ଶ୍ରୀବଟୁକଭୈରଵବ୍ରହ୍ମକଵଚମ୍

 🌹॥ ଶ୍ରୀବଟୁକଭୈରଵବ୍ରହ୍ମକଵଚମ୍ ॥🌹

 ॥ ଶ୍ରୀଗଣେଶାୟ ନମଃ ॥

॥ ଶ୍ରୀଉମାମହେଶ୍ଵରାଭ୍ୟାଂ ନମଃ ॥

॥ ଶ୍ରୀଗୁରଵେ ନମଃ ॥

॥ ଶ୍ରୀଭୈରଵାୟ ନମଃ ॥

ଶ୍ରୀଦେଵ୍ୟୁଵାଚ ।

ଭଗଵନ୍ସର୍ଵଵେତ୍ତା ତ୍ଵଂ ଦେଵାନାଂ ପ୍ରୀତିଦାୟକମ୍ ।

ଭୈରଵଂ କଵଚଂ ବ୍ରୂହି ୟଦି ଚାସ୍ତି କୃପା ମୟି ॥ ୧॥

ପ୍ରାଣତ୍ୟାଗଂ କରିଷ୍ୟାମି ୟଦି ନୋ କଥୟିଷ୍ୟସି ।

ସତ୍ୟଂ ସତ୍ୟଂ ପୁନଃ ସତ୍ୟଂ ସତ୍ୟମେଵ ନ ସଂଶୟଃ ॥ ୨॥

ଇତ୍ଥଂ ଦେଵ୍ୟା ଵଚଃ ଶ୍ରୁତ୍ଵା ପ୍ରହସ୍ୟାତିଶୟଂ ପ୍ରଭୁଃ ।

ଉଵାଚ ଵଚନଂ ତତ୍ର ଦେଵଦେଵୋ ମହେଶ୍ଵରଃ ॥ ୩॥

ଈଶ୍ଵର ଉଵାଚ ।

ବାଟୁକଂ କଵଚଂ ଦିଵ୍ୟଂ ଶୃଣୁ ମତ୍ପ୍ରାଣଵଲ୍ଲଭେ ।

ଚଣ୍ଡିକାତନ୍ତ୍ରସର୍ଵସ୍ଵଂ ବଟୁକସ୍ୟ ଵିଶେଷତଃ ॥ ୪॥

ତତ୍ର ମନ୍ତ୍ରାଦ୍ୟକ୍ଷରଂ ତୁ ଵାସୁଦେଵସ୍ଵରୂପକମ୍ ।

ଶଙ୍ଖଵର୍ଣଦ୍ଵୟୋ ବ୍ରହ୍ମା ବଟୁକଶ୍ଚନ୍ଦ୍ରଶେଖରଃ ॥ ୫॥

ଆପଦୁଦ୍ଧାରଣୋ ଦେଵୋ ଭୈରଵଃ ପରିକୀର୍ତିତଃ ।

ପ୍ରଵକ୍ଷ୍ୟାମି ସମାସେନ ଚତୁର୍ଵର୍ଗପ୍ରସିଦ୍ଧୟେ ॥ ୬॥

ପ୍ରଣଵଃ କାମଦଂ ଵିଦ୍ୟା ଲଜ୍ଜାବୀଜଂ ଚ ସିଦ୍ଧିଦମ୍ ।

ବଟୁକାୟେତି ଵିଜ୍ଞେୟଂ ମହାପାତକନାଶନମ୍ ॥ ୭॥

ଆପଦୁଦ୍ଧାରଣାୟେତି ତ୍ଵାପଦୁଦ୍ଧାରଣଂ ନୃଣାମ୍ ।

କୁରୁଦ୍ଵୟଂ ମହେଶାନି ମୋହନେ ପରିକୀର୍ତିତମ୍ ॥ ୮॥

ବଟୁକାୟ ମହେଶାନି ସ୍ତମ୍ଭନେ ପରିକୀର୍ତିତମ୍ ।

ଲଜ୍ଜାବୀଜଂ ତଥା ଵିଦ୍ୟାନ୍ମୁକ୍ତିଦଂ ପରିକୀର୍ତିତମ୍ ॥ ୯॥

ଦ୍ଵାଵିଂଶତ୍ୟକ୍ଷରୋ ମନ୍ତ୍ରଃ କ୍ରମେଣ ଜଗଦୀଶ୍ଵରି ।

॥ ଓଂ ହ୍ରୀଂ ବଟୁକାୟ ଆପଦୁଦ୍ଧାରଣାୟ କୁରୁ କୁରୁ ବଟୁକାୟ ହ୍ରୀମ୍ ॥

ଇସକା ଜପ କଵଚ ସେ ପହଲେ ଔର ବାଦ ମେଂ ୧୧ ୟା ୨୧ ବାର କରେଂ ॥

ଓଂ ଅସ୍ୟ ଶ୍ରୀବଟୁକଭୈରଵବ୍ରହ୍ମକଵଚସ୍ୟ ଭୈରଵ ଋଷିଃ ।

ଅନୁଷ୍ଟୁପ୍ ଛନ୍ଦଃ । ଶ୍ରୀବଟୁକଭୈରଵୋ ଦେଵତା ।

ମମ ଶ୍ରୀବଟୁକଭୈରଵପ୍ରସାଦସିଦ୍ଧୟର୍ଥେ ଜପେ ଵିନିୟୋଗଃ ॥

ଅଥ ପାଠଃ ।

ଓଂ ପାତୁ ନିତ୍ୟଂ ଶିରସି ପାତୁ ହ୍ରୀଂ କଣ୍ଠଦେଶକେ ॥ ୧୦॥

ବଟୁକାୟ ପାତୁ ନାଭୌ ଚାପଦୁଦ୍ଧାରଣାୟ ଚ ॥

କୁରୁଦ୍ଵୟଂ ଲିଙ୍ଗମୂଲେ ତ୍ଵାଧାରେ ଵଟୁକାୟ ଚ ॥ ୧୧॥

ସର୍ଵଦା ପାତୁ ହ୍ରୀଂ ବୀଜଂ ବାହ୍ଵୋର୍ୟୁଗଲମେଵ ଚ ॥

ଷଡଙ୍ଗସହିତୋ ଦେଵୋ ନିତ୍ୟଂ ରକ୍ଷତୁ ଭୈରଵଃ ॥ ୧୨॥

ଓଂ ହ୍ରୀଂ ବଟୁକାୟ ସତତଂ ସର୍ଵାଙ୍ଗଂ ମମ ସର୍ଵଦା ॥

ଓଂ ହ୍ରୀଂ ପାଦୌ ମହାକାଲଃ ପାତୁ ଵୀରାସନୋ ହୃଦି ॥ ୧୩॥

ଓଂ ହ୍ରୀଂ କାଲଃ ଶିରଃ ପାତୁ କଣ୍ଠଦେଶେ ତୁ ଭୈରଵଃ ।

ଗଣରାଟ୍ ପାତୁ ଜିହ୍ଵାୟାମଷ୍ଟାଭିଃ ଶକ୍ତିଭିଃ ସହ ॥ ୧୪॥

ଓଂ ହ୍ରୀଂ ଦଣ୍ଡପାଣିର୍ଗୁହ୍ୟମୂଲେ ଭୈରଵୀସହିତସ୍ତଥା ।

ଓଂ ହ୍ରୀଂ ଵିଶ୍ଵନାଥଃ ସଦା ପାତୁ ସର୍ଵାଙ୍ଗଂ ମମ ସର୍ଵଦଃ ॥ ୧୫॥

ଓଂ ହ୍ରୀଂ ଅନ୍ନପୂର୍ଣା ସଦା ପାତୁ ଚାଂସୌ ରକ୍ଷତୁ ଚଣ୍ଡିକା ।

ଆସିତାଙ୍ଗଃ ଶିରଃ ପାତୁ ଲଲାଟଂ ରୁରୁଭୈରଵଃ ॥ ୧୬॥

ଓଂ ହ୍ରୀଂ ଚଣ୍ଡଭୈରଵଃ ପାତୁ ଵକ୍ତ୍ରଂ କଣ୍ଠଂ ଶ୍ରୀକ୍ରୋଧଭୈରଵଃ ।

ଉନ୍ମତ୍ତଭୈରଵଃ ପାତୁ ହୃଦୟଂ ମମ ସର୍ଵଦା ॥ ୧୭॥

ଓଂ ହ୍ରୀଂ ନାଭିଦେଶେ କପାଲୀ ଚ ଲିଙ୍ଗେ ଭୀଷଣଭୈରଵଃ ।

ସଂହାରଭୈରଵଃ ପାତୁ ମୂଲାଧାରଂ ଚ ସର୍ଵଦା ॥ ୧୮॥

ଓଂ ହ୍ରୀଂ ବାହୁୟୁଗ୍ମଂ ସଦା ପାତୁ ଭୈରଵୋ ମମ କେଵଲମ୍ ।

ହଂସବୀଜଂ ପାତୁ ହୃଦି ସୋଽହଂ ରକ୍ଷତୁ ପାଦୟୋଃ ॥ ୧୯॥

ଓଂ ହ୍ରୀଂ ପ୍ରାଣାପାନୌ ସମାନଂ ଚ ଉଦାନଂ ଵ୍ୟାନମେଵ ଚ ।

ରକ୍ଷତୁ ଦ୍ଵାରମୂଲେ ଚ ଦଶଦିକ୍ଷୁ ସମନ୍ତତଃ ॥ ୨୦॥

ଓଂ ହ୍ରୀଂ ପ୍ରଣଵଂ ପାତୁ ସର୍ଵାଙ୍ଗଂ ଲଜ୍ଜାବୀଜଂ ମହାଭୟେ ।

ଇତି ଶ୍ରୀବ୍ରହ୍ମକଵଚଂ ଭୈରଵସ୍ୟ ପ୍ରକୀର୍ତିତମ୍ ॥ ୨୧॥

ଚତୁଵର୍ଗପ୍ରଦଂ ନିତ୍ୟଂ ସ୍ଵୟଂ ଦେଵପ୍ରକାଶିତମ୍ । (ଚତୁଵର୍ଗଫଲପ୍ରଦଂ)

ୟଃ ପଠେଚ୍ଛୃଣୁୟାନ୍ନିତ୍ୟଂ ଧାରୟେତ୍କଵଚୋତ୍ତମମ୍ ॥ ୨୨॥

ସଦାନନ୍ଦମୟୋ ଭୂତ୍ଵା ଲଭତେ ପରମଂ ପଦମ୍ ।

ୟଃ ଇଦଂ କଵଚଂ ଦେଵି ଚିନ୍ତୟେନ୍ମନ୍ମୁଖୋଦିତମ୍ ॥ ୨୩॥

କୋଟିଜନ୍ମାର୍ଜିତଂ ପାପଂ ତସ୍ୟ ନଶ୍ୟତି ତତ୍କ୍ଷଣାତ୍ ।

ଜଲମଧ୍ୟେଽଗ୍ନିମଧ୍ୟେ ଵା ଦୁର୍ଗ୍ରହେ ଶତ୍ରୁସଙ୍କଟେ ॥ ୨୪॥

କଵଚସ୍ମରଣାଦ୍ଦେଵି ସର୍ଵତ୍ର ଵିଜୟୀ ଭଵେତ୍ ।

ଭକ୍ତିୟୁକ୍ତେନ ମନସା କଵଚଂ ପୂଜୟେଦ୍ୟଦି ॥ ୨୫॥

କାମତୁଲ୍ୟସ୍ତୁ ନାରୀଣାଂ ରିପୂଣାଂ ଚ ୟମୋପମଃ ।

ତସ୍ୟ ପାଦାମ୍ବୁଜଦ୍ଵନ୍ଦଂ ରାଜ୍ଞାଂ ମୁକୁଟଭୂଷଣମ୍ ॥ ୨୬॥

ତସ୍ୟ ଭୂତିଂ ଵିଲୋକ୍ୟୈଵ କୁବେରୋଽପି ତିରସ୍କୃତଃ ।

ୟସ୍ୟ ଵିଜ୍ଞାନମାତ୍ରେଣ ମନ୍ତ୍ରସିଦ୍ଧିର୍ନ ସଂଶୟଃ ॥ ୨୭॥

ଇଦଂ କଵଚମଜ୍ଞାତ୍ଵା ୟୋ ଜପେଦ୍ବଟୁକଂ ନରଃ ।

ନ ଚାପ୍ନୋତି ଫଲଂ ତସ୍ୟ ପରଂ ନରକମାପ୍ନୁୟାତ୍ ॥ ୨୮॥

ମନ୍ଵନ୍ତରତ୍ରୟଂ ସ୍ଥିତ୍ଵା ତିର୍ୟଗ୍ୟୋନିଷୁ ଜାୟତେ ।

ଇହ ଲୋକେ ମହାରୋଗୀ ଦାରିଦ୍ର୍ୟେଣାତିପୀଡିତଃ ॥ ୨୯॥

ଶତ୍ରୂଣାଂ ଵଶଗୋ ଭୂତ୍ଵା କରପାତ୍ରୀ ଭଵେଜ୍ଜଡଃ ।

ଦେୟଂ ପୁତ୍ରାୟ ଶିଷ୍ୟାୟ ଶାନ୍ତାୟ ପ୍ରିୟଵାଦିନେ ॥ ୩୦॥

କାର୍ପଣ୍ୟରହିତାୟାଲଂ ବଟୁକଭକ୍ତିରତାୟ ଚ ।

ୟୋଽପରାଗେ ପ୍ରଦାତା ଵୈ ତସ୍ୟ ସ୍ୟାଦତିସତ୍ଵରମ୍ ॥ ୩୧॥

ଆୟୁର୍ଵିଦ୍ୟା ୟଶୋ ଧର୍ମଂ ବଲଂ ଚୈଵ ନ ସଂଶୟଃ ।

ଇତି ତେ କଥିତଂ ଦେଵି ଗୋପନୀୟଂ ସ୍ଵୟୋନିଵତ୍ ॥ ୩୨॥

॥ ଇତି ଶ୍ରୀରୁଦ୍ରୟାମଲୋକ୍ତଂ ଶ୍ରୀବଟୁକଭୈରଵବ୍ରହ୍ମକଵଚଂ ସମ୍ପୂର୍ଣମ୍ ॥