ଦ୍ଵିତୀୟୋଽଧ୍ୟାୟଃ
🟣॥ ଦ୍ଵିତୀୟୋଽଧ୍ୟାୟଃ ॥🟣
ଵିନିୟୋଗଃ
ଅସ୍ୟ ଶ୍ରୀ ମଧ୍ୟମଚରିତ୍ରସ୍ୟ ଵିଷ୍ଣୁରୃଷିଃ ।
ଶ୍ରୀମହାଲକ୍ଷ୍ମୀର୍ଦେଵତା ।
ଉଷ୍ଣିକ୍ ଛନ୍ଦଃ । ଶାକମ୍ଭରୀ ଶକ୍ତିଃ । ଦୁର୍ଗା ବୀଜମ୍ ।
ଵାୟୁସ୍ତତ୍ତ୍ଵମ୍ ।
ୟଜୁର୍ଵେଦଃ ସ୍ଵରୂପମ୍ । ଶ୍ରୀମହାଲକ୍ଷ୍ମୀପ୍ରୀତ୍ୟର୍ଥେ
ମଧ୍ୟମଚରିତ୍ରଜପେ ଵିନିୟୋଗଃ ।
। ଧ୍ୟାନମ୍ ।
ଓଁ ଅକ୍ଷସ୍ରକ୍ପରଶୂ ଗଦେଷୁକୁଲିଶଂ ପଦ୍ମଂ ଧନୁଃ କୁଣ୍ଡିକାଂ
ଦଣ୍ଡଂ ଶକ୍ତିମସିଂ ଚ ଚର୍ମ ଜଲଜଂ ଘଣ୍ଟାଂ ସୁରାଭାଜନମ୍ ।
ଶୂଲଂ ପାଶସୁଦର୍ଶନେ ଚ ଦଧତୀଂ ହସ୍ତୈଃ ପ୍ରଵାଲପ୍ରଭାଂ
ସେଵେ ସୈରିଭମର୍ଦିନୀମିହ ମହାଲକ୍ଷ୍ମୀଂ ସରୋଜସ୍ଥିତାମ୍ ॥
ଓଁ ହ୍ରୀଂ ଋଷିରୁଵାଚ ॥ ୧॥
ଦେଵାସୁରମଭୂଦ୍ୟୁଦ୍ଧଂ ପୂର୍ଣମବ୍ଦଶତଂ ପୁରା ।
ମହିଷେଽସୁରାଣାମଧିପେ ଦେଵାନାଂ ଚ ପୁରନ୍ଦରେ ॥ ୨॥
ତତ୍ରାସୁରୈର୍ମହାଵୀର୍ୟୈର୍ଦେଵସୈନ୍ୟଂ ପରାଜିତମ୍ ।
ଜିତ୍ଵା ଚ ସକଲାନ୍ ଦେଵାନିନ୍ଦ୍ରୋଽଭୂନ୍ମହିଷାସୁରଃ ॥ ୩॥
ତତଃ ପରାଜିତା ଦେଵାଃ ପଦ୍ମୟୋନିଂ ପ୍ରଜାପତିମ୍ ।
ପୁରସ୍କୃତ୍ୟ ଗତାସ୍ତତ୍ର ୟତ୍ରେଶଗରୁଡଧ୍ଵଜୌ ॥ ୪॥
ୟଥାଵୃତ୍ତଂ ତୟୋସ୍ତଦ୍ଵନ୍ମହିଷାସୁରଚେଷ୍ଟିତମ୍ ।
ତ୍ରିଦଶାଃ କଥୟାମାସୁର୍ଦେଵାଭିଭଵଵିସ୍ତରମ୍ ॥ ୫॥
ସୂର୍ୟେନ୍ଦ୍ରାଗ୍ନ୍ୟନିଲେନ୍ଦୂନାଂ ୟମସ୍ୟ ଵରୁଣସ୍ୟ ଚ ।
ଅନ୍ୟେଷାଂ ଚାଧିକାରାନ୍ସ ସ୍ଵୟମେଵାଧିତିଷ୍ଠତି ॥ ୬॥
ସ୍ଵର୍ଗାନ୍ନିରାକୃତାଃ ସର୍ଵେ ତେନ ଦେଵଗଣା ଭୁଵି ।
ଵିଚରନ୍ତି ୟଥା ମର୍ତ୍ୟା ମହିଷେଣ ଦୁରାତ୍ମନା ॥ ୭॥
ଏତଦ୍ଵଃ କଥିତଂ ସର୍ଵମମରାରିଵିଚେଷ୍ଟିତମ୍ ।
ଶରଣଂ ଵଃ ପ୍ରପନ୍ନାଃ ସ୍ମୋ ଵଧସ୍ତସ୍ୟ ଵିଚିନ୍ତ୍ୟତାମ୍ ॥ ୮॥
ଇତ୍ଥଂ ନିଶମ୍ୟ ଦେଵାନାଂ ଵଚାଂସି ମଧୁସୂଦନଃ ।
ଚକାର କୋପଂ ଶମ୍ଭୁଶ୍ଚ ଭ୍ରୁକୁଟୀକୁଟିଲାନନୌ ॥ ୯॥
ତତୋଽତିକୋପପୂର୍ଣସ୍ୟ ଚକ୍ରିଣୋ ଵଦନାତ୍ତତଃ ।
ନିଶ୍ଚକ୍ରାମ ମହତ୍ତେଜୋ ବ୍ରହ୍ମଣଃ ଶଙ୍କରସ୍ୟ ଚ ॥ ୧୦॥
ଅନ୍ୟେଷାଂ ଚୈଵ ଦେଵାନାଂ ଶକ୍ରାଦୀନାଂ ଶରୀରତଃ ।
ନିର୍ଗତଂ ସୁମହତ୍ତେଜସ୍ତଚ୍ଚୈକ୍ୟଂ ସମଗଚ୍ଛତ ॥ ୧୧॥
ଅତୀଵ ତେଜସଃ କୂଟଂ ଜ୍ଵଲନ୍ତମିଵ ପର୍ଵତମ୍ ।
ଦଦୃଶୁସ୍ତେ ସୁରାସ୍ତତ୍ର ଜ୍ଵାଲାଵ୍ୟାପ୍ତଦିଗନ୍ତରମ୍ ॥ ୧୨॥
ଅତୁଲଂ ତତ୍ର ତତ୍ତେଜଃ ସର୍ଵଦେଵଶରୀରଜମ୍ ।
ଏକସ୍ଥଂ ତଦଭୂନ୍ନାରୀ ଵ୍ୟାପ୍ତଲୋକତ୍ରୟଂ ତ୍ଵିଷା ॥ ୧୩॥
ୟଦଭୂଚ୍ଛାମ୍ଭଵଂ ତେଜସ୍ତେନାଜାୟତ ତନ୍ମୁଖମ୍ ।
ୟାମ୍ୟେନ ଚାଭଵନ୍ କେଶା ବାହଵୋ ଵିଷ୍ଣୁତେଜସା ॥ ୧୪॥
ସୌମ୍ୟେନ ସ୍ତନୟୋର୍ୟୁଗ୍ମଂ ମଧ୍ୟଂ ଚୈନ୍ଦ୍ରେଣ ଚାଭଵତ୍ ।
ଵାରୁଣେନ ଚ ଜଙ୍ଘୋରୂ ନିତମ୍ବସ୍ତେଜସା ଭୁଵଃ ॥ ୧୫॥
ବ୍ରହ୍ମଣସ୍ତେଜସା ପାଦୌ ତଦଙ୍ଗୁଲ୍ୟୋଽର୍କତେଜସା ।
ଵସୂନାଂ ଚ କରାଙ୍ଗୁଲ୍ୟଃ କୌବେରେଣ ଚ ନାସିକା ॥ ୧୬॥
ତସ୍ୟାସ୍ତୁ ଦନ୍ତାଃ ସମ୍ଭୂତାଃ ପ୍ରାଜାପତ୍ୟେନ ତେଜସା ।
ନୟନତ୍ରିତୟଂ ଜଜ୍ଞେ ତଥା ପାଵକତେଜସା ॥ ୧୭॥
ଭ୍ରୁଵୌ ଚ ସନ୍ଧ୍ୟୟୋସ୍ତେଜଃ ଶ୍ରଵଣାଵନିଲସ୍ୟ ଚ ।
ଅନ୍ୟେଷାଂ ଚୈଵ ଦେଵାନାଂ ସମ୍ଭଵସ୍ତେଜସାଂ ଶିଵା ॥ ୧୮॥
ତତଃ ସମସ୍ତଦେଵାନାଂ ତେଜୋରାଶିସମୁଦ୍ଭଵାମ୍ ।
ତାଂ ଵିଲୋକ୍ୟ ମୁଦଂ ପ୍ରାପୁରମରା ମହିଷାର୍ଦିତାଃ ।
ତତୋ ଦେଵା ଦଦୁସ୍ତସ୍ୟୈ ସ୍ଵାନି ସ୍ଵାନ୍ୟାୟୁଧାନି ଚ ॥ ୧୯॥
ଶୂଲଂ ଶୂଲାଦ୍ଵିନିଷ୍କୃଷ୍ୟ ଦଦୌ ତସ୍ୟୈ ପିନାକଧୃକ୍ ।
ଚକ୍ରଂ ଚ ଦତ୍ତଵାନ୍ କୃଷ୍ଣଃ ସମୁତ୍ପାଟ୍ୟ ସ୍ଵଚକ୍ରତଃ ॥ ୨୦॥
ଶଙ୍ଖଂ ଚ ଵରୁଣଃ ଶକ୍ତିଂ ଦଦୌ ତସ୍ୟୈ ହୁତାଶନଃ ।
ମାରୁତୋ ଦତ୍ତଵାଂଶ୍ଚାପଂ ବାଣପୂର୍ଣେ ତଥେଷୁଧୀ ॥ ୨୧॥
ଵଜ୍ରମିନ୍ଦ୍ରଃ ସମୁତ୍ପାଟ୍ୟ କୁଲିଶାଦମରାଧିପଃ ।
ଦଦୌ ତସ୍ୟୈ ସହସ୍ରାକ୍ଷୋ ଘଣ୍ଟାମୈରାଵତାଦ୍ଗଜାତ୍ ॥ ୨୨॥
କାଲଦଣ୍ଡାଦ୍ୟମୋ ଦଣ୍ଡଂ ପାଶଂ ଚାମ୍ବୁପତିର୍ଦଦୌ ।
ପ୍ରଜାପତିଶ୍ଚାକ୍ଷମାଲାଂ ଦଦୌ ବ୍ରହ୍ମା କମଣ୍ଡଲୁମ୍ ॥ ୨୩॥
ସମସ୍ତରୋମକୂପେଷୁ ନିଜରଶ୍ମୀନ୍ ଦିଵାକରଃ ।
କାଲଶ୍ଚ ଦତ୍ତଵାନ୍ ଖଡ୍ଗଂ ତସ୍ୟୈ ଚର୍ମ ଚ ନିର୍ମଲମ୍ ॥ ୨୪॥
କ୍ଷୀରୋଦଶ୍ଚାମଲଂ ହାରମଜରେ ଚ ତଥାମ୍ବରେ ।
ଚୂଡାମଣିଂ ତଥା ଦିଵ୍ୟଂ କୁଣ୍ଡଲେ କଟକାନି ଚ ॥ ୨୫॥
ଅର୍ଧଚନ୍ଦ୍ରଂ ତଥା ଶୁଭ୍ରଂ କେୟୂରାନ୍ ସର୍ଵବାହୁଷୁ ।
ନୂପୁରୌ ଵିମଲୌ ତଦ୍ଵଦ୍ ଗ୍ରୈଵେୟକମନୁତ୍ତମମ୍ ॥ ୨୬॥
ଅଙ୍ଗୁଲୀୟକରତ୍ନାନି ସମସ୍ତାସ୍ଵଙ୍ଗୁଲୀଷୁ ଚ ।
ଵିଶ୍ଵକର୍ମା ଦଦୌ ତସ୍ୟୈ ପରଶୁଂ ଚାତିନିର୍ମଲମ୍ ॥ ୨୭॥
ଅସ୍ତ୍ରାଣ୍ୟନେକରୂପାଣି ତଥାଭେଦ୍ୟଂ ଚ ଦଂଶନମ୍ ।
ଅମ୍ଲାନପଙ୍କଜାଂ ମାଲାଂ ଶିରସ୍ୟୁରସି ଚାପରାମ୍ ॥ ୨୮॥
ଅଦଦଜ୍ଜଲଧିସ୍ତସ୍ୟୈ ପଙ୍କଜଂ ଚାତିଶୋଭନମ୍ ।
ହିମଵାନ୍ ଵାହନଂ ସିଂହଂ ରତ୍ନାନି ଵିଵିଧାନି ଚ ॥ ୨୯॥
ଦଦାଵଶୂନ୍ୟଂ ସୁରୟା ପାନପାତ୍ରଂ ଧନାଧିପଃ ।
ଶେଷଶ୍ଚ ସର୍ଵନାଗେଶୋ ମହାମଣିଵିଭୂଷିତମ୍ ॥ ୩୦॥
ନାଗହାରଂ ଦଦୌ ତସ୍ୟୈ ଧତ୍ତେ ୟଃ ପୃଥିଵୀମିମାମ୍ ।
ଅନ୍ୟୈରପି ସୁରୈର୍ଦେଵୀ ଭୂଷଣୈରାୟୁଧୈସ୍ତଥା ॥ ୩୧॥
ସମ୍ମାନିତା ନନାଦୋଚ୍ଚୈଃ ସାଟ୍ଟହାସଂ ମୁହୁର୍ମୁହୁଃ ।
ତସ୍ୟା ନାଦେନ ଘୋରେଣ କୃତ୍ସ୍ନମାପୂରିତଂ ନଭଃ ॥ ୩୨॥
ଅମାୟତାତିମହତା ପ୍ରତିଶବ୍ଦୋ ମହାନଭୂତ୍ ।
ଚୁକ୍ଷୁଭୁଃ ସକଲା ଲୋକାଃ ସମୁଦ୍ରାଶ୍ଚ ଚକମ୍ପିରେ ॥ ୩୩॥
ଚଚାଲ ଵସୁଧା ଚେଲୁଃ ସକଲାଶ୍ଚ ମହୀଧରାଃ ।
ଜୟେତି ଦେଵାଶ୍ଚ ମୁଦା ତାମୂଚୁଃ ସିଂହଵାହିନୀମ୍ ॥ ୩୪॥
ତୁଷ୍ଟୁଵୁର୍ମୁନୟଶ୍ଚୈନାଂ ଭକ୍ତିନମ୍ରାତ୍ମମୂର୍ତୟଃ ।
ଦୃଷ୍ଟ୍ଵା ସମସ୍ତଂ ସଙ୍କ୍ଷୁବ୍ଧଂ ତ୍ରୈଲୋକ୍ୟମମରାରୟଃ ॥ ୩୫॥
ସନ୍ନଦ୍ଧାଖିଲସୈନ୍ୟାସ୍ତେ ସମୁତ୍ତସ୍ଥୁରୁଦାୟୁଧାଃ ।
ଆଃ କିମେତଦିତି କ୍ରୋଧାଦାଭାଷ୍ୟ ମହିଷାସୁରଃ ॥ ୩୬॥
ଅଭ୍ୟଧାଵତ ତଂ ଶବ୍ଦମଶେଷୈରସୁରୈର୍ଵୃତଃ ।
ସ ଦଦର୍ଶ ତତୋ ଦେଵୀଂ ଵ୍ୟାପ୍ତଲୋକତ୍ରୟାଂ ତ୍ଵିଷା ॥ ୩୭॥
ପାଦାକ୍ରାନ୍ତ୍ୟା ନତଭୁଵଂ କିରୀଟୋଲ୍ଲିଖିତାମ୍ବରାମ୍ ।
କ୍ଷୋଭିତାଶେଷପାତାଲାଂ ଧନୁର୍ଜ୍ୟାନିଃସ୍ଵନେନ ତାମ୍ ॥ ୩୮॥
ଦିଶୋ ଭୁଜସହସ୍ରେଣ ସମନ୍ତାଦ୍ଵ୍ୟାପ୍ୟ ସଂସ୍ଥିତାମ୍ ।
ତତଃ ପ୍ରଵଵୃତେ ୟୁଦ୍ଧଂ ତୟା ଦେଵ୍ୟା ସୁରଦ୍ଵିଷାମ୍ ॥ ୩୯॥
ଶସ୍ତ୍ରାସ୍ତ୍ରୈର୍ବହୁଧା ମୁକ୍ତୈରାଦୀପିତଦିଗନ୍ତରମ୍ ।
ମହିଷାସୁରସେନାନୀଶ୍ଚିକ୍ଷୁରାଖ୍ୟୋ ମହାସୁରଃ ॥ ୪୦॥
ୟୁୟୁଧେ ଚାମରଶ୍ଚାନ୍ୟୈଶ୍ଚତୁରଙ୍ଗବଲାନ୍ଵିତଃ ।
ରଥାନାମୟୁତୈଃ ଷଡ୍ଭିରୁଦଗ୍ରାଖ୍ୟୋ ମହାସୁରଃ ॥ ୪୧॥
ଅୟୁଧ୍ୟତାୟୁତାନାଂ ଚ ସହସ୍ରେଣ ମହାହନୁଃ ।
ପଞ୍ଚାଶଦ୍ଭିଶ୍ଚ ନିୟୁତୈରସିଲୋମା ମହାସୁରଃ ॥ ୪୨॥
ଅୟୁତାନାଂ ଶତୈଃ ଷଡ୍ଭିର୍ବାଷ୍କଲୋ ୟୁୟୁଧେ ରଣେ ।
ଗଜଵାଜିସହସ୍ରୌଘୈରନେକୈଃ ପରିଵାରିତଃ ॥ ୪୩॥
ଵୃତୋ ରଥାନାଂ କୋଟ୍ୟା ଚ ୟୁଦ୍ଧେ ତସ୍ମିନ୍ନୟୁଧ୍ୟତ ।
ବିଡାଲାଖ୍ୟୋଽୟୁତାନାଂ ଚ ପଞ୍ଚାଶଦ୍ଭିରଥାୟୁତୈଃ ॥ ୪୪॥
ୟୁୟୁଧେ ସଂୟୁଗେ ତତ୍ର ରଥାନାଂ ପରିଵାରିତଃ ।
ଅନ୍ୟେ ଚ ତତ୍ରାୟୁତଶୋ ରଥନାଗହୟୈର୍ଵୃତାଃ ॥ ୪୫॥
ୟୁୟୁଧୁଃ ସଂୟୁଗେ ଦେଵ୍ୟା ସହ ତତ୍ର ମହାସୁରାଃ ।
କୋଟିକୋଟିସହସ୍ରୈସ୍ତୁ ରଥାନାଂ ଦନ୍ତିନାଂ ତଥା ॥ ୪୬॥
ହୟାନାଂ ଚ ଵୃତୋ ୟୁଦ୍ଧେ ତତ୍ରାଭୂନ୍ମହିଷାସୁରଃ ।
ତୋମରୈର୍ଭିନ୍ଦିପାଲୈଶ୍ଚ ଶକ୍ତିଭିର୍ମୁସଲୈସ୍ତଥା ॥ ୪୭॥
ୟୁୟୁଧୁଃ ସଂୟୁଗେ ଦେଵ୍ୟା ଖଡ୍ଗୈଃ ପରଶୁପଟ୍ଟିଶୈଃ ।
କେଚିଚ୍ଚ ଚିକ୍ଷିପୁଃ ଶକ୍ତୀଃ କେଚିତ୍ ପାଶାଂସ୍ତଥାପରେ ॥ ୪୮॥
ଦେଵୀଂ ଖଡ୍ଗପ୍ରହାରୈସ୍ତୁ ତେ ତାଂ ହନ୍ତୁଂ ପ୍ରଚକ୍ରମୁଃ ।
ସାପି ଦେଵୀ ତତସ୍ତାନି ଶସ୍ତ୍ରାଣ୍ୟସ୍ତ୍ରାଣି ଚଣ୍ଡିକା ॥ ୪୯॥
ଲୀଲୟୈଵ ପ୍ରଚିଚ୍ଛେଦ ନିଜଶସ୍ତ୍ରାସ୍ତ୍ରଵର୍ଷିଣୀ ।
ଅନାୟସ୍ତାନନା ଦେଵୀ ସ୍ତୂୟମାନା ସୁରର୍ଷିଭିଃ ॥ ୫୦॥
ମୁମୋଚାସୁରଦେହେଷୁ ଶସ୍ତ୍ରାଣ୍ୟସ୍ତ୍ରାଣି ଚେଶ୍ଵରୀ ।
ସୋଽପି କ୍ରୁଦ୍ଧୋ ଧୁତସଟୋ ଦେଵ୍ୟା ଵାହନକେସରୀ ॥ ୫୧॥
ଚଚାରାସୁରସୈନ୍ୟେଷୁ ଵନେଷ୍ଵିଵ ହୁତାଶନଃ ।
ନିଃଶ୍ଵାସାନ୍ ମୁମୁଚେ ୟାଂଶ୍ଚ ୟୁଧ୍ୟମାନା ରଣେଽମ୍ବିକା ॥ ୫୨॥
ତ ଏଵ ସଦ୍ୟଃ ସମ୍ଭୂତା ଗଣାଃ ଶତସହସ୍ରଶଃ ।
ୟୁୟୁଧୁସ୍ତେ ପରଶୁଭିର୍ଭିନ୍ଦିପାଲାସିପଟ୍ଟିଶୈଃ ॥ ୫୩॥
ନାଶୟନ୍ତୋଽସୁରଗଣାନ୍ ଦେଵୀଶକ୍ତ୍ୟୁପବୃଂହିତାଃ ।
ଅଵାଦୟନ୍ତ ପଟହାନ୍ ଗଣାଃ ଶଙ୍ଖାଂସ୍ତଥାପରେ ॥ ୫୪॥
ମୃଦଙ୍ଗାଂଶ୍ଚ ତଥୈଵାନ୍ୟେ ତସ୍ମିନ୍ ୟୁଦ୍ଧମହୋତ୍ସଵେ ।
ତତୋ ଦେଵୀ ତ୍ରିଶୂଲେନ ଗଦୟା ଶକ୍ତିଵୃଷ୍ଟିଭିଃ ॥ ୫୫॥
ଖଡ୍ଗାଦିଭିଶ୍ଚ ଶତଶୋ ନିଜଘାନ ମହାସୁରାନ୍ ।
ପାତୟାମାସ ଚୈଵାନ୍ୟାନ୍ ଘଣ୍ଟାସ୍ଵନଵିମୋହିତାନ୍ ॥ ୫୬॥
ଅସୁରାନ୍ ଭୁଵି ପାଶେନ ବଦ୍ଧ୍ଵା ଚାନ୍ୟାନକର୍ଷୟତ୍ ।
କେଚିଦ୍ ଦ୍ଵିଧାକୃତାସ୍ତୀକ୍ଷ୍ଣୈଃ ଖଡ୍ଗପାତୈସ୍ତଥାପରେ ॥ ୫୭॥
ଵିପୋଥିତା ନିପାତେନ ଗଦୟା ଭୁଵି ଶେରତେ ।
ଵେମୁଶ୍ଚ କେଚିଦ୍ରୁଧିରଂ ମୁସଲେନ ଭୃଶଂ ହତାଃ ॥ ୫୮॥
କେଚିନ୍ନିପତିତା ଭୂମୌ ଭିନ୍ନାଃ ଶୂଲେନ ଵକ୍ଷସି ।
ନିରନ୍ତରାଃ ଶରୌଘେଣ କୃତାଃ କେଚିଦ୍ରଣାଜିରେ ॥ ୫୯॥
ଶ୍ୟେନାନୁକାରିଣଃ ପ୍ରାଣାନ୍ ମୁମୁଚୁସ୍ତ୍ରିଦଶାର୍ଦନାଃ ।
କେଷାଞ୍ଚିଦ୍ ବାହଵଶ୍ଛିନ୍ନାଶ୍ଛିନ୍ନଗ୍ରୀଵାସ୍ତଥାପରେ ॥ ୬୦॥
ଶିରାଂସି ପେତୁରନ୍ୟେଷାମନ୍ୟେ ମଧ୍ୟେ ଵିଦାରିତାଃ ।
ଵିଚ୍ଛିନ୍ନଜଙ୍ଘାସ୍ତ୍ଵପରେ ପେତୁରୁର୍ଵ୍ୟାଂ ମହାସୁରାଃ ॥ ୬୧॥
ଏକବାହ୍ଵକ୍ଷିଚରଣାଃ କେଚିଦ୍ଦେଵ୍ୟା ଦ୍ଵିଧାକୃତାଃ ।
ଛିନ୍ନେଽପି ଚାନ୍ୟେ ଶିରସି ପତିତାଃ ପୁନରୁତ୍ଥିତାଃ ॥ ୬୨॥
କବନ୍ଧା ୟୁୟୁଧୁର୍ଦେଵ୍ୟା ଗୃହୀତପରମାୟୁଧାଃ ।
ନନୃତୁଶ୍ଚାପରେ ତତ୍ର ୟୁଦ୍ଧେ ତୂର୍ୟଲୟାଶ୍ରିତାଃ ॥ ୬୩॥
କବନ୍ଧାଶ୍ଛିନ୍ନଶିରସଃ ଖଡ୍ଗଶକ୍ତ୍ୟୃଷ୍ଟିପାଣୟଃ ।
ତିଷ୍ଠ ତିଷ୍ଠେତି ଭାଷନ୍ତୋ ଦେଵୀମନ୍ୟେ ମହାସୁରାଃ ॥ ୬୪॥
ପାତିତୈ ରଥନାଗାଶ୍ଵୈରସୁରୈଶ୍ଚ ଵସୁନ୍ଧରା ।
ଅଗମ୍ୟା ସାଭଵତ୍ତତ୍ର ୟତ୍ରାଭୂତ୍ ସ ମହାରଣଃ ॥ ୬୫॥
ଶୋଣିତୌଘା ମହାନଦ୍ୟଃ ସଦ୍ୟସ୍ତତ୍ର ପ୍ରସୁସ୍ରୁଵୁଃ ।
ମଧ୍ୟେ ଚାସୁରସୈନ୍ୟସ୍ୟ ଵାରଣାସୁରଵାଜିନାମ୍ ॥ ୬୬॥
କ୍ଷଣେନ ତନ୍ମହାସୈନ୍ୟମସୁରାଣାଂ ତଥାମ୍ବିକା ।
ନିନ୍ୟେ କ୍ଷୟଂ ୟଥା ଵହ୍ନିସ୍ତୃଣଦାରୁମହାଚୟମ୍ ॥ ୬୭॥
ସ ଚ ସିଂହୋ ମହାନାଦମୁତ୍ସୃଜନ୍ ଧୁତକେସରଃ ।
ଶରୀରେଭ୍ୟୋଽମରାରୀଣାମସୂନିଵ ଵିଚିନ୍ଵତି ॥ ୬୮॥
ଦେଵ୍ୟା ଗଣୈଶ୍ଚ ତୈସ୍ତତ୍ର କୃତଂ ୟୁଦ୍ଧଂ ତଥାସୁରୈଃ ।
ୟଥୈଷାଂ ତୁତୁଷୁର୍ଦେଵାଃ ପୁଷ୍ପଵୃଷ୍ଟିମୁଚୋ ଦିଵି ॥ ୬୯॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ମହିଷାସୁରସୈନ୍ୟଵଧୋ ନାମ ଦ୍ଵିତୀୟୋଽଧ୍ୟାୟଃ ॥ ୨॥
Comments
Post a Comment