ଏକାଦଶୋଽଧ୍ୟାୟଃ

 🔴॥ ଏକାଦଶୋଽଧ୍ୟାୟଃ ॥🔴

ଓଂ ଋଷିରୁଵାଚ ॥ ୧॥

ଦେଵ୍ୟା ହତେ ତତ୍ର ମହାସୁରେନ୍ଦ୍ରେ

        ସେନ୍ଦ୍ରାଃ ସୁରା ଵହ୍ନିପୁରୋଗମାସ୍ତାମ୍ ।

କାତ୍ୟାୟନୀଂ ତୁଷ୍ଟୁଵୁରିଷ୍ଟଲାଭାଦ୍

        ଵିକାଶିଵକ୍ତ୍ରାବ୍ଜଵିକାଶିତାଶାଃ ॥ ୨॥

ଦେଵି ପ୍ରପନ୍ନାର୍ତିହରେ ପ୍ରସୀଦ

        ପ୍ରସୀଦ ମାତର୍ଜଗତୋଽଖିଲସ୍ୟ ।

ପ୍ରସୀଦ ଵିଶ୍ଵେଶ୍ଵରି ପାହି ଵିଶ୍ଵଂ

        ତ୍ଵମୀଶ୍ଵରୀ ଦେଵି ଚରାଚରସ୍ୟ ॥ ୩॥

ଆଧାରଭୂତା ଜଗତସ୍ତ୍ଵମେକା

        ମହୀସ୍ଵରୂପେଣ ୟତଃ ସ୍ଥିତାସି ।

ଅପାଂ ସ୍ଵରୂପସ୍ଥିତୟା ତ୍ଵୟୈତ-

        ଦାପ୍ୟାୟତେ କୃତ୍ସ୍ନମଲଙ୍ଘ୍ୟଵୀର୍ୟେ ॥ ୪॥

ତ୍ଵଂ ଵୈଷ୍ଣଵୀଶକ୍ତିରନନ୍ତଵୀର୍ୟା

        ଵିଶ୍ଵସ୍ୟ ବୀଜଂ ପରମାସି ମାୟା ।

ସମ୍ମୋହିତଂ ଦେଵି ସମସ୍ତମେତତ୍

        ତ୍ଵଂ ଵୈ ପ୍ରସନ୍ନା ଭୁଵି ମୁକ୍ତିହେତୁଃ ॥ ୫॥

ଵିଦ୍ୟାଃ ସମସ୍ତାସ୍ତଵ ଦେଵି ଭେଦାଃ

        ସ୍ତ୍ରିୟଃ ସମସ୍ତାଃ ସକଲା ଜଗତ୍ସୁ ।

ତ୍ଵୟୈକୟା ପୂରିତମମ୍ବୟୈତତ୍

        କା ତେ ସ୍ତୁତିଃ ସ୍ତଵ୍ୟପରାପରୋକ୍ତିଃ ॥ ୬॥

ସର୍ଵଭୂତା ୟଦା ଦେଵୀ ଭୁକ୍ତିମୁକ୍ତିପ୍ରଦାୟିନୀ ।

ତ୍ଵଂ ସ୍ତୁତା ସ୍ତୁତୟେ କା ଵା ଭଵନ୍ତୁ ପରମୋକ୍ତୟଃ ॥ ୭॥

ସର୍ଵସ୍ୟ ବୁଦ୍ଧିରୂପେଣ ଜନସ୍ୟ ହୃଦି ସଂସ୍ଥିତେ ।

ସ୍ଵର୍ଗାପଵର୍ଗଦେ ଦେଵି ନାରାୟଣି ନମୋଽସ୍ତୁ ତେ ॥ ୮॥

କଲାକାଷ୍ଠାଦିରୂପେଣ ପରିଣାମପ୍ରଦାୟିନି ।

ଵିଶ୍ଵସ୍ୟୋପରତୌ ଶକ୍ତେ ନାରାୟଣି ନମୋଽସ୍ତୁ ତେ ॥ ୯॥

ସର୍ଵମଙ୍ଗଲମାଙ୍ଗଲ୍ୟେ ଶିଵେ ସର୍ଵାର୍ଥସାଧିକେ ।

ଶରଣ୍ୟେ ତ୍ର୍ୟମ୍ବକେ ଗୌରି ନାରାୟଣି ନମୋଽସ୍ତୁ ତେ ॥ ୧୦॥

ସୃଷ୍ଟିସ୍ଥିତିଵିନାଶାନାଂ ଶକ୍ତିଭୂତେ ସନାତନି ।

ଗୁଣାଶ୍ରୟେ ଗୁଣମୟେ ନାରାୟଣି ନମୋଽସ୍ତୁ ତେ ॥ ୧୧॥

ଶରଣାଗତଦୀନାର୍ତପରିତ୍ରାଣପରାୟଣେ ।

ସର୍ଵସ୍ୟାର୍ତିହରେ ଦେଵି ନାରାୟଣି ନମୋଽସ୍ତୁ ତେ ॥ ୧୨॥

ହଂସୟୁକ୍ତଵିମାନସ୍ଥେ ବ୍ରହ୍ମାଣୀରୂପଧାରିଣି ।

କୌଶାମ୍ଭଃକ୍ଷରିକେ ଦେଵି ନାରାୟଣି ନମୋଽସ୍ତୁ ତେ ॥ ୧୩॥

ତ୍ରିଶୂଲଚନ୍ଦ୍ରାହିଧରେ ମହାଵୃଷଭଵାହିନି ।

ମାହେଶ୍ଵରୀସ୍ଵରୂପେଣ ନାରାୟଣି ନମୋଽସ୍ତୁତେ ॥ ୧୪॥

ମୟୂରକୁକ୍କୁଟଵୃତେ ମହାଶକ୍ତିଧରେଽନଘେ ।

କୌମାରୀରୂପସଂସ୍ଥାନେ ନାରାୟଣି ନମୋଽସ୍ତୁ ତେ ॥ ୧୫॥

ଶଙ୍ଖଚକ୍ରଗଦାଶାର୍ଙ୍ଗଗୃହୀତପରମାୟୁଧେ ।

ପ୍ରସୀଦ ଵୈଷ୍ଣଵୀରୂପେ ନାରାୟଣି ନମୋଽସ୍ତୁ ତେ ॥ ୧୬॥

ଗୃହୀତୋଗ୍ରମହାଚକ୍ରେ ଦଂଷ୍ଟ୍ରୋଦ୍ଧୃତଵସୁନ୍ଧରେ ।

ଵରାହରୂପିଣି ଶିଵେ ନାରାୟଣି ନମୋଽସ୍ତୁ ତେ ॥ ୧୭॥

ନୃସିଂହରୂପେଣୋଗ୍ରେଣ ହନ୍ତୁଂ ଦୈତ୍ୟାନ୍ କୃତୋଦ୍ୟମେ ।

ତ୍ରୈଲୋକ୍ୟତ୍ରାଣସହିତେ ନାରାୟଣି ନମୋଽସ୍ତୁ ତେ ॥ ୧୮॥

କିରୀଟିନି ମହାଵଜ୍ରେ ସହସ୍ରନୟନୋଜ୍ଜ୍ଵଲେ ।

ଵୃତ୍ରପ୍ରାଣହରେ ଚୈନ୍ଦ୍ରି ନାରାୟଣି ନମୋଽସ୍ତୁ ତେ ॥ ୧୯॥

ଶିଵଦୂତୀସ୍ଵରୂପେଣ ହତଦୈତ୍ୟମହାବଲେ ।

ଘୋରରୂପେ ମହାରାଵେ ନାରାୟଣି ନମୋଽସ୍ତୁ ତେ ॥ ୨୦॥

ଦଂଷ୍ଟ୍ରାକରାଲଵଦନେ ଶିରୋମାଲାଵିଭୂଷଣେ ।

ଚାମୁଣ୍ଡେ ମୁଣ୍ଡମଥନେ ନାରାୟଣି ନମୋଽସ୍ତୁ ତେ ॥ ୨୧॥

ଲକ୍ଷ୍ମି ଲଜ୍ଜେ ମହାଵିଦ୍ୟେ ଶ୍ରଦ୍ଧେ ପୁଷ୍ଟି ସ୍ଵଧେ ଧ୍ରୁଵେ ।

ମହାରାତ୍ରି ମହାମାୟେ ନାରାୟଣି ନମୋଽସ୍ତୁ ତେ ॥ ୨୨॥

ମେଧେ ସରସ୍ଵତି ଵରେ ଭୂତି ବାଭ୍ରଵି ତାମସି ।

ନିୟତେ ତ୍ଵଂ ପ୍ରସୀଦେଶେ ନାରାୟଣି ନମୋଽସ୍ତୁତେ ॥ ୨୩॥

ସର୍ଵସ୍ଵରୂପେ ସର୍ଵେଶେ ସର୍ଵଶକ୍ତିସମନ୍ଵିତେ ।

ଭୟେଭ୍ୟସ୍ତ୍ରାହି ନୋ ଦେଵି ଦୁର୍ଗେ ଦେଵି ନମୋଽସ୍ତୁ ତେ ॥ ୨୪॥

ଏତତ୍ତେ ଵଦନଂ ସୌମ୍ୟଂ ଲୋଚନତ୍ରୟଭୂଷିତମ୍ ।

ପାତୁ ନଃ ସର୍ଵଭୂତେଭ୍ୟଃ କାତ୍ୟାୟନି ନମୋଽସ୍ତୁ ତେ ॥ ୨୫॥

ଜ୍ଵାଲାକରାଲମତ୍ୟୁଗ୍ରମଶେଷାସୁରସୂଦନମ୍ ।

ତ୍ରିଶୂଲଂ ପାତୁ ନୋ ଭୀତେର୍ଭଦ୍ରକାଲି ନମୋଽସ୍ତୁ ତେ ॥ ୨୬॥

ହିନସ୍ତି ଦୈତ୍ୟତେଜାଂସି ସ୍ଵନେନାପୂର୍ୟ ୟା ଜଗତ୍ ।

ସା ଘଣ୍ଟା ପାତୁ ନୋ ଦେଵି ପାପେଭ୍ୟୋ ନଃ ସୁତାନିଵ ॥ ୨୭॥

ଅସୁରାସୃଗ୍ଵସାପଙ୍କଚର୍ଚିତସ୍ତେ କରୋଜ୍ଜ୍ଵଲଃ ।

ଶୁଭାୟ ଖଡ୍ଗୋ ଭଵତୁ ଚଣ୍ଡିକେ ତ୍ଵାଂ ନତା ଵୟମ୍ ॥ ୨୮॥

ରୋଗାନଶେଷାନପହଂସି ତୁଷ୍ଟା

        ରୁଷ୍ଟା ତୁ କାମାନ୍ ସକଲାନଭୀଷ୍ଟାନ୍ ।

ତ୍ଵାମାଶ୍ରିତାନାଂ ନ ଵିପନ୍ନରାଣାଂ

        ତ୍ଵାମାଶ୍ରିତା ହ୍ୟାଶ୍ରୟତାଂ ପ୍ରୟାନ୍ତି ॥ ୨୯॥

ଏତତ୍କୃତଂ ୟତ୍କଦନଂ ତ୍ଵୟାଦ୍ୟ

        ଧର୍ମଦ୍ଵିଷାଂ ଦେଵି ମହାସୁରାଣାମ୍ ।

ରୂପୈରନେକୈର୍ବହୁଧାତ୍ମମୂର୍ତିଂ

        କୃତ୍ଵାମ୍ବିକେ ତତ୍ପ୍ରକରୋତି କାନ୍ୟା ॥ ୩୦॥

ଵିଦ୍ୟାସୁ ଶାସ୍ତ୍ରେଷୁ ଵିଵେକଦୀପେ-

        ଷ୍ଵାଦ୍ୟେଷୁ ଵାକ୍ୟେଷୁ ଚ କା ତ୍ଵଦନ୍ୟା ।

ମମତ୍ଵଗର୍ତେଽତିମହାନ୍ଧକାରେ

        ଵିଭ୍ରାମୟତ୍ୟେତଦତୀଵ ଵିଶ୍ଵମ୍ ॥ ୩୧॥

ରକ୍ଷାଂସି ୟତ୍ରୋଗ୍ରଵିଷାଶ୍ଚ ନାଗା

        ୟତ୍ରାରୟୋ ଦସ୍ୟୁବଲାନି ୟତ୍ର ।

ଦାଵାନଲୋ ୟତ୍ର ତଥାବ୍ଧିମଧ୍ୟେ

        ତତ୍ର ସ୍ଥିତା ତ୍ଵଂ ପରିପାସି ଵିଶ୍ଵମ୍ ॥ ୩୨॥

ଵିଶ୍ଵେଶ୍ଵରି ତ୍ଵଂ ପରିପାସି ଵିଶ୍ଵଂ

        ଵିଶ୍ଵାତ୍ମିକା ଧାରୟସୀହ ଵିଶ୍ଵମ୍ ।

ଵିଶ୍ଵେଶଵନ୍ଦ୍ୟା ଭଵତୀ ଭଵନ୍ତି

        ଵିଶ୍ଵାଶ୍ରୟା ୟେ ତ୍ଵୟି ଭକ୍ତିନମ୍ରାଃ ॥ ୩୩॥

ଦେଵି ପ୍ରସୀଦ ପରିପାଲୟ ନୋଽରିଭୀତେ-

        ର୍ନିତ୍ୟଂ ୟଥାସୁରଵଧାଦଧୁନୈଵ ସଦ୍ୟଃ ।

ପାପାନି ସର୍ଵଜଗତାଂ ପ୍ରଶମଂ ନୟାଶୁ

        ଉତ୍ପାତପାକଜନିତାଂଶ୍ଚ ମହୋପସର୍ଗାନ୍ ॥ ୩୪॥

ପ୍ରଣତାନାଂ ପ୍ରସୀଦ ତ୍ଵଂ ଦେଵି ଵିଶ୍ଵାର୍ତିହାରିଣି ।

ତ୍ରୈଲୋକ୍ୟଵାସିନାମୀଡ୍ୟେ ଲୋକାନାଂ ଵରଦା ଭଵ ॥ ୩୫॥

ଦେଵ୍ୟୁଵାଚ ॥ ୩୬॥

ଵରଦାହଂ ସୁରଗଣା ଵରଂ ୟନ୍ମନସେଚ୍ଛଥ ।

ତଂ ଵୃଣୁଧ୍ଵଂ ପ୍ରୟଚ୍ଛାମି ଜଗତାମୁପକାରକମ୍ ॥ ୩୭॥

ଦେଵା ଊଚୁଃ ॥ ୩୮॥

ସର୍ଵାବାଧାପ୍ରଶମନଂ ତ୍ରୈଲୋକ୍ୟସ୍ୟାଖିଲେଶ୍ଵରି ।

ଏଵମେଵ ତ୍ଵୟା କାର୍ୟମସ୍ମଦ୍ଵୈରିଵିନାଶନମ୍ ॥ ୩୯॥

ଦେଵ୍ୟୁଵାଚ ॥ ୪୦॥

ଵୈଵସ୍ଵତେଽନ୍ତରେ ପ୍ରାପ୍ତେ ଅଷ୍ଟାଵିଂଶତିମେ ୟୁଗେ ।

ଶୁମ୍ଭୋ ନିଶୁମ୍ଭଶ୍ଚୈଵାନ୍ୟାଵୁତ୍ପତ୍ସ୍ୟେତେ ମହାସୁରୌ ॥ ୪୧॥

ନନ୍ଦଗୋପଗୃହେ ଜାତା ୟଶୋଦାଗର୍ଭସମ୍ଭଵା ।

ତତସ୍ତୌ ନାଶୟିଷ୍ୟାମି ଵିନ୍ଧ୍ୟାଚଲନିଵାସିନୀ ॥ ୪୨॥

ପୁନରପ୍ୟତିରୌଦ୍ରେଣ ରୂପେଣ ପୃଥିଵୀତଲେ ।

ଅଵତୀର୍ୟ ହନିଷ୍ୟାମି ଵୈପ୍ରଚିତ୍ତାଂଶ୍ଚ ଦାନଵାନ୍ ॥ ୪୩॥

ଭକ୍ଷୟନ୍ତ୍ୟାଶ୍ଚ ତାନୁଗ୍ରାନ୍ ଵୈପ୍ରଚିତ୍ତାନ୍ ମହାସୁରାନ୍ ।

ରକ୍ତା ଦନ୍ତା ଭଵିଷ୍ୟନ୍ତି ଦାଡିମୀକୁସୁମୋପମାଃ ॥ ୪୪॥

ତତୋ ମାଂ ଦେଵତାଃ ସ୍ଵର୍ଗେ ମର୍ତ୍ୟଲୋକେ ଚ ମାନଵାଃ ।

ସ୍ତୁଵନ୍ତୋ ଵ୍ୟାହରିଷ୍ୟନ୍ତି ସତତଂ ରକ୍ତଦନ୍ତିକାମ୍ ॥ ୪୫॥

ଭୂୟଶ୍ଚ ଶତଵାର୍ଷିକ୍ୟାମନାଵୃଷ୍ଟ୍ୟାମନମ୍ଭସି ।

ମୁନିଭିଃ ସଂସ୍ମୃତା ଭୂମୌ ସମ୍ଭଵିଷ୍ୟାମ୍ୟୟୋନିଜା ॥ ୪୬॥

ତତଃ ଶତେନ ନେତ୍ରାଣାଂ ନିରୀକ୍ଷିଷ୍ୟାମ୍ୟହଂ ମୁନୀନ୍ ।

କୀର୍ତୟିଷ୍ୟନ୍ତି ମନୁଜାଃ ଶତାକ୍ଷୀମିତି ମାଂ ତତଃ ॥ ୪୭॥

ତତୋଽହମଖିଲଂ ଲୋକମାତ୍ମଦେହସମୁଦ୍ଭଵୈଃ ।

ଭରିଷ୍ୟାମି ସୁରାଃ ଶାକୈରାଵୃଷ୍ଟେଃ ପ୍ରାଣଧାରକୈଃ ॥ ୪୮॥

ଶାକମ୍ଭରୀତି ଵିଖ୍ୟାତିଂ ତଦା ୟାସ୍ୟାମ୍ୟହଂ ଭୁଵି ।

ତତ୍ରୈଵ ଚ ଵଧିଷ୍ୟାମି ଦୁର୍ଗମାଖ୍ୟଂ ମହାସୁରମ୍ ॥ ୪୯॥

ଦୁର୍ଗାଦେଵୀତି ଵିଖ୍ୟାତଂ ତନ୍ମେ ନାମ ଭଵିଷ୍ୟତି ।

ପୁନଶ୍ଚାହଂ ୟଦା ଭୀମଂ ରୂପଂ କୃତ୍ଵା ହିମାଚଲେ ॥ ୫୦॥

ରକ୍ଷାଂସି ଭକ୍ଷୟିଷ୍ୟାମି ମୁନୀନାଂ ତ୍ରାଣକାରଣାତ୍ ।

ତଦା ମାଂ ମୁନୟଃ ସର୍ଵେ ସ୍ତୋଷ୍ୟନ୍ତ୍ୟାନମ୍ରମୂର୍ତୟଃ ॥ ୫୧॥

ଭୀମାଦେଵୀତି ଵିଖ୍ୟାତଂ ତନ୍ମେ ନାମ ଭଵିଷ୍ୟତି ।

ୟଦାରୁଣାଖ୍ୟସ୍ତ୍ରୈଲୋକ୍ୟେ ମହାବାଧାଂ କରିଷ୍ୟତି ॥ ୫୨॥

ତଦାହଂ ଭ୍ରାମରଂ ରୂପଂ କୃତ୍ଵାସଙ୍ଖ୍ୟେୟଷଟ୍ପଦମ୍ ।

ତ୍ରୈଲୋକ୍ୟସ୍ୟ ହିତାର୍ଥାୟ ଵଧିଷ୍ୟାମି ମହାସୁରମ୍ ॥ ୫୩॥

ଭ୍ରାମରୀତି ଚ ମାଂ ଲୋକାସ୍ତଦା ସ୍ତୋଷ୍ୟନ୍ତି ସର୍ଵତଃ ।

ଇତ୍ଥଂ ୟଦା ୟଦା ବାଧା ଦାନଵୋତ୍ଥା ଭଵିଷ୍ୟତି ॥ ୫୪॥

ତଦା ତଦାଵତୀର୍ୟାହଂ କରିଷ୍ୟାମ୍ୟରିସଙ୍କ୍ଷୟମ୍ ॥ ୫୫॥

॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ

ନାରାୟଣୀସ୍ତୁତିର୍ନାମୈକାଦଶୋଽଧ୍ୟାୟଃ ॥ ୧୧॥