ସପ୍ତମୋଽଧ୍ୟାୟଃ
🟣॥ ସପ୍ତମୋଽଧ୍ୟାୟଃ ॥🟣
ଓଂ ଋଷିରୁଵାଚ ॥ ୧॥
ଆଜ୍ଞପ୍ତାସ୍ତେ ତତୋ ଦୈତ୍ୟାଶ୍ଚଣ୍ଡମୁଣ୍ଡପୁରୋଗମାଃ ।
ଚତୁରଙ୍ଗବଲୋପେତା ୟୟୁରଭ୍ୟୁଦ୍ୟତାୟୁଧାଃ ॥ ୨॥
ଦଦୃଶୁସ୍ତେ ତତୋ ଦେଵୀମୀଷଦ୍ଧାସାଂ ଵ୍ୟଵସ୍ଥିତାମ୍ ।
ସିଂହସ୍ୟୋପରି ଶୈଲେନ୍ଦ୍ରଶୃଙ୍ଗେ ମହତି କାଞ୍ଚନେ ॥ ୩॥
ତେ ଦୃଷ୍ଟ୍ଵା ତାଂ ସମାଦାତୁମୁଦ୍ୟମଂ ଚକ୍ରୁରୁଦ୍ୟତାଃ ।
ଆକୃଷ୍ଟଚାପାସିଧରାସ୍ତଥାନ୍ୟେ ତତ୍ସମୀପଗାଃ ॥ ୪॥
ତତଃ କୋପଂ ଚକାରୋଚ୍ଚୈରମ୍ବିକା ତାନରୀନ୍ପ୍ରତି ।
କୋପେନ ଚାସ୍ୟା ଵଦନଂ ମଷୀଵର୍ଣମଭୂତ୍ତଦା ॥ ୫॥
ଭ୍ରୁକୁଟୀକୁଟିଲାତ୍ତସ୍ୟା ଲଲାଟଫଲକାଦ୍ଦ୍ରୁତମ୍ ।
କାଲୀ କରାଲଵଦନା ଵିନିଷ୍କ୍ରାନ୍ତାସିପାଶିନୀ ॥ ୬॥
ଵିଚିତ୍ରଖଟ୍ଵାଙ୍ଗଧରା ନରମାଲାଵିଭୂଷଣା ।
ଦ୍ଵୀପିଚର୍ମପରୀଧାନା ଶୁଷ୍କମାଂସାତିଭୈରଵା ॥ ୭॥
ଅତିଵିସ୍ତାରଵଦନା ଜିହ୍ଵାଲଲନଭୀଷଣା ।
ନିମଗ୍ନାରକ୍ତନୟନା ନାଦାପୂରିତଦିଙ୍ମୁଖା ॥ ୮॥
ସା ଵେଗେନାଭିପତିତା ଘାତୟନ୍ତୀ ମହାସୁରାନ୍ ।
ସୈନ୍ୟେ ତତ୍ର ସୁରାରୀଣାମଭକ୍ଷୟତ ତଦ୍ବଲମ୍ ॥ ୯॥
ପାର୍ଷ୍ଣିଗ୍ରାହାଙ୍କୁଶଗ୍ରାହୟୋଧଘଣ୍ଟାସମନ୍ଵିତାନ୍ ।
ସମାଦାୟୈକହସ୍ତେନ ମୁଖେ ଚିକ୍ଷେପ ଵାରଣାନ୍ ॥ ୧୦॥
ତଥୈଵ ୟୋଧଂ ତୁରଗୈ ରଥଂ ସାରଥିନା ସହ ।
ନିକ୍ଷିପ୍ୟ ଵକ୍ତ୍ରେ ଦଶନୈଶ୍ଚର୍ଵୟନ୍ତ୍ୟତିଭୈରଵମ୍ ॥ ୧୧॥
ଏକଂ ଜଗ୍ରାହ କେଶେଷୁ ଗ୍ରୀଵାୟାମଥ ଚାପରମ୍ ।
ପାଦେନାକ୍ରମ୍ୟ ଚୈଵାନ୍ୟମୁରସାନ୍ୟମପୋଥୟତ୍ ॥ ୧୨॥
ତୈର୍ମୁକ୍ତାନି ଚ ଶସ୍ତ୍ରାଣି ମହାସ୍ତ୍ରାଣି ତଥାସୁରୈଃ ।
ମୁଖେନ ଜଗ୍ରାହ ରୁଷା ଦଶନୈର୍ମଥିତାନ୍ୟପି ॥ ୧୩॥
ବଲିନାଂ ତଦ୍ବଲଂ ସର୍ଵମସୁରାଣାଂ ଦୁରାତ୍ମନାମ୍ ।
ମମର୍ଦାଭକ୍ଷୟଚ୍ଚାନ୍ୟାନନ୍ୟାଂଶ୍ଚାତାଡୟତ୍ତଦା ॥ ୧୪॥
ଅସିନା ନିହତାଃ କେଚିତ୍କେଚିତ୍ଖଟ୍ଵାଙ୍ଗତାଡିତାଃ ।
ଜଗ୍ମୁର୍ଵିନାଶମସୁରା ଦନ୍ତାଗ୍ରାଭିହତାସ୍ତଥା ॥ ୧୫॥
କ୍ଷଣେନ ତଦ୍ବଲଂ ସର୍ଵମସୁରାଣାଂ ନିପାତିତମ୍ ।
ଦୃଷ୍ଟ୍ଵା ଚଣ୍ଡୋଽଭିଦୁଦ୍ରାଵ ତାଂ କାଲୀମତିଭୀଷଣାମ୍ ॥ ୧୬॥
ଶରଵର୍ଷୈର୍ମହାଭୀମୈର୍ଭୀମାକ୍ଷୀଂ ତାଂ ମହାସୁରଃ ।
ଛାଦୟାମାସ ଚକ୍ରୈଶ୍ଚ ମୁଣ୍ଡଃ କ୍ଷିପ୍ତୈଃ ସହସ୍ରଶଃ ॥ ୧୭॥
ତାନି ଚକ୍ରାଣ୍ୟନେକାନି ଵିଶମାନାନି ତନ୍ମୁଖମ୍ ।
ବଭୁର୍ୟଥାର୍କବିମ୍ବାନି ସୁବହୂନି ଘନୋଦରମ୍ ॥ ୧୮॥
ତତୋ ଜହାସାତିରୁଷା ଭୀମଂ ଭୈରଵନାଦିନୀ ।
କାଲୀ କରାଲଵଦନା ଦୁର୍ଦର୍ଶଦଶନୋଜ୍ଜ୍ଵଲା ॥ ୧୯॥
ଉତ୍ଥାୟ ଚ ମହାସିଂହଂ ଦେଵୀ ଚଣ୍ଡମଧାଵତ ।
ଗୃହୀତ୍ଵା ଚାସ୍ୟ କେଶେଷୁ ଶିରସ୍ତେନାସିନାଚ୍ଛିନତ୍ ॥ ୨୦॥
ଅଥ ମୁଣ୍ଡୋଽଭ୍ୟଧାଵତ୍ତାଂ ଦୃଷ୍ଟ୍ଵା ଚଣ୍ଡଂ ନିପାତିତମ୍ ।
ତମପ୍ୟପାତୟଦ୍ଭୂମୌ ସା ଖଡ୍ଗାଭିହତଂ ରୁଷା ॥ ୨୧॥
ହତଶେଷଂ ତତଃ ସୈନ୍ୟଂ ଦୃଷ୍ଟ୍ଵା ଚଣ୍ଡଂ ନିପାତିତମ୍ ।
ମୁଣ୍ଡଂ ଚ ସୁମହାଵୀର୍ୟଂ ଦିଶୋ ଭେଜେ ଭୟାତୁରମ୍ ॥ ୨୨॥
ଶିରଶ୍ଚଣ୍ଡସ୍ୟ କାଲୀ ଚ ଗୃହୀତ୍ଵା ମୁଣ୍ଡମେଵ ଚ ।
ପ୍ରାହ ପ୍ରଚଣ୍ଡାଟ୍ଟହାସମିଶ୍ରମଭ୍ୟେତ୍ୟ ଚଣ୍ଡିକାମ୍ ॥ ୨୩॥
ମୟା ତଵାତ୍ରୋପହୃତୌ ଚଣ୍ଡମୁଣ୍ଡୌ ମହାପଶୂ ।
ୟୁଦ୍ଧୟଜ୍ଞେ ସ୍ଵୟଂ ଶୁମ୍ଭଂ ନିଶୁମ୍ଭଂ ଚ ହନିଷ୍ୟସି ॥ ୨୪॥
ଋଷିରୁଵାଚ ॥ ୨୫॥
ତାଵାନୀତୌ ତତୋ ଦୃଷ୍ଟ୍ଵା ଚଣ୍ଡମୁଣ୍ଡୌ ମହାସୁରୌ ।
ଉଵାଚ କାଲୀଂ କଲ୍ୟାଣୀ ଲଲିତଂ ଚଣ୍ଡିକା ଵଚଃ ॥ ୨୬॥
ୟସ୍ମାଚ୍ଚଣ୍ଡଂ ଚ ମୁଣ୍ଡଂ ଚ ଗୃହୀତ୍ଵା ତ୍ଵମୁପାଗତା ।
ଚାମୁଣ୍ଡେତି ତତୋ ଲୋକେ ଖ୍ୟାତା ଦେଵୀ ଭଵିଷ୍ୟସି ॥ ୨୭॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ଚଣ୍ଡମୁଣ୍ଡଵଧୋ ନାମ ସପ୍ତମୋଽଧ୍ୟାୟଃ ॥ ୭॥
Comments
Post a Comment