ମହାଲକ୍ଷ୍ମ୍ୟଷ୍ଟକଂ
॥ ମହାଲକ୍ଷ୍ମ୍ୟଷ୍ଟକଂ ॥
🥀 (ଇନ୍ଦ୍ରକୃତଂ)🥀
ଶ୍ରୀଗଣେଶାୟ ନମଃ ॥
ଇନ୍ଦ୍ର ଉଵାଚ ।
ନମସ୍ତେଽସ୍ତୁ ମହାମାୟେ ଶ୍ରୀପୀଠେ ସୁରପୂଜିତେ ।
ଶଙ୍ଖଚକ୍ରଗଦାହସ୍ତେ ମହାଲକ୍ଷ୍ମି ନମୋଽସ୍ତୁତେ ॥ ୧॥
ନମସ୍ତେ ଗରୁଡାରୂଢେ କୋଲାସୁରଭୟଙ୍କରି ।
ସର୍ଵପାପହରେ ଦେଵି ମହାଲକ୍ଷ୍ମି ନମୋଽସ୍ତୁତେ ॥ ୨॥
ସର୍ଵଜ୍ଞେ ସର୍ଵଵରଦେ ସର୍ଵଦୁଷ୍ଟଭୟଙ୍କରି ।
ସର୍ଵଦୁଃଖହରେ ଦେଵି ମହାଲକ୍ଷ୍ମି ନମୋଽସ୍ତୁତେ ॥ ୩॥
ସିଦ୍ଧିବୁଦ୍ଧିପ୍ରଦେ ଦେଵି ଭୁକ୍ତିମୁକ୍ତିପ୍ରଦାୟିନି ।
ମନ୍ତ୍ରମୂର୍ତେ ସଦା ଦେଵି ମହାଲକ୍ଷ୍ମି ନମୋଽସ୍ତୁତେ ॥ ୪॥ ମନ୍ତ୍ରପୂତେ
ଆଦ୍ୟନ୍ତରହିତେ ଦେଵି ଆଦ୍ୟଶକ୍ତିମହେଶ୍ଵରି ।
ୟୋଗଜେ ୟୋଗସମ୍ଭୂତେ ମହାଲକ୍ଷ୍ମି ନମୋଽସ୍ତୁତେ ॥ ୫॥
ସ୍ଥୂଲସୂକ୍ଷ୍ମମହାରୌଦ୍ରେ ମହାଶକ୍ତିମହୋଦରେ ।
ମହାପାପହରେ ଦେଵି ମହାଲକ୍ଷ୍ମି ନମୋଽସ୍ତୁତେ ॥ ୬॥
ପଦ୍ମାସନସ୍ଥିତେ ଦେଵି ପରବ୍ରହ୍ମସ୍ଵରୂପିଣି ।
ପରମେଶି ଜଗନ୍ମାତର୍ମହାଲକ୍ଷ୍ମି ନମୋଽସ୍ତୁତେ ॥ ୭॥
ଶ୍ଵେତାମ୍ବରଧରେ ଦେଵି ନାନାଲଙ୍କାରଭୂଷିତେ ।
ଜଗତ୍ସ୍ଥିତେ ଜଗନ୍ମାତର୍ମହାଲକ୍ଷ୍ମି ନମୋଽସ୍ତୁତେ ॥ ୮॥
ମହାଲକ୍ଷ୍ମ୍ୟଷ୍ଟକଂ ସ୍ତୋତ୍ରଂ ୟଃ ପଠେଦ୍ଭକ୍ତିମାନ୍ନରଃ ।
ସର୍ଵସିଦ୍ଧିମଵାପ୍ନୋତି ରାଜ୍ୟଂ ପ୍ରାପ୍ନୋତି ସର୍ଵଦା ॥ ୯॥
ଏକକାଲେ ପଠେନ୍ନିତ୍ୟଂ ମହାପାପଵିନାଶନମ୍ ।
ଦ୍ଵିକାଲଂ ୟଃ ପଠେନ୍ନିତ୍ୟଂ ଧନଧାନ୍ୟସମନ୍ଵିତଃ ॥ ୧୦॥
ତ୍ରିକାଲଂ ୟଃ ପଠେନ୍ନିତ୍ୟଂ ମହାଶତ୍ରୁଵିନାଶନମ୍ ।
ମହାଲକ୍ଷ୍ମୀର୍ଭଵେନ୍ନିତ୍ୟଂ ପ୍ରସନ୍ନା ଵରଦା ଶୁଭା ॥ ୧୧॥
🔴॥ ଇତୀନ୍ଦ୍ରକୃତଂ ଶ୍ରୀମହାଲକ୍ଷ୍ମୀସ୍ତଵମ୍ ॥🔴
Comments
Post a Comment