ଷଷ୍ଠୋଽଧ୍ୟାୟଃ
🔴॥ ଷଷ୍ଠୋଽଧ୍ୟାୟଃ ॥🔴
ଓଂ ଋଷିରୁଵାଚ ॥ ୧॥
ଇତ୍ୟାକର୍ଣ୍ୟ ଵଚୋ ଦେଵ୍ୟାଃ ସ ଦୂତୋଽମର୍ଷପୂରିତଃ ।
ସମାଚଷ୍ଟ ସମାଗମ୍ୟ ଦୈତ୍ୟରାଜାୟ ଵିସ୍ତରାତ୍ ॥ ୨॥
ତସ୍ୟ ଦୂତସ୍ୟ ତଦ୍ଵାକ୍ୟମାକର୍ଣ୍ୟାସୁରରାଟ୍ ତତଃ ।
ସକ୍ରୋଧଃ ପ୍ରାହ ଦୈତ୍ୟାନାମଧିପଂ ଧୂମ୍ରଲୋଚନମ୍ ॥ ୩॥
ହେ ଧୂମ୍ରଲୋଚନାଶୁ ତ୍ଵଂ ସ୍ଵସୈନ୍ୟପରିଵାରିତଃ ।
ତାମାନୟ ବଲାଦ୍ଦୁଷ୍ଟାଂ କେଶାକର୍ଷଣଵିହ୍ଵଲାମ୍ ॥ ୪॥
ତତ୍ପରିତ୍ରାଣଦଃ କଶ୍ଚିଦ୍ୟଦି ଵୋତ୍ତିଷ୍ଠତେଽପରଃ ।
ସ ହନ୍ତଵ୍ୟୋଽମରୋ ଵାପି ୟକ୍ଷୋ ଗନ୍ଧର୍ଵ ଏଵ ଵା ॥ ୫॥
ଋଷିରୁଵାଚ ॥ ୬॥
ତେନାଜ୍ଞପ୍ତସ୍ତତଃ ଶୀଘ୍ରଂ ସ ଦୈତ୍ୟୋ ଧୂମ୍ରଲୋଚନଃ ।
ଵୃତଃ ଷଷ୍ଟ୍ୟା ସହସ୍ରାଣାମସୁରାଣାଂ ଦ୍ରୁତଂ ୟୟୌ ॥ ୭॥
ସ ଦୃଷ୍ଟ୍ଵା ତାଂ ତତୋ ଦେଵୀଂ ତୁହିନାଚଲସଂସ୍ଥିତାମ୍ ।
ଜଗାଦୋଚ୍ଚୈଃ ପ୍ରୟାହୀତି ମୂଲଂ ଶୁମ୍ଭନିଶୁମ୍ଭୟୋଃ ॥ ୮॥
ନ ଚେତ୍ପ୍ରୀତ୍ୟାଦ୍ୟ ଭଵତୀ ମଦ୍ଭର୍ତାରମୁପୈଷ୍ୟତି ।
ତତୋ ବଲାନ୍ନୟାମ୍ୟେଷ କେଶାକର୍ଷଣଵିହ୍ଵଲାମ୍ ॥ ୯॥
ଦେଵ୍ୟୁଵାଚ ॥ ୧୦॥
ଦୈତ୍ୟେଶ୍ଵରେଣ ପ୍ରହିତୋ ବଲଵାନ୍ବଲସଂଵୃତଃ ।
ବଲାନ୍ନୟସି ମାମେଵଂ ତତଃ କିଂ ତେ କରୋମ୍ୟହମ୍ ॥ ୧୧॥
ଋଷିରୁଵାଚ ॥ ୧୨॥
ଇତ୍ୟୁକ୍ତଃ ସୋଽଭ୍ୟଧାଵତ୍ତାମସୁରୋ ଧୂମ୍ରଲୋଚନଃ ।
ହୁଙ୍କାରେଣୈଵ ତଂ ଭସ୍ମ ସା ଚକାରାମ୍ବିକା ତଦା ॥ ୧୩॥
ଅଥ କ୍ରୁଦ୍ଧଂ ମହାସୈନ୍ୟମସୁରାଣାଂ ତଥାମ୍ବିକା ।
ଵଵର୍ଷ ସାୟକୈସ୍ତୀକ୍ଷ୍ଣୈସ୍ତଥା ଶକ୍ତିପରଶ୍ଵଧୈଃ ॥ ୧୪॥
ତତୋ ଧୁତସଟଃ କୋପାତ୍କୃତ୍ଵା ନାଦଂ ସୁଭୈରଵମ୍ ।
ପପାତାସୁରସେନାୟାଂ ସିଂହୋ ଦେଵ୍ୟାଃ ସ୍ଵଵାହନଃ ॥ ୧୫॥
କାଂଶ୍ଚିତ୍କରପ୍ରହାରେଣ ଦୈତ୍ୟାନାସ୍ୟେନ ଚାପରାନ୍ ।
ଆକ୍ରାନ୍ତ୍ୟା ଚାଧରେଣାନ୍ୟାନ୍ ଜଘାନ ସ ମହାସୁରାନ୍ ॥ ୧୬॥
କେଷାଞ୍ଚିତ୍ପାଟୟାମାସ ନଖୈଃ କୋଷ୍ଠାନି କେସରୀ ।
ତଥା ତଲପ୍ରହାରେଣ ଶିରାଂସି କୃତଵାନ୍ପୃଥକ୍ ॥ ୧୭॥
ଵିଚ୍ଛିନ୍ନବାହୁଶିରସଃ କୃତାସ୍ତେନ ତଥାପରେ ।
ପପୌ ଚ ରୁଧିରଂ କୋଷ୍ଠାଦନ୍ୟେଷାଂ ଧୁତକେସରଃ ॥ ୧୮॥
କ୍ଷଣେନ ତଦ୍ବଲଂ ସର୍ଵଂ କ୍ଷୟଂ ନୀତଂ ମହାତ୍ମନା ।
ତେନ କେସରିଣା ଦେଵ୍ୟା ଵାହନେନାତିକୋପିନା ॥ ୧୯॥
ଶ୍ରୁତ୍ଵା ତମସୁରଂ ଦେଵ୍ୟା ନିହତଂ ଧୂମ୍ରଲୋଚନମ୍ ।
ବଲଂ ଚ କ୍ଷୟିତଂ କୃତ୍ସ୍ନଂ ଦେଵୀକେସରିଣା ତତଃ ॥ ୨୦॥
ଚୁକୋପ ଦୈତ୍ୟାଧିପତିଃ ଶୁମ୍ଭଃ ପ୍ରସ୍ଫୁରିତାଧରଃ ।
ଆଜ୍ଞାପୟାମାସ ଚ ତୌ ଚଣ୍ଡମୁଣ୍ଡୌ ମହାସୁରୌ ॥ ୨୧॥
ହେ ଚଣ୍ଡ ହେ ମୁଣ୍ଡ ବଲୈର୍ବହୁଭିଃ ପରିଵାରିତୌ ।
ତତ୍ର ଗଚ୍ଛତ ଗତ୍ଵା ଚ ସା ସମାନୀୟତାଂ ଲଘୁ ॥ ୨୨॥
କେଶେଷ୍ଵାକୃଷ୍ୟ ବଦ୍ଧ୍ଵା ଵା ୟଦି ଵଃ ସଂଶୟୋ ୟୁଧି ।
ତଦାଶେଷାୟୁଧୈଃ ସର୍ଵୈରସୁରୈର୍ଵିନିହନ୍ୟତାମ୍ ॥ ୨୩॥
ତସ୍ୟାଂ ହତାୟାଂ ଦୁଷ୍ଟାୟାଂ ସିଂହେ ଚ ଵିନିପାତିତେ ।
ଶୀଘ୍ରମାଗମ୍ୟତାଂ ବଦ୍ଧ୍ଵା ଗୃହୀତ୍ଵା ତାମଥାମ୍ବିକାମ୍ ॥ ୨୪॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ଶୁମ୍ଭନିଶୁମ୍ଭସେନାନୀଧୂମ୍ରଲୋଚନଵଧୋ ନାମ ଷଷ୍ଠୋଽଧ୍ୟାୟଃ ॥ ୬॥
Comments
Post a Comment