ଶ୍ରୀଶ୍ରୀରାଧାକୃଷ୍ଣୋଜ୍ଜ୍ୱଲକୁସୁମକେଳି଼ଃ
🌷🌹ଶ୍ରୀଶ୍ରୀରାଧାକୃଷ୍ଣୋଜ୍ଜ୍ୱଲକୁସୁମକେଳି଼ଃ ।।🌹🌷
ସଖୀବୃନ୍ଦୈର୍ୱୃନ୍ଦାର୍ଚିତମୁଦିତବୃନ୍ଦାବନପଦଂ
ବିନୋଦେନାସାଦ୍ୟ ପ୍ରିୟକୁସୁମପାତ୍ରାଙ୍କୁରଫଲମ୍ ।
ହରନ୍ତ୍ୟାଂ ରାଧାୟାଂ ଧ୍ୱନିଭିରଭିସଙ୍ଗମ୍ୟ ଗିରିଭୃ-
ଦ୍ଧୃତାଟୋପଂ ତାଭିଃ ସହ ବିବଦମାନୋଽବଦଦିଦମ୍ ॥ ୧॥
ରହଃ ପାଟଚର୍ୟଃ କୁରୁତ କିମିଦଂ ଯୌବତମଦା-
ତ୍ସ୍ଫୁଟଂ ଯୁଷ୍ମାଭିର୍ମେ ବିପିନମପଣଂ ନାଶିତମଦଃ ।
ଅତୋ ବଲ୍ଲର୍ୟର୍ଥେ ତନୁତଟିମବଶ୍ୟଂ ଫଲକୃତେ
କୁଚାନ୍ୱୋ ଲୁଣ୍ଠାମଃ କିସଲୟପଦେ ଚାଧରକୁଲମ୍ ॥ ୨॥
ଇତି ନିଶମ୍ୟ ଭ୍ରୁଭଙ୍ଗମବଲୋକନ୍ତ୍ୟାଂ ଲଲିତାୟାମନ୍ୟାଃ ସସ୍ମିତମୂଚୁଃ
ବଦନ୍ତ୍ୟଃ ସ୍ମୋ ନୂନଂ ତବ କିଟବ ସତ୍ୟଂ ହିତମିଦଂ
ବୃଥାଟୋପଂ ହିତ୍ୱା ବ୍ରଜ ଝଟଟି ନନ୍ଦୀଶ୍ୱରପୁରମ୍ ।
ନ ଜାନୀଷେ କିଂ ତଂ ପ୍ରଖରଲଲିତାବିକ୍ରମତଟିଂ
ଯୟା ତେ ବାନ୍ୟାନ୍ତଃ କ୍ଷପିତମସକୃତ୍ପୌରୁଷୟଶଃ ॥ ୩॥
ଇତି ବିଶାଖାକଥିତମାକର୍ଣ୍ୟ ସଦର୍ପାଭିନୟଂ କୃଷ୍ଣଃ ପୁନଃ ପ୍ରାହ
ଅହୋ ଶିଷ୍ୟା ଏବଂ ହି କୁରୁତ ଧାଋଷ୍ତ୍ୟଂ ମୟି ପୁନ-
ର୍ୟଥା ଶ୍ରୁତ୍ୱା କ୍ରୁଧନ୍ତ୍ୟଖିଲଲତିକାମଣ୍ଡନବରଃ ।
ମୟା କାମଂ ଯତ୍ର ପ୍ରଗୁଣଗୁରୁଣା ଯତ୍କରୁଣୟା
ବିତୀର୍ଣା ବୋ ଦୀକ୍ଷା ନ କିଲ କତିଧା ଜୈନରଚିତାଃ ॥ ୪॥
ଏତନ୍ନିଶମ୍ୟ ଲଜ୍ଜୟା କୋପମିବ ବିବୃଣ୍ୱତୀଷୁ ସର୍ୱାସୁ
ପ୍ରସଙ୍ଗାନ୍ତରେଣ ତଂ ବିଜେତୁଂ ବିଶାଖା ସନ୍ୟାସମାହ
ସ୍ୱୟଂ ଯୋ ନିର୍ବନ୍ଧାଦ୍ଧନବିତରଣୈର୍ଲୋକତଟିଭିଃ
କରୋତ୍ୟାରାମଂ ଯଂ ସ ହି ଭବତି ତସ୍ୟୈବ ନିୟତମ୍ ।
ଇଦଂ ତୁ ଶ୍ରୀବୃନ୍ଦାବନମକୃତମନ୍ୟୈରନୁଦିନଂ
ସମାନଂ ସର୍ୱେଷାଂ କଥମିବ ତବୈବାଦ୍ୟ ଭବିତା ॥ ୫॥
ଇତି ବିଶାଖାସନ୍ୟାୟକଥିତମାକର୍ଣ୍ୟ ସଦର୍ପାଭିନୟଂ ଶ୍ରୀକୃଷ୍ଣଃ ପୁନଃ ପ୍ରାହ
ଅକୁଣ୍ଠଂ ବୈକୁଣ୍ଠେ ଦିବି ଭୁବି ଚ ରସାୟାଂ ଶ୍ରୁତିଗଣୈଃ
ପ୍ରଗୀତଂ ମନ୍ନାମ୍ନା ବନମିତି ନ ଯଦ୍ୱଃ ଶ୍ରୁତିମିତମ୍ ।
ନ ଯୁଷ୍ମଦ୍ଦୋଷୋଽସ୍ମିନ୍ପ୍ରବଲମଦଗର୍ୱୋତ୍ତରୁଣତା
ତ୍ରିଦୋଷି ବାଧିର୍ୟଂ ପ୍ରଚୁରମକରୋଦ୍ୟତ୍ସ୍ଫୁଟମିଦମ୍ ॥ ୬॥
ଏତଦାକର୍ଣ୍ୟ ତିର୍ୟଗ୍ୱିଲୋକୟନ୍ତୀ ରାଧା ସସ୍ମିତମୁବାଚ
ଅୟେ ଚେଦ୍ୟନ୍ନାମ୍ନାଙ୍କିତମିତି ଭବେତ୍ତସ୍ୟ ବିପିନଂ
ତଦାସ୍ମଦ୍ୱୃନ୍ଦାୟା ଭବତି ସୁତରାମେବ କପଟିନ୍।
ଯତୋଽସ୍ୟ ନାମ୍ନୈବ ତ୍ରିଜଗତି ଜନୈର୍ଗୀୟତ ଇହ
ସ୍ୱୟଂ ଚ ଶ୍ରୀସ୍ୱାମିନ୍ବତ ତୁ ନ ହି ନାମ୍ନା କ୍ୱଚିଦପି ॥ ୭॥
ଇତି ରାଧାୟାଃ ସୟୁକ୍ତିକବାକ୍ପୀୟୂଷମତ୍ତଃ ଶ୍ରୀକୃଷ୍ଣଃ ସସ୍ମିତମାହ
ଇୟଂ ଲକ୍ଷ୍ମୀବୃନ୍ଦାଦପି ମଧୁରବୃନ୍ଦା ମମ ବଧୂ-
ର୍ଭବେନ୍ନୋ ଚେଦାରାତ୍ସଶପଥମିମଂ ପୃଚ୍ଛତ ସତୀମ୍ ।
ଶ୍ରୁତୌ ଯଦ୍ଦମ୍ପତ୍ୟୋର୍ନ ହି ଭବତି ଭେଦସ୍ତ୍ରୁଟିରତୋ
ଦ୍ୱୟୋର୍ନୌ ନାମ୍ନୈବ ତ୍ରିଜଗତି ଜନୋ ଗାୟତି ବନମ୍ ॥ ୮॥
ଇତି ଶ୍ରୀକୃଷ୍ଣସ୍ୟ ବାଗମୃତମାପୀୟ ରାଧା ବୃନ୍ଦାଂ ପ୍ରତି ନୀଚୈରାହ
ଇଦଂ ବୃନ୍ଦେ ସତ୍ୟଂ ଭବତି ନ ହି କିଂ ବା କଥୟ ନଃ
ପୁରୋ ଲଜ୍ଜାଂ ହା ହା କଥମିବ ତନୋଷି ପ୍ରିୟଗଣେ ।
ଋତଂ ଚେତ୍ତଦ୍ରୋଷଚ୍ଛଲତ ଇବ ଗଚ୍ଛ କ୍ଷଣମିତୋ
ଯଥା ନାନାବାଦୈର୍ୱୟମିହ ଜୟାମଃ ଶଠଗୁରୁମ୍ ॥ ୯॥
ଇଦଂ କର୍ଣେ ତସ୍ୟା ନିଗଦିତବତୀଷ୍ୱାଶୁ ସହସଂ
ମୃଷାରୋଷାଦେଷା ଚଲକୁଟିଲଚିଲ୍ଲୀକ୍ଷଣତଟୈଃ ।
ଅଲଂ ଶୋଣୈରେଣୀଦୃଗତିକୁଟିଲାଃ ପ୍ରେକ୍ଷ୍ୟ ସଖି ତାଃ
ସଗର୍ୱେ ଗୋବିନ୍ଦେ ପରିଷଦି ଦଦାବୁତ୍ତରମିଦମ୍ ॥ ୧୦॥
ଅୟେ ପଦ୍ମାଷଣ୍ଡ ବ୍ରଜନଗରଭଣ୍ଡ ବ୍ରଜବନା-
ଦିତସ୍ତ୍ୱଂ ଚେଦିଚ୍ଛେ ରୁଚିରବନରାଜତ୍ୱମଚିରାତ୍ ।
ସଖୀସ୍ଥଲ୍ୟାଃ ଷଷ୍ଠୀଂ ଭଜ ନିଜବଧୂଂ ତାଂ କିଲ ତଦା
ଯଥା ସା ତୁଷ୍ଟ୍ୟା ତେ ବଦରବନରାଜ୍ୟଂ ବିତରତୀ ॥ ୧୧॥
ତତ ଇତ୍ଥଂ ତତ୍ସୌନ୍ଦର୍ୟାଦିସ୍ତବନାରଭଟ୍ୟା ଶ୍ରୀଗାନ୍ଧର୍ୱାୟା ବୃନ୍ଦାଟବ୍ୟାଂ
ସ୍ୱତାମର୍ପୟନ୍ତୀ ତମୁପଲଭ୍ୟ ସୋଲ୍ଲାସଂ ପୁନରାହ
ଯଦେତଦ୍ବିମ୍ବତ୍ୱାଲ୍ଲସତି ମୁଖମସ୍ୟାଃ କମଲତୋ
ଦୃଶୋର୍ଦ୍ୱନ୍ଦ୍ୱଂ ଚଞ୍ଚତ୍କୁବଲୟମୃଗାନାମିବ ଚୟାତ୍ ।
ଉଦଞ୍ଚନ୍ନାସଶ୍ରୀଃ ଶୁକନବୟୁବତ୍ରୋଟିବଲନା-
ଲ୍ଲସଦ୍ବନ୍ଧୂକେଭ୍ୟୋଽପି ଚ ରୁଚିଘଟରାଜ୍ୟଦଧରଃ ॥ ୧୨॥
ଅୟେ ଦନ୍ତାଃ କୁନ୍ଦାବଲୀକରକବୀଜାଦିରଚନା-
ଦପି ସ୍ଫୀତା ଗୀତାଃ କୁମୁଦବନତୋଽପି ସ୍ମିତଲବଃ ।
ଶ୍ରୁତିଦ୍ୱନ୍ଦ୍ୱଂ ମୁଞ୍ଜାଲଲିତଗୁଣପୁଞ୍ଜାଦପି ପୁନ-
ର୍ଲଲାଟୋଦ୍ୟଲ୍ଲକ୍ଷ୍ମୀଃ ସୁଭଗବକପୁଷ୍ପାଦତିତରାମ୍ ॥ ୧୩॥
ଚଲାଚିଲ୍ଲୀବଲ୍ଲୀ ଭ୍ରମରବରପଙ୍କ୍ତେରପି ତତଃ
ସ୍ଫୁରଞ୍ଜମ୍ବୂପକ୍ୱପ୍ରଚୁରଫଲତୋଽପ୍ୟେତଦଲକଃ ।
କଚୋଲ୍ଲାସଃ ସ୍ଫୁର୍ଜନ୍ମଦଶିଖିଶିଖଣ୍ଡାଦପି ମଧୌ
ପିକୋତ୍ତାନଧ୍ୱାନାଦପି ପରମୁଦାରଂ ମୃଦୁବଚଃ ॥ ୧୪॥
ନିତମ୍ବଃ ଶୈଲାନାମପି ବିପୁଲଭାରାଦତିଗୁରୁଃ
କୁଚୌ ତୁଙ୍ଗୌ ବିଲ୍ୱାଦିକଫଲକୁଲାଦପ୍ୟତିଘନୌ ।
ଭୁଜୟୁଗ୍ମଂ ଭ୍ରାଜଦ୍ୱ୍ରତତିତତିତୋଽପୀହ ଲଲିତାଂ
ଲଲାମଶ୍ରୀଲୋମାବଲୀରପି ଭୁଜାଙ୍ଗୀତତିରୁଚେଃ ॥ ୧୫॥
ବରୋରୂ ରମ୍ଭାଲିକ୍ରମରଚନଜୃମ୍ଭାଦପି ଗତି-
ର୍ମରାଲୀପାଲୀନାମପି ଚଲନରଙ୍ଗାନ୍ମୃଦୁତରା ।
ପଦଦ୍ୱନ୍ଦ୍ୱଂ ଫୁଲ୍ଲସ୍ଥଲକମଲବୃନ୍ଦାଦପି ସଦା
ବଦାନ୍ୟତ୍ୱଂ କଲ୍ପଦ୍ରୁମନିକରତୋଽପି ବ୍ରଜପୁରେ ॥ ୧୬॥
ଦୃଶୋଃ ପ୍ରେମ୍ଣା ଶଶ୍ୱତ୍କ୍ଷରଦମୃତନିଃସ୍ୟନ୍ଦବିତତି-
ସ୍ତଥା ସ୍ୱେଦସ୍ତୋମଃ କନକଜୟିବର୍ଷ୍ମପ୍ରପତିତଃ ।
ମନୋଗଙ୍ଗାକୃଷ୍ଣାବିବିଧସରସୀବୃନ୍ଦବିଚଲ-
ତ୍ପ୍ରବାହାଦପ୍ୟୁଚ୍ଚୈଃ ପୁଲକ ଉତ ନୀପସ୍ତବକତଃ ॥ ୧୭॥
ଅଲଂ ଗନ୍ଧସ୍ନିଗ୍ଧା କନକଗିରିବନ୍ଦ୍ୟା ଦ୍ୟୁତିରପି
ସ୍ଫୁଟତ୍ଫୁଲ୍ଲଚମ୍ପାବଲୀକନକୟୂଥୀନିବହତଃ
ଅପି ଭ୍ରାଜଦ୍ୱକ୍ଷଃସ୍ଥଲମତୁଲସିଂହାସନକୁଲା-
ଦପି ଭ୍ରାମ୍ୟନ୍ନେତ୍ରକ୍ରମଣନଟନଂ ଖଞ୍ଜନଗଣା-
ପରଂ ଚାସ୍ୟାଦୀନାଂ ବିକସନଭରାଦେଷୁ କିଲ ସ
କ୍ୱଚିନ୍ମାନାନ୍ମ୍ଲାନେର୍ବତ ଭବତି ସୈବୈଷ୍ୱିହ ଯତଃ ।
ଅତୋଽସ୍ୟାଶ୍ଛାୟୈବ ସ୍ଫୁଟମଟବିରିତ୍ଥଂ ଖଲୁ ଭବେ-
ତ୍କଥଙ୍କାରଂ ସ୍ୱାମିନ୍ଭବତୁ ଭବତଃ ସାମ୍ପ୍ରତମିୟମ୍ ॥ ୧୯॥
ଅପି ଚ
ମୁଖାଦୀନାଂ ପଦ୍ମାଦିକପୁରୁପଦାର୍ଥଃ ସମରୁଚଃ
ପ୍ରପନ୍ନାଃ ସାରୂପ୍ୟଂ ଯଦତି ବିଲସନ୍ତି ସ୍ଫୁଟମତଃ ।
ଅଜାଣ୍ଡେ ବିଖ୍ୟାତା ପ୍ରକୃତିମଧୁରେୟଂ ସମଗୁଣା
ତତଃ ଶ୍ରୀରାଧାୟାଃ ପ୍ରକଟମଟବୀୟଂ ପ୍ରିୟସଖୀ ॥ ୨୦॥
ବିରାଜାଛାୟାତ୍ୱେ ପ୍ରକଟତରସାରୂପ୍ୟବଲନା-
ତ୍ସଖୀତ୍ୱେଽପି କ୍ରୀଡାସ୍ପଦମଟବିରେଷା ରସମୟୀ ।
ସଦୈତସ୍ୟା ଏବ ବ୍ରଜଭୁବି ଭବତ୍ୟେବ ସୁତରାଂ
ଯତଶ୍ଛାୟାସଖ୍ୟୋଃ ସ୍ଫୁରତି ନ ହି ଭେଦଃ କ୍ୱଚିଦପି ॥ ୨୧॥
ଅଦୋ ବୃନ୍ଦାନାନ୍ଦୀସ୍ତବରସଭରୈଃ ପୋଷିତବପୁଃ
ଶ୍ରିୟା ପୂର୍ଣେ ଘୂର୍ଣତ୍ସ୍ମରନଟନତୃଷ୍ଣାତରଲିତେ ।
ଅହୋ ରାଧୋନ୍ମୀଲନ୍ମନସିଜମହାନାଟକନଟୀ
ନଟାଚାର୍ୟେ ତସ୍ମିନ୍ନଟିତୁମିବ ଦୃଷ୍ଟିଂ ସମତନୋତ୍ ॥ ୨୨॥
ବିଶାଖା ତୁ ସ୍ନେହସ୍ନପନକୃତରୋମଞ୍ଚବିଲସ-
ଦ୍ୱପୁସ୍ତାମାଲିଙ୍ଗ୍ୟ ସ୍ତବରଚିତହ୍ରୀଶ୍ରୀସ୍ମିତବୃତାମ୍ ।
ସହାସଂ ଦୃଗ୍ଭଙ୍ଗ୍ୟା ଗିରିଧରମୁପାଲଭ୍ୟ ସହସଂ
ବିନୋଦୈର୍ୱୃନ୍ଦାୟାଃ ଶିରସି ସୁମନୋବୃଷ୍ଟିମକରୋତ୍ ॥ ୨୩॥
ଏତନ୍ମଧୁରବର୍ଣନାକର୍ଣନେନ ସ୍ୱାନ୍ତସ୍ତୋଷଂ ବହିର୍ୱିହସ୍ୟ
ସୋତ୍ପ୍ରାସଂ କୃଷ୍ଣଃ ପୁନରାହ
ତ୍ୱଦାଲେରଙ୍ଗାଲୀ ମମ କମନବୃନ୍ଦାବନତନୋଃ
ସଦଙ୍ଗାନାଂ କୁଞ୍ଜାଦିକରୁଚିରନାମ୍ନାଂ ରୁଚିଧନମ୍ ।
ଧ୍ରୁବଂ ହୃତ୍ୱା ମ୍ଲାନଂ ପ୍ରକଟମକରୋତ୍ତଂ କଥମିମଂ
ଇଦାନୀଂ ସାରୂପ୍ୟସ୍ତବନମିଷତୋ ରକ୍ଷସି ଶଠେ ॥ ୨୪॥
ତବାଲ୍ୟା ଏବଂ ଚେଦତି ଗୁଣଗଣା ମତ୍ପ୍ରିୟବନା-
ଦପି ଶ୍ରେଷ୍ଠଃ ସୁଷ୍ଠୁ ଧ୍ରୁବମିହ ଭବନ୍ତି ସ୍ଫୁଟମମୀ ।
ତଦା ତୁଚ୍ଛଂ ପୁଷ୍ପଂ କଥମପହରେତ୍ସେୟମଥବା
ସ୍ୱଭାବଶ୍ଚୌରାଣାଂ ପରଧନଜିଘୃକ୍ଷୁର୍ନ ହି ଚଲେତ୍ ॥ ୨୫॥
ପ୍ରକାରୈଶ୍ଛାୟାତୋ ଯଦତିବରବିମ୍ବାସ୍ୟ ମହିମା
ନମୁଚ୍ଚୈର୍ୱିସ୍ଫାର୍ୟ ସ୍ମରସି ମୟି ରାଧାଂ ବିତରିତୁମ୍ ।
କଥଂ ତତ୍ସ୍ୟାଦ୍ୟସ୍ମାତ୍ପତିପରବଶେୟଂ ତତ ଇମଂ
ସ ଚେଦାରାଦ୍ଦଦ୍ୟାଦ୍ଭବତି ମମ ତର୍ହ୍ୟେବ ମମତା ॥ ୨୬॥
ଏତଦ୍ୱିଚିତ୍ରରଙ୍ଗୋଚ୍ଛଲିତବାଗ୍ଭଣିବିଲାସସୁଧାସ୍ୱର୍ଧୁନୀତରଙ୍ଗେନୋତ୍ତରଲୀକୃତ-
ହୃଦ୍ୱୃତ୍ତିଦୃଢନୌକଂ ଶ୍ରୀରାଧାଂ ସସ୍ମିତମଲୋକୟନ୍ତୀଷୁ
ସର୍ୱାସୁ ସସ୍ମିତଂ ଲଲିତା ଲଲାପ
ପିପାସାର୍ଥଃ କଶ୍ଚିତ୍କ୍ଷୁଦିତବିବଶୋ ବର୍ତ୍ମନି ଚଲ-
ନ୍ମରୁକ୍ଷେତ୍ରେ କ୍ଷାରୋଦକମଲଭମାନୋଽପି ବିରସମ୍ ।
ସ୍ୱୟମ୍ଭୂସଂସ୍ତବ୍ୟଂ ହରିପୁରବରସ୍ଥାମପି ସୁଧାଂ
ପ୍ରପାତୁଂ ଦ୍ରାଗିଚ୍ଛନ୍ଜଗତି କିଲ ହାସ୍ୟାସ୍ପଦମଭୂତ୍ ॥ ୨୭॥
ତତୋ ରସିକଶେଖରଂ ବ୍ରଜରାଜକୁମାରଂ ସ ଦୃଗଞ୍ଚଲବିଭ୍ରମେଣ ପଶ୍ୟନ୍ତୀ
ସଖୀଃ ପ୍ରତି ଶ୍ରୀରାଧା ବ୍ୟଜହାର
ସ୍ଫୁଟଂ କାଲୀ ଶୈବ୍ୟା ଚମରବନିତା ମଧ୍ୟମବଧୂ-
ର୍ମହାପଦ୍ମା ପଦ୍ମା ପରମରୁଚିକୃତ୍କାମଦକୁଚା ।
ବରା ଷଷ୍ଠୀ ଚନ୍ଦ୍ରାବଲିରପି ଲସେଦ୍ୟସ୍ୟ ମହିଷୀ
କଥଂ ତସ୍ୟାପ୍ୟନ୍ୟା ଭବତୁ ଭୁବି ଯୋଗ୍ୟା ନବବଧୂଃ ॥ ୨୮॥
ତାଛ୍ରବଣତୋ ରୋଷେଣୈବ ସାଟୋପଂ ତାସାଂ ବାସନହାରାଦିକମାଦାତୁମୁପସର୍ପତି
ଶ୍ରୀବ୍ରଜେନ୍ଦ୍ରନନ୍ଦନେ ସ୍ଫୁଟମେବ ଚମ୍ପକଲତା ସୋଲ୍ଲୁଣ୍ଠମବଦୀ-
ବନେ ଫୁଲ୍ଲେ ଚିଲ୍ଲାତକପତିରୟଂ ବାଢମସକୃ-
ତ୍ସତୀରସ୍ମାନ୍ପ୍ରୀତ୍ୟା ପରିଚରତି ଭୋଗାଦିକୁସୁମୈଃ ।
ଇତି ଶ୍ରୀବୃତ୍ତାନ୍ତଂ ନିଷମୟିତୁମାର୍ୟାଂ ଦିଶ ନୃପେ
ଯଥା ଶୃଣ୍ୱନ୍ନସ୍ମୈ ସ୍ରଜମିହ ସୁଖଂ ପ୍ରେଷୟତି ସଃ ॥ ୨୯॥
ଇତି ଚମ୍ପକଲତାଲପିତମବଧାର୍ୟ ସ୍ମିତ୍ୱା ସଶିରୋଧୁନାନମୁବାଚ କୃଷ୍ଣଃ
ନୃପେନ୍ଦ୍ରେଣୈବାରାଦପଣବିପିନସ୍ୟାବନକୃତେ
ନିୟୁଜ୍ୟାସ୍ମାନ୍ଶଶ୍ୱଦ୍ୟଦୁତ ଗଦିତଂ ତା ଛୃଣୁତ ଭୋଃ ।
ନିଜୋ ବା ବାହ୍ୟୋ ବା ହରତି ଯ ଇହାସ୍ୟାପି ଗଲିତଂ
ଦଲଂ ବା ପୁଷ୍ପଂ ବା ହରତ କିଲ ତଦ୍ୱସ୍ତ୍ରପଦକମ୍ ॥ ୩୦॥
ଅତୋଽହଂ ଯୁଷ୍ମାକଂ ମଣିବସନହାରାଦିକମିଦଂ
ବଲେନୈବାଲୁଞ୍ଚ୍ୟ ପ୍ରମଦଭରତୋ ଯାମି ସଦନମ୍ ।
ନ ମନ୍ୟଧ୍ୱେ ପୁଷ୍ପାଙ୍କୁରଦଲହୃତିଂ ଚେନ୍ନନୁ ତଦା
ବିଚାରଂ ନୀବୀନାମପି କୁଚପଟାନାଂ ବିତରତ ॥ ୩୧॥
ଇତି ସୋଲ୍ଲୁଣ୍ଠମାଭାଷ୍ୟ ସୋଦ୍ଗ୍ରୀବମୁଦ୍ୱୀକ୍ଷ୍ୟ ଅୟେ ଧ୍ରୁବମେତା ଗୁଣବତ୍ୟୋ ନୀବ୍ୟଃ
ପରଦ୍ରବ୍ୟଂ ନ ରକ୍ଷୟିଷ୍ୟନ୍ତ ଏବ କିନ୍ତୁ କଠିଣେଷ୍ୱେତେଷ୍ୱେବ ତଲ୍ଲକ୍ଷଣଂ
ଲକ୍ଷ୍ୟତେ । ତଥା ହି
ଉରୋଜାନୁଚ୍ଛୂନାନ୍ୟଦଭିକଲୟାମ୍ୟଦ୍ୟ ଦିବସା-
ତ୍ପରସ୍ମାତ୍ତସ୍ମାନ୍ମେ କୁସୁମକୁଲମାତ୍ରୈବ ଭବିତା ।
ଅତୋ ଜିଜ୍ଞାସୋର୍ମେ ସ୍ୱକରମିଲନେ ଦୋଷ ଇହ ବୋ
ଭବେଚ୍ଚେନ୍ମତ୍ସ୍ପର୍ଶାତ୍ସ୍ୱୟମକପଟଂ ପ୍ରେକ୍ଷୟତ ତାନ୍॥ ୩୨॥
ତଦନନ୍ତରଂ ଭଙ୍ଗ୍ୟା ଶ୍ରୀରାଧାନୀବ୍ୟାମେବ ସନ୍ଦେହମିବୋଦ୍ଭବ୍ୟ ତସ୍ୟାଂ ଦୃଷ୍ଟିଂ
ନିକ୍ଷିପ୍ୟ ଅହୋ ନ୍ୟାୟ୍ୟମିତ୍ୟୁଚ୍ଚୈରାଭାଷ୍ୟ ରାଧାଂ ପ୍ରତ୍ୟୁବାଚ
ରାଧେ ତ୍ୱନ୍ନବନୀବିକା ଗୁଣମୟୀ ସାଧ୍ୱୀତି ସାଧ୍ୱୀଗୁଣୈଃ
ସଶ୍ଲାଘଂ ପରିଗୀୟତେ ଯଦିହ ତତ୍ସୋଲ୍ଲୁଣ୍ଠମେବ ସ୍ଫୁଟମ୍ ।
ଯଦ୍ଦୃଷ୍ଟେଃ କୃପୟା ଦ୍ରୁତଂ ନିବିଦତୋ ବନ୍ଧାଦ୍ୱିମୁକ୍ତାପ୍ୟସୌ
ତାମେବାଦ୍ୟ ଦୃଢଂ ସଦାତ୍ମସବିଧେ ନୀତ୍ୱା ବବନ୍ଧ ସ୍ୱୟମ୍ ॥ ୩୩॥
ଭୋଃ ପଶ୍ୟତ ପଶ୍ୟତ କୃତାଘ୍ନ୍ୟୋଽନୟା ନୀବ୍ୟା ଦମ୍ଭବୃତ୍ତିମାଚାର୍ୟ
ମତ୍ସୁରଭିପୁଷ୍ପାଣି ସ୍ୱାଧସ୍ତାଦ୍ରକ୍ଷିତାନି ସନ୍ତି ଯତୋ ରୋମାବଲୀ ନାମ
ଭ୍ରମରପଙ୍କ୍ତିସ୍ତତ୍ସୌରଭ୍ୟମନୁଭୂୟ ତଦନୁସରନ୍ତି ବର୍ତତେ। ଏତଦାକର୍ଣନେନ
ଭ୍ରୂଭଙ୍ଗ୍ୟା ତମାକ୍ଷିପ୍ୟ ଗୃହାୟ ଗଚ୍ଛନ୍ତ୍ୟାଂ ବଲାତ୍କୃଷ୍ଣେନ ବ୍ୟାଘୋତିତାୟାଂ
ରାଧାୟାଂ ତୁଙ୍ଗବିଦ୍ୟାବ୍ରବୀ-
ଶଠେନ୍ଦ୍ର ତ୍ୱଂ ଶଶ୍ୱତ୍ପଦକମପି ହର୍ତୁଂ ବଦସି ଯ-
ତ୍ତଦସ୍ମାଭିଃ ସୋଢଂ ନୃପସୁତତୟା ସଂପ୍ରତି ଶ୍ର୍ଣୁ ।
ସମସ୍ତାଃ ସମ୍ଭୂୟ ହ୍ରିୟମିହ ବିହାୟ ପ୍ରିୟତମାଂ
ଗ୍ରହିଷ୍ୟାମୋଽବଶ୍ୟଂ ବୟମପି ତବାଚ୍ଛିଦ୍ୟ ମୁରଲୀମ୍ ॥ ୩୪॥
ତତଃ ଶ୍ରୀକୃଷ୍ଣଃ ସଦର୍ପମୁପଦିଶନ୍ନିବାହ
ଅହଂ ସଖ୍ୟେ ଦକ୍ଷସ୍ଚତୁରୟୁବରାଜୋ ବ୍ରଜପୁରେ
ସ୍ୱକଂ ବୃନ୍ଦାରଣ୍ୟଂ ବିକସଦଭିରକ୍ଷାମ୍ୟବିବଶଃ
ପ୍ରଦାୟାରାଦଙ୍କସ୍ରଜମନୁଗତା ମତ୍କରୁଣୟା
ସମସ୍ତା ହିତ୍ୱୈତାମପସରତ ଚୌରୀଂ ଚଲସଖୀମ୍ ॥ ୩୫॥
ଏବମାକର୍ଣ୍ୟ ଲଲିତାନ୍ତଃ ସୁଷ୍ଠୁ ପ୍ରମୁଦିତା ସାକୁଟଭଙ୍ଗ୍ୟାହ
ପୁନର୍ଗର୍ୱଂ କୁର୍ୟାନ୍ନ ହି ବିଟ ଶଠାସ୍ମତ୍ପୁର ଇହ
ବ୍ରଜସ୍ୟୈତସ୍ୟାଲଂ ଚତୁରୟୁବରାଜୋଽହମିତି ଭୋଃ ।
ଯଦେଷା ତ୍ୱତ୍ସେବ୍ୟସ୍ମରନୁତରସେନ୍ଦ୍ରପ୍ରିୟସଖୀ
ମହାରଞ୍ଜୀ ଚଣ୍ଡା ତ୍ୱଦୁପରି ଚ ରାଗାତ୍ପ୍ରତପତି ॥ ୩୬॥
କୁଟିଲଦୃଷ୍ଟ୍ୟା ସହାସଲଜ୍ଜୟା ତାମବଲୋକୟନ୍ତୀଂ ଶ୍ରୀରାଧାଂ ପ୍ରତି ଶ୍ରୀକୃଷ୍ଣୋ
ବ୍ୟଜହାର
ମୁଧାବାଦଂ ରାଧେ ନ ସୃଜ ନିଜମତ୍ତାଲିଲପନା-
ଦ୍ୱ୍ରଜେ ଶୁଦ୍ଧା ସାଧ୍ୱୀ ଯଦସି ତଦିଦଂ ବାଚ୍ଣି ବିନୟୈଃ ।
ତ୍ୱମେତା ହିତ୍ୱୋଗ୍ରା ବନକରକୃତେ ମହ୍ୟମଚିରା-
ତ୍ପ୍ରସାଦଂ ଦତ୍ତ୍ୱା ତେ ରୁଚିରଶୁଚିମାଲାଂ ବ୍ରଜ ଗୃହମ୍ ॥ ୩୭॥
ତା ଛ୍ରୁତ୍ୱା ସଭ୍ରୂଭଙ୍ଗଂ ଶ୍ରୀରାଧା ଭଙ୍ଗ୍ୟାହ
ତ୍ୱମାସାଂ ବୈଦଗ୍ଧୀଘଟିତବପୁଷାଂ ସଂସଦି ମଦା-
ନ୍ନ ଚେମଂ ଭଙ୍ଗ୍ୟାଖ୍ୟାଂ କୁନଟକୁନତିଂ ନାଟୟ ବୃଥା ।
ବନାଦସ୍ମାଦ୍ଗତ୍ୱା ସ୍ୱକମୁଚିତଭଣ୍ଡତ୍ୱମଚିରା-
ନ୍ନିଜସ୍ଥାନୀମଧ୍ୟେ ରଚୟ ନିବସନ୍ଭଣ୍ଡସଖିଭିଃ ॥ ୩୮॥
ତତଃ କୃଷ୍ଣଃ ସ୍ମିତ୍ୱା ସସୌଟୀର୍ୟମୁବାଚ
ବ୍ରଜେଽସ୍ମଞ୍ଜୁଷ୍ଟାନ୍ନାଶନନିରତକୀନାଶବନିତାଃ
କୁରୁଧ୍ୱେ ମେ ନଷ୍ଟାଂ ପ୍ରକଟମଟବୀଂ କସ୍ୟ ବଲତଃ ।
ଇଦାନୀଂ ତାଛାନ୍ତିଂ ବତ ଝଟିତି ଲବ୍ଧୁଂ ଗିରିପତେ-
ର୍ଗୁହାକାରାଗାରଂ ଘନତରତମିଶ୍ରଂ ପ୍ରବିଶତ ॥ ୩୯॥
ତଦାକର୍ଣ୍ୟ ସସ୍ମିତଗର୍ୱଂ ବିଶାଖାବ୍ରବୀ-
ଭବାଦୃକ୍ସମ୍ପୂଜ୍ୟୋଜ୍ଜ୍ୱଲକୁଲବଦେତତ୍ପିତୃପଦୈଃ
ସ୍ୱୟଂ ଦତ୍ତା ଯସ୍ମୈ ନବକମଲିନୀୟଂ ଗୁଣବତୀ ।
ଅହୋ ସର୍ୱଶ୍ରେଷ୍ଠଃ ସ ଚ ତବ ବିତସ୍ୟାପି କୃଷକ-
ସ୍ତଥୋଚ୍ଛିଷ୍ଟପ୍ରାଶୀ ପ୍ରଥିତଜଟିଲାସୂନୁରଭବତ୍ ॥ ୪୦॥
ସଦା ପଦ୍ମାପୁଷ୍ଟାଧରଗଲିତମାଧ୍ୱୀକଧୟନା-
ନ୍ନିକାମଂ ଶ୍ୟାମାତ୍ମା ଭବସି ଯଦପି ଦ୍ରାଗପି ତଥା ।
ବିଚାର୍ୟ ତ୍ୱଂ ସାଧ୍ୱୀନୁତଗୁଣବିଧୁଂ ମାତୁଲବଧୂଂ
ଭଜେମାମତ୍ର ସ୍ୟାତ୍କିଟବ ଶିବଲାଭସ୍ତବ ଯଥା ॥ ୪୧॥
ତା ଛ୍ରୁତ୍ୱା ସନର୍ମଭଙ୍ଗ୍ୟୋକ୍ତ୍ୟା ଦବୀୟଃସମ୍ବନ୍ଧଂ ଖ୍ୟାପୟନ୍କୃଷ୍ଣଃ
ସାଦ୍ରମାଲଲାପ
ଅସାବସ୍ମନ୍ମାତୁର୍ଜନୟତୃପ୍ରସୂପୌତ୍ରବନିତେତ୍ୟ୍-
ଅଲଂ ଜ୍ଞାତଂ ଯସ୍ମିନ୍କ୍ଷଣ ଇହ ସଦୈନଂ ତଦବଧି ।
ନମାମି ଧ୍ୟାୟାମି ଦ୍ରୁତମନୁସରାମି ବ୍ରଜପୁରେ
ଗ୍ରହୀତୁଂ ସତ୍କାମାଶିଷମତିତରାଂ ଭକ୍ତିବିନତଃ ॥ ୪୨॥
ଉଦଞ୍ଚନ୍ମଞ୍ଜୀରଧ୍ୱନିସହଚରୀସଞ୍ଚୟଜୁଷ-
ଶ୍ଚଲନ୍ତ୍ୟା ରାଧାୟାଃ ପ୍ରକଟିତରୁଷଃ ଶ୍ରୀଗିରିଧରଃ ।
ଗିରୀନ୍ଦ୍ରାତ୍ପାରୀନ୍ଦ୍ରାଧିକଗତିରୁପେତ୍ୟାଶୁ ନଖରୈ-
ର୍ଗଜେନ୍ଦ୍ରୋଦ୍ୟତ୍କୁମ୍ଭଦ୍ୱୟମିବ ଦଦାର ସ୍ତନୟୁଗମ୍ ॥ ୪୩॥
ଇଦଂ ରାଧାକୃଷ୍ଣୋଜ୍ଜ୍ୱଲକୁସୁମକେଲିକଲିମଧୁ
ପ୍ରିୟାଲୀନର୍ମାଲିପରିମଲୟୁତଂ ଯସ୍ୟ ଭଜନାତ୍ ।
ମମାନ୍ଧସ୍ୟାପ୍ୟେତଦ୍ୱଚନମଧୁପେନାଲ୍ପଗତିନା
ମନାଗ୍ଘ୍ରାତଂ ତନ୍ମେ ଗତିରତୁଲରୂପାଙ୍ଘ୍ରିଜରଜଃ ॥ ୪୪॥
ଇତି ଶ୍ରୀରର୍ଘୁନାଥଦାସଗୋସ୍ୱାମିବିରଚିତସ୍ତବାବଲ୍ୟାଂ
ଶ୍ରୀଶ୍ରୀରାଧାକୃଷ୍ଣୋଜ୍ଜ୍ୱଲକୁସୁମକେଲିଃ ସମ୍ପୂର୍ଣା ।
Comments
Post a Comment