ଏକାକ୍ଷରଗଣପତିକଵଚମ୍
🔴ଏକାକ୍ଷରଗଣପତିକଵଚମ୍ 🔴
( ତ୍ରୈଲୋକ୍ୟମୋହନକଵଚମ୍ )
ଶ୍ରୀଗଣେଶାୟ ନମଃ ।
ନମସ୍ତସ୍ମୈ ଗଣେଶାୟ ସର୍ଵଵିଘ୍ନଵିନାଶିନେ ।
କାର୍ୟାରମ୍ଭେଷୁ ସର୍ଵେଷୁ ପୂଜିତୋ ୟଃ ସୁରୈରପି ॥ ୧॥
ପାର୍ଵତ୍ୟୁଵାଚ ।
ଭଗଵନ୍ ଦେଵଦେଵେଶ ଲୋକାନୁଗ୍ରହକାରକଃ ।
ଇଦାନୀ ଶ୍ରୋତୃମିଚ୍ଛାମି କଵଚଂ ୟତ୍ପ୍ରକାଶିତମ୍ ॥ ୨॥
ଏକାକ୍ଷରସ୍ୟ ମନ୍ତ୍ରସ୍ୟ ତ୍ଵୟା ପ୍ରୀତେନ ଚେତସା ।
ଵଦୈତଦ୍ଵିଧିଵଦ୍ଦେଵ ୟଦି ତେ ଵଲ୍ଲଭାସ୍ମ୍ୟହମ୍ ॥ ୩॥
ଈଶ୍ଵର ଉଵାଚ ।
ଶୃଣୁ ଦେଵି ପ୍ରଵକ୍ଷ୍ୟାମି ନାଖ୍ୟେୟମପି ତେ ଧ୍ରୁଵମ୍ ।
ଏକାକ୍ଷରସ୍ୟ ମନ୍ତ୍ରସ୍ୟ କଵଚଂ ସର୍ଵକାମଦମ୍ ॥ ୪॥
ୟସ୍ୟ ସ୍ମରଣମାତ୍ରେଣ ନ ଵିଘ୍ନାଃ ପ୍ରଭଵନ୍ତି ହି ।
ତ୍ରିକାଲମେକକାଲଂ ଵା ୟେ ପଠନ୍ତି ସଦା ନରାଃ ॥ ୫॥
ତେଷାଂ କ୍ଵାପି ଭୟଂ ନାସ୍ତି ସଙ୍ଗ୍ରାମେ ସଙ୍କଟେ ଗିରୌ ।
ଭୂତଵେତାଲରକ୍ଷୋଭିର୍ଗ୍ରହୈଶ୍ଚାପି ନ ବାଧ୍ୟତେ ॥ ୬॥
ଇଦଂ କଵଚମଜ୍ଞାତ୍ଵା ୟୋ ଜପେଦ୍ ଗଣନାୟକମ୍ ।
ନ ଚ ସିଦ୍ଧିମାପ୍ନୋତି ମୂଢୋ ଵର୍ଷଶତୈରପି ॥ ୭॥
ଅଘୋରୋ ମେ ୟଥା ମନ୍ତ୍ରୋ ମନ୍ତ୍ରାଣାମୁତ୍ତମୋତ୍ତମଃ ।
ତଥେଦଂ କଵଚଂ ଦେଵି ଦୁର୍ଲଭଂ ଭୁଵି ମାନଵୈଃ ॥ ୮॥
ଗୋପନୀୟଂ ପ୍ରୟତ୍ନେନ ନାଜ୍ୟେୟଂ ୟସ୍ୟ କସ୍ୟଚିତ୍ ।
ତଵ ପ୍ରୀତ୍ୟା ମହେଶାନି କଵଚଂ କଥ୍ୟତେଽଦ୍ଭୁତମ୍ ॥ ୯॥
ଏକାକ୍ଷରସ୍ୟ ମନ୍ତ୍ରସ୍ୟ ଗଣକଶ୍ଚର୍ଷିରୀରିତଃ ।
ତ୍ରିଷ୍ଟୁପ୍ ଛନ୍ଦସ୍ତୁ ଵିଘ୍ନେଶୋ ଦେଵତା ପରିକୀର୍ତିତା ॥ ୧୦॥
ଗଁ ବୀଜଂ ଶକ୍ତିରୋଙ୍କାରଃ ସର୍ଵକାମାର୍ଥସିଦ୍ଧୟେ ।
ସର୍ଵଵିଘ୍ନଵିନାଶାୟ ଵିନିୟୋଗସ୍ତୁ କୀର୍ତିତଃ ॥ ୧୧॥
ଧ୍ୟାନମ୍ ।
ରକ୍ତାମ୍ଭୋଜସ୍ଵରୂପଂ ଲସଦରୁଣସରୋଜାଧିରୂଢଂ ତ୍ରିନେତ୍ରଂ ପାଶଂ
ଚୈଵାଙ୍କୁଶଂ ଵା ଵରଦମଭୟଦଂ ବାହୁଭିର୍ଧାରୟନ୍ତମ୍ ।
ଶକ୍ତ୍ୟା ୟୁକ୍ତଂ ଗଜାସ୍ୟଂ ପୃଥୁତରଜଠରଂ ନାଗୟଜ୍ଞୋପଵୀତଂ ଦେଵଂ
ଚନ୍ଦ୍ରାର୍ଧଚୂଡଂ ସକଲଭୟହରଂ ଵିଘ୍ନରାଜଂ ନମାମି ॥ ୧୨॥
କଵଚମ୍ ।
ଗଣେଶୋ ମେ ଶିରଃ ପାତୁ ଭାଲଂ ପାତୁ ଗଜାନନଃ ।
ନେତ୍ରେ ଗଣପତିଃ ପାତୁ ଗଜକର୍ଣଃ ଶ୍ରୁତୀ ମମ ॥ ୧୩॥
କପୋଲୌ ଗଣନାଥସ୍ତୁ ଘ୍ରାଣଂ ଗନ୍ଧର୍ଵପୂଜିତଃ ।
ମୁଖଂ ମେ ସୁମୁଖଃ ପାତୁ ଚିବୁକଂ ଗିରିଜାସୁତଃ ॥ ୧୪॥
ଜିହ୍ଵାଂ ପାତୁ ଗଣକ୍ରୀଡୋ ଦନ୍ତାନ୍ ରକ୍ଷତୁ ଦୁର୍ମୁଖଃ ।
ଵାଚଂ ଵିନାୟକଃ ପାତୁ କଷ୍ଟଂ ପାତୁ ମହୋତ୍କଟଃ ॥ ୧୫॥
ସ୍କନ୍ଧୌ ପାତୁ ଗଜସ୍କନ୍ଧୋ ବାହୂ ମେ ଵିଘ୍ନନାଶନଃ ।
ହସ୍ତୌ ରକ୍ଷତୁ ହେରମ୍ବୋ ଵକ୍ଷଃ ପାତୁ ମହାବଲଃ ॥ ୧୬॥
ହୃଦୟଂ ମେ ଗଣପତିରୁଦରଂ ମେ ମହୋଦରଃ ।
ନାଭି ଗମ୍ଭୀରହୃଦୟଃ ପୃଷ୍ଠଂ ପାତୁ ସୁରପ୍ରିୟଃ ॥ ୧୭॥
କଟିଂ ମେ ଵିକଟଃ ପାତୁ ଗୁହ୍ୟଂ ମେ ଗୁହପୂଜିତଃ ।
ଊରୁ ମେ ପାତୁ କୌମାରଂ ଜାନୁନୀ ଚ ଗଣାଧିପଃ ॥ ୧୮॥
ଜଙ୍ଘେ ଗଜପ୍ରଦଃ ପାତୁ ଗୁଲ୍ଫୌ ମେ ଧୂର୍ଜଟିପ୍ରିୟଃ ।
ଚରଣୌ ଦୁର୍ଜୟଃ ପାତୁର୍ସାଙ୍ଗଂ ଗଣନାୟକଃ ॥ ୧୯॥
ଆମୋଦୋ ମେଽଗ୍ରତଃ ପାତୁ ପ୍ରମୋଦଃ ପାତୁ ପୃଷ୍ଠତଃ ।
ଦକ୍ଷିଣେ ପାତୁ ସିଦ୍ଧିଶୋ ଵାମେ ଵିଘ୍ନଧରାର୍ଚିତଃ ॥ ୨୦॥
ପ୍ରାଚ୍ୟାଂ ରକ୍ଷତୁ ମାଂ ନିତ୍ୟଂ ଚିନ୍ତାମଣିଵିନାୟକଃ ।
ଆଗ୍ନେୟାଂ ଵକ୍ରତୁଣ୍ଡୋ ମେ ଦକ୍ଷିଣସ୍ୟାମୁମାସୁତଃ ॥ ୨୧॥
ନୈରୃତ୍ୟାଂ ସର୍ଵଵିଘ୍ନେଶଃ ପାତୁ ନିତ୍ୟଂ ଗଣେଶ୍ଵରଃ ।
ପ୍ରତୀଚ୍ୟାଂ ସିଦ୍ଧିଦଃ ପାତୁ ଵାୟଵ୍ୟାଂ ଗଜକର୍ଣକଃ ॥ ୨୨॥
କୌବେର୍ୟାଂ ସର୍ଵସିଦ୍ଧିଶଃ ଈଶାନ୍ୟାମୀଶନନ୍ଦନଃ ।
ଊର୍ଧ୍ଵଂ ଵିନାୟକଃ ପାତୁ ଅଧୋ ମୂଷକଵାହନଃ ॥ ୨୩॥
ଦିଵା ଗୋକ୍ଷୀରଧଵଲଃ ପାତୁ ନିତ୍ୟଂ ଗଜାନନଃ ।
ରାତ୍ରୌ ପାତୁ ଗଣକ୍ରୀଡଃ ସନ୍ଧ୍ୟୋଃ ସୁରଵନ୍ଦିତଃ ॥ ୨୪॥
ପାଶାଙ୍କୁଶାଭୟକରଃ ସର୍ଵତଃ ପାତୁ ମାଂ ସଦା ।
ଗ୍ରହଭୂତପିଶାଚେଭ୍ୟଃ ପାତୁ ନିତ୍ୟଂ ଗଜାନନଃ ॥ ୨୫॥
ସତ୍ଵଂ ରଜସ୍ତମୋ ଵାଚଂ ବୁଦ୍ଧିଂ ଜ୍ଞାନଂ ସ୍ମୃତିଂ ଦୟାମ୍ ।
ଧର୍ମଚତୁର୍ଵିଧଂ ଲକ୍ଷ୍ମୀଂ ଲଜ୍ଜାଂ କୀର୍ତିଂ କୁଲଂ ଵପୁଃ ॥ ୨୬॥
ଧନଂ ଧାନ୍ୟଂ ଗୃହଂ ଦାରାନ୍ ପୌତ୍ରାନ୍ ସଖୀଂସ୍ତଥା ।
ଏକଦନ୍ତୋଽଵତୁ ଶ୍ରୀମାନ୍ ସର୍ଵତଃ ଶଙ୍କରାତ୍ମଜଃ ॥ ୨୭॥
ସିଦ୍ଧିଦଂ କୀର୍ତିଦଂ ଦେଵି ପ୍ରପଠେନ୍ନିୟତଃ ଶୁଚିଃ ।
ଏକକାଲଂ ଦ୍ଵିକାଲଂ ଵାପି ଭକ୍ତିମାନ୍ ॥ ୨୮॥
ନ ତସ୍ୟ ଦୁର୍ଲଭଂ କିଞ୍ଚିତ୍ ତ୍ରିଷୁ ଲୋକେଷୁ ଵିଦ୍ୟତେ ।
ସର୍ଵପାପଵିନିର୍ମୁକ୍ତୋ ଜାୟତେ ଭୁଵି ମାନଵଃ ॥ ୨୯॥
ୟଂ ୟଂ କାମୟତେ ନିତ୍ୟଂ ସୁଦୁର୍ଲଭମନୋରଥମ୍ ।
ତଂ ତଂ ପ୍ରାପ୍ନୋତି ସକଲଂ ଷଣ୍ମାସାନ୍ନାତ୍ର ସଂଶୟଃ ॥ ୩୦॥
ମୋହନସ୍ତମ୍ଭନାକର୍ଷମାରଣୋଚ୍ଚାଟନଂ ଵଶମ୍ ।
ସ୍ମରଣାଦେଵ ଜାୟନ୍ତେ ନାତ୍ର କାର୍ୟା ଵିଚାରଣା ॥ ୩୧॥
ସର୍ଵଵିଘ୍ନହରଂ ଦେଵଂ ଗ୍ରହପୀଡାନିଵାରଣମ୍ ।
ସର୍ଵଶତ୍ରୁକ୍ଷୟକରଂ ସର୍ଵାପତ୍ତିନିଵାରଣମ୍ ॥ ୩୨॥
ଧୃତ୍ଵେଦଂ କଵଚଂ ଦେଵି ୟୋ ଜପେନ୍ମନ୍ତ୍ରମୁତ୍ତମମ୍ ।
ନ ଵାଚ୍ୟତେ ସ ଵିଘ୍ନୌଘୈଃ କଦାଚିଦପି କୁତ୍ରଚିତ୍ ॥ ୩୩॥
ଭୂର୍ଜେ ଲିଖିତ୍ଵା ଵିଧିଵଦ୍ଧାରୟେଦ୍ୟୋ ନରଃ ଶୁଚିଃ ।
ଏକବାହୋ ଶିରଃ କଣ୍ଠେ ପୂଜୟିତ୍ଵା ଗଣାଧିପମ୍ ॥ ୩୪॥
ଏକାକ୍ଷରସ୍ୟ ମନ୍ତ୍ରସ୍ୟ କଵଚଂ ଦେଵି ଦୁର୍ଲଭମ୍ ।
ୟୋ ଧାରୟେନ୍ମହେଶାନି ନ ଵିଘ୍ନୈରଭିଭୂୟତେ ॥ ୩୫॥
ଗଣେଶହୃଦୟଂ ନାମ କଵଚଂ ସର୍ଵସିଦ୍ଧିଦମ୍ ।
ପଠେଦ୍ଵା ପାଠୟେଦ୍ଵାପି ତସ୍ୟ ସିଦ୍ଧିଃ କରେ ସ୍ଥିତା ॥ ୩୬॥
ନ ପ୍ରକାଶ୍ୟଂ ମହେଶାନି କଵଚଂ ୟତ୍ର କୁତ୍ରଚିତ୍ ।
ଦାତଵ୍ୟଂ ଭକ୍ତିୟୁକ୍ତାୟ ଗୁରୁଦେଵପରାୟ ଚ ॥ ୩୭॥
॥ ଇତି ଶ୍ରୀରୁଦ୍ରୟାମଲେ ଏକାକ୍ଷରଗଣପତିକଵଚଂ ଅଥଵା
ତ୍ରୈଲୋକ୍ୟମୋହନକଵଚଂ ସମ୍ପୂର୍ଣମ୍ ॥
🔹
Comments
Post a Comment