ତ୍ରୟୋଦଶୋଽଧ୍ୟାୟଃ
🔴 ॥ ତ୍ରୟୋଦଶୋଽଧ୍ୟାୟଃ ॥🔴
ଓଂ ଋଷିରୁଵାଚ ॥ ୧॥
ଏତତ୍ତେ କଥିତଂ ଭୂପ ଦେଵୀମାହାତ୍ମ୍ୟମୁତ୍ତମମ୍ ।
ଏଵଂ ପ୍ରଭାଵା ସା ଦେଵୀ ୟୟେଦଂ ଧାର୍ୟତେ ଜଗତ୍ ॥ ୨॥
ଵିଦ୍ୟା ତଥୈଵ କ୍ରିୟତେ ଭଗଵଦ୍ଵିଷ୍ଣୁମାୟୟା ।
ତୟା ତ୍ଵମେଷ ଵୈଶ୍ୟଶ୍ଚ ତଥୈଵାନ୍ୟେ ଵିଵେକିନଃ ॥ ୩॥
ମୋହ୍ୟନ୍ତେ ମୋହିତାଶ୍ଚୈଵ ମୋହମେଷ୍ୟନ୍ତି ଚାପରେ ।
ତାମୁପୈହି ମହାରାଜ ଶରଣଂ ପରମେଶ୍ଵରୀମ୍ ॥ ୪॥
ଆରାଧିତା ସୈଵ ନୃଣାଂ ଭୋଗସ୍ଵର୍ଗାପଵର୍ଗଦା ॥ ୫॥
ମାର୍କଣ୍ଡେୟ ଉଵାଚ ॥ ୬॥
ଇତି ତସ୍ୟ ଵଚଃ ଶ୍ରୁତ୍ଵା ସୁରଥଃ ସ ନରାଧିପଃ ॥ ୭॥
ପ୍ରଣିପତ୍ୟ ମହାଭାଗଂ ତମୃଷିଂ ସଂଶିତଵ୍ରତମ୍ ।
ନିର୍ଵିଣ୍ଣୋଽତିମମତ୍ଵେନ ରାଜ୍ୟାପହରଣେନ ଚ ॥ ୮॥
ଜଗାମ ସଦ୍ୟସ୍ତପସେ ସ ଚ ଵୈଶ୍ୟୋ ମହାମୁନେ ।
ସନ୍ଦର୍ଶନାର୍ଥମମ୍ବାୟା ନଦୀପୁଲିନମାସ୍ଥିତଃ ॥ ୯॥
ସ ଚ ଵୈଶ୍ୟସ୍ତପସ୍ତେପେ ଦେଵୀସୂକ୍ତଂ ପରଂ ଜପନ୍ ।
ତୌ ତସ୍ମିନ୍ ପୁଲିନେ ଦେଵ୍ୟାଃ କୃତ୍ଵା ମୂର୍ତିଂ ମହୀମୟୀମ୍ ॥ ୧୦॥
ଅର୍ହଣାଂ ଚକ୍ରତୁସ୍ତସ୍ୟାଃ ପୁଷ୍ପଧୂପାଗ୍ନିତର୍ପଣୈଃ ।
ନିରାହାରୌ ୟତାତ୍ମାନୌ ତନ୍ମନସ୍କୌ ସମାହିତୌ ॥ ୧୧॥
ଦଦତୁସ୍ତୌ ବଲିଂ ଚୈଵ ନିଜଗାତ୍ରାସୃଗୁକ୍ଷିତମ୍ ।
ଏଵଂ ସମାରାଧୟତୋସ୍ତ୍ରିଭିର୍ଵର୍ଷୈର୍ୟତାତ୍ମନୋଃ ॥ ୧୨॥
ପରିତୁଷ୍ଟା ଜଗଦ୍ଧାତ୍ରୀ ପ୍ରତ୍ୟକ୍ଷଂ ପ୍ରାହ ଚଣ୍ଡିକା ॥ ୧୩॥
ଦେଵ୍ୟୁଵାଚ ॥ ୧୪॥
ୟତ୍ପ୍ରାର୍ଥ୍ୟତେ ତ୍ଵୟା ଭୂପ ତ୍ଵୟା ଚ କୁଲନନ୍ଦନ ।
ମତ୍ତସ୍ତତ୍ପ୍ରାପ୍ୟତାଂ ସର୍ଵଂ ପରିତୁଷ୍ଟା ଦଦାମିତେ ॥ ୧୫॥
ମାର୍କଣ୍ଡେୟ ଉଵାଚ ॥ ୧୬॥
ତତୋ ଵଵ୍ରେ ନୃପୋ ରାଜ୍ୟମଵିଭ୍ରଂଶ୍ୟନ୍ୟଜନ୍ମନି ।
ଅତ୍ରୈଵ ଚ ନିଜଂ ରାଜ୍ୟଂ ହତଶତ୍ରୁବଲଂ ବଲାତ୍ ॥ ୧୭॥
ସୋଽପି ଵୈଶ୍ୟସ୍ତତୋ ଜ୍ଞାନଂ ଵଵ୍ରେ ନିର୍ଵିଣ୍ଣମାନସଃ ।
ମମେତ୍ୟହମିତି ପ୍ରାଜ୍ଞଃ ସଙ୍ଗଵିଚ୍ୟୁତିକାରକମ୍ ॥ ୧୮॥
ଦେଵ୍ୟୁଵାଚ ॥ ୧୯॥
ସ୍ଵଲ୍ପୈରହୋଭିର୍ନୃପତେ ସ୍ଵଂ ରାଜ୍ୟଂ ପ୍ରାପ୍ସ୍ୟତେ ଭଵାନ୍ ॥ ୨୦॥
ହତ୍ଵା ରିପୂନସ୍ଖଲିତଂ ତଵ ତତ୍ର ଭଵିଷ୍ୟତି ॥ ୨୧॥
ମୃତଶ୍ଚ ଭୂୟଃ ସମ୍ପ୍ରାପ୍ୟ ଜନ୍ମ ଦେଵାଦ୍ଵିଵସ୍ଵତଃ ॥ ୨୨॥
ସାଵର୍ଣିକୋ ମନୁର୍ନାମ ଭଵାନ୍ଭୁଵି ଭଵିଷ୍ୟତି ॥ ୨୩॥
ଵୈଶ୍ୟଵର୍ୟ ତ୍ଵୟା ୟଶ୍ଚ ଵରୋଽସ୍ମତ୍ତୋଽଭିଵାଞ୍ଛିତଃ ॥ ୨୪॥
ତଂ ପ୍ରୟଚ୍ଛାମି ସଂସିଦ୍ଧ୍ୟୈ ତଵ ଜ୍ଞାନଂ ଭଵିଷ୍ୟତି ॥ ୨୫॥
ମାର୍କଣ୍ଡେୟ ଉଵାଚ ॥ ୨୬॥
ଇତି ଦତ୍ତ୍ଵା ତୟୋର୍ଦେଵୀ ୟଥାଭିଲଷିତଂ ଵରମ୍ ।
ବଭୂଵାନ୍ତର୍ହିତା ସଦ୍ୟୋ ଭକ୍ତ୍ୟା ତାଭ୍ୟାମଭିଷ୍ଟୁତା ॥ ୨୭॥
ଏଵଂ ଦେଵ୍ୟା ଵରଂ ଲବ୍ଧ୍ଵା ସୁରଥଃ କ୍ଷତ୍ରିୟର୍ଷଭଃ ।
ସୂର୍ୟାଜ୍ଜନ୍ମ ସମାସାଦ୍ୟ ସାଵର୍ଣିର୍ଭଵିତା ମନୁଃ ॥ ୨୮॥
ଇତି ଦତ୍ତ୍ଵା ତୟୋର୍ଦେଵୀ ୟଥାଭିଲଷିତଂ ଵରମ୍ ।
ବଭୂଵାନ୍ତର୍ହିତା ସଦ୍ୟୋ ଭକ୍ତ୍ୟା ତାଭ୍ୟାମଭିଷ୍ଟୁତା ॥
ଏଵଂ ଦେଵ୍ୟା ଵରଂ ଲବ୍ଧ୍ଵା ସୁରଥଃ କ୍ଷତ୍ରିୟର୍ଷଭଃ ।
ସୂର୍ୟାଜ୍ଜନ୍ମ ସମାସାଦ୍ୟ ସାଵର୍ଣିର୍ଭଵିତା ମନୁଃ ॥ କ୍ଲୀଂ ଓଂ ॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ସୁରଥଵୈଶ୍ୟୟୋର୍ଵରପ୍ରଦାନଂ ନାମ ତ୍ରୟୋଦଶୋଽଧ୍ୟାୟଃ ॥ ୧୩॥
॥ ଶ୍ରୀସପ୍ତଶତୀଦେଵୀମାହାତ୍ମ୍ୟଂ ସମାପ୍ତମ୍ ॥
॥ ଓଂ ତତ୍ ସତ୍ ଓଂ ॥
Comments
Post a Comment