ଶ୍ରୀମୃତ୍ୟୁଞ୍ଜୟମାନସିକପୂଜାସ୍ତୋତ୍ରମ୍

 🟣ଶ୍ରୀମୃତ୍ୟୁଞ୍ଜୟମାନସିକପୂଜାସ୍ତୋତ୍ରମ୍ 🟣➖➖➖➖➖➖➖➖➖➖➖

🥀🥀🥀🥀🥀🥀🥀🥀🥀🥀🥀

କୈଳାସେ କମନୀୟରତ୍ନଖଚିତେ କଲ୍ପଦ୍ରୁମୂଳେ ସ୍ଥିତଂ

କର୍ପୂରସ୍ଫଟିକେନ୍ଦୁସୁନ୍ଦରତନୁଂ କାତ୍ୟାୟନୀସେବିତମ୍ ।

ଗଙ୍ଗାତୁଙ୍ଗତରଙ୍ଗରଞ୍ଜିତଜଟାଭାରଂ କୃପାସାଗରଂ

କଣ୍ଠାଲଂକୃତଶେଷଭୂଷଣମମୁଂ ମୃତ୍ୟୁଞ୍ଜୟଂ ଭାବୟେ ॥ ୧॥

ଆଗତ୍ୟ ମୃତ୍ୟୁଞ୍ଜୟ ଚନ୍ଦ୍ରମୌଲେ

    ବ୍ୟାଘ୍ରାଜିନାଲଂକୃତ ଶୂଲପାଣେ ।

ସ୍ୱଭକ୍ତସଂରକ୍ଷଣକାମଧେନୋ

    ପ୍ରସୀଦ ବିଶ୍ୱେଶ୍ୱର ପାର୍ୱତୀଶ ॥ ୨॥

ଭାସ୍ୱନ୍ମୌକ୍ତିକତୋରଣେ ମରକତସ୍ତମ୍ଭାୟୁଧାଲଂକୃତେ

    ସୌଧେ ଧୂପସୁବାସିତେ ମଣିମୟେ ମାଣିକ୍ୟଦୀପାଞ୍ଚିତେ ।

ବ୍ରହ୍ମେନ୍ଦ୍ରାମରୟୋଗିପୁଙ୍ଗବଗଣୈର୍ୟୁକ୍ତେ ଚ କଲ୍ପଦ୍ରୁମୈଃ

    ଶ୍ରୀମୃତ୍ୟୁଞ୍ଜୟ ସୁସ୍ଥିରୋ ଭବ ବିଭୋ ମାଣିକ୍ୟସିଂହାସନେ ॥ ୩॥

ମନ୍ଦାରମଲ୍ଲୀକରବୀରମାଧବୀ-

ପୁନ୍ନାଗନୀଲୋତ୍ପଲଚମ୍ପକାନ୍ୱିତୈଃ ।

କର୍ପୂରପାଟୀରସୁବାସିତୈର୍ଜଲୈ-

ରାଧତ୍ସ୍ୱ ମୃତ୍ୟୁଞ୍ଜୟ ପାଦ୍ୟମୁତ୍ତମମ୍ ॥ ୪॥

ସୁଗନ୍ଧପୁଷ୍ପପ୍ରକରୈଃ ସୁବାସିତୈ-

ର୍ୱିୟନ୍ନଦୀଶୀତଲବାରିଭିଃ ଶୁଭୈଃ ।

ତ୍ରିଲୋକନାଥାର୍ତିହରାର୍ଘ୍ୟମାଦରା-

ଦ୍ଗୃହାଣ ମୃତ୍ୟୁଞ୍ଜୟ ସର୍ୱବନ୍ଦିତ ॥ ୫॥

ହିମାମ୍ବୁବାସିତୈସ୍ତୋୟୈଃ ଶୀତଲୈରତିପାବନୈଃ ।

ମୃତ୍ୟୁଞ୍ଜୟ ମହାଦେବ ଶୁଦ୍ଧାଚମନମାଚର ॥ ୬॥

ଗୁଡଦଧିସହିତଂ ମଧୁପ୍ରକୀର୍ଣଂ

ସୁଘୃତସମନ୍ୱିତଧେନୁଦୁଗ୍ଧୟୁକ୍ତମ୍ ।

ଶୁଭକର ମଧୁପର୍କମାହର ତ୍ୱଂ

ତ୍ରିନୟନ ମୃତ୍ୟୁହର ତ୍ରିଲୋକବନ୍ଦ୍ୟ ॥ ୭॥

ପଞ୍ଚାସ୍ର ଶାନ୍ତ ପଞ୍ଚାସ୍ୟ ପଞ୍ଚପାତକସଂହର ।

ପଞ୍ଚାମୃତସ୍ନାନମିଦଂ କୁରୁ ମୃତ୍ୟୁଞ୍ଜୟ ପ୍ରଭୋ ॥ ୮॥

ଜଗତ୍ତ୍ରୟୀଖ୍ୟାତ ସମସ୍ତତୀର୍ଥ-

ସମାହୃତୈଃ କଲ୍ମଷହାରିଭିଶ୍ଚ ।

ସ୍ନାନଂ ସୁତୋୟୈଃ ସମୁଦାଚର ତ୍ୱଂ

ମୃତ୍ୟୁଞ୍ଜୟାନନ୍ତଗୁଣାଭିରାମ ॥ ୯॥

ଆନୀତେନାତିଶୁଭ୍ରେଣ କୌଶେୟେନାମରଦ୍ରୁମାତ୍ ।

ମାର୍ଜୟାମି ଜଟାଭାରଂ ଶିବ ମୃତ୍ୟୁଞ୍ଜୟ ପ୍ରଭୋ ॥ ୧୦॥

ନାନାହେମବିଚିତ୍ରାଣି ଚୀରଚୀନାମ୍ବରାଣି ଚ ।

ବିବିଧାନି ଚ ଦିବ୍ୟାନି ମୃତ୍ୟୁଞ୍ଜୟ ସୁଧାରୟ ॥ ୧୧॥

ବିଶୁଦ୍ଧମୁକ୍ତାଫଲଜାଲରମ୍ୟଂ

ମନୋହରଂ କାଞ୍ଚନହେମସୂତ୍ରମ୍ ।

ଯଜ୍ଞୋପବୀତଂ ପରମଂ ପବିତ୍ର-

ମାଧତ୍ସ୍ୱ ମୃତ୍ୟୁଞ୍ଜୟ ଭକ୍ତିଗମ୍ୟ ॥ ୧୨॥

ଶ୍ରୀଗନ୍ଧଂ ଘନସାରକୁଙ୍କୁମୟୁତଂ କସ୍ତୂରିକାପୂରିତଂ

    କାଲେୟେନ ହିମାମ୍ବୁନା ବିରଚିତଂ ମନ୍ଦାରସଂବାସିତମ୍ ।

ଦିବ୍ୟଂ ଦେବମନୋହରଂ ମଣିମୟେ ପାତ୍ରେ ସମାରୋପିତଂ

    ସର୍ୱାଙ୍ଗେଷୁ ବିଲେପୟାମି ସତତଂ ମୃତ୍ୟୁଞ୍ଜୟ ଶ୍ରୀବିଭୋ ॥ ୧୩॥

ଅକ୍ଷତୈର୍ଧବଲୈର୍ଦିବ୍ୟୈଃ ସମ୍ୟକ୍ତିଲସମନ୍ୱିତୈଃ ।

ମୃତ୍ୟୁଞ୍ଜୟ ମହାଦେବ ପୂଜୟାମି ବୃଷଧ୍ୱଜ ॥ ୧୪॥

ଚମ୍ପକପଙ୍କଜକୁରବକକୁନ୍ଦୈଃ କରବୀରମଲ୍ଲିକାକୁସୁମୈଃ ।

ବିସ୍ତାରୟ ନିଜମକୁଟଂ ମୃତ୍ୟୁଞ୍ଜୟ ପୁଣ୍ଡରୀକନୟନାପ୍ତ ॥ ୧୫॥

ମାଣିକ୍ୟପାଦୁକାଦ୍ୱନ୍ଦ୍ୱେ ମୌନିହୃତ୍ପଦ୍ମମନ୍ଦିରେ ।

ପାଦୌ ସତ୍ପଦ୍ମସଦୃଶୌ ମୃତ୍ୟୁଞ୍ଜୟ ନିବେଶୟ ॥ ୧୬॥

ମାଣିକ୍ୟକେୟୂରକିରୀଟହାରୈଃ

କାଞ୍ଚୀମଣିସ୍ଥାପିତକୁଣ୍ଡଲୈଶ୍ଚ ।

ମଞ୍ଜୀରମୁଖ୍ୟାଭରଣୈର୍ମନୋଜ୍ଞୈ-

ରଙ୍ଗାନି ମୃତ୍ୟୁଞ୍ଜୟ ଭୂଷୟାମି ॥ ୧୭॥

ଗଜବଦନସ୍କନ୍ଦଧୃତେ-

ନାତିସ୍ୱଚ୍ଛେନ ଚାମରୟୁଗେନ ।

ଗଲଦଲକାନନପଦ୍ମଂ

ମୃତ୍ୟୁଞ୍ଜୟ ଭାବୟାମି ହୃତ୍ପଦ୍ମେ ॥ ୧୮॥

ମୁକ୍ତାତପତ୍ରଂ ଶଶିକୋଟିଶୁଭ୍ରଂ

ଶୁଭପ୍ରଦଂ କାଞ୍ଚନଦଣ୍ଡୟୁକ୍ତମ୍ ।

ମାଣିକ୍ୟସଂସ୍ଥାପିତହେମକୁମ୍ଭଂ

ସୁରେଶ ମୃତ୍ୟୁଞ୍ଜୟ ତେଽର୍ପୟାମି ॥ ୧୯॥

ମଣିମୁକୁରେ ନିଷ୍ପଟଲେ ତ୍ରିଜଗଦ୍ଗାଢାନ୍ଧକାରସପ୍ତାଶ୍ୱେ ।

କନ୍ଦର୍ପକୋଟିସଦୃଶଂ ମୃତ୍ୟୁଞ୍ଜୟ ପଶ୍ୟ ବଦନମାତ୍ମୀୟମ୍ ॥ ୨୦॥

କର୍ପୂରଚୂର୍ଣଂ କପିଲାଜ୍ୟପୂତଂ

ଦାସ୍ୟାମି କାଲେୟସମାନ୍ୱିତୈଶ୍ଚ ।

ସମୁଦ୍ଭବଂ ପାବନଗନ୍ଧଧୂପିତଂ

ମୃତ୍ୟୁଞ୍ଜୟାଙ୍ଗଂ ପରିକଲ୍ପୟାମି ॥ ୨୧॥

ବର୍ତିତ୍ରୟୋପେତମଖଣ୍ଡଦୀପ୍ତ୍ୟା

ତମୋହରଂ ବାହ୍ୟମଥାନ୍ତରଂ ଚ ।

ସାଜ୍ୟଂ ସମସ୍ତାମରବର୍ଗହୃଦ୍ୟଂ

ସୁରେଶ ମୃତ୍ୟୁଞ୍ଜୟ ବଂଶଦୀପମ୍ ॥ ୨୨॥

ରାଜାନ୍ନଂ ମଧୁରାନ୍ୱିତଂ ଚ ମୃଦୁଲଂ ମାଣିକ୍ୟପାତ୍ରେ ସ୍ଥିତଂ

ହିଙ୍ଗୂଜୀରକସନ୍ମରୀଚିମିଲିତୈଃ ଶାକୈରନେକୈଃ ଶୁଭୈଃ ।

ଶାକଂ ସମ୍ୟଗପୂପସୂପସହିତଂ ସଦ୍ୟୋଘୃତେନାପ୍ଲୁତଂ

ଶ୍ରୀମୃତ୍ୟୁଞ୍ଜୟ ପାର୍ୱତୀପ୍ରିୟ ବିଭୋ ସାପୋଶନଂ ଭୁଜ୍ୟତାମ୍ ॥ ୨୩॥

କୂଷ୍ମାଣ୍ଡବାର୍ତାକପଟୋଲିକାନାଂ

ଫଲାନି ରମ୍ୟାଣି ଚ କାରବଲ୍ଲ୍ୟା ।

ସୁପାକୟୁକ୍ତାନି ସସୌରଭାଣି

ଶ୍ରୀକଣ୍ଠ ମୃତ୍ୟୁଞ୍ଜୟ ଭକ୍ଷୟେଶ ॥ ୨୪॥

ଶୀତଲଂ ମଧୁରଂ ସ୍ୱଚ୍ଛଂ ପାବନଂ ବାସିତଂ ଲଘୁ ।

ମଧ୍ୟେ ସ୍ୱୀକୁରୁ ପାନୀୟଂ ଶିବ ମୃତ୍ୟୁଞ୍ଜୟ ପ୍ରଭୋ ॥ ୨୫॥

ଶର୍କରାମିଲିତଂ ସ୍ନିଗ୍ଧଂ ଦୁଗ୍ଧାନ୍ନଂ ଗୋଘୃତାନ୍ୱିତମ୍ ।

କଦଲୀଫଲସଂମିଶ୍ରଂ ଭୁଜ୍ୟତାଂ ମୃତ୍ୟୁସଂହର ॥ ୨୬॥

କେବଲମତିମାଧୁର୍ୟଂ ଦୁଗ୍ଧୈଃ ସ୍ନିଗ୍ଧୈଶ୍ଚ ଶର୍କରାମିଲିତୈଃ ।

ଏଲାମରୀଚମିଲିତଂ ମୃତ୍ୟୁଞ୍ଜୟ ଦେବ ଭୁଙ୍କ୍ଷ୍ୱ ପରମାନ୍ନମ୍ ॥ ୨୭॥

ରମ୍ଭାଚୂତକପିତ୍ଥକଣ୍ଠକଫଲୈର୍ଦ୍ରାକ୍ଷାରସାସ୍ୱାଦୁମ-

    ତ୍ଖର୍ଜୂରୈର୍ମଧୁରେକ୍ଷୁଖଣ୍ଡଶକଲୈଃ ସନ୍ନାରିକେଲାମ୍ବୁଭିଃ ।

କର୍ପୂରେଣ ସୁବାସିତୈର୍ଗୁଡଜଲୈର୍ମାଧୁର୍ୟଯୁକ୍ତୈର୍ୱିଭୋ

    ଶ୍ରୀମୃତ୍ୟୁଞ୍ଜୟ ପୂରୟ ତ୍ରିଭୁବନାଧାରଂ ବିଶାଲୋଦରମ୍ ॥ ୨୮॥

ମନୋଜ୍ଞରମ୍ଭାବନଖଣ୍ଡଖଣ୍ଡିତା-

ନ୍ରୁଚିପ୍ରଦାନ୍ସର୍ଷପଜୀରକାଂଶ୍ଚ ।

ସସୌରଭାନ୍ସୈନ୍ଧବସେବିତାଂଶ୍ଚ

ଗୃହାଣ ମୃତ୍ୟୁଞ୍ଜୟ ଲୋକବନ୍ଦ୍ୟ ॥ ୨୯॥

ହିଙ୍ଗୂଜୀରକସହିତଂ ବିମଲାମଲକଂ କପିତ୍ଥମତିମଧୁରମ୍ ।

ବିସଖଣ୍ଡାଁଲ୍ଲାବଣୟୁତାନ୍ମୃତ୍ୟୁଞ୍ଜୟ ତେଽର୍ପୟାମି ଜଗଦୀଶ ॥ ୩୦॥

ଏଲାଶୁଣ୍ଠୀସହୀତଂ ଦଧ୍ୟନ୍ନଂ ଚାରୁହେମପାତ୍ରସ୍ଥମ୍ ।

ଅମୃତପ୍ରତିନିଧିମାଢ୍ୟଂ ମୃତ୍ୟୁଞ୍ଜୟ ଭୁଜ୍ୟତାଂ ତ୍ରିଲୋକେଶ ॥ ୩୧॥

ଜମ୍ବୀରନୀରାଞ୍ଚିତଶୃଙ୍ଗବେରଂ

ମନୋହରାନମ୍ଲଶଲାଟୁଖଣ୍ଡାନ୍ ।

ମୃଦୂପଦଂଶାନ୍ସହସୋପଭୁଙ୍କ୍ଷ୍ୱ

ମୃତ୍ୟୁଞୟ ଶ୍ରୀକରୁଣାସମୁଦ୍ର ॥ ୩୨॥

ନାଗରରାମଠୟୁକ୍ତଂ ସୁଲଲିତଜମ୍ବୀରନୀରସମ୍ପୂର୍ଣମ୍ ।

ମଥିତଂ ସୈନ୍ଧବସହିତଂ ପିବ ହର ମୃତ୍ୟୁଞ୍ଜୟ କ୍ରତୁଧ୍ୱଂସିନ୍ ॥ ୩୩॥

ମନ୍ଦାରହେମାମ୍ବୁଜଗନ୍ଧୟୁକ୍ତୈ-

ର୍ମନ୍ଦାକିନୀନିର୍ମଲପୁଣ୍ୟତୋୟୈଃ ।

ଗୃହାଣ ମୃତ୍ୟୁଞ୍ଜୟ ପୂର୍ଣକାମ

ଶ୍ରୀମତ୍ପରାପୋଶନମଭ୍ରକେଶ ॥ ୩୪॥

ଗଗନଧୁନୀବିମଲଜଲୈର୍ମୃତ୍ୟୁଞ୍ଜୟ ପଦ୍ମରାଗପାତ୍ରଗତୈଃ ।

ମୃଗମଦଚନ୍ଦନପୂର୍ଣଂ ପ୍ରକ୍ଷାଲୟ ଚାରୁ ହସ୍ତପଦୟୁଗ୍ମମ୍ ॥ ୩୫॥

ପୁଂନାଗମଲ୍ଲିକାକୁନ୍ଦବାସିତୈର୍ଜାହ୍ନବୀଜଲୈଃ ।

ମୃତ୍ୟୁଞ୍ଜୟ ମହାଦେବ ପୁନରାଚମନଂ କୁରୁ ॥ ୩୬॥

ମୌକ୍ତିକଚୂର୍ଣସମେତୈର୍ମୃଗମଦଘନସାରବାସିତୈଃ ପୂଗୈଃ ।

ପର୍ଣୈଃ ସ୍ୱର୍ଣସମାନୈର୍ମୃତ୍ୟୁଞ୍ଜୟ ତେଽର୍ପୟାମି ତାମ୍ବୂଲମ୍ ॥ ୩୭॥

ନୀରାଜନଂ ନିର୍ମଲଦୀପ୍ତିମଦ୍ଭି-

ର୍ଦୀପାଙ୍କୁରୈରୁଜ୍ଜ୍ୱଲମୁଚ୍ଛ୍ରିତୈଶ୍ଚ ।

ଘଣ୍ଟାନିନାଦେନ ସମର୍ପୟାମି

ମୃତ୍ୟୁଞ୍ଜୟାୟ ତ୍ରିପୁରାନ୍ତକାୟ ॥ ୩୮॥

ବିରିଞ୍ଚିମୁଖ୍ୟାମରବୃନ୍ଦବନ୍ଦିତେ

ସରୋଜମତ୍ସ୍ୟାଙ୍କିତଚକ୍ରଚିହ୍ନିତେ ।

ଦଦାମି ମୃତ୍ୟୁଞ୍ଜୟ ପାଦପଙ୍କଜେ

ଫଣୀନ୍ଦ୍ରଭୂଷେ ପୁନରର୍ଘ୍ୟମୀଶ୍ୱର ॥ ୩୯॥

ପୁଂନାଗନୀଲୋତ୍ପଲକୁନ୍ଦଜାଜୀ-

ମନ୍ଦାରମଲ୍ଲୀକରବୀରପଙ୍କଜୈଃ ।

ପୁଷ୍ପାଞ୍ଜଲିଂ ବିଲ୍ୱଦଲୈସ୍ତୁଲସ୍ୟା

ମୃତ୍ୟୁଞ୍ଜୟାଙ୍ଘ୍ରୌ ବିନିବେଶୟାମି ॥ ୪୦॥

ପଦେ ପଦେ ସର୍ୱତମୋନିକୃନ୍ତନଂ

ପଦେ ପଦେ ସର୍ୱଶୁଭପ୍ରଦାୟକମ୍ ।

ପ୍ରଦକ୍ଷିଣଂ ଭକ୍ତିୟୁତେନ ଚେତସା

କରୋମି ମୃତ୍ୟୁଞ୍ଜୟ ରକ୍ଷ ରକ୍ଷ ମାମ୍ ॥ ୪୧॥

ନମୋ ଗୌରୀଶାୟ ସ୍ଫଟିକଧବଲାଙ୍ଗାୟ ଚ ନମୋ

    ନମୋ ଲୋକେଶାୟ ସ୍ତୁତବିବୁଧଲୋକାୟ ଚ ନମଃ ।

ନମଃ ଶ୍ରୀକଣ୍ଠାୟ କ୍ଷପିତପୁରଦୈତ୍ୟାୟ ଚ ନମୋ

    ନମଃ ଫାଲାକ୍ଷାୟ ସ୍ମରମଦବିନାଶାୟ ଚ ନମଃ ॥ ୪୨॥

ସଂସାରେ ଜନିତାପରୋଗସହିତେ ତାପତ୍ରୟାକ୍ରନ୍ଦିତେ

    ନିତ୍ୟଂ ପୁତ୍ରକଲତ୍ରବିତ୍ତବିଲସତ୍ପାଶୈର୍ନିବଦ୍ଧଂ ଦୃଢମ୍ ।

ଗର୍ୱାନ୍ଧଂ ବହୁପାପବର୍ଗସହିତଂ କାରୁଣ୍ୟଦୃଷ୍ଟ୍ୟା ବିଭୋ

    ଶ୍ରୀମୃତ୍ୟୁଞ୍ଜୟ ପାର୍ୱତୀପ୍ରିୟ ସଦା ମାଂ ପାହି ସର୍ୱେଶ୍ୱର ॥ ୪୩॥

ସୌଧେ ରତ୍ନମୟେ ନବୋତ୍ପଲଦଲାକୀର୍ଣେ ଚ ତଲ୍ପାନ୍ତରେ

    କୌଶେୟେନ ମନୋହରେଣ ଧବଲେନାଚ୍ଛାଦିତେ ସର୍ୱଶଃ ।

କର୍ପୂରାଞ୍ଚିତଦୀପଦୀପ୍ତିମିଲିତେ ରମ୍ୟୋପଧାନଦ୍ୱୟେ

    ପାର୍ୱତ୍ୟାଃ କରପଦ୍ମଲାଲିତପଦଂ ମୃତ୍ୟୁଞ୍ଜୟଂ ଭାବୟେ ॥ ୪୪॥

ଚତୁଶ୍ଚତ୍ୱାରିଂଶଦ୍ୱିଲସଦୁପଚାରୈରଭିମତୈ-

    ର୍ମନଃ ପଦ୍ମେ ଭକ୍ତ୍ୟା ବହିରପି ଚ ପୂଜାଂ ଶୁଭକରୀମ୍ ।

କରୋତି ପ୍ରତ୍ୟୂଷେ ନିଶି ଦିବସମଧ୍ୟେଽପି ଚ ପୁମା-

    ନ୍ପ୍ରୟାତି ଶ୍ରୀମୃତ୍ୟୁଞ୍ଜୟପଦମନେକାଦ୍ଭୁତପଦମ୍ ॥ ୪୫॥

ପ୍ରାତର୍ଲିଙ୍ଗମୁମାପତେରହରହଃ ସଂଦର୍ଶନାତ୍ସ୍ୱର୍ଗଦଂ

    ମଧ୍ୟାହ୍ନେ ହୟମେଧତୁଲ୍ୟଫଲଦଂ ସାୟଂତନେ ମୋକ୍ଷଦମ୍ ।

ଭାନୋରସ୍ତମୟେ ପ୍ରଦୋଷସମୟେ ପଞ୍ଚାକ୍ଷରାରାଧନଂ

    ତତ୍କାଲତ୍ରୟତୁଲ୍ୟମିଷ୍ଟଫଲଦଂ ସଦ୍ୟୋଽନବଦ୍ୟଂ ଦୃଢମ୍ ॥ ୪୬॥

॥ ଇତି ଶ୍ରୀମଚ୍ଛଙ୍କରଭଗବତଃ କୃତୌ

ମୃତ୍ୟୁଞ୍ଜୟମାନସିକପୂଜାସ୍ତୋତ୍ରଂ ସମ୍ପୂର୍ଣମ୍ ॥