ଶ୍ରୀଲଲିତା ଚତୁଃଷଷ୍ଟ୍ୟୁପଚାରସଂଗ୍ରହଃ
🔴ଶ୍ରୀଲଲିତା ଚତୁଃଷଷ୍ଟ୍ୟୁପଚାରସଂଗ୍ରହଃ 🔴
ଓଁ ହୃନ୍ମଧ୍ୟନିଲୟେ ଦେବି ଲଲିତେ ପରଦେବତେ ।
ଚତୁଷ୍ଷଷ୍ଟ୍ୟୁପଚାରାଂସ୍ତେ ଭକ୍ତ୍ୟା ମାତଃ ସମର୍ପୟେ ॥ ୧॥
କାମେଶୋତ୍ସଙ୍ଗନିଲୟେ ପାଦ୍ୟଂ ଗୃହ୍ଣୀଷ୍ୱ ସାଦରମ୍ ।
ଭୂଷଣାନି ସମୁତ୍ତାର୍ୟ ଗନ୍ଧତୈଲଂ ଚ ତେଽର୍ପୟେ ॥ ୨॥
ସ୍ନାନଶାଲାଂ ପ୍ରବିଶ୍ୟାଽଥ ତତ୍ରସ୍ଥ ମଣିପୀଠକେ ।
ଉପବିଶ୍ୟ ସୁଖେନ ତ୍ୱଂ ଦେହୋଦ୍ୱର୍ତନମାଚର ॥ ୩॥
ଉଷ୍ଣୋଦକେନ ଲଲିତେ ସ୍ନାପୟାମ୍ୟଥ ଭକ୍ତିତଃ ।
ଅଭିଷିଞ୍ଚାମି ପଶ୍ଚାତ୍ତ୍ୱାଂ ସୌବର୍ଣକଲଶୋଦକୈଃ ॥ ୪॥
ଧୌତବସ୍ତ୍ରପ୍ରୋଚ୍ଛନଂ ଚାରକ୍ତକ୍ଷୌମାମ୍ବରଂ ତଥା ।
କୁଚୋତ୍ତରୀୟମରୁଣମର୍ପୟାମି ମହେଶ୍ୱରି ॥ ୫॥
ତତଃ ପ୍ରବିଶ୍ୟ ଚାଲେପମଣ୍ଟପଂ ପରମେଶ୍ୱରି ।
ଉପବିଶ୍ୟ ଚ ସୌବର୍ଣପୀଠେ ଗନ୍ଧାନ୍ୱିଲେପୟ ॥ ୬॥
କାଲଗରୁଜଧୂପୈଶ୍ଚ ଧୂପୟେ କେଶପାଶକମ୍ ।
ଅର୍ପୟାମି ଚ ମାଲ୍ୟାଦି ସର୍ୱର୍ତୁକୁସୁମସ୍ରଜଃ ॥ ୭॥
ଭୂଷାମଣ୍ଟପମାବିଶ୍ୟ ସ୍ଥିତ୍ୱା ସୌବର୍ଣପୀଠକେ ।
ମାଣିକ୍ୟମୁକୁଟଂ ମୂର୍ଧ୍ନି ଦୟଯା ସ୍ଥାପୟାମ୍ବିକେ ॥ ୮॥
ଶରତ୍ପାର୍ୱଣଚନ୍ଦ୍ରସ୍ୟ ଶକଲଂ ତତ୍ର ଶୋଭତାମ୍ ।
ସିନ୍ଦୂରେଣ ଚ ସୀମନ୍ତମଲଙ୍କୁରୁ ଦୟାନିଧେ ॥ ୯॥
ଭାଲେ ଚ ତିଲକଂ ନ୍ୟସ୍ୟ ନେତ୍ରୟୋରଞ୍ଜନଂ ଶିବେ ।
ବାଲୀୟୁଗଳମପ୍ୟମ୍ବ ଭକ୍ତ୍ୟା ତେ ବିନିବେଦୟେ ॥ ୧୦॥
ମଣିକୁଣ୍ଡଲମପ୍ୟମ୍ବ ନାସାଭରଣମେବ ଚ ।
ତାଟଙ୍କୟୁଗଳଂ ଦେବି ଯାବକଞ୍ଚାଧରେଽର୍ପୟେ ॥ ୧୧॥
ଆଦ୍ୟଭୂଷଣସୌବର୍ଣଚିନ୍ତାକପଦକାନି ଚ ।
ମହାପଦକମୁକ୍ତାବଲ୍ୟେକାବଲ୍ୟାଦିଭୂଷଣମ୍ ॥ ୧୨॥
ଛନ୍ନବୀରଂ ଗୃହାଣାମ୍ବ କେୟୂରୟୁଗଲଂ ତଥା ।
ବଲୟାବଲିମଙ୍ଗୁଲ୍ୟାଭରଣଂ ଲଲିତାମ୍ବିକେ ॥ ୧୩॥
ଓଡ୍ୟାଣମଥ କଟ୍ୟନ୍ତେ କଟିସୂତ୍ରଞ୍ଚ ସୁନ୍ଦରି ।
ସୌଭାଗ୍ୟାଭରଣଂ ପାଦକଟକଂ ନୂପୁରଦ୍ୱୟମ୍ ॥ ୧୪॥
ଅର୍ପୟାମି ଜଗନ୍ମାତଃ ପାଦୟୋଶ୍ଚାଙ୍ଗୁଲୀୟକମ୍ ।
ପାଶଂ ବାମୋର୍ଧ୍ୱହସ୍ତେ ତେ ଦକ୍ଷହସ୍ତେ ତଥାଙ୍କୁଶମ୍ ॥ ୧୫॥
ଅନ୍ୟସ୍ମିନ୍ୱାମହସ୍ତେ ଚ ତଥା ପୁଂଡ୍ରେକ୍ଷୁଚାପକମ୍ ।
ପୁଷ୍ପବାଣାଂଶ୍ଚ ଦକ୍ଷାଧଃ ପାଣୌ ଧାରୟ ସୁନ୍ଦରି ॥ ୧୬॥
ଅର୍ପୟାମି ଚ ମାଣିକ୍ୟପାଦୁକେ ପାଦୟୋଃ ଶିବେ ।
ଆରୋହାବୃତିଦେବୀଭିଃ ଚକ୍ରଂ ପରଶିବେ ମୁଦା ॥ ୧୭॥
ସମାନବେଷଭୂଷାଭିଃ ସାକଂ ତ୍ରିପୁରସୁନ୍ଦରି ।
ତତ୍ର କାମେଶବାମାଙ୍କପର୍ୟଙ୍କୋପନିବେଶିନୀମ୍ ॥ ୧୮॥
ଅମୃତାସବପାନେନ ମୁଦିତାଂ ତ୍ୱାଂ ସଦା ଭଜେ ।
ଶୁଦ୍ଧେନ ଗାଙ୍ଗତୋୟେନ ପୁନରାଚମନଂ କୁରୁ ॥ ୧୯॥
କର୍ପୂରବୀଟିକାମାସ୍ୟେ ତତୋଽମ୍ବ ବିନିବେଶୟ ।
ଆନନ୍ଦୋଲ୍ଲାସହାସେନ ବିଲସନ୍ମୁଖପଙ୍କଜାମ୍ ॥ ୨୦॥
ଭକ୍ତିମତ୍କଲ୍ପଲିତିକାଂ କୃତୀସ୍ୟାଂ ତ୍ୱାଂ ସ୍ମରନ୍ କଦା ।
ମଙ୍ଗଲାରାର୍ତିକଂ ଛତ୍ରଂ ଚାମରଂ ଦର୍ପଣଂ ତଥା ।
ତାଳବୃଂତଂ ଗନ୍ଧପୁଷ୍ପଧୂପଦୀପାଂଶ୍ଚ ତେଽର୍ପୟେ ॥ ୨୧॥
ଶ୍ରୀକାମେଶ୍ୱରି ତପ୍ତହାଟକକୃତୈଃ ସ୍ଥାଲୀସହସ୍ରୈର୍ଭୃତମ୍
ଦିବ୍ୟାନ୍ନଂ ଘୃତସୂପଶାକଭରିତଂ ଚିତ୍ରାନ୍ନଭେଦୈର୍ୟୁତମ୍ ।
ଦୁଗ୍ଧାନ୍ନଂ ମଧୁଶର୍କରାଦଧିୟୁତଂ ମାଣିକ୍ୟପାତ୍ରାର୍ପିତମ୍
ମାଷାପୂପକପୂରିକାଦିସହିତଂ ନୈବେଦ୍ୟମମ୍ବାଽର୍ପୟେ ॥ ୨୨॥
ସାଗ୍ରବିଂଶତିପଦ୍ୟୋକ୍ତଚତୁଷ୍ଷଷ୍ଟ୍ୟୁପଚାରତଃ ।
ହୃନ୍ମଧ୍ୟନିଲୟା ମାତା ଲଲିତା ପରିତୁଷ୍ୟତୁ ॥ ୨୩॥
ଶ୍ରୀମୁଖାଖ୍ୟସ୍ୟ ବର୍ଷସ୍ୟ ତୁଲାୟାଂ ଶୁକ୍ଲପକ୍ଷକେ ।
ଚତୁର୍ଥ୍ୟାମପରାହ୍ଣେ ଚ ଲଲିତାର୍ପିତମାନସଃ ॥ ୨୪॥
ସାଗ୍ରବିଂଶତିପଦ୍ୟୈସ୍ତୁ ଚତୁଷ୍ଷଷ୍ଟ୍ୟୁପଚାରକାନ୍ ।
ସମଗ୍ରହୀତ୍ପରାମ୍ବାୟାଃ ପ୍ରୀତ୍ୟୈ ନାରାୟଣୋ ମୁଦା ॥ ୨୫॥
ନାରାୟଣଃ ଶ୍ରୀପୁରୁଷୋତ୍ତମାତ୍ମଜୋଽଲିଖନ୍ମହୀଷୂରପୁରେ ବସନ୍କୃତୀ ।
ଦେବୀସପର୍ୟାମଖିଲାଭିଲାଷଦାଂ କାମେଶବାମାଙ୍କଗତା ପ୍ରସୀଦତୁ ॥
॥ ଇତି ଶିବମ୍ ॥
Comments
Post a Comment