ମହାମାରୀସ୍ତୋତ୍ରମ୍

 🟣ମହାମାରୀସ୍ତୋତ୍ରମ୍ 🟣

➖➖➖➖➖➖➖➖➖➖

     🥀   ( ଶ୍ରୀଦେଵୀପୁରାଣେ )🥀

ଦେଵ୍ୟୁଵାଚ ।

ପୁରା ବ୍ରହ୍ମା ତୁ ମାଂ ସୃଷ୍ଟ୍ଵା ସମାହୂୟାବ୍ରଵୀଦ୍ଵଚଃ ।

ଶୃଣୁ ମେ ଵଚନଂ ପୁତ୍ରି କୁରୁଷ୍ଵାଦ୍ୟାଥ ସାଦରମ୍ ॥ ୧॥

କଲୌ ଜନା ଦୁରାଚାରା ରାଜାନଶ୍ଚ ତଥାଵିଧାଃ ।

ଅତୋ ଗତ୍ଵା ଭୁଵଂ ଦେଵି ମୃତ୍ୟୁରୂପା ଭଵାଶୁ ଚ ॥ ୨॥

ପରଦ୍ରଵ୍ୟାପହର୍ତାରଃ ପରସ୍ତ୍ରୀନିରତାଃ ସଦା ।

ଦେଵସ୍ଵହରଣେ ସକ୍ତା ବ୍ରହ୍ମସ୍ଵହରଣେ ନୃପ ॥ ୩॥

ତେଷାଂ ଦୋଷଵଶାତ୍ତ୍ଵଂ ତୁ ଜନାନ୍ ସଂହର ନିତ୍ୟଶଃ ।

ବ୍ରହ୍ମଣୈଵଂ ସମାଦିଷ୍ଟା ଇନ୍ଦ୍ରାଦ୍ୟୈଃ ସୁରସତ୍ତମୈଃ ॥ ୪॥

ଭୁଵଂ ସମାଗତା ତତ୍ର ଜନାଞ୍ଜ୍ଞାତ୍ଵାଥ ପାପିନଃ ।

ରାଜ୍ଞୋ ଦୋଷାନ୍ପୁରସ୍କୃତ୍ୟ ଗ୍ରାମେ ଗ୍ରାମେ ଵସାମ୍ୟହମ୍ ।

ତତ୍ରାପି ପାପିନୋ ହତ୍ଵା ପୁନର୍ଗ୍ରାମାନ୍ତରଂ ଭଜେ ॥ ୫॥

ଏଵଂ ଦେଶାନଟିତ୍ଵାଽହଂ ସର୍ଵାନ୍ସଂହୃତ୍ୟ ଵୈ ଜନାନ୍ ।

ପୁନର୍ଗଚ୍ଛାମି ସଦନଂ ବ୍ରହ୍ମଣଃ ପରମେଷ୍ଠିନଃ ॥ ୬॥

ଏଵଂ ମଦାଗମଂ ଜ୍ଞାତ୍ଵା ବୁଦ୍ଧିମାନ୍ପୁଣ୍ୟକୃନ୍ନରଃ ।

ଵିଚାର୍ୟ ଶାସ୍ତ୍ରତୋ ନିତ୍ୟଂ ଜାଗରୂକୋ ଭଵେଦଲମ୍ ॥ ୭॥

ପତନ୍ତି ମୂଷିକା ୟତ୍ର ନୃତ୍ୟନ୍ତି ଵିରମନ୍ତି ଚ ।

ତଦ୍ଗୃହଂ ତତ୍କ୍ଷଣଂ ତ୍ୟକ୍ତ୍ଵା ସକୁଟୁମ୍ବୋ ଵନେ ଵିଶେତ୍ ॥ ୮॥

ତତ୍ର ଶାନ୍ତିଂ ପ୍ରକୁର୍ଵୀତ ମହାଦେଵ୍ୟାଃ ସମୀରିତାମ୍ ।

ଜପିତ୍ଵା ଚ ମହାମନ୍ତ୍ରଂ ପଠିତ୍ଵା ସ୍ତୋତ୍ରମୁତ୍ତମମ୍ ॥ ୯॥

ଓଁ ନମୋ ଭଗଵତି ମହାମାରିକେ ମୃତ୍ୟୁରୂପିଣି ସକୁଟୁମ୍ବଂ ମାମଵ ସ୍ଵାହା ।''

ଵନେ ଜଲାଶୟଂ ଗତ୍ଵା ଊର୍ଧ୍ଵବାହୁରଧୋମୁଖଃ ।

ଵୀରାସନେ ଚୋପଵିଶ୍ୟ ଜପେନ୍ମନ୍ତ୍ରଂ ସହସ୍ରଶଃ ॥ ୧୦॥

ସଂସ୍ଥାପ୍ୟ ପ୍ରତିମାଂ ତତ୍ର ଧୂପଦୀପୋପହାରକୈଃ ।

ସମ୍ପୂଜ୍ୟ ଵିଧିଵତ୍ପଶ୍ଚାଜ୍ଜୁହୁୟାତ୍ପ୍ରତ୍ୟହଂ ନରଃ ॥ ୧୧॥

ହରିଦ୍ରାଚୂର୍ଣମିଶ୍ରେଣ ଚିତ୍ରାନ୍ନେନୈଵ ସଂୟୁତଃ ।

ସମିଦ୍ଭିଃ ଖଦିରୈର୍ଭକ୍ତ୍ୟା ବ୍ରାହ୍ମଣୈଶ୍ଚ ସମନ୍ଵିତଃ ॥ ୧୨॥

ପତ୍ନୀପୁତ୍ରାତ୍ମଭୃତ୍ୟୈଶ୍ଚ ଜୁହୁୟାଦନୁଵାସରମ୍ ।

ହୋମାନ୍ତେ ଚ ପଠେନ୍ନିତ୍ୟଂ ସ୍ତୋତ୍ରମେତଜ୍ଜିତେନ୍ଦ୍ରିୟଃ ॥ ୧୩॥

ନମୋ ଦେଵି ମହାଦେଵି ସର୍ଵଶୋକଵଶଙ୍କରୀ ।

ସର୍ଵଦା ସର୍ଵତୋ ମହ୍ୟଂ କୃପାଂ କୁରୁ କୃପାମୟି ॥ ୧୪॥

ମେରୌ କୈଲାସଶିଖରେ ହେମାଦ୍ରୌ ଗନ୍ଧମାଦନେ ।

ନିତ୍ୟପ୍ରିୟକୃତାଵାସେ ମଦ୍ୟମାଂସବଲିପ୍ରିୟେ ॥ ୧୫॥

ମହାସୈନ୍ୟସମାୟୁକ୍ତେ ସର୍ଵପ୍ରାଣଵିହିଂସକେ ।

ସର୍ଵାଭିଚାରିକେ ଦେଵି ସର୍ଵଂ ତ୍ଵଂ ରକ୍ଷ ସର୍ଵଦା ॥ ୧୬॥

ୟତ୍ର କୁତ୍ର ସ୍ଥଲେ ଵାପି ୟସ୍ମିନ୍ କସ୍ମିନ୍ ୟଦା ତଦା ।

ରକ୍ଷ ମାଂ ରକ୍ଷ ମାଂ ଦେଵି ସପୁତ୍ରପଶୁଭୃତ୍ୟକମ୍ ॥ ୧୭॥

ମାଙ୍ଗଲ୍ୟଂ ମଙ୍ଗଲଂ ଦେହି ମହାମଙ୍ଗଲଦାୟିନି ।

ଲୋକାନାମଭୟେ ସର୍ଵମଙ୍ଗଲେ ମଙ୍ଗଲପ୍ରିୟେ ॥ ୧୮॥

ଇତି ସ୍ତୁତ୍ଵା ମହାଦେଵୀଂ ଭକ୍ତିଭାଵେନ ସଂୟୁତଃ ।

ଭୁଞ୍ଜୀତ ସ୍ଵଜନୈର୍ୟୁକ୍ତୋ ଦେଵୀଂ ତାଂ ମନସା ସ୍ମରନ୍ ॥ ୧୯॥

ୟଦା ସ୍ଵଗୃହଚୈତ୍ୟେଷୁ ଧ୍ଵାଙ୍କ୍ଷରାଵୋ ଭଵିଷ୍ୟତି ।

କାକଶାନ୍ତିଂ ତତଃ କୃତ୍ଵା ଗୃହଂ ଗନ୍ତୁମୁପକ୍ରମେତ୍ ॥ ୨୦॥

ସୁମୁହୂର୍ତେ ସୁନକ୍ଷତ୍ରେ ସ୍ଵଲଙ୍କୃତ୍ୟ ତତୋ ଗୃହମ୍ ।

ବ୍ରାହ୍ମଣୈର୍ବନ୍ଧୁଭିଃ ସାର୍ଧଂ ସଂଵିଶେଦ୍ଗୃହମାତ୍ମନଃ ॥ ୨୧॥

ସ୍ଵସ୍ତିଵାଚନଵିପ୍ରେଭ୍ୟଃ ଶାନ୍ତିସୂକ୍ତୋକ୍ତିପୂର୍ଵକମ୍ ।

ଦକ୍ଷିଣାଂ ଚ ହିରଣ୍ୟାଦିଂ ଦଦ୍ୟାଚ୍ଛାଟ୍ୟଵିଵର୍ଜିତଃ ॥ ୨୨॥

ବ୍ରାହ୍ମଣାନ୍ଭୋଜୟିତ୍ଵା ଚ ଦେଵୀଂ ତାଂ ପ୍ରାର୍ଥୟେଦ୍ଗୃହେ ।

ଗଚ୍ଛ ଗଚ୍ଛ ମହାଦେଵି ସ୍ଵସ୍ଥାନଂ ମଙ୍ଗଲଂ କୁରୁ ॥ ୨୩॥

ଏଵଂ କୃତ୍ୟଵିଧାନେନ ମାରିକାଶାନ୍ତିରୁତ୍ତମା ।

ଜାୟତେ ନାତ୍ର ସନ୍ଦେହଃ ସତ୍ୟଂ ସତ୍ୟଂ ସମୀରିତମ୍ ॥ ୨୪॥

ଇତ୍ୟେତତ୍କଥିତଂ ଦେଵ୍ୟା ଦେଵେଭ୍ୟଃ ସ୍ଵାତ୍ମସମ୍ଭଵମ୍ ।

ମାହାତ୍ମ୍ୟଂ ପଠିତଂ ୟେନ ସୋଽପି ମାଙ୍ଗଲ୍ୟମାପ୍ନୁୟାତ୍ ॥ ୨୫॥

ଲିଖିତଂ ପୁସ୍ତକଂ ୟସ୍ୟ ଗୃହେ ତିଷ୍ଠତି ସର୍ଵଦା ।

ତସ୍ୟ ମାରୀଭୟଂ ନାସ୍ତି ସତ୍ୟଂ ସତ୍ୟଂ ମୟୋଦିତମ୍ ॥ ୨୬॥

ପୁସ୍ତକଂ ପୂଜୟେଦ୍ୟସ୍ତୁ ଶ୍ରଦ୍ଧୟା ପରୟା ସଦା ।

ସୋଽପି ମାଙ୍ଗଲ୍ୟମାପ୍ନୋତି ଇହାମୁତ୍ର ପରାଂ ଗତିମ୍ ॥ ୨୭॥

ସର୍ଵଂ ତ୍ୟକ୍ତ୍ଵା ସାଧୟେତ ଦେଵୀଂ ୟତ୍ନୈର୍ଧନୈରପି ।

ସ୍ତୋଷ୍ୟନ୍ତି ପରୟା ଭକ୍ତ୍ୟା ସର୍ଵକାମାର୍ଥସିଦ୍ଧୟେ ॥ ୨୮॥

ବିଡାଲା ୟତ୍ର ନଶ୍ୟନ୍ତି ୟତ୍ର ନଶ୍ୟନ୍ତି ମୂଷିକାଃ ।

ସ୍ଥାନଂ ତଚ୍ଚ ପରିତ୍ୟଜ୍ୟ ସ୍ଥାନଂ ଶୂନ୍ୟଂ ଚ କାରୟେତ୍ ॥ ୨୯॥

ଇତି ଶ୍ରୀଦେଵୀପୁରାଣେ ଶ୍ରୀମହାମାରିକାସ୍ତୋତ୍ରଂ ସମ୍ପୂର୍ଣମ୍ ॥