ଶ୍ରୀକୃଷ୍ଣସ୍ତୁତିଃ (କୁନ୍ତୀସ୍ତୁତିଃ)
🔸ଶ୍ରୀକୃଷ୍ଣସ୍ତୁତିଃ (କୁନ୍ତୀସ୍ତୁତିଃ)🔸
➖➖➖➖➖➖➖➖➖
[ସମସ୍ତ ବିପତ୍ତି ନାଶକ]
ନମସ୍ୟେ ପୁରୁଷଂ ତ୍ଵାଦ୍ୟମୀଶ୍ଵରଂ ପ୍ରକୃତେଃ ପରମ୍ ।
ଅଲକ୍ଷ୍ୟଂ ସର୍ଵଭୂତାନାମନ୍ତର୍ବହିରଵସ୍ଥିତମ୍ ॥ ୧॥
ମାୟାଜଵନିକାଚ୍ଛନ୍ନମଜ୍ଞାଧୋକ୍ଷଜମଵ୍ୟୟମ୍ ।
ନ ଲକ୍ଷ୍ୟସେ ମୂଢଦୃଶା ନଟୋ ନାଟ୍ୟଧରୋ ୟଥା ॥ ୨॥
ତଥା ପରମହଂସାନାଂ ମୁନୀନାମମଲାତ୍ମନାମ୍ ।
ଭକ୍ତିୟୋଗଵିଧାନାର୍ଥଂ କଥଂ ପଶ୍ୟେମହି ସ୍ତ୍ରିୟଃ ॥ ୩॥
କୃଷ୍ଣାୟ ଵାସୁଦେଵାୟ ଦେଵକୀନନ୍ଦନାୟ ଚ ।
ନନ୍ଦଗୋପକୁମାରାୟ ଗୋଵିନ୍ଦାୟ ନମୋ ନମଃ ॥ ୪॥
ନମଃ ପଙ୍କଜନାଭାୟ ନମଃ ପଙ୍କଜମାଲିନେ ।
ନମଃ ପଙ୍କଜନେତ୍ରାୟ ନମସ୍ତେ ପଙ୍କଜାଙ୍ଘ୍ରୟେ ॥ ୫॥
ୟଥା ହୃଷୀକେଶ ଖଲେନ ଦେଵକୀ କଂସେନ ରୁଦ୍ଧାଽତିଚିରଂ ଶୁଚାର୍ପିତା ।
ଵିମୋଚିତାହଂ ଚ ସହାତ୍ମଜା ଵିଭୋ ତ୍ଵୟୈଵ ନାଥେନ ମୁହୁର୍ଵିପଦ୍ଗଣାତ୍ ॥ ୬॥
ଵିଷାନ୍ମହାଗ୍ନେଃ ପୁରୁଷାଦଦର୍ଶନାଦ୍-
ଅସତ୍ସଭାୟା ଵନଵାସକୃଚ୍ଛ୍ରତଃ ।
ମୃଧେ ମୃଧେଽନେକମହାରଥାସ୍ତ୍ରତୋ
ଦ୍ରୌଣ୍ୟସ୍ତ୍ରତଶ୍ଚାସ୍ମ ହରେଽଭିରକ୍ଷିତାଃ ॥ ୭॥
ଵିପଦଃ ସନ୍ତୁ ନଃ ଶଶ୍ଵତ୍ତତ୍ର ତତ୍ର ଜଗଦ୍ଗୁରୋ ।
ଭଵତୋ ଦର୍ଶନଂ ୟତ୍ସ୍ୟାଦପୁନର୍ଭଵଦର୍ଶନମ୍ ॥ ୮॥
ଜନ୍ମୈଶ୍ଵର୍ୟଶ୍ରୁତଶ୍ରୀଭିରେଧମାନମଦଃ ପୁମାନ୍ ।
ନୈଵାର୍ହତ୍ୟଭିଧାତୁଂ ଵୈ ତ୍ଵାମକିଞ୍ଚନଗୋଚରମ୍ ॥ ୯॥
ନମୋଽକିଞ୍ଚନଵିତ୍ତାୟ ନିଵୃତ୍ତଗୁଣଵୃତ୍ତୟେ ।
ଆତ୍ମାରାମାୟ ଶାନ୍ତାୟ କୈଵଲ୍ୟପତୟେ ନମଃ ॥ ୧୦॥
ମନ୍ୟେ ତ୍ଵାଂ କାଲମୀଶାନମନାଦିନିଧନଂ ଵିଭୁମ୍ ।
ସମଂ ଚରନ୍ତଂ ସର୍ଵତ୍ର ଭୂତାନାଂ ୟନ୍ମିଥଃ କଲିଃ ॥ ୧୧॥
ନ ଵେଦ କଶ୍ଚିଦ୍ଭଗଵଂଶ୍ଚିକୀର୍ଷିତଂ
ତଵେହମାନସ୍ୟ ନୃଣାଂ ଵିଡମ୍ବନମ୍ ।
ନ ୟସ୍ୟ କଶ୍ଚିଦ୍ଦୟିତୋଽସ୍ତି କର୍ହିଚି-
ଦ୍ଵେଷ୍ୟଶ୍ଚ ୟସ୍ମିନ୍ଵିଷମା ମତିର୍ନୃଣାମ୍ ॥ ୧୨॥
ଜନ୍ମ କର୍ମ ଚ ଵିଶ୍ଵାତ୍ମନ୍ନଜସ୍ୟାକର୍ତୁରାତ୍ମନଃ ।
ତିର୍ୟଙ୍ନୃର୍ଷିଷୁ ୟାଦଃସୁ ତଦତ୍ୟନ୍ତଵିଡମ୍ବନମ୍ ॥ ୧୩॥
ଗୋପ୍ୟାଦଦେ ତ୍ଵୟି କୃତାଗସି ଦାମ ତାଵତ୍
ୟା ତେ ଦଶାଶ୍ରୁକଲିଲାଞ୍ଜନସମ୍ଭ୍ରମାକ୍ଷମ୍ ।
ଵକ୍ତ୍ରଂ ନିନୀୟ ଭୟଭାଵନୟା ସ୍ଥିତସ୍ୟ
ସା ମାଂ ଵିମୋହୟତି ଭୀରପି ୟଦ୍ବିଭେତି ॥ ୧୪॥
କେଚିଦାହୁରଜଂ ଜାତଂ ପୁଣ୍ୟଶ୍ଲୋକସ୍ୟ କୀର୍ତୟେ ।
ୟଦୋଃ ପ୍ରିୟସ୍ୟାନ୍ଵଵାୟେ ମଲୟସ୍ୟେଵ ଚନ୍ଦନମ୍ ॥ ୧୫॥
ଅପରେ ଵସୁଦେଵସ୍ୟ ଦେଵକ୍ୟାଂ ୟାଚିତୋଽଭ୍ୟଗାତ୍ ।
ଅଜସ୍ତ୍ଵମସ୍ୟ କ୍ଷେମାୟ ଵଧାୟ ଚ ସୁରଦ୍ଵିଷାମ୍ ॥ ୧୬॥
ଭାରାଵତରଣାୟାନ୍ୟେ ଭୁଵୋ ନାଵ ଇଵୋଦଧୌ ।
ସୀଦନ୍ତ୍ୟା ଭୂରିଭାରେଣ ଜାତୋ ହ୍ୟାତ୍ମଭୁଵାର୍ଥିତଃ ॥ ୧୭॥
ଭଵେଽସ୍ମନ୍ କ୍ଲିଶ୍ୟମାନାନାମଵିଦ୍ୟାକାମକର୍ମଭିଃ ।
ଶ୍ରଵଣସ୍ମରଣାର୍ହାଣି କରିଷ୍ୟନ୍ନିତି କେଚନ ॥ ୧୮॥
ଶୃଣ୍ଵନ୍ତି ଗାୟନ୍ତି ଗୃଣନ୍ତ୍ୟଭୀକ୍ଷ୍ଣଶଃ
ସ୍ମରନ୍ତି ନନ୍ଦନ୍ତି ତଵେହିତଂ ଜନାଃ ।
ତ ଏଵ ପଶ୍ୟନ୍ତ୍ୟଚିରେଣ ତାଵକଂ
ଭଵପ୍ରଵାହୋପରମଂ ପଦାମ୍ବୁଜମ୍ ॥ ୧୯॥
ଅପ୍ୟଦ୍ୟ ନସ୍ତ୍ଵଂ ସ୍ଵକୃତେହିତପ୍ରଭୋ
ଜିହାସସି ସ୍ଵିତ୍ସୁହୃଦୋଽନୁଜୀଵିନଃ ।
ୟେଷାଂ ନ ଚାନ୍ୟଦ୍ଭଵତଃ ପଦାମ୍ବୁଜାତ୍
ପରାୟଣଂ ରାଜସୁ ୟୋଜିତାଂହସାମ୍ ॥ ୨୦॥
କେ ଵୟଂ ନାମରୂପାଭ୍ୟାଂ ୟଦୁଭିଃ ସହ ପାଣ୍ଡଵାଃ ।
ଭଵତୋଽଦର୍ଶନଂ ୟର୍ହି ହୃଷୀକାଣାମିଵେଶିତୁଃ ॥ ୨୧॥
ନେୟଂ ଶୋଭିଷ୍ୟତେ ତତ୍ର ୟଥେଦାନୀଂ ଗଦାଧର ।
ତ୍ଵତ୍ପଦୈରଙ୍କିତା ଭାତି ସ୍ଵଲକ୍ଷଣଵିଲକ୍ଷିତୈଃ ॥ ୨୨॥
ଇମେ ଜନପଦାଃ ସ୍ଵୃଦ୍ଧାଃ ସୁପକ୍ଵୌଷଧିଵୀରୁଧଃ ।
ଵନାଦ୍ରିନଦ୍ୟୁଦନ୍ଵନ୍ତୋ ହ୍ୟେଧନ୍ତେ ତଵ ଵୀକ୍ଷିତୈଃ ॥ ୨୩॥
ଅଥ ଵିଶ୍ଵେଶ ଵିଶ୍ଵାତ୍ମନ୍ ଵିଶ୍ଵମୂର୍ତେ ସ୍ଵକେଷୁ ମେ ।
ସ୍ନେହପାଶମିମଂ ଛିନ୍ଧ ଦୃଢଂ ପାଣ୍ଡୁଷୁ ଵୃଷ୍ଣିଷୁ ॥ ୨୪॥
ତ୍ଵୟି ମେଽନନ୍ୟଵିଷୟା ମତିର୍ମଧୁପତେଽସକୃତ୍ ।
ରତିମୁଦ୍ଵହତାଦଦ୍ଧା ଗଙ୍ଗେଵୌଘମୁଦନ୍ଵତି ॥ ୨୫॥
ଶ୍ରୀକୃଷ୍ଣ କୃଷ୍ଣସଖ ଵୃଷ୍ଣ୍ୟୃଷଭାଵନିଧ୍ରୁଗ୍-
ରାଜନ୍ୟଵଂଶଦହନାନପଵର୍ଗଵୀର୍ୟ ।
ଗୋଵିନ୍ଦ ଗୋଦ୍ଵିଜସୁରାର୍ତିହରାଵତାର
ୟୋଗେଶ୍ଵରାଖିଲଗୁରୋ ଭଗଵନ୍ ନମସ୍ତେ ॥
ଇତି ଶ୍ରୀମଦ୍ଭାଗଵତପୁରାଣାନ୍ତର୍ଗତା କୁନ୍ତୀକୃତା ଶ୍ରୀକୃଷ୍ଣସ୍ତୁତିଃ ସମାପ୍ତା ।
Comments
Post a Comment