ଶତ୍ରୁସଂହାରକମେକଦନ୍ତସ୍ତୋତ୍ରମ୍
॥ ଶତ୍ରୁସଂହାରକମେକଦନ୍ତସ୍ତୋତ୍ରମ୍ ॥
ଶ୍ରୀଗଣେଶାୟ ନମଃ ।
ସନତ୍କୁମାର ଉଵାଚ ।
ଶୃଣୁ ଶମ୍ଭ୍ଵାଦୟୋ ଦେଵା ମଦାସୁରଵିନାଶନେ ।
ଉପାୟଂ କଥୟିଷ୍ୟାମି ତତ୍କୁରୁଧ୍ଵଂ ମୁନୀଶ୍ଵରାଃ ॥ ୧॥
ଗଣେଶଂ ପୂଜୟଧ୍ଵଂ ଵୈ ୟୂୟଂ ସର୍ଵେ ସମାଵୃତାଃ ।
ସ ବାହ୍ୟାନ୍ତରସଂସ୍ଥୋ ଵୈ ହନିଷ୍ୟତି ମଦାସୁରମ୍ ॥ ୨॥
ସନତ୍କୁମାରଵାକ୍ୟଂ ତଚ୍ଛ୍ରୁତ୍ଵା ଦେଵର୍ଷିସତ୍ତମାଃ ।
ଊଚୁସ୍ତଂ ପ୍ରଣିପତ୍ୟାଦୌ ଭକ୍ତିନମ୍ରାତ୍ମକନ୍ଧରାଃ ॥ ୩॥
ଦେଵର୍ଷୟ ଊଚୁଃ ।
କେନୋପାୟେନ ଦେଵେଶଂ ଗଣେଶଂ ମୁନିସତ୍ତମମ୍ ।
ପୂଜୟାମୋ ଵିଶେଷେଣ ତଂ ବ୍ରଵୀହି ୟଥାତଥମ୍ ॥ ୪॥
ଏଵଂ ପୃଷ୍ଟୋ ମହାୟୋଗୀ ଦେଵୈଶ୍ଚ ମୁନିଭିଃ ସହ ।
ଉଵାଚାରାଧନଂ ତେଭ୍ୟୋ ଗାଣପତ୍ୟୋ ମହାୟଶାଃ ॥ ୫॥
ଏକାକ୍ଷରେଣ ତଂ ଦେଵଂ ହୃଦିସ୍ଥଂ ଗଣନାୟକମ୍ ।
ଵିଧିନା ପୂଜୟଧ୍ଵଂ ଚ ତୁଷ୍ଟସ୍ତେନ ଭଵିଷ୍ୟତି ॥ ୬॥
ଧ୍ୟାନଂ ତସ୍ୟ ପ୍ରଵକ୍ଷ୍ୟାମି ଶୃଣୁଧ୍ଵଂ ସୁରସତ୍ତମାଃ ।
ୟୂୟଂ ତଂ ତାଦୃଶଂ ଧ୍ୟାତ୍ଵା ତୋଷୟଧ୍ଵଂ ଵିଧାନତଃ ॥ ୭॥
ଏକଦନ୍ତଂ ଚତୁର୍ବାହୁଂ ଗଜଵକ୍ତ୍ରଂ ମହୋଦରମ୍ ।
ସିଦ୍ଧିବୁଦ୍ଧିସମାୟୁକ୍ତଂ ମୂଷକାରୂଢମେଵ ଚ ॥ ୮॥
ନାଭିଶେଷଂ ସପାଶଂ ଵୈ ପରଶୁଂ କମଲଂ ଶୁଭମ୍ ।
ଅଭୟଂ ସନ୍ଦଧନ୍ତଂ ଚ ପ୍ରସନ୍ନଵଦନାମ୍ବୁଜମ୍ ॥ ୯॥
ଭକ୍ତେଭ୍ୟୋ ଵରଦଂ ନିତ୍ୟମଭକ୍ତାନାଂ ନିଷୂଦନମ୍ ।
ଏତାଦୃଶଂ ହୃଦି ଧ୍ୟାତ୍ଵା ସେଵଧ୍ଵମେକଦନ୍ତକମ୍ ॥ ୧୦॥
ସର୍ଵେଷାଂ ହୃଦି ସଂସ୍ଥୋଽୟଂ ବୁଦ୍ଧିପ୍ରେରକଭାଵତଃ ।
ସ୍ଵୟଂ ବୁଦ୍ଧିପତିଃ ସାକ୍ଷାଦାତ୍ମା ଚ ସର୍ଵଦେହିନାମ୍ ॥ ୧୧॥
ଏକଶବ୍ଦାତ୍ମିକା ମାୟା ଦେହରୂପା ଵିଲାସିନୀ ।
ଦନ୍ତଃ ସତ୍ତାତ୍ମକଃ ପ୍ରୋକ୍ତଃ ଶବ୍ଦସ୍ତତ୍ର ନ ସଂଶୟଃ ॥ ୧୨॥
ମାୟାୟା ଧାରକୋଽୟଂ ଵୈ ସତ୍ତମାତ୍ରେଣ ସଂସ୍ଥିତଃ ।
ଏକଦନ୍ତୋ ଗଣେଶୋ ଵୈ କଥ୍ୟତେ ଵେଦଵାଦିଭିଃ ॥ ୧୩॥
ସର୍ଵସତ୍ତାଧରଂ ପୂର୍ଣମେକଦନ୍ତଂ ଗଜାନନମ୍ ।
ସେଵଧ୍ଵଂ ଭକ୍ତିଭାଵେନ ଭଵିଷ୍ୟତି ସଦା ସୁଖମ୍ ॥ ୧୪॥
ଏଵମୁକ୍ତ୍ଵା ୟୟୌ ୟୋଗୀ ସ ସନତ୍କୁମାର ଆଦରାତ୍ ।
ଜୟ ହେରମ୍ବମନ୍ତ୍ରଂ ଵୈ ସମୁଚ୍ଚରନ୍ ମୁଖେନ ସଃ ॥ ୧୫॥
ତତୋ ଦେଵଗଣାଃ ସର୍ଵେ ମନୁୟସ୍ତପସି ସ୍ଥିତାଃ ।
ଏକାକ୍ଷରଵିଧାନେନ ତୋଷୟାମାସୁରାଦରାତ୍ ॥ ୧୬॥
ପତ୍ରଭକ୍ଷା ନିରାହାରା ଵାୟୁଭକ୍ଷା ଜଲାଶିନଃ ।
କନ୍ଦମୂଲଫଲାହାରାଃ କେଚିତ୍କେଚିଦ୍ବଭୂଵିରେ ॥ ୧୭॥
ସଂସ୍ଥିତା ଧ୍ୟାନନିଷ୍ଠା ଵୈ ଜପହୋମପରାୟଣାଃ ।
ନାନାତପଃପ୍ରଭାଵେଣ ତୋଷୟନ୍ ଗଣନାୟକମ୍ ॥ ୧୮॥
ଗତଵର୍ଷଶତେଷୁ ଵୈ ସନ୍ତୁଷ୍ଟ ଏକଦନ୍ତକଃ ।
ଆୟୟୌ ତାନ୍ଵରାନ୍ଦାତୁଂ ଧ୍ୟାତସ୍ତୈର୍ୟାଦୃଶସ୍ତଥା ॥ ୧୯॥
ଜଗାଦ ସ ତପୋୟୁକ୍ତାନ୍ ମୁନୀନ୍ଦେଵନ୍ଗଜାନନଃ ।
ଵରଂ ଵୃଣୁତ ତୁଷ୍ଟୋଽହଂ ଦାସ୍ୟାମି ବ୍ରାହ୍ମଣାମରାଃ ॥ ୨୦॥
ତସ୍ୟ ତଦ୍ଵଚନଂ ଶ୍ରୁତ୍ଵା ହୃଷ୍ଟା ଦେଵର୍ଷୟୋଽଭଵନ୍ ।
ଉନ୍ମୀଲ୍ୟ ଲୋଚନେ ଦେଵମପଶ୍ୟନ୍ସମୀପସ୍ଥିତମ୍ ॥ ୨୧॥
ଦୃଷ୍ଟ୍ଵା ମୂଷକସଂସ୍ଥଂ ତଂ ପ୍ରଣେମୁସ୍ତେ ଗଜାନନମ୍ ।
ମୁନୟୋ ଦେଵଦେଵେନ୍ଦ୍ରା ପୁପୂଜୁର୍ଭକ୍ତିସଂୟୁତାଃ ॥ ୨୨॥
ପୂଜୟିତ୍ଵା ୟଥାନ୍ୟାୟଂ ପ୍ରଣମ୍ୟ କରସମ୍ପୁଟାଃ ।
ତୁଷ୍ଟୁଵୁରେକଦନ୍ତଂ ତଂ ଭକ୍ତିନମ୍ରାତ୍ମକନ୍ଧରାଃ ॥ ୨୩॥
ଦେଵର୍ଷୟ ଊଚୁଃ ।
ନମସ୍ତେ ଗଜଵକ୍ତ୍ରାୟ ଗଣେଶାୟ ନମୋ ନମଃ ।
ଅନନ୍ତାନନ୍ଦଭୋକ୍ତ୍ରେ ଵୈ ବ୍ରହ୍ମଣେ ବ୍ରହ୍ମରୂପିଣେ ॥ ୨୪॥
ଆଦିମଧ୍ୟାନ୍ତହୀନାୟ ଚରାଚରମୟାୟ ତେ ।
ଅନନ୍ତୋଦରସଂସ୍ଥାୟ ନାଭିଶେଷାୟ ତେ ନମଃ ॥ ୨୫॥
କର୍ତ୍ରେ ପାତ୍ରେ ଚ ସଂହର୍ତ୍ରେ ତ୍ରିଗୁଣାନାମଧୀଶ୍ଵର ।
ସର୍ଵସତ୍ତାଧରାୟୈଵ ନିର୍ଗୁଣାୟ ନମୋ ନମଃ ॥ ୨୬॥
ସିଦ୍ଧିବୁଦ୍ଧିପତେ ତୁଭ୍ୟଂ ସିଦ୍ଧିବୁଦ୍ଧିପ୍ରଦାୟ ଚ ।
ବ୍ରହ୍ମଭୂତାୟ ଦେଵେଶ ସଗୁଣାୟ ନମୋ ନମଃ ॥ ୨୭॥
ପରଶୁଧାରିଣେ ତୁଭ୍ୟଂ କମଲହସ୍ତଶୋଭିନେ ।
ପାଶାଭୟଧରାୟୈଵ ମହୋଦରାୟ ତେ ନମଃ ॥ ୨୮॥
ମୂଷକାରୂଢଦେଵାୟ ମୂଷକଧ୍ଵଜିନେ ନମଃ ।
ଆଦିପୂଜ୍ୟାୟ ସର୍ଵାୟ ସର୍ଵପୂଜ୍ୟାୟ ତେ ନମଃ ॥ ୨୯॥
ସଗୁଣାତ୍ମକକାୟାୟ ନିର୍ଗୁଣମସ୍ତକାୟ ତେ ।
ତୟୋଦଭେଦରୂପେଣ ଚୈକଦନ୍ତୟ ତେ ନମଃ ॥ ୩୦॥
ଦେଵାନ୍ତାଽଗୋଚରାୟୈଵ ଵେଦାନ୍ତଲଭ୍ୟକାୟ ତେ ।
ୟୋଗାଧୀଶାୟ ଵୈ ତୁଭ୍ୟଂ ବ୍ରହ୍ମାଧୀଶାୟ ତେ ନମଃ ॥ ୩୧॥
ଅପାରଗୁଣଧାମାୟାନନ୍ତମାୟାପ୍ରଚରିଣେ ।
ନାନାଵତାରଭେଦାୟ ଶାନ୍ତିଦାୟ ନମୋ ନମଃ ॥ ୩୨॥
ଵୟଂ ଧନ୍ୟା ଵୟଂ ଧନ୍ୟା ୟୈର୍ଦୃଷ୍ଟୋ ଗଣନାୟକଃ ।
ବ୍ରହ୍ମଭୂତମୟଃ ସାକ୍ଷାତ୍ପ୍ରତ୍ୟକ୍ଷଂ ପୁରତଃ ସ୍ଥିତଃ ॥ ୩୩॥
ଏଵଂ ସ୍ତୁତ୍ଵା ପ୍ରହର୍ଷେଣ ନନୃତୁର୍ଭକ୍ତିସଂୟୁତାଃ ।
ସାଶ୍ରୁନେତ୍ରାନ୍ସରୋମାଞ୍ଚାନ୍ଦୃଷ୍ଟ୍ଵା ତାନ୍ ଢୁଣ୍ଢିରବ୍ରଵୀତ୍ ॥ ୩୪॥
ଏକଦନ୍ତ ଉଵାଚ ।
ଵରଂ ଵୃଣୁତ ଦେଵେଶା ମନୁୟଶ୍ଚ ୟଥେପ୍ସିତମ୍ ।
ଦାସ୍ୟାମି ତଂ ନ ସନ୍ଦେହୋ ୟଦ୍ୟପି ଦୁର୍ଲଭଂ ଭଵେତ୍ ॥ ୩୫॥
ଭଵତ୍କୃତଂ ମଦୀୟଂ ତତ୍ ସ୍ତୋତ୍ରଂ ସର୍ଵାର୍ଥଦଂ ଭଵେତ୍ ।
ପଠତେ ଶ୍ରୁଣ୍ଵତେ ଦେଵା ନାନାସିଦ୍ଧିପ୍ରଦଂ ଦ୍ଵିଜାଃ ॥ ୩୬॥
ଶତ୍ରୁନାଶକରଂ ଚୈଵ ସୁଖାନନ୍ଦପ୍ରଦାୟକମ୍ ।
ପୁତ୍ରପୌତ୍ରାଦିକଂ ସର୍ଵଂ ଲଭତେ ପାଠତୋ ନରଃ ॥ ୩୭॥
ଗୃତ୍ସମଦ ଉଵାଚ ।
ଏଵଂ ତସ୍ୟ ଵଚଃ ଶ୍ରୁତ୍ଵା ହର୍ଷୟୁକ୍ତାଃ ସୁରର୍ଷୟଃ ।
ଊଚୁସ୍ତମେକଦନ୍ତଂ ତେ ପ୍ରଣମ୍ୟ ଭକ୍ତିଭାଵତଃ ॥ ୩୮॥
ସୁରର୍ଷୟ ଊଚୁଃ ।
ୟଦି ତୁଷ୍ଟୋଽସି ସର୍ଵେଶ ଏକଦନ୍ତ ମହାପ୍ରଭୋ ।
ୟଦି ଦେୟୋ ଵରୋ ନଶ୍ଚେଜ୍ଜହି ଦୁଷ୍ଟଂ ମଦାସୁରମ୍ ॥ ୩୯॥
ଇତି ଶ୍ରୀମୁଦ୍ଗଲପୁରାଣାନ୍ତର୍ଗତଂ ସନକାଦିକୃତମେକଦନ୍ତସ୍ତୋତ୍ରଂ ସମାପ୍ତମ୍ ।
Comments
Post a Comment