ରୁଦ୍ରମୃତ୍ୟୁଞ୍ଜୟସ୍ତୋତ୍ରମ୍
🟣ରୁଦ୍ରମୃତ୍ୟୁଞ୍ଜୟସ୍ତୋତ୍ରମ୍ 🟣
➖➖➖➖➖➖➖➖
(ଶ୍ରୀରୁଦ୍ରୟାମଳେ ଉତ୍ତରତନ୍ତ୍ରେ)
( ଅଥାଷ୍ଟଚତ୍ତ୍ଵାରିଂଶଃ ପଟଳଃ)
ଆନନ୍ଦଭୈରଵ ଉଵାଚ
ଶ୍ରୁତଂ ଚ ସାଧନଂ ପୁଣ୍ୟଂ ମହାରୁଦ୍ରସ୍ୟ ସୁନ୍ଦରି ।
ମଣିପୂରେ ପ୍ରକାଶଞ୍ଚ କଥିତଂ ଜ୍ଞାନନିର୍ଣୟମ୍ ॥ ୪୮-୧॥
ଅକସ୍ମାତ୍ ସିଦ୍ଧିସମ୍ପତ୍ତିଂ ନୁତିଂ ଵଦ ମହାପ୍ରିୟାମ୍ ।
ୟସ୍ୟ ଶ୍ରଵଣମାତ୍ରେଣ ପାଠେନ ୟୋଗିନୀଵଶମ୍ ॥ ୪୮-୨॥
ଶ୍ରୀଆନନ୍ଦଭୈରଵୀ ଉଵାଚ
ପରମାନନ୍ଦଦେଵେଶ ୟୋଗାନାମଧିପ ପ୍ରଭୋ ।
ସ୍ତୋତ୍ରଂ ରୁଦ୍ରସ୍ୟ ଵକ୍ଷ୍ୟାମି ସାରାତ୍ସାରଂ ପରାତ୍ପରମ୍ ॥ ୪୮-୩॥
ୟଜ୍ଜ୍ଞାତ୍ଵା ୟୋଗିନଃ ସର୍ଵେ ଷଟ୍ଚକ୍ରପରିଭେଦକାଃ ।
ଆକାଶଗାମିନଃ ସର୍ଵେର୍ସ୍ଵଗମୋକ୍ଷାଭିଲାଷୁକାଃ ॥ ୪୮-୪॥
ମହାଦେଵସମାଃ ସର୍ଵେ ଦେଵାଶ୍ଚ ସ୍ଵର୍ଗଭୋଗିନଃ ।
ସର୍ଵରକ୍ଷାକରଂ ସ୍ତୋତ୍ରଂ ୟେ ପଠନ୍ତି ନିରନ୍ତରମ୍ ॥ ୪୮-୫॥
ତେ ୟାନ୍ତି ବ୍ରହ୍ମସଦନଂ ସିଦ୍ଧମୁଖ୍ୟା ମହୀତଲେ ॥ ୪୮-୬॥
ଓଁ ଭଜାମି ଶମ୍ଭୁଂ ସୁଖମୋକ୍ଷହେତୁଂ
ରୁଦ୍ରଂ ମହାଶକ୍ତିସମାକୁଲାଙ୍ଗମ୍ ।
ରୌଦ୍ରାତ୍ମକଂ ଚାରୁହିମାଂଶୁଶେଖରମ୍ ।
କାଲଂ ଗଣେଶଂ ସୁମୁଖାୟ ଶଙ୍କରମ୍ ॥ ୪୮-୭॥
ମୃତ୍ୟୁଞ୍ଜୟଂ ଜୀଵନରକ୍ଷକଂ ପରଂ
ଶିଵଂ ପରବ୍ରହ୍ମଶରୀରମଙ୍ଗଲମ୍ ।
ହିମାଂଶୁକୋଟିଚ୍ଛଵିମାଦଧାନଂ
ଭଜାମି ପଦ୍ମଦ୍ଵୟମଧ୍ୟସଂସ୍ଥିତମ୍ ॥ ୪୮-୮॥
ସର୍ଵାତ୍ମକଂ କାମଵିନାଶମୂଲମ୍ ।
ତଂ ଚନ୍ଦ୍ରଚୂଡଂ ମଣିପୂରଵାସିନମ୍ ।
ଚତୁର୍ଭୁଜଂ ଜ୍ଞାନସମୁଦ୍ରୟାଢ୍ୟଂ
ପାଶଂ ମୃଗାକ୍ଷଂ ଗୁଣସୂତ୍ରଵ୍ୟାପ୍ତମ୍ ॥ ୪୮-୯॥
ଧରାମୟଂ ତେଜସମିନ୍ଦୁକୋଟିଂ
ଵାୟୁଂ ଜଲେଶଂ ଗଗନାତ୍ମକଂ ପରମ୍ ।
ଭଜାମି ରୁଦ୍ରଂ କୁଲଲାକିନୀଗତଂ
ସର୍ଵାଙ୍ଗୟୋଗଂ ଜୟଦଂ ସୁରେଶ୍ଵରମ୍ ॥ ୪୮-୧୦॥
ଶୁକ୍ରଂ ମହାଭୀମନୟଂ ପୁରାଣଂ
ପ୍ରାଣାତ୍ମକଂ ଵ୍ୟାଧିଵିନାଶମୂଲମ୍ ।
ୟଜ୍ଞାତ୍ମକଂ କାମନିଵାରଣଂ ଗୁରୁଂ
ଭଜାମି ଵିଶ୍ଵେଶ୍ଵରଶଙ୍କରଂ ଶିଵମ୍ ॥ ୪୮-୧୧॥
ଵେଦାଗମାନାମତିମୂଲଦେଶଂ
ତଦୁଦ୍ଭଵଂ ଭଦ୍ରହିତଂ ପରାପରମ୍ ।
କାଲାନ୍ତକଂ ବ୍ରହ୍ମସନାତନପ୍ରିୟଂ
ଭଜାମି ଶମ୍ଭୁଂ ଗଗନାଦିରୂଢମ୍ ॥ ୪୮-୧୨॥
ଶିଵାଗମଂ ଶବ୍ଦମୟଂ ଵିଭାକରଂ
ଭାସ୍ଵତ୍ପ୍ରଚଣ୍ଡାନଲଵିଗ୍ରହଂ ଗ୍ରହମ୍ ।
ଗ୍ରହସ୍ଥିତଂ ଜ୍ଞାନକରଂ କରାଲଂ
ଭଜାମି ଶମ୍ଭୁଂ ପ୍ରକୃତୀଶ୍ଵରଂ ହରମ୍ ॥ ୪୮-୧୩॥
ଛାୟାକରଂ ୟୋଗକରଂ ସୁଖେନ୍ଦ୍ରଂ
ମତ୍ତଂ ମହାମତ୍ତକୁଲୋତ୍ସଵାଢ୍ୟମ୍ ।
ୟୋଗେଶ୍ଵରଂ ୟୋଗକଲାନିଧିଂ ଵିଧିମ୍ ।
ଵିଧାନଵକ୍ତାରମହଂ ଭଜାମି ॥ ୪୮-୧୪॥
ହେମାଚଲାଲଙ୍କୃତଶୁଦ୍ଧଵେଶଂ
ଵରାଭୟାଦାନନିଦାନମୂଲମ୍ ।
ଭଜାମି କାନ୍ତଂ ଵନମାଲଶୋଭିତଂ
ଚାମୂଲପଦ୍ମାମଲମାଲିନଂ କୁଲମ୍ ॥ ୪୮-୧୫॥
ସ୍ଵୟଂ ପୁରାଣଂ ପୁରୁଷେଶ୍ଵରଂ ଗୁରୁଂ
ମିଥ୍ୟାଭୟାହ୍ଲାଦଵିଭାଵିନଂ ଭଜେ ।
ଭାଵପ୍ରିୟଂ ପ୍ରେମକଲାଧରଂ ଶିଵଂ
ଗିରୀଶ୍ଵରଂ ଚାରୁପଦାରଵିନ୍ଦମ୍ ॥ ୪୮-୧୬॥
ଧ୍ୟାନପ୍ରିୟଂ ଜ୍ଞାନଗଭୀରୟୋଗଂ
ଭାଗ୍ୟାସ୍ପଦଂ ଭାଗ୍ୟସମଂ ସୁଲକ୍ଷଣମ୍ ।
ଶୂଲାୟୁଧଂ ଶୂଲଵିଭୂଷିତାଙ୍ଗଂ
ଶ୍ରୀଶଙ୍କରଂ ମୋକ୍ଷଫଲକ୍ରିୟଂ ଭଜେ ॥ ୪୮-୧୭॥
ନମୋ ନମୋ ରୁଦ୍ରଗଣେଭ୍ୟ ଏଵଂ
ମୃତ୍ୟୁଞ୍ଜୟେଭ୍ୟଃ କୁଲଚଞ୍ଚଲେଭ୍ୟଃ ।
ଶକ୍ତିପ୍ରିୟେଭ୍ୟୋ ଵିଜୟାଦିଭୂତୟେ
ଶିଵାୟ ଧନ୍ୟାୟ ନମୋ ନମସ୍ତେ ॥ ୪୮-୧୮॥
ବାହ୍ୟଂ ତ୍ରିଶୂଲଂ ଵରସୂକ୍ଷ୍ମଭାଵଂ
ଵିଶାଲନେତ୍ରଂ ତନୁମଧ୍ୟଗାମିନମ୍ ।
ମହାଵିପଦ୍ ଦୁଃଖଵିନାଶବୀଜଂ
ପ୍ରଜ୍ଞାଦୟାକାନ୍ତିକରଂ ଭଜାମି ॥ ୪୮-୧୯॥
ପୁରାନ୍ତକଂ ପୂର୍ଣଶରୀରିଣଂ ଗୁରୁଂ
ସ୍ମରାରିମାଦ୍ୟଂ ନିଜତର୍କମାର୍ଗମ୍ ।
ଅନାଦିଦେଵଂ ଦିଵି ଦୋଷଘାତିନଂ
ଭଜାମି ପଞ୍ଚାକ୍ଷରପୁଣ୍ୟସାଧନମ୍ ॥ ୪୮-୨୦॥
ଦିଗଗ୍ବରଂ ପଦ୍ମମୁଖଂ କରସ୍ଥଂ
ସ୍ଥିତିକ୍ରିୟାୟୋଗନିୟୋଜନଂ ଭଵମ୍ ।
ଭାଵାତ୍ମକଂ ଭଦ୍ରଶରୀରିଣଂ ଶିଵଂ
ଭଜାମି ପଞ୍ଚାନନମର୍କଵର୍ଣମ୍ ॥ ୪୮-୨୧॥
ମାୟାମୟଂ ପଙ୍କଜଦାମକୋମଲଂ
ଦିଗ୍ଵ୍ୟାପିନଂ ଦଣ୍ଡଧରଂ ହରେଶ୍ଵରମ୍ ।
ତ୍ରିପକ୍ଷକଂ ତ୍ର୍ୟକ୍ଷରବୀଜଭାଵଂ
ତ୍ରିପଦ୍ମମୂଲଂ ତ୍ରିଗୁଣଂ ଭଜାମି ॥ ୪୮-୨୨॥
ଵିଦ୍ୟାଧରଂ ଵେଦଵିଧାନକାର୍ୟଂ
କାୟାଗତଂ ନୀତନିନାଦତୋଷମ୍ ।
ନିତ୍ୟଂ ଚତୁର୍ଵର୍ଗଫଲାଦିମୂଲଂ
ଵେଦାଦିସୂତ୍ରଂ ପ୍ରଣମାମି ୟୋଗମ୍ ॥ ୪୮-୨୩॥
ଵେଦାନ୍ତଵେଦ୍ୟଂ କୁଲଶାସ୍ତ୍ରଵିଜ୍ଞଂ
କ୍ରିୟାମୟଂ ୟୋଗସ୍ଵଧର୍ମଦାନମ୍ ।
ଭକ୍ତେଶ୍ଵରଂ ଭକ୍ତିପରାୟଣଂ ଵରଂ
ଭକ୍ତଂ ମହାବୁଦ୍ଧିକରଂ ଭଜାମ୍ୟହମ୍ ॥ ୪୮-୨୪॥
ଗତାଗତଂ ଗମ୍ୟମଗମ୍ୟଭାଵଂ
ସମୁଲ୍ଲସତ୍କୋଟିକଲାଵତଂସମ୍ ।
ଭାଵାତ୍ମକଂ ଭାଵମୟଂ ସୁଖାସୁଖଂ
ଭଜାମି ଭର୍ଗଂ ପ୍ରଥମାରୁଣପ୍ରଭମ୍ ॥ ୪୮-୨୫॥
ବିନ୍ଦୁସ୍ଵରୂପଂ ପରିଵାଦଵାଦିନଂ
ମଧ୍ୟାହ୍ନସୂର୍ୟାୟୁତସନ୍ନିଭଂ ନଵମ୍ ।
ଵିଭୂତିଦାନଂ ନିଜଦାନଦାନଂ
ଦାନାତ୍ମକଂ ତଂ ପ୍ରଣମାମି ଦେଵମ୍ ॥ ୪୮-୨୬॥
କୁମ୍ଭାପହଂ ଶତ୍ରୁନିକୁମ୍ଭଘାତିନଂ
ଦୈତ୍ୟାରିମୀଶଂ କୁଲକାମିନୀଶମ୍ ।
ପ୍ରୀତ୍ୟାନ୍ଵିତଂ ଚିନ୍ତ୍ୟମଚିନ୍ତ୍ୟଭାଵଂ
ପ୍ରଭାକରାହ୍ଲାଦମହଂ ଭଜାମି ॥ ୪୮-୨୭॥
ତ୍ରିମୂର୍ତିମୂଲାୟ ଜୟାୟ ଶମ୍ଭଵେ
ହିତାୟ ଲୋକସ୍ୟ ଵପୁର୍ଧରାୟ ।
ନମୋ ଭୟାଚ୍ଛିନ୍ନଵିଘାତିନେ ପତେ
ନମୋ ନମୋ ଵିଶ୍ଵଶରୀରଧାରିଣେ ॥ ୪୮-୨୮॥
ତପଃଫଲାୟ ପ୍ରକୃତିଗ୍ରହାୟ
ଗୁଣାତ୍ମନେ ସିଦ୍ଧିକରାୟ ୟୋଗିନେ ।
ନମଃ ପ୍ରସିଦ୍ଧାୟ ଦୟାତୁରାୟ
ଵାଞ୍ଛାଫଲୋତ୍ସାହଵିଵର୍ଧନାୟ ତେ ॥ ୪୮-୨୯॥
ଶିଵମମରମହାନ୍ତଂ ପୂର୍ଣୟୋଗାଶ୍ରୟନ୍ତଂ
ଧରଣିଧରକରାବ୍ଜୈର୍ଵର୍ଧମାନଂ ତ୍ରିସର୍ଗମ୍ ।
ଵିସମ ମରଣଘାତଂ ମୃତ୍ୟୁପୂଜ୍ୟଂ ଜନେଶଂ
ଵିଧିଗଣପତିସେଵ୍ୟଂ ପୂଜୟେ ଭାଵୟାମି ॥ ୪୮-୩୦॥
ଏତତ୍ସ୍ତୋତ୍ରଂ ପଠେଦ୍ ଵିଦ୍ଵାନ୍ ମୁନିର୍ୟୋଗପରାୟଣଃ ।
ନିତ୍ୟଂ ଜଗନ୍ନାଥଗୁରୁଂ ଭାଵୟିତ୍ଵା ପୁନଃ ପୁନଃ ॥ ୪୮-୩୧॥
ମଣିପୂରେ ଵାୟୁନିଷ୍ଠୋ ନିତ୍ୟଂ ସ୍ତୋତ୍ରଂ ପଠେଦ୍ ୟଦି ।
ଜୀଵନ୍ମୁକ୍ତଶ୍ଚ ଦେହାନ୍ତେ ପରଂ ନିର୍ଵାଣମାପ୍ନୁୟାତ୍ ॥ ୪୮-୩୨॥
ଇତି ଶ୍ରୀରୁଦ୍ରୟାମଲେ ଉତ୍ତରତନ୍ତ୍ରେ ମହାତନ୍ତ୍ରୋଦ୍ଦୀପନେ ରୁଦ୍ରମୃତ୍ୟୁଞ୍ଜୟସ୍ତଵନଂ
ନାମ ଅଷ୍ଟଚତ୍ଵାରିଂଶତ୍ତମଃ ପଟଲଃ ॥ ୪୮॥
Comments
Post a Comment