ବଳଭଦ୍ରସ୍ତଵରାଜ
🔴 ବଳଭଦ୍ରସ୍ତଵରାଜ 🔴
➖➖➖➖➖➖
( ଶ୍ରୀଗର୍ଗସଂହିତାୟାଂ )
ଦୁର୍ୟୋଧନ ଉଵାଚ -
ସ୍ତୋତ୍ରଂ ଶ୍ରୀବଲଦେଵସ୍ୟ ପ୍ରାଡ୍ଵିପାକ ମହାମୁନେ ।
ଵଦ ମାଂ କୃପୟା ସାକ୍ଷାତ୍ସର୍ଵସିଦ୍ଧିପ୍ରଦାୟକମ୍ ॥ ୧॥
ପ୍ରାଡ୍ଵିପାକ ଉଵାଚ -
ସ୍ତଵରାଜଂ ତୁ ରାମସ୍ୟ ଵେଦଵ୍ୟାସକୃତଂ ଶୁଭମ୍ ।
ସର୍ଵସିଦ୍ଧିପ୍ରଦଂ ରାଜଞ୍ଛୃଣୁ କୈଵଲ୍ୟଦଂ ନୃଣାମ୍ ॥ ୨॥
ଦେଵାଦିଦେଵ ଭଗଵନ୍କାମପାଲ ନମୋଽସ୍ତୁ ତେ ।
ନମୋଽନନ୍ତାୟ ଶେଷାୟ ସାକ୍ଷାଦ୍ରାମାୟ ତେ ନମଃ ॥ ୩॥
ଧରାଧରାୟ ପୂର୍ଣାୟ ସ୍ଵଧାମ୍ନେ ସୀରପାଣୟେ ।
ସହସ୍ରଶିରସେ ନିତ୍ୟଂ ନମଃ ସଙ୍କର୍ଷଣାୟ ତେ ॥ ୪॥
ରେଵତୀରମଣ ତ୍ଵଂ ଵୈ ବଲଦେଵାଚ୍ୟୁତାଗ୍ରଜଃ ।
ହଲାୟୁଧ ପ୍ରଲମ୍ବଘ୍ନ ପାହି ମାଂ ପୁରୁଷୋତ୍ତମ ॥ ୫॥
ବଲାୟ ବଲଭଦ୍ରାୟ ତାଲାଙ୍କାୟ ନମୋ ନମଃ ।
ନୀଲାମ୍ବରାୟ ଗୌରାୟ ରୌହଣେୟାୟ ତେ ନମଃ ॥ ୬॥
ଧେନୁକାରିର୍ମୁଷ୍ଟିକାରିଃ କୂଟାରିର୍ବଲ୍ଵଲାନ୍ତକଃ ।
ରୁକ୍ମ୍ୟରିଃ କୂପକର୍ଣାରିଃ କୁମ୍ଭାଣ୍ଡାରିସ୍ତ୍ଵମେଵ ହି ॥ ୭॥
କାଲିନ୍ଦୀଭେଦନୋଽସି ତ୍ଵଂ ହସ୍ତିନାପୁରକର୍ଷକଃ ।
ଦ୍ଵିଵିଦାରିର୍ୟାଦଵେନ୍ଦ୍ରୋ ଵ୍ରଜମଣ୍ଡଲମଣ୍ଡନଃ ॥ ୮॥
କଂସଭ୍ରାତୃପ୍ରହନ୍ତାସି ତୀର୍ଥୟାତ୍ରାକରଃ ପ୍ରଭୁଃ ।
ଦୁର୍ୟୋଧନଗୁରୁଃ ସାକ୍ଷାତ୍ପାହି ପାହି ପ୍ରଭୋ ତ୍ଵତଃ ॥ ୯॥
ଜୟ ଜୟାଚ୍ୟୁତଦେଵ ପରାତ୍ପର ସ୍ଵୟମନନ୍ତଦିଗନ୍ତଗତଶ୍ରୁତ ।
ସୁରମୁନୀନ୍ଦ୍ରଫଣୀନ୍ଦ୍ରଵରାୟ ତେ ମୁସଲିନେ ବଲିନେ ହଲିନେ ନମଃ ॥ ୧୦॥
ୟଃ ପଠେତ୍ସତତଂ ସ୍ତଵନଂ ନରଃ ସ ତୁ ହରେଃ ପରମଂ ପଦମାଵ୍ରଜେତ୍ ।
ଜଗତି ସର୍ଵବଲଂ ତ୍ଵରିମର୍ଦନଂ ଭଵତି ତସ୍ୟ ଧନଂ ସ୍ଵଜନଂ ଧନମ୍ ॥ ୧୧॥
ଇତି ଶ୍ରୀଗର୍ଗସଂହିତାୟାଂ ବଲଭଦ୍ରଖଣ୍ଡେ
ବଲଭଦ୍ରସ୍ତଵରାଜଵର୍ଣନଂ ନାମୈକାଦଶୋଽଧ୍ୟାୟଃ ॥ ଗ. ସଂ. ଅଧାୟ ୧୧॥
Comments
Post a Comment