ଦଶମୋଽଧ୍ୟାୟଃ
🟣॥ ଦଶମୋଽଧ୍ୟାୟଃ ॥🟣
ଓଂ ଋଷିରୁଵାଚ ॥ ୧॥
ନିଶୁମ୍ଭଂ ନିହତଂ ଦୃଷ୍ଟ୍ଵା ଭ୍ରାତରଂ ପ୍ରାଣସମ୍ମିତମ୍ ।
ହନ୍ୟମାନଂ ବଲଂ ଚୈଵ ଶୁମ୍ଭଃ କ୍ରୁଦ୍ଧୋଽବ୍ରଵୀଦ୍ଵଚଃ ॥ ୨॥
ବଲାଵଲେପଦୁଷ୍ଟେ ତ୍ଵଂ ମା ଦୁର୍ଗେ ଗର୍ଵମାଵହ ।
ଅନ୍ୟାସାଂ ବଲମାଶ୍ରିତ୍ୟ ୟୁଦ୍ଧ୍ୟସେ ଚାତିମାନିନୀ ॥ ୩॥
ଦେଵ୍ୟୁଵାଚ ॥ ୪॥
ଏକୈଵାହଂ ଜଗତ୍ୟତ୍ର ଦ୍ଵିତୀୟା କା ମମାପରା ।
ପଶ୍ୟୈତା ଦୁଷ୍ଟ ମୟ୍ୟେଵ ଵିଶନ୍ତ୍ୟୋ ମଦ୍ଵିଭୂତୟଃ ॥ ୫॥
ତତଃ ସମସ୍ତାସ୍ତା ଦେଵ୍ୟୋ ବ୍ରହ୍ମାଣୀପ୍ରମୁଖା ଲୟମ୍ ।
ତସ୍ୟା ଦେଵ୍ୟାସ୍ତନୌ ଜଗ୍ମୁରେକୈଵାସୀତ୍ତଦାମ୍ବିକା ॥ ୬॥
ଦେଵ୍ୟୁଵାଚ ॥ ୭॥
ଅହଂ ଵିଭୂତ୍ୟା ବହୁଭିରିହ ରୂପୈର୍ୟଦାସ୍ଥିତା ।
ତତ୍ସଂହୃତଂ ମୟୈକୈଵ ତିଷ୍ଠାମ୍ୟାଜୌ ସ୍ଥିରୋ ଭଵ ॥ ୮॥
ଋଷିରୁଵାଚ ॥ ୯॥
ତତଃ ପ୍ରଵଵୃତେ ୟୁଦ୍ଧଂ ଦେଵ୍ୟାଃ ଶୁମ୍ଭସ୍ୟ ଚୋଭୟୋଃ ।
ପଶ୍ୟତାଂ ସର୍ଵଦେଵାନାମସୁରାଣାଂ ଚ ଦାରୁଣମ୍ ॥ ୧୦॥
ଶରଵର୍ଷୈଃ ଶିତୈଃ ଶସ୍ତ୍ରୈସ୍ତଥା ଚାସ୍ତ୍ରୈଃ ସୁଦାରୁଣୈଃ ।
ତୟୋର୍ୟୁଦ୍ଧମଭୂଦ୍ଭୂୟଃ ସର୍ଵଲୋକଭୟଙ୍କରମ୍ ॥ ୧୧॥
ଦିଵ୍ୟାନ୍ୟସ୍ତ୍ରାଣି ଶତଶୋ ମୁମୁଚେ ୟାନ୍ୟଥାମ୍ବିକା ।
ବଭଞ୍ଜ ତାନି ଦୈତ୍ୟେନ୍ଦ୍ରସ୍ତତ୍ପ୍ରତୀଘାତକର୍ତୃଭିଃ ॥ ୧୨॥
ମୁକ୍ତାନି ତେନ ଚାସ୍ତ୍ରାଣି ଦିଵ୍ୟାନି ପରମେଶ୍ଵରୀ ।
ବଭଞ୍ଜ ଲୀଲୟୈଵୋଗ୍ରହୁଙ୍କାରୋଚ୍ଚାରଣାଦିଭିଃ ॥ ୧୩॥
ତତଃ ଶରଶତୈର୍ଦେଵୀମାଚ୍ଛାଦୟତ ସୋଽସୁରଃ ।
ସାପି ତତ୍କୁପିତା ଦେଵୀ ଧନୁଶ୍ଚିଚ୍ଛେଦ ଚେଷୁଭିଃ ॥ ୧୪॥
ଛିନ୍ନେ ଧନୁଷି ଦୈତ୍ୟେନ୍ଦ୍ରସ୍ତଥା ଶକ୍ତିମଥାଦଦେ ।
ଚିଚ୍ଛେଦ ଦେଵୀ ଚକ୍ରେଣ ତାମପ୍ୟସ୍ୟ କରେ ସ୍ଥିତାମ୍ ॥ ୧୫॥
ତତଃ ଖଡ୍ଗମୁପାଦାୟ ଶତଚନ୍ଦ୍ରଂ ଚ ଭାନୁମତ୍ ।
ଅଭ୍ୟଧା ଵତ ତାଂ ଦେଵୀଂ ଦୈତ୍ୟାନାମଧିପେଶ୍ଵରଃ ॥ ୧୬॥
ତସ୍ୟାପତତ ଏଵାଶୁ ଖଡ୍ଗଂ ଚିଚ୍ଛେଦ ଚଣ୍ଡିକା ।
ଧନୁର୍ମୁକ୍ତୈଃ ଶିତୈର୍ବାଣୈଶ୍ଚର୍ମ ଚାର୍କକରାମଲମ୍ ।
ଅଶ୍ଵାଂଶ୍ଚ ପାତୟାମାସ ରଥଂ ସାରଥିନା ସହ ॥ ୧୭॥
ହତାଶ୍ଵଃ ସ ତଦା ଦୈତ୍ୟଶ୍ଛିନ୍ନଧନ୍ଵା ଵିସାରଥିଃ ।
ଜଗ୍ରାହ ମୁଦ୍ଗରଂ ଘୋରମମ୍ବିକାନିଧନୋଦ୍ୟତଃ ॥ ୧୮॥
ଚିଚ୍ଛେଦାପତତସ୍ତସ୍ୟ ମୁଦ୍ଗରଂ ନିଶିତୈଃ ଶରୈଃ ।
ତଥାପି ସୋଽଭ୍ୟଧାଵତ୍ତାଂ ମୁଷ୍ଟିମୁଦ୍ୟମ୍ୟ ଵେଗଵାନ୍ ॥ ୧୯॥
ସ ମୁଷ୍ଟିଂ ପାତୟାମାସ ହୃଦୟେ ଦୈତ୍ୟପୁଙ୍ଗଵଃ ।
ଦେଵ୍ୟାସ୍ତଂ ଚାପି ସା ଦେଵୀ ତଲେନୋରସ୍ୟତାଡୟତ୍ ॥ ୨୦॥
ତଲପ୍ରହାରାଭିହତୋ ନିପପାତ ମହୀତଲେ ।
ସ ଦୈତ୍ୟରାଜଃ ସହସା ପୁନରେଵ ତଥୋତ୍ଥିତଃ ॥ ୨୧॥
ଉତ୍ପତ୍ୟ ଚ ପ୍ରଗୃହ୍ୟୋଚ୍ଚୈର୍ଦେଵୀଂ ଗଗନମାସ୍ଥିତଃ ।
ତତ୍ରାପି ସା ନିରାଧାରା ୟୁୟୁଧେ ତେନ ଚଣ୍ଡିକା ॥ ୨୨॥
ନିୟୁଦ୍ଧଂ ଖେ ତଦା ଦୈତ୍ୟଶ୍ଚଣ୍ଡିକା ଚ ପରସ୍ପରମ୍ ।
ଚକ୍ରତୁଃ ପ୍ରଥମଂ ସିଦ୍ଧମୁନିଵିସ୍ମୟକାରକମ୍ ॥ ୨୩॥
ତତୋ ନିୟୁଦ୍ଧଂ ସୁଚିରଂ କୃତ୍ଵା ତେନାମ୍ବିକା ସହ ।
ଉତ୍ପାଟ୍ୟ ଭ୍ରାମୟାମାସ ଚିକ୍ଷେପ ଧରଣୀତଲେ ॥ ୨୪॥
ସ କ୍ଷିପ୍ତୋ ଧରଣୀଂ ପ୍ରାପ୍ୟ ମୁଷ୍ଟିମୁଦ୍ୟମ୍ୟ ଵେଗଵାନ୍ ।
ଅଭ୍ୟଧାଵତ ଦୁଷ୍ଟାତ୍ମା ଚଣ୍ଡିକାନିଧନେଚ୍ଛୟା ॥ ୨୫॥
ତମାୟାନ୍ତଂ ତତୋ ଦେଵୀ ସର୍ଵଦୈତ୍ୟଜନେଶ୍ଵରମ୍ ।
ଜଗତ୍ୟାଂ ପାତୟାମାସ ଭିତ୍ତ୍ଵା ଶୂଲେନ ଵକ୍ଷସି ॥ ୨୬॥
ସ ଗତାସୁଃ ପପାତୋର୍ଵ୍ୟାଂ ଦେଵୀ ଶୂଲାଗ୍ରଵିକ୍ଷତଃ ।
ଚାଲୟନ୍ ସକଲାଂ ପୃଥ୍ଵୀଂ ସାବ୍ଧିଦ୍ଵୀପାଂ ସପର୍ଵତାମ୍ ॥ ୨୭॥
ତତଃ ପ୍ରସନ୍ନମଖିଲଂ ହତେ ତସ୍ମିନ୍ ଦୁରାତ୍ମନି ।
ଜଗତ୍ସ୍ଵାସ୍ଥ୍ୟମତୀଵାପ ନିର୍ମଲଂ ଚାଭଵନ୍ନଭଃ ॥ ୨୮॥
ଉତ୍ପାତମେଘାଃ ସୋଲ୍କା ୟେ ପ୍ରାଗାସଂସ୍ତେ ଶମଂ ୟୟୁଃ ।
ସରିତୋ ମାର୍ଗଵାହିନ୍ୟସ୍ତଥାସଂସ୍ତତ୍ର ପାତିତେ ॥ ୨୯॥
ତତୋ ଦେଵଗଣାଃ ସର୍ଵେ ହର୍ଷନିର୍ଭରମାନସାଃ ।
ବଭୂଵୁର୍ନିହତେ ତସ୍ମିନ୍ ଗନ୍ଧର୍ଵା ଲଲିତଂ ଜଗୁଃ ॥ ୩୦॥
ଅଵାଦୟଂସ୍ତଥୈଵାନ୍ୟେ ନନୃତୁଶ୍ଚାପ୍ସରୋଗଣାଃ ।
ଵଵୁଃ ପୁଣ୍ୟାସ୍ତଥା ଵାତାଃ ସୁପ୍ରଭୋଽଭୂଦ୍ଦିଵାକରଃ ॥ ୩୧॥
ଜଜ୍ଵଲୁଶ୍ଚାଗ୍ନୟଃ ଶାନ୍ତାଃ ଶାନ୍ତା ଦିଗ୍ଜନିତସ୍ଵନାଃ ॥ ୩୨॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ
ଦେଵୀମାହାତ୍ମ୍ୟେ ଶୁମ୍ଭଵଧୋ ନାମ ଦଶମୋଽଧ୍ୟାୟଃ ॥ ୧୦॥
Comments
Post a Comment