ବ୍ରହ୍ମାନୁଚିନ୍ତନମ୍

 .         🌹॥ ବ୍ରହ୍ମାନୁଚିନ୍ତନମ୍ ॥🌹

ଅହମେଵ ପରଂ ବ୍ରହ୍ମ ଵାସୁଦେଵାଖ୍ୟମଵ୍ୟୟମ୍ ।

ଇତି ସ୍ୟାନ୍ନିଶ୍ଚିତୋ ମୁକ୍ତୋ ବଦ୍ଧ ଏଵାନ୍ୟଥା ଭଵେତ୍ ॥ ୧॥

ଅହମେଵ ପରଂ ବ୍ରହ୍ମ ନିଶ୍ଚିତଂ ଚିତ୍ତ ଚିନ୍ତ୍ୟତାମ୍ ।

ଚିଦ୍ରୂପତ୍ଵାଦସଙ୍ଗତ୍ଵାଦବାଧ୍ୟତ୍ଵାତ୍ ପ୍ରୟତ୍ନତଃ ॥ ୨॥

ଅହମେଵ ପରଂ ବ୍ରହ୍ମ ନ ଚାହଂ ବ୍ରହ୍ମଣଃ ପୃଥକ୍ ।

ଇତ୍ୟେଵଂ ସମୁପାସୀତ ବ୍ରାହ୍ମଣୋ ବ୍ରହ୍ମଣି ସ୍ଥିତଃ ॥ ୩॥

ସର୍ଵୋପାଧିଵିନିର୍ମୁକ୍ତଂ ଚୈତନ୍ୟଂ ଚ ନିରନ୍ତରମ୍ ।

ତଦ୍ବ୍ରହ୍ମାହମିତି ଜ୍ଞାତ୍ଵା କଥଂ ଵର୍ଣାଶ୍ରମୀ ଭଵେତ୍ ॥ ୪॥

ଅହଂ ବ୍ରହ୍ମାସ୍ମି ୟୋ ଵେଦ ସ ସର୍ଵଂ ଭଵତି ତ୍ଵିଦମ୍ ।

ନାଭୂତ୍ୟା ଈଶତେ ଦେଵାସ୍ତେଷାମାତ୍ମା ଭଵେଦ୍ଧି ସଃ ॥ ୫॥

ଅନ୍ୟୋ ଅସାଵହମନ୍ୟୋ ଅସ୍ମୀତ୍ୟୁପାସ୍ତେ ୟୋ ଅନ୍ୟଦେଵତାମ୍ ।

ନ ସ ଵେଦ ନରୋ ବ୍ରହ୍ମ ସ ଦେଵାନାଂ ୟଥା ପଶୁଃ ॥ ୬॥

ଅହମାତ୍ମା ନ ଚାନ୍ୟୋଽସ୍ମି ବ୍ରହ୍ମୈଵାହଂ ନ ଶୋକଭାକ୍ ।

ସଚ୍ଚିଦାନନ୍ଦରୂପୋଽହଂ ନିତ୍ୟମୁକ୍ତସ୍ଵଭାଵଵାନ୍ ॥ ୭॥

ଆତ୍ମାନଂ ସତତଂ ବ୍ରହ୍ମ ସଂଭାଵ୍ୟ ଵିହରନ୍ତି ୟେ ।

ନ ତେଷାଂ ଦୁଷ୍କୃତଂ କିଞ୍ଚିଦ୍ଦୁଷ୍କୃତୋତ୍ଥା ନ ଚାପଦଃ ॥ ୮॥

ଆତ୍ମାନଂ ସତତଂ ବ୍ରହ୍ମ ସଂଭାଵ୍ୟ ଵିହରେତ୍ସୁଖମ୍ ।

କ୍ଷଣଂ ବ୍ରହ୍ମାହମସ୍ମୀତି ୟଃ କୁର୍ୟାଦାତ୍ମଚିନ୍ତନମ୍ ॥ ୯॥

ତନ୍ମହାପାତକଂ ହନ୍ତି ତମଃ ସୂର୍ୟୋଦୟୋ ୟଥା ।

ଅଜ୍ଞାନାଦ୍ବ୍ରହ୍ମଣୋ ଜ୍ଞାତମାତ୍ମାକାଶଂ ବୁଦ୍ବୁଦୋପମମ୍ ॥ ୧୦॥

ଆକାଶାଦ୍ଵାୟୁରୁତ୍ପନ୍ନୋ ଵାୟୋସ୍ତେଜସ୍ତତଃ ପୟଃ ।

ଅଦ୍ଭ୍ୟଶ୍ଚ ପୃଥିଵୀ ଜ୍ଞାତା ତତୋ ଵ୍ରୀହିୟଵାଦିକମ୍ ॥ ୧୧॥

ପୃଥିଵ୍ୟପ୍ସୁ ପୟୋ ଵହ୍ନୌ ଵହ୍ନିର୍ଵାୟୌ ନଭସ୍ୟସୌ ।

ନଭୋଽପ୍ୟଵ୍ୟାକୃତେ ତଚ୍ଚ ଶୁଦ୍ଧେ ଶୁଦ୍ଧୋଽସ୍ମ୍ୟହଂ ହରିଃ ॥ ୧୨॥

ଅହଂ ଵିଷ୍ଣୁରହଂ ଵିଷ୍ଣୁରହଂ ଵିଷ୍ଣୁରହଂ ହରିଃ ।

କର୍ତୃଭୋକ୍ତ୍ରାଦିକଂ ସର୍ଵଂ ତଦଵିଦ୍ୟୋତ୍ଥମେଵ ଚ ॥ ୧୩॥

ଅଚ୍ୟୁତୋଽହମନନ୍ତୋଽହଂ ଗୋଵିନ୍ଦୋଽହମହଂହରିଃ ।

ଆନନ୍ଦୋଽହମଶେଷୋଽହମଜୋଽହମମୃତୋଽସ୍ମ୍ୟହମ୍ ॥ ୧୪॥

ନିତ୍ୟୋଽହଂ ନିର୍ଵିକଲ୍ପୋଽହଂ ନିରାକାରୋଽହମଵ୍ୟୟଃ ।

ସଚ୍ଚିଦାନନ୍ଦରୂପୋଽହଂ ପଙ୍ଚକୋଶାତିଗୋଽସ୍ମ୍ୟହମ୍ ॥ ୧୫॥

ଅକର୍ତାଽହମଭୋକ୍ତାଽହମସଙ୍ଗଃ ପରମେଶ୍ଵରଃ ।

ସଦା ମତ୍ସନ୍ନିଧାନେନ ଚେଷ୍ଟତେ ସର୍ଵମିନ୍ଦ୍ରିୟଂ ॥ ୧୬॥

ଆଦିମଧ୍ୟାନ୍ତମୁକ୍ତୋଽହଂ ନ ବଦ୍ଧୋଽହଂ କଦାଚନ ।

ସ୍ଵଭାଵନିର୍ମଲଃ ଶୁଦ୍ଧଃ ସ ଏଵାହଂ ନ ସଂଶୟଃ ॥ ୧୭॥

ବ୍ରହ୍ମୈଵାହଂ ନ ସଂସାରୀ ମୁକ୍ତୋଽହମିତି ଭାଵୟେତ୍ ।

ଅଶକ୍ନୁଵନ୍ଭାଵୟିତୁଂ ଵାକ୍ୟମେତତ୍ସଦାଽଭ୍ୟସେତ୍ ॥ ୧୮॥

ୟଦଭ୍ୟାସେନ ତଦ୍ଭାଵୋ ଭଵେଦ୍ଭ୍ରମରକୀଟଵତ୍ ।

ଅତ୍ରାପହାୟ ସନ୍ଦେହମଭ୍ୟସେତ୍କୃତନିଶ୍ଚୟଃ ॥ ୧୯॥

ଧ୍ୟାନୟୋଗେନ ମାସୈକାଦ୍ବ୍ରହ୍ମହତ୍ୟାଂ ଵ୍ୟପୋହତି ।

ସଂଵତ୍ସରଂ ସଦାଽଭ୍ୟାସାତ୍ସିଦ୍ଧ୍ୟଷ୍ଟକମଵାପ୍ନୁୟାତ୍ ॥ ୨୦॥

ୟାଵଜ୍ଜୀଵଂ ସଦାଽଭ୍ୟାସାଜ୍ଜୀଵନ୍ମୁକ୍ତୋ ଭଵେଦ୍ୟତିଃ ।

ନାହଂ ଦେହୋ ନ ଚ ପ୍ରାଣୋ ନେନ୍ଦ୍ରିୟାଣି ତଥୈଵ ଚ ॥ ୨୧॥

ନ ମନୋଽହଂ ନ ବୁଦ୍ଧିଶ୍ଚ ନୈଵ ଚିତ୍ତମହଙ୍କୃତିଃ ।

ନାହଂ ପୃଥ୍ଵୀ ନ ସଲିଲଂ ନ ଚ ଵହ୍ନିସ୍ତଥାଽନିଲଃ ॥ ୨୨॥

ନ ଚାକାଶୋ ନ ଶବ୍ଦଶ୍ଚ ନ ଚ ସ୍ପର୍ଶସ୍ତଥା ରସଃ ।

ନାହଂ ଗନ୍ଧୋ ନ ରୂପଂ ଚ ନ ମାୟାଽହଂ ନ ସଂସୃତିଃ ॥ ୨୩॥

ସଦା ସାକ୍ଷିସ୍ଵରୂପତ୍ଵାଚ୍ଛିଵ ଏଵାସ୍ମି କେଵଲଃ ।

ମୟ୍ୟେଵ ସକଲଂ ଜାତଂ ମୟି ସର୍ଵଂ ପ୍ରତିଷ୍ଠିତମ୍ ॥ ୨୪॥

ମୟି ସର୍ଵଂ ଲୟଂ ୟାତି ତଦ୍ବ୍ରହ୍ମାସ୍ମ୍ୟହମଦ୍ଵୟମ୍ ।

ସର୍ଵଜ୍ଞୋଽହମନନ୍ତୋଽହଂ ସର୍ଵେଶଃ ସର୍ଵଶକ୍ତିମାନ୍ ॥ ୨୫॥

ଆନନ୍ଦଃ ସତ୍ୟବୋଧୋଽହମିତି ବ୍ରହ୍ମାନୁଚିନ୍ତନମ୍ ।

ଅୟଂ ପ୍ରପଞ୍ଚୋ ମିଥ୍ୟୈଵ ସତ୍ୟଂ ବ୍ରହ୍ମାହମଵ୍ୟୟମ୍ ॥ ୨୬॥

ଅତ୍ର ପ୍ରମାଣଂ ଵେଦାନ୍ତା ଗୁରଵୋଽନୁଭଵସ୍ତଥା ।

ବ୍ରହ୍ମୈଵାହଂ ନ ସଂସାରୀ ନ ଚାହଂ ବ୍ରହ୍ମଣଃ ପୃଥକ୍ ॥ ୨୭॥

ନାହଂ ଦେହୋ ନ ମେ ଦେହଃ କେଵଲୋଽହଂ ସନାତନଃ ।

ଏକମେଵାଦିଵିତୀୟଂ ଵୈ ବ୍ରହ୍ମଣୋ ନେହ କିଂଚନ ॥ ୨୮॥

ହୃଦୟକମଲମଧ୍ୟେ ଦୀପଵଦ୍ଵେଦସାରଂ

     ପ୍ରଣଵମୟମତର୍କ୍ୟଂ ୟୋଗିଭିର୍ଧ୍ୟାନଗମ୍ୟମ୍ ।

ହରିଗୁରୁଶିଵୟୋଗଂ ସର୍ଵଭୂତସ୍ଥମେକଂ

     ସକୃଦପି ମନସା ଵୈ ଚିନ୍ତୟେଦ୍ୟଃ ସ ମୁକ୍ତଃ ॥ ୨୯॥

॥ ଇତି ଶ୍ରୀମଦ୍ ଶଙ୍କରାଚାର୍ୟଵିରଚିତଂ ବ୍ରହ୍ମାନୁଚିନ୍ତନଂ ସମାପ୍ତଂ ॥