ପ୍ରଥମୋଽଧ୍ୟାୟଃ
🟣॥ ପ୍ରଥମୋଽଧ୍ୟାୟଃ ॥🟣
ଵିନିୟୋଗଃ
ଅସ୍ୟ ଶ୍ରୀ ପ୍ରଥମଚରିତ୍ରସ୍ୟ । ବ୍ରହ୍ମା ଋଷିଃ ।
ମହାକାଲୀ ଦେଵତା । ଗାୟତ୍ରୀ ଛନ୍ଦଃ । ନନ୍ଦା ଶକ୍ତିଃ ।
ରକ୍ତଦନ୍ତିକା ବୀଜମ୍ । ଅଗ୍ନିସ୍ତତ୍ତ୍ଵମ୍ ।
ଋଗ୍ଵେଦଃ ସ୍ଵରୂପମ୍ । ଶ୍ରୀମହାକାଲୀପ୍ରୀତ୍ୟର୍ଥେ
ପ୍ରଥମଚରିତ୍ରଜପେ
ଵିନିୟୋଗଃ ।
। ଧ୍ୟାନମ୍ ।
ଓଂ ଖଡ୍ଗଂ ଚକ୍ରଗଦେଷୁଚାପପରିଘାଞ୍ଛୂଲଂ ଭୁଶୁଣ୍ଡୀଂ ଶିରଃ
ଶଙ୍ଖଂ ସନ୍ଦଧତୀଂ କରୈସ୍ତ୍ରିନୟନାଂ ସର୍ଵାଙ୍ଗଭୂଷାଵୃତାମ୍ ।
ନୀଲାଶ୍ମଦ୍ୟୁତିମାସ୍ୟପାଦଦଶକାଂ ସେଵେ ମହାକାଲିକାଂ
ୟାମସ୍ତୌତ୍ସ୍ଵପିତେ ହରୌ କମଲଜୋ ହନ୍ତୁଂ ମଧୁଂ କୌଟଭମ୍ ॥
ଓଂ ନମଶ୍ଚଣ୍ଡିକାୟୈ ॥
ଓଂ ଐଂ ମାର୍କଣ୍ଡେୟ ଉଵାଚ ॥ ୧॥
ସାଵର୍ଣିଃ ସୂର୍ୟତନୟୋ ୟୋ ମନୁଃ କଥ୍ୟତେଽଷ୍ଟମଃ ।
ନିଶାମୟ ତଦୁତ୍ପତ୍ତିଂ ଵିସ୍ତରାଦ୍ଗଦତୋ ମମ ॥ ୨॥
ମହାମାୟାନୁଭାଵେନ ୟଥା ମନ୍ଵନ୍ତରାଧିପଃ ।
ସ ବଭୂଵ ମହାଭାଗଃ ସାଵର୍ଣିସ୍ତନୟୋ ରଵେଃ ॥ ୩॥
ସ୍ଵାରୋଚିଷେଽନ୍ତରେ ପୂର୍ଵଂ ଚୈତ୍ରଵଂଶସମୁଦ୍ଭଵଃ ।
ସୁରଥୋ ନାମ ରାଜାଭୂତ୍ସମସ୍ତେ କ୍ଷିତିମଣ୍ଡଲେ ॥ ୪॥
ତସ୍ୟ ପାଲୟତଃ ସମ୍ୟକ୍ ପ୍ରଜାଃ ପୁତ୍ରାନିଵୌରସାନ୍ ।
ବଭୂଵୁଃ ଶତ୍ରଵୋ ଭୂପାଃ କୋଲାଵିଧ୍ଵଂସିନସ୍ତଦା ॥ ୫॥
ତସ୍ୟ ତୈରଭଵଦ୍ ୟୁଦ୍ଧମତିପ୍ରବଲଦଣ୍ଡିନଃ ।
ନ୍ୟୂନୈରପି ସ ତୈର୍ୟୁଦ୍ଧେ କୋଲାଵିଧ୍ଵଂସିଭିର୍ଜିତଃ ॥ ୬॥
ତତଃ ସ୍ଵପୁରମାୟାତୋ ନିଜଦେଶାଧିପୋଽଭଵତ୍ ।
ଆକ୍ରାନ୍ତଃ ସ ମହାଭାଗସ୍ତୈସ୍ତଦା ପ୍ରବଲାରିଭିଃ ॥ ୭॥
ଅମାତ୍ୟୈର୍ବଲିଭିର୍ଦୁଷ୍ଟୈର୍ଦୁର୍ବଲସ୍ୟ ଦୁରାତ୍ମଭିଃ ।
କୋଶୋ ବଲଂ ଚାପହୃତଂ ତତ୍ରାପି ସ୍ଵପୁରେ ତତଃ ॥ ୮॥
ତତୋ ମୃଗୟାଵ୍ୟାଜେନ ହୃତସ୍ଵାମ୍ୟଃ ସ ଭୂପତିଃ ।
ଏକାକୀ ହୟମାରୁହ୍ୟ ଜଗାମ ଗହନଂ ଵନମ୍ ॥ ୯॥
ସ ତତ୍ରାଶ୍ରମମଦ୍ରାକ୍ଷୀଦ୍ଦ୍ଵିଜଵର୍ୟସ୍ୟ ମେଧସଃ ।
ପ୍ରଶାନ୍ତଶ୍ଵାପଦାକୀର୍ଣଂ ମୁନିଶିଷ୍ୟୋପଶୋଭିତମ୍ ॥ ୧୦॥
ତସ୍ଥୌ କଞ୍ଚିତ୍ସ କାଲଂ ଚ ମୁନିନା ତେନ ସତ୍କୃତଃ ।
ଇତଶ୍ଚେତଶ୍ଚ ଵିଚରଂସ୍ତସ୍ମିନ୍ ମୁନିଵରାଶ୍ରମେ ॥ ୧୧॥
ସୋଽଚିନ୍ତୟତ୍ତଦା ତତ୍ର ମମତ୍ଵାକୃଷ୍ଟମାନସଃ ।
ମତ୍ପୂର୍ଵୈଃ ପାଲିତଂ ପୂର୍ଵଂ ମୟା ହୀନଂ ପୁରଂ ହି ତତ୍ ॥ ୧୨॥
ମଦ୍ଭୃତ୍ୟୈସ୍ତୈରସଦ୍ଵୃତ୍ତୈର୍ଧର୍ମତଃ ପାଲ୍ୟତେ ନ ଵା ।
ନ ଜାନେ ସ ପ୍ରଧାନୋ ମେ ଶୂରୋ ହସ୍ତୀ ସଦାମଦଃ ॥ ୧୩॥
ମମ ଵୈରିଵଶଂ ୟାତଃ କାନ୍ ଭୋଗାନୁପଲପ୍ସ୍ୟତେ ।
ୟେ ମମାନୁଗତା ନିତ୍ୟଂ ପ୍ରସାଦଧନଭୋଜନୈଃ ॥ ୧୪॥
ଅନୁଵୃତ୍ତିଂ ଧ୍ରୁଵଂ ତେଽଦ୍ୟ କୁର୍ଵନ୍ତ୍ୟନ୍ୟମହୀଭୃତାମ୍ ।
ଅସମ୍ୟଗ୍ଵ୍ୟୟଶୀଲୈସ୍ତୈଃ କୁର୍ଵଦ୍ଭିଃ ସତତଂ ଵ୍ୟୟମ୍ ॥ ୧୫॥
ସଞ୍ଚିତଃ ସୋଽତିଦୁଃଖେନ କ୍ଷୟଂ କୋଶୋ ଗମିଷ୍ୟତି ।
ଏତଚ୍ଚାନ୍ୟଚ୍ଚ ସତତଂ ଚିନ୍ତୟାମାସ ପାର୍ଥିଵଃ ॥ ୧୬॥
ତତ୍ର ଵିପ୍ରାଶ୍ରମାଭ୍ୟାଶେ ଵୈଶ୍ୟମେକଂ ଦଦର୍ଶ ସଃ ।
ସ ପୃଷ୍ଟସ୍ତେନ କସ୍ତ୍ଵଂ ଭୋ ହେତୁଶ୍ଚାଗମନେଽତ୍ର କଃ ॥ ୧୭॥
ସଶୋକ ଇଵ କସ୍ମାତ୍ତ୍ଵଂ ଦୁର୍ମନା ଇଵ ଲକ୍ଷ୍ୟସେ ।
ଇତ୍ୟାକର୍ଣ୍ୟ ଵଚସ୍ତସ୍ୟ ଭୂପତେଃ ପ୍ରଣୟୋଦିତମ୍ ॥ ୧୮॥
ପ୍ରତ୍ୟୁଵାଚ ସ ତଂ ଵୈଶ୍ୟଃ ପ୍ରଶ୍ରୟାଵନତୋ ନୃପମ୍ ॥ ୧୯॥
ଵୈଶ୍ୟ ଉଵାଚ ॥ ୨୦॥
ସମାଧିର୍ନାମ ଵୈଶ୍ୟୋଽହମୁତ୍ପନ୍ନୋ ଧନିନାଂ କୁଲେ ॥ ୨୧॥
ପୁତ୍ରଦାରୈର୍ନିରସ୍ତଶ୍ଚ ଧନଲୋଭାଦସାଧୁଭିଃ ।
ଵିହୀନଶ୍ଚ ଧନୈର୍ଦାରୈଃ ପୁତ୍ରୈରାଦାୟ ମେ ଧନମ୍ ॥ ୨୨॥
ଵନମଭ୍ୟାଗତୋ ଦୁଃଖୀ ନିରସ୍ତଶ୍ଚାପ୍ତବନ୍ଧୁଭିଃ ।
ସୋଽହଂ ନ ଵେଦ୍ମି ପୁତ୍ରାଣାଂ କୁଶଲାକୁଶଲାତ୍ମିକାମ୍ ॥ ୨୩॥
ପ୍ରଵୃତ୍ତିଂ ସ୍ଵଜନାନାଂ ଚ ଦାରାଣାଂ ଚାତ୍ର ସଂସ୍ଥିତଃ ।
କିଂ ନୁ ତେଷାଂ ଗୃହେ କ୍ଷେମମକ୍ଷେମଂ କିଂ ନୁ ସାମ୍ପ୍ରତମ୍ ॥ ୨୪॥
କଥଂ ତେ କିଂ ନୁ ସଦ୍ଵୃତ୍ତା ଦୁର୍ଵୃତ୍ତାଃ କିଂ ନୁ ମେ ସୁତାଃ ॥ ୨୫॥
ରାଜୋଵାଚ ॥ ୨୬॥
ୟୈର୍ନିରସ୍ତୋ ଭଵାଁଲ୍ଲୁବ୍ଧୈଃ ପୁତ୍ରଦାରାଦିଭିର୍ଧନୈଃ ॥ ୨୭॥
ତେଷୁ କିଂ ଭଵତଃ ସ୍ନେହମନୁବଧ୍ନାତି ମାନସମ୍ ॥ ୨୮॥
ଵୈଶ୍ୟ ଉଵାଚ ॥ ୨୯॥
ଏଵମେତଦ୍ୟଥା ପ୍ରାହ ଭଵାନସ୍ମଦ୍ଗତଂ ଵଚଃ ॥ ୩୦॥
କିଂ କରୋମି ନ ବଧ୍ନାତି ମମ ନିଷ୍ଠୁରତାଂ ମନଃ ।
ୟୈଃ ସନ୍ତ୍ୟଜ୍ୟ ପିତୃସ୍ନେହଂ ଧନଲୁବ୍ଧୈର୍ନିରାକୃତଃ ॥ ୩୧॥
ପତିସ୍ଵଜନହାର୍ଦଂ ଚ ହାର୍ଦିତେଷ୍ଵେଵ ମେ ମନଃ ।
କିମେତନ୍ନାଭିଜାନାମି ଜାନନ୍ନପି ମହାମତେ ॥ ୩୨॥
ୟତ୍ପ୍ରେମପ୍ରଵଣଂ ଚିତ୍ତଂ ଵିଗୁଣେଷ୍ଵପି ବନ୍ଧୁଷୁ ।
ତେଷାଂ କୃତେ ମେ ନିଃଶ୍ଵାସୋ ଦୌର୍ମନସ୍ୟଂ ଚ ଜାୟତେ ॥ ୩୩॥
କରୋମି କିଂ ୟନ୍ନ ମନସ୍ତେଷ୍ଵପ୍ରୀତିଷୁ ନିଷ୍ଠୁରମ୍ ॥ ୩୪॥
ମାର୍କଣ୍ଡେୟ ଉଵାଚ ॥ ୩୫॥
ତତସ୍ତୌ ସହିତୌ ଵିପ୍ର ତଂ ମୁନିଂ ସମୁପସ୍ଥିତୌ ॥ ୩୬॥
ସମାଧିର୍ନାମ ଵୈଶ୍ୟୋଽସୌ ସ ଚ ପାର୍ଥିଵସତ୍ତମଃ ।
କୃତ୍ଵା ତୁ ତୌ ୟଥାନ୍ୟାୟଂ ୟଥାର୍ହଂ ତେନ ସଂଵିଦମ୍ ॥ ୩୭॥
ଉପଵିଷ୍ଟୌ କଥାଃ କାଶ୍ଚିଚ୍ଚକ୍ରତୁର୍ଵୈଶ୍ୟପାର୍ଥିଵୌ ॥ ୩୮॥
ରାଜୋଵାଚ ॥ ୩୯॥
ଭଗଵଂସ୍ତ୍ଵାମହଂ ପ୍ରଷ୍ଟୁମିଚ୍ଛାମ୍ୟେକଂ ଵଦସ୍ଵ ତତ୍ ॥ ୪୦॥
ଦୁଃଖାୟ ୟନ୍ମେ ମନସଃ ସ୍ଵଚିତ୍ତାୟତ୍ତତାଂ ଵିନା ।
ମମତ୍ଵଂ ଗତରାଜ୍ୟସ୍ୟ ରାଜ୍ୟାଙ୍ଗେଷ୍ଵଖିଲେଷ୍ଵପି ॥ ୪୧॥
ଜାନତୋଽପି ୟଥାଜ୍ଞସ୍ୟ କିମେତନ୍ମୁନିସତ୍ତମ ।
ଅୟଂ ଚ ନିକୃତଃ ପୁତ୍ରୈର୍ଦାରୈର୍ଭୃତ୍ୟୈସ୍ତଥୋଜ୍ଝିତଃ ॥ ୪୨॥
ସ୍ଵଜନେନ ଚ ସନ୍ତ୍ୟକ୍ତସ୍ତେଷୁ ହାର୍ଦୀ ତଥାପ୍ୟତି ।
ଏଵମେଷ ତଥାହଂ ଚ ଦ୍ଵାଵପ୍ୟତ୍ୟନ୍ତଦୁଃଖିତୌ ॥ ୪୩॥
ଦୃଷ୍ଟଦୋଷେଽପି ଵିଷୟେ ମମତ୍ଵାକୃଷ୍ଟମାନସୌ ।
ତତ୍କିମେତନ୍ମହାଭାଗ ୟନ୍ମୋହୋ ଜ୍ଞାନିନୋରପି ॥ ୪୪॥
ମମାସ୍ୟ ଚ ଭଵତ୍ୟେଷା ଵିଵେକାନ୍ଧସ୍ୟ ମୂଢତା ॥ ୪୫॥
ଋଷିରୁଵାଚ ॥ ୪୬॥
ଜ୍ଞାନମସ୍ତି ସମସ୍ତସ୍ୟ ଜନ୍ତୋର୍ଵିଷୟଗୋଚରେ ॥ ୪୭॥
ଵିଷୟାଶ୍ଚ ମହାଭାଗ ୟାନ୍ତି ଚୈଵଂ ପୃଥକ୍ପୃଥକ୍ ।
ଦିଵାନ୍ଧାଃ ପ୍ରାଣିନଃ କେଚିଦ୍ରାତ୍ରାଵନ୍ଧାସ୍ତଥାପରେ ॥ ୪୮॥
କେଚିଦ୍ଦିଵା ତଥା ରାତ୍ରୌ ପ୍ରାଣିନସ୍ତୁଲ୍ୟଦୃଷ୍ଟୟଃ ।
ଜ୍ଞାନିନୋ ମନୁଜାଃ ସତ୍ୟଂ କିଂ ତୁ ତେ ନ ହି କେଵଲମ୍ ॥ ୪୯॥
ୟତୋ ହି ଜ୍ଞାନିନଃ ସର୍ଵେ ପଶୁପକ୍ଷିମୃଗାଦୟଃ ।
ଜ୍ଞାନଂ ଚ ତନ୍ମନୁଷ୍ୟାଣାଂ ୟତ୍ତେଷାଂ ମୃଗପକ୍ଷିଣାମ୍ ॥ ୫୦॥
ମନୁଷ୍ୟାଣାଂ ଚ ୟତ୍ତେଷାଂ ତୁଲ୍ୟମନ୍ୟତ୍ତଥୋଭୟୋଃ ।
ଜ୍ଞାନେଽପି ସତି ପଶ୍ୟୈତାନ୍ ପତଙ୍ଗାଞ୍ଛାଵଚଞ୍ଚୁଷୁ ॥ ୫୧॥
କଣମୋକ୍ଷାଦୃତାନ୍ ମୋହାତ୍ପୀଡ୍ୟମାନାନପି କ୍ଷୁଧା ।
ମାନୁଷା ମନୁଜଵ୍ୟାଘ୍ର ସାଭିଲାଷାଃ ସୁତାନ୍ ପ୍ରତି ॥ ୫୨॥
ଲୋଭାତ୍ ପ୍ରତ୍ୟୁପକାରାୟ ନନ୍ଵେତାନ୍ କିଂ ନ ପଶ୍ୟସି ।
ତଥାପି ମମତାଵର୍ତ୍ତେ ମୋହଗର୍ତେ ନିପାତିତାଃ ॥ ୫୩॥
ମହାମାୟାପ୍ରଭାଵେଣ ସଂସାରସ୍ଥିତିକାରିଣା ।
ତନ୍ନାତ୍ର ଵିସ୍ମୟଃ କାର୍ୟୋ ୟୋଗନିଦ୍ରା ଜଗତ୍ପତେଃ ॥ ୫୪॥
ମହାମାୟା ହରେଶ୍ଚୈଷା ତୟା ସମ୍ମୋହ୍ୟତେ ଜଗତ୍ ।
ଜ୍ଞାନିନାମପି ଚେତାଂସି ଦେଵୀ ଭଗଵତୀ ହି ସା ॥ ୫୫॥
ବଲାଦାକୃଷ୍ୟ ମୋହାୟ ମହାମାୟା ପ୍ରୟଚ୍ଛତି ।
ତୟା ଵିସୃଜ୍ୟତେ ଵିଶ୍ଵଂ ଜଗଦେତଚ୍ଚରାଚରମ୍ ॥ ୫୬॥
ସୈଷା ପ୍ରସନ୍ନା ଵରଦା ନୃଣାଂ ଭଵତି ମୁକ୍ତୟେ ।
ସା ଵିଦ୍ୟା ପରମା ମୁକ୍ତେର୍ହେତୁଭୂତା ସନାତନୀ ॥ ୫୭॥
ସଂସାରବନ୍ଧହେତୁଶ୍ଚ ସୈଵ ସର୍ଵେଶ୍ଵରେଶ୍ଵରୀ ॥ ୫୮॥
ରାଜୋଵାଚ ॥ ୫୯॥
ଭଗଵନ୍ କା ହି ସା ଦେଵୀ ମହାମାୟେତି ୟାଂ ଭଵାନ୍ ॥ ୬୦॥
ବ୍ରଵୀତି କଥମୁତ୍ପନ୍ନା ସା କର୍ମାସ୍ୟାଶ୍ଚ କିଂ ଦ୍ଵିଜ ।
ୟତ୍ପ୍ରଭାଵା ଚ ସା ଦେଵୀ ୟତ୍ସ୍ଵରୂପା ୟଦୁଦ୍ଭଵା ॥ ୬୧॥
ତତ୍ସର୍ଵଂ ଶ୍ରୋତୁମିଚ୍ଛାମି ତ୍ଵତ୍ତୋ ବ୍ରହ୍ମଵିଦାଂ ଵର ॥ ୬୨॥
ଋଷିରୁଵାଚ ॥ ୬୩॥
ନିତ୍ୟୈଵ ସା ଜଗନ୍ମୂର୍ତିସ୍ତୟା ସର୍ଵମିଦଂ ତତମ୍ ॥ ୬୪॥
ତଥାପି ତତ୍ସମୁତ୍ପତ୍ତିର୍ବହୁଧା ଶ୍ରୂୟତାଂ ମମ ।
ଦେଵାନାଂ କାର୍ୟସିଦ୍ଧ୍ୟର୍ଥମାଵିର୍ଭଵତି ସା ୟଦା ॥ ୬୫॥
ଉତ୍ପନ୍ନେତି ତଦା ଲୋକେ ସା ନିତ୍ୟାପ୍ୟଭିଧୀୟତେ ।
ୟୋଗନିଦ୍ରାଂ ୟଦା ଵିଷ୍ଣୁର୍ଜଗତ୍ୟେକାର୍ଣଵୀକୃତେ ॥ ୬୬॥
ଆସ୍ତୀର୍ୟ ଶେଷମଭଜତ୍ କଲ୍ପାନ୍ତେ ଭଗଵାନ୍ ପ୍ରଭୁଃ ।
ତଦା ଦ୍ଵାଵସୁରୌ ଘୋରୌ ଵିଖ୍ୟାତୌ ମଧୁକୈଟଭୌ ॥ ୬୭॥
ଵିଷ୍ଣୁକର୍ଣମଲୋଦ୍ଭୂତୌ ହନ୍ତୁଂ ବ୍ରହ୍ମାଣମୁଦ୍ୟତୌ ।
ସ ନାଭିକମଲେ ଵିଷ୍ଣୋଃ ସ୍ଥିତୋ ବ୍ରହ୍ମା ପ୍ରଜାପତିଃ ॥ ୬୮॥
ଦୃଷ୍ଟ୍ଵା ତାଵସୁରୌ ଚୋଗ୍ରୌ ପ୍ରସୁପ୍ତଂ ଚ ଜନାର୍ଦନମ୍ ।
ତୁଷ୍ଟାଵ ୟୋଗନିଦ୍ରାଂ ତାମେକାଗ୍ରହୃଦୟଃ ସ୍ଥିତଃ ॥ ୬୯॥
ଵିବୋଧନାର୍ଥାୟ ହରେର୍ହରିନେତ୍ରକୃତାଲୟାମ୍ ।
ଵିଶ୍ଵେଶ୍ଵରୀଂ ଜଗଦ୍ଧାତ୍ରୀଂ ସ୍ଥିତିସଂହାରକାରିଣୀମ୍ ॥ ୭୦॥
ନିଦ୍ରାଂ ଭଗଵତୀଂ ଵିଷ୍ଣୋରତୁଲାଂ ତେଜସଃ ପ୍ରଭୁଃ ॥ ୭୧॥
ବ୍ରହ୍ମୋଵାଚ ॥ ୭୨॥
ତ୍ଵଂ ସ୍ଵାହା ତ୍ଵଂ ସ୍ଵଧା ତ୍ଵଂ ହି ଵଷଟ୍କାରଃ ସ୍ଵରାତ୍ମିକା ॥ ୭୩॥
ସୁଧା ତ୍ଵମକ୍ଷରେ ନିତ୍ୟେ ତ୍ରିଧା ମାତ୍ରାତ୍ମିକା ସ୍ଥିତା ।
ଅର୍ଧମାତ୍ରା ସ୍ଥିତା ନିତ୍ୟା ୟାନୁଚ୍ଚାର୍ୟାଵିଶେଷତଃ ॥ ୭୪॥
ତ୍ଵମେଵ ସନ୍ଧ୍ୟା ସାଵିତ୍ରୀ ତ୍ଵଂ ଦେଵି ଜନନୀ ପରା ।
ତ୍ଵୟୈତଦ୍ଧାର୍ୟତେ ଵିଶ୍ଵଂ ତ୍ଵୟୈତତ୍ ସୃଜ୍ୟତେ ଜଗତ୍ ॥ ୭୫॥
ତ୍ଵୟୈତତ୍ ପାଲ୍ୟତେ ଦେଵି ତ୍ଵମତ୍ସ୍ୟନ୍ତେ ଚ ସର୍ଵଦା ।
ଵିସୃଷ୍ଟୌ ସୃଷ୍ଟିରୂପା ତ୍ଵଂ ସ୍ଥିତିରୂପା ଚ ପାଲନେ ॥ ୭୬॥
ତଥା ସଂହୃତିରୂପାନ୍ତେ ଜଗତୋଽସ୍ୟ ଜଗନ୍ମୟେ ।
ମହାଵିଦ୍ୟା ମହାମାୟା ମହାମେଧା ମହାସ୍ମୃତିଃ ॥ ୭୭॥
ମହାମୋହା ଚ ଭଵତୀ ମହାଦେଵୀ ମହେଶ୍ଵରୀ ।
ପ୍ରକୃତିସ୍ତ୍ଵଂ ଚ ସର୍ଵସ୍ୟ ଗୁଣତ୍ରୟଵିଭାଵିନୀ ॥ ୭୮॥
କାଲରାତ୍ରିର୍ମହାରାତ୍ରିର୍ମୋହରାତ୍ରିଶ୍ଚ ଦାରୁଣା ।
ତ୍ଵଂ ଶ୍ରୀସ୍ତ୍ଵମୀଶ୍ଵରୀ ତ୍ଵଂ ହ୍ରୀସ୍ତ୍ଵଂ ବୁଦ୍ଧିର୍ବୋଧଲକ୍ଷଣା ॥ ୭୯॥
ଲଜ୍ଜା ପୁଷ୍ଟିସ୍ତଥା ତୁଷ୍ଟିସ୍ତ୍ଵଂ ଶାନ୍ତିଃ କ୍ଷାନ୍ତିରେଵ ଚ ।
ଖଡ୍ଗିନୀ ଶୂଲିନୀ ଘୋରା ଗଦିନୀ ଚକ୍ରିଣୀ ତଥା ॥ ୮୦॥
ଶଙ୍ଖିନୀ ଚାପିନୀ ବାଣଭୁଶୁଣ୍ଡୀପରିଘାୟୁଧା ।
ସୌମ୍ୟା ସୌମ୍ୟତରାଶେଷସୌମ୍ୟେଭ୍ୟସ୍ତ୍ଵତିସୁନ୍ଦରୀ ॥ ୮୧॥
ପରାପରାଣାଂ ପରମା ତ୍ଵମେଵ ପରମେଶ୍ଵରୀ ।
ୟଚ୍ଚ କିଞ୍ଚିତ୍କ୍ଵଚିଦ୍ଵସ୍ତୁ ସଦସଦ୍ଵାଖିଲାତ୍ମିକେ ॥ ୮୨॥
ତସ୍ୟ ସର୍ଵସ୍ୟ ୟା ଶକ୍ତିଃ ସା ତ୍ଵଂ କିଂ ସ୍ତୂୟସେ ମୟା ।
ୟୟା ତ୍ଵୟା ଜଗତ୍ସ୍ରଷ୍ଟା ଜଗତ୍ପାତ୍ୟତ୍ତି ୟୋ ଜଗତ୍ ॥ ୮୩॥
ସୋଽପି ନିଦ୍ରାଵଶଂ ନୀତଃ କସ୍ତ୍ଵାଂ ସ୍ତୋତୁମିହେଶ୍ଵରଃ ।
ଵିଷ୍ଣୁଃ ଶରୀରଗ୍ରହଣମହମୀଶାନ ଏଵ ଚ ॥ ୮୪॥
କାରିତାସ୍ତେ ୟତୋଽତସ୍ତ୍ଵାଂ କଃ ସ୍ତୋତୁଂ ଶକ୍ତିମାନ୍ ଭଵେତ୍ ।
ସା ତ୍ଵମିତ୍ଥଂ ପ୍ରଭାଵୈଃ ସ୍ଵୈରୁଦାରୈର୍ଦେଵି ସଂସ୍ତୁତା ॥ ୮୫॥
ମୋହୟୈତୌ ଦୁରାଧର୍ଷାଵସୁରୌ ମଧୁକୈଟଭୌ ।
ପ୍ରବୋଧଂ ଚ ଜଗତ୍ସ୍ଵାମୀ ନୀୟତାମଚ୍ୟୁତୋ ଲଘୁ ॥ ୮୬॥
ବୋଧଶ୍ଚ କ୍ରିୟତାମସ୍ୟ ହନ୍ତୁମେତୌ ମହାସୁରୌ ॥ ୮୭॥
ଋଷିରୁଵାଚ ॥ ୮୮॥
ଏଵଂ ସ୍ତୁତା ତଦା ଦେଵୀ ତାମସୀ ତତ୍ର ଵେଧସା ॥ ୮୯॥
ଵିଷ୍ଣୋଃ ପ୍ରବୋଧନାର୍ଥାୟ ନିହନ୍ତୁଂ ମଧୁକୈଟଭୌ ।
ନେତ୍ରାସ୍ୟନାସିକାବାହୁହୃଦୟେଭ୍ୟସ୍ତଥୋରସଃ ॥ ୯୦॥
ନିର୍ଗମ୍ୟ ଦର୍ଶନେ ତସ୍ଥୌ ବ୍ରହ୍ମଣୋଽଵ୍ୟକ୍ତଜନ୍ମନଃ ।
ଉତ୍ତସ୍ଥୌ ଚ ଜଗନ୍ନାଥସ୍ତୟା ମୁକ୍ତୋ ଜନାର୍ଦନଃ ॥ ୯୧॥
ଏକାର୍ଣଵେଽହିଶୟନାତ୍ତତଃ ସ ଦଦୃଶେ ଚ ତୌ ।
ମଧୁକୈଟଭୌ ଦୁରାତ୍ମାନାଵତିଵୀର୍ୟପରାକ୍ରମୌ ॥ ୯୨॥
କ୍ରୋଧରକ୍ତେକ୍ଷଣାଵତ୍ତୁଂ ବ୍ରହ୍ମାଣଂ ଜନିତୋଦ୍ୟମୌ ।
ସମୁତ୍ଥାୟ ତତସ୍ତାଭ୍ୟାଂ ୟୁୟୁଧେ ଭଗଵାନ୍ ହରିଃ ॥ ୯୩॥
ପଞ୍ଚଵର୍ଷସହସ୍ରାଣି ବାହୁପ୍ରହରଣୋ ଵିଭୁଃ ।
ତାଵପ୍ୟତିବଲୋନ୍ମତ୍ତୌ ମହାମାୟାଵିମୋହିତୌ ॥ ୯୪॥
ଉକ୍ତଵନ୍ତୌ ଵରୋଽସ୍ମତ୍ତୋ ଵ୍ରିୟତାମିତି କେଶଵମ୍ ॥ ୯୫॥
ଶ୍ରୀଭଗଵାନୁଵାଚ ॥ ୯୬॥
ଭଵେତାମଦ୍ୟ ମେ ତୁଷ୍ଟୌ ମମ ଵଧ୍ୟାଵୁଭାଵପି ॥ ୯୭॥
କିମନ୍ୟେନ ଵରେଣାତ୍ର ଏତାଵଦ୍ଧି ଵୃତଂ ମୟା ॥ ୯୮॥
ଋଷିରୁଵାଚ ॥ ୯୯॥
ଵଞ୍ଚିତାଭ୍ୟାମିତି ତଦା ସର୍ଵମାପୋମୟଂ ଜଗତ୍ ॥ ୧୦୦॥
ଵିଲୋକ୍ୟ ତାଭ୍ୟାଂ ଗଦିତୋ ଭଗଵାନ୍ କମଲେକ୍ଷଣଃ ।
ଆଵାଂ ଜହି ନ ୟତ୍ରୋର୍ଵୀ ସଲିଲେନ ପରିପ୍ଲୁତା ॥ ୧୦୧॥
ଋଷିରୁଵାଚ ॥ ୧୦୨॥
ତଥେତ୍ୟୁକ୍ତ୍ଵା ଭଗଵତା ଶଙ୍ଖଚକ୍ରଗଦାଭୃତା ।
କୃତ୍ଵା ଚକ୍ରେଣ ଵୈ ଛିନ୍ନେ ଜଘନେ ଶିରସୀ ତୟୋଃ ॥ ୧୦୩॥
ଏଵମେଷା ସମୁତ୍ପନ୍ନା ବ୍ରହ୍ମଣା ସଂସ୍ତୁତା ସ୍ଵୟମ୍ ।
ପ୍ରଭାଵମସ୍ୟା ଦେଵ୍ୟାସ୍ତୁ ଭୂୟଃ ଶୃଣୁ ଵଦାମି ତେ ॥ ୧୦୪॥
। ଐଂ ଓଂ ।
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ମଧୁକୈଟଭଵଧୋ ନାମ ପ୍ରଥମୋଽଧ୍ୟାୟଃ ॥ ୧॥
Comments
Post a Comment