କନକଧାରାସ୍ତୋତ୍ରମ୍
💥 କନକଧାରାସ୍ତୋତ୍ରମ୍ 💥
ଅଙ୍ଗଂ ହରେଃ ପୁଲକଭୂଷଣମାଶ୍ରୟନ୍ତୀ
ଭୃଙ୍ଗାଙ୍ଗନେଵ ମୁକୁଲାଭରଣଂ ତମାଲମ୍ ।
ଅଙ୍ଗୀକୃତାଖିଲଵିଭୂତିରପାଙ୍ଗଲୀଲା
ମାଙ୍ଗଲ୍ୟଦାସ୍ତୁ ମମ ମଙ୍ଗଳଦେଵତାୟାଃ ॥ ୧॥
ମୁଗ୍ଧା ମୁହୁର୍ଵିଦଧତୀ ଵଦନେ ମୁରାରେଃ
ପ୍ରେମତ୍ରପାପ୍ରଣିହିତାନି ଗତାଗତାନି ।
ମାଲା ଦୃଶୋର୍ମଧୁକରୀଵ ମହୋତ୍ପଲେ ୟା
ସା ମେ ଶ୍ରିୟଂ ଦିଶତୁ ସାଗରସମ୍ଭଵାୟାଃ ॥ ୨॥
ଆମୀଲିତାକ୍ଷମଧିଗମ୍ୟ ମୁଦା ମୁକୁନ୍ଦଂ
ଆନନ୍ଦକନ୍ଦମନିମେଷମନଙ୍ଗତନ୍ତ୍ରମ୍ ।
ଆକେକରସ୍ଥିତକନୀନିକପକ୍ଷ୍ମନେତ୍ରଂ
ଭୂତ୍ୟୈ ଭଵେନ୍ମମ ଭୁଜଙ୍ଗଶୟାଙ୍ଗନାୟାଃ ॥ ୩॥
ବାହ୍ଵନ୍ତରେ ମଧୁଜିତଃ ଶ୍ରିତକୌସ୍ତୁଭେ ୟା
ହାରାଵଲୀଵ ହରିନୀଲମୟୀ ଵିଭାତି ।
କାମପ୍ରଦା ଭଗଵତୋଽପି କଟାକ୍ଷମାଲା
କଲ୍ୟାଣମାଵହତୁ ମେ କମଲାଲୟାୟାଃ ॥ ୪॥
କାଲାମ୍ବୁଦାଳିଲଲିତୋରସି କୈଟଭାରେଃ
ଧାରାଧରେ ସ୍ଫୁରତି ୟା ତଡିଦଙ୍ଗନେଵ ।
ମାତୁସ୍ସମସ୍ତଜଗତାଂ ମହନୀୟମୂର୍ତିଃ
ଭଦ୍ରାଣି ମେ ଦିଶତୁ ଭାର୍ଗଵନନ୍ଦନାୟାଃ ॥ ୫॥
ପ୍ରାପ୍ତଂ ପଦଂ ପ୍ରଥମତଃ ଖଲୁ ୟତ୍ପ୍ରଭାଵାନ୍-
ମାଙ୍ଗଲ୍ୟଭାଜି ମଧୁମାଥିନି ମନ୍ମଥେନ ।
ମୟ୍ୟାପତେତ୍ତଦିହ ମନ୍ଥରମୀକ୍ଷଣାର୍ଧଂ
ମନ୍ଦାଲସଂ ଚ ମକରାଲୟକନ୍ୟକାୟାଃ ॥ ୬॥
ଵିଶ୍ଵାମରେନ୍ଦ୍ରପଦଵିଭ୍ରମଦାନଦକ୍ଷଂ
ଆନନ୍ଦହେତୁରଧିକଂ ମୁରଵିଦ୍ଵିଷୋଽପି ।
ଈଷନ୍ନିଷୀଦତୁ ମୟି କ୍ଷଣମୀକ୍ଷଣାର୍ଧ-
ମିନ୍ଦୀଵରୋଦରସହୋଦରମିନ୍ଦିରାୟାଃ ॥ ୭॥
ଇଷ୍ଟା ଵିଶିଷ୍ଟମତୟୋଽପି ୟୟା ଦୟାର୍ଦ୍ର
ଦୃଷ୍ଟ୍ୟା ତ୍ରିଵିଷ୍ଟପପଦଂ ସୁଲଭଂ ଲଭନ୍ତେ ।
ଦୃଷ୍ଟିଃ ପ୍ରହୃଷ୍ଟକମଲୋଦରଦୀପ୍ତିରିଷ୍ଟାଂ
ପୁଷ୍ଟିଂ କୃଷୀଷ୍ଟ ମମ ପୁଷ୍କରଵିଷ୍ଟରାୟାଃ ॥ ୮॥
ଦଦ୍ୟାଦ୍ଦୟାନୁପଵନୋ ଦ୍ରଵିଣାମ୍ବୁଧାରାଂ
ଅସ୍ମିନ୍ନକିଞ୍ଚନଵିହଙ୍ଗଶିଶୌ ଵିଷଣ୍ଣେ ।
ଦୁଷ୍କର୍ମଘର୍ମମପନୀୟ ଚିରାୟ ଦୂରଂ
ନାରାୟଣପ୍ରଣୟିନୀନୟନାମ୍ବୁଵାହଃ ॥ ୯॥
ଧୀର୍ଦେଵତେତି ଗରୁଡଧ୍ଵଜସୁନ୍ଦରୀତି
ଶାକମ୍ଭରୀତି ଶଶିଶେଖରଵଲ୍ଲଭେତି ।
ସୃଷ୍ଟିସ୍ଥିତିପ୍ରଲୟକେଲିଷୁ ସଂସ୍ଥିତାୟୈ
ତସ୍ୟୈ ନମସ୍ତ୍ରିଭୁଵନୈକଗୁରୋସ୍ତରୁଣ୍ୟୈ ॥ ୧୦॥
ଶ୍ରୁତ୍ୟୈ ନମୋଽସ୍ତୁ ଶୁଭକର୍ମଫଲପ୍ରସୂତ୍ୟୈ
ରତ୍ୟୈ ନମୋଽସ୍ତୁ ରମଣୀୟଗୁଣାର୍ଣଵାୟୈ ।
ଶକ୍ତ୍ୟୈ ନମୋଽସ୍ତୁ ଶତପତ୍ରନିକେତନାୟୈ
ପୁଷ୍ଟ୍ୟୈ ନମୋଽସ୍ତୁ ପୁରୁଷୋତ୍ତମଵଲ୍ଲଭାୟୈ ॥ ୧୧॥
ନମୋଽସ୍ତୁ ନାଲୀକନିଭାନନାୟୈ
ନମୋଽସ୍ତୁ ଦୁଗ୍ଧୋଦଧିଜନ୍ମଭୂମ୍ୟୈ ।
ନମୋଽସ୍ତୁ ସୋମାମୃତସୋଦରାୟୈ
ନମୋଽସ୍ତୁ ନାରାୟଣଵଲ୍ଲଭାୟୈ ॥ ୧୨॥
ନମୋଽସ୍ତୁ ହେମାମ୍ବୁଜପୀଠିକାୟୈ
ନମୋଽସ୍ତୁ ଭୂମଣ୍ଡଲନାୟିକାୟୈ ।
ନମୋଽସ୍ତୁ ଦେଵାଦିଦୟାପରାୟୈ
ନମୋଽସ୍ତୁ ଶାର୍ଙ୍ଗାୟୁଧଵଲ୍ଲଭାୟୈ ॥ ୧୩॥
ନମୋଽସ୍ତୁ ଦେଵ୍ୟୈ ଭୃଗୁନନ୍ଦନାୟୈ
ନମୋଽସ୍ତୁ ଵିଷ୍ଣୋରୁରସି ସ୍ଥିତାୟୈ ।
ନମୋଽସ୍ତୁ ଲକ୍ଷ୍ମ୍ୟୈ କମଲାଲୟାୟୈ
ନମୋଽସ୍ତୁ ଦାମୋଦରଵଲ୍ଲଭାୟୈ ॥ ୧୪॥
ନମୋଽସ୍ତୁ କାନ୍ତ୍ୟୈ କମଲେକ୍ଷଣାୟୈ
ନମୋଽସ୍ତୁ ଭୂତ୍ୟୈ ଭୁଵନପ୍ରସୂତ୍ୟୈ ।
ନମୋଽସ୍ତୁ ଦେଵାଦିଭିରର୍ଚିତାୟୈ
ନମୋଽସ୍ତୁ ନନ୍ଦାତ୍ମଜଵଲ୍ଲଭାୟୈ ॥ ୧୫॥
ସମ୍ପତ୍କରାଣି ସକଲେନ୍ଦ୍ରିୟନନ୍ଦନାନି
ସାମ୍ରାଜ୍ୟଦାନଵିଭଵାନି ସରୋରୁହାକ୍ଷି ।
ତ୍ଵଦ୍ଵନ୍ଦନାନି ଦୁରିତାହରଣୋଦ୍ୟତାନି
ମାମେଵ ମାତରନିଶଂ କଲୟନ୍ତୁ ମାନ୍ୟେ ॥ ୧୬॥
ୟତ୍କଟାକ୍ଷସମୁପାସନାଵିଧିଃ
ସେଵକସ୍ୟ ସକଲାର୍ଥସମ୍ପଦଃ ।
ସନ୍ତନୋତି ଵଚନାଙ୍ଗମାନସୈଃ
ତ୍ଵାଂ ମୁରାରିହୃଦୟେଶ୍ଵରୀଂ ଭଜେ ॥ ୧୭॥
ସରସିଜନିଲୟେ ସରୋଜହସ୍ତେ
ଧଵଳତମାଂଶୁକଗନ୍ଧମାଲ୍ୟଶୋଭେ ।
ଭଗଵତି ହରିଵଲ୍ଲଭେ ମନୋଜ୍ଞେ
ତ୍ରିଭୁଵନଭୂତିକରି ପ୍ରସୀଦ ମହ୍ୟମ୍ ॥ ୧୮॥
ଦିଗ୍ଘସ୍ତିଭିଃ କନକକୁମ୍ଭମୁଖାଵସୃଷ୍ଟ
ସ୍ଵର୍ଵାହିନୀ ଵିମଲଚାରୁଜଲପ୍ଲୁତାଙ୍ଗୀମ୍ ।
ପ୍ରାତର୍ନମାମି ଜଗତାଂ ଜନନୀମଶେଷ
ଲୋକାଧିନାଥଗୃହିଣୀମମୃତାବ୍ଧିପୁତ୍ରୀମ୍ ॥ ୧୯॥
କମଲେ କମଲାକ୍ଷଵଲ୍ଲଭେ ତ୍ଵଂ
କରୁଣାପୂରତରଙ୍ଗିତୈରପାଙ୍ଗୈଃ ।
ଅଵଲୋକୟ ମାମକିଞ୍ଚନାନାଂ
ପ୍ରଥମଂ ପାତ୍ରମକୃତ୍ରିମଂ ଦୟାୟାଃ ॥ ୨୦॥
ଦେଵି ପ୍ରସୀଦ ଜଗଦୀଶ୍ଵରି ଲୋକମାତଃ
କଲ୍ୟାନଗାତ୍ରି କମଲେକ୍ଷଣଜୀଵନାଥେ ।
ଦାରିଦ୍ର୍ୟଭୀତିହୃଦୟଂ ଶରଣାଗତଂ ମାଂ
ଆଲୋକୟ ପ୍ରତିଦିନଂ ସଦୟୈରପାଙ୍ଗୈଃ ॥ ୨୧॥
ସ୍ତୁଵନ୍ତି ୟେ ସ୍ତୁତିଭିରମୂଭିରନ୍ଵହଂ
ତ୍ରୟୀମୟୀଂ ତ୍ରିଭୁଵନମାତରଂ ରମାମ୍ ।
ଗୁଣାଧିକା ଗୁରୁତରଭାଗ୍ୟଭାଗିନୋ
ଭଵନ୍ତି ତେ ଭୁଵି ବୁଧଭାଵିତାଶୟାଃ ॥ ୨୨॥
॥ ଇତି ଶ୍ରୀମଦ୍ ଶଙ୍କରାଚାର୍ୟକୃତ ଶ୍ରୀ କନକଧାରାସ୍ତୋତ୍ରଂ ସମ୍ପୂର୍ଣମ୍ ॥
👉. ଅୟଂ ସ୍ତଵଃ ସ୍ଵାମିନା ଶଙ୍କରଭଗଵତ୍ପାଦେନ ବ୍ରହ୍ମଵ୍ରତସ୍ଥେନ କାଲଟିନାମ୍ନି
ସ୍ଵଗ୍ରାମ ଏଵାକିଞ୍ଚନ୍ୟପରିଖିନ୍ନାୟା ଦ୍ଵିଜଗୃହିଣ୍ୟା ନିର୍ଧନତ୍ଵମାର୍ଜନାୟ
ନିରମାୟି । ତେନ ସ୍ତଵେନ ପ୍ରୀତା ଲକ୍ଷ୍ମୀର୍ଵିପ୍ରଂ ଵିପୁଲଧନଦାନେନାପ୍ରୀଣୟଦିତି
ଶଞ୍କରଵିଜୟତଃ ସମାଧିଗମ୍ୟତେ, ``ସ ମୁନିର୍ମୁରଜିତ୍କୁଟୁମ୍ବିନୀଂ
ପଦଚିତ୍ରୈର୍ନଵନୀତ କୋମଲୈଃ ଂଅଧୁରୈରୂପତସ୍ଥିଵାଂ- ସ୍ତଵୈଃ''
ଇତ୍ୟାଦିନା ॥ ଏତେ ଶ୍ରୀମନ୍ମାତୁରଭ୍ୟର୍ଥନୟା ସ୍ତଵମେତମତନିଷତେତି
କାଲଟିଗ୍ରାମନିକଟଵର୍ତିନାଂ ଵିଦୁଷାଂ ମତମ୍ । ତଦାରଭ୍ୟ କର୍ଣାକର୍ଣିକୟା
ତଥାନୁଶ୍ରୁତମ୍ ।
Comments
Post a Comment