ଦ୍ଵାଦଶୋଽଧ୍ୟାୟଃ
🟣॥ ଦ୍ଵାଦଶୋଽଧ୍ୟାୟଃ ॥🟣
ଓଂ ଦେଵ୍ୟୁଵାଚ ॥ ୧॥
ଏଭିଃ ସ୍ତଵୈଶ୍ଚ ମାଂ ନିତ୍ୟଂ ସ୍ତୋଷ୍ୟତେ ୟଃ ସମାହିତଃ ।
ତସ୍ୟାହଂ ସକଲାଂ ବାଧାଂ ଶମୟିଷ୍ୟାମ୍ୟସଂଶୟମ୍ ॥ ୨॥
ମଧୁକୈଟଭନାଶଂ ଚ ମହିଷାସୁରଘାତନମ୍ ।
କୀର୍ତୟିଷ୍ୟନ୍ତି ୟେ ତଦ୍ଵଦ୍ଵଧଂ ଶୁମ୍ଭନିଶୁମ୍ଭୟୋଃ ॥ ୩॥
ଅଷ୍ଟମ୍ୟାଂ ଚ ଚତୁର୍ଦଶ୍ୟାଂ ନଵମ୍ୟାଂ ଚୈକଚେତସଃ ।
ଶ୍ରୋଷ୍ୟନ୍ତି ଚୈଵ ୟେ ଭକ୍ତ୍ୟା ମମ ମାହାତ୍ମ୍ୟମୁତ୍ତମମ୍ ॥ ୪॥
ନ ତେଷାଂ ଦୁଷ୍କୃତଂ କିଞ୍ଚିଦ୍ଦୁଷ୍କୃତୋତ୍ଥା ନ ଚାପଦଃ ।
ଭଵିଷ୍ୟତି ନ ଦାରିଦ୍ର୍ୟଂ ନ ଚୈଵେଷ୍ଟଵିୟୋଜନମ୍ ॥ ୫॥
ଶତ୍ରୁଭ୍ୟୋ ନ ଭୟଂ ତସ୍ୟ ଦସ୍ୟୁତୋ ଵା ନ ରାଜତଃ ।
ନ ଶସ୍ତ୍ରାନଲତୋୟୌଘାତ୍ କଦାଚିତ୍ ସମ୍ଭଵିଷ୍ୟତି ॥ ୬॥
ତସ୍ମାନ୍ମମୈତନ୍ମାହାତ୍ମ୍ୟଂ ପଠିତଵ୍ୟଂ ସମାହିତୈଃ ।
ଶ୍ରୋତଵ୍ୟଂ ଚ ସଦା ଭକ୍ତ୍ୟା ପରଂ ସ୍ଵସ୍ତ୍ୟୟନଂ ମହତ୍ ॥ ୭॥
ଉପସର୍ଗାନଶେଷାଂସ୍ତୁ ମହାମାରୀସମୁଦ୍ଭଵାନ୍ ।
ତଥା ତ୍ରିଵିଧମୁତ୍ପାତଂ ମାହାତ୍ମ୍ୟଂ ଶମୟେନ୍ମମ ॥ ୮॥
ୟତ୍ରୈତତ୍ପଠ୍ୟତେ ସମ୍ୟଙ୍ନିତ୍ୟମାୟତନେ ମମ ।
ସଦା ନ ତଦ୍ଵିମୋକ୍ଷ୍ୟାମି ସାନ୍ନିଧ୍ୟଂ ତତ୍ର ମେ ସ୍ଥିତମ୍ ॥ ୯॥
ବଲିପ୍ରଦାନେ ପୂଜାୟାମଗ୍ନିକାର୍ୟେ ମହୋତ୍ସଵେ ।
ସର୍ଵଂ ମମୈତନ୍ମାହାତ୍ମ୍ୟମ୍ ଉଚ୍ଚାର୍ୟଂ ଶ୍ରାଵ୍ୟମେଵ ଚ ॥ ୧୦॥
ଜାନତାଜାନତା ଵାପି ବଲିପୂଜାଂ ୟଥା କୃତାମ୍ ।
ପ୍ରତୀକ୍ଷିଷ୍ୟାମ୍ୟହଂ ପ୍ରୀତ୍ୟା ଵହ୍ନିହୋମଂ ତଥାକୃତମ୍ ॥ ୧୧॥
ଶରତ୍କାଲେ ମହାପୂଜା କ୍ରିୟତେ ୟା ଚ ଵାର୍ଷିକୀ ।
ତସ୍ୟାଂ ମମୈତନ୍ମାହାତ୍ମ୍ୟଂ ଶ୍ରୁତ୍ଵା ଭକ୍ତିସମନ୍ଵିତଃ ॥ ୧୨॥
ସର୍ଵାବାଧାଵିନିର୍ମୁକ୍ତୋ ଧନଧାନ୍ୟସମନ୍ଵିତଃ ।
ମନୁଷ୍ୟୋ ମତ୍ପ୍ରସାଦେନ ଭଵିଷ୍ୟତି ନ ସଂଶୟଃ ॥ ୧୩॥
ଶ୍ରୁତ୍ଵା ମମୈତନ୍ମାହାତ୍ମ୍ୟଂ ତଥା ଚୋତ୍ପତ୍ତୟଃ ଶୁଭାଃ ।
ପରାକ୍ରମଂ ଚ ୟୁଦ୍ଧେଷୁ ଜାୟତେ ନିର୍ଭୟଃ ପୁମାନ୍ ॥ ୧୪॥
ରିପଵଃ ସଙ୍କ୍ଷୟଂ ୟାନ୍ତି କଲ୍ୟାଣଂ ଚୋପପଦ୍ୟତେ ।
ନନ୍ଦତେ ଚ କୁଲଂ ପୁଂସାଂ ମାହାତ୍ମ୍ୟଂ ମମ ଶୃଣ୍ଵତାମ୍ ॥ ୧୫॥
ଶାନ୍ତିକର୍ମଣି ସର୍ଵତ୍ର ତଥା ଦୁଃସ୍ଵପ୍ନଦର୍ଶନେ ।
ଗ୍ରହପୀଡାସୁ ଚୋଗ୍ରାସୁ ମାହାତ୍ମ୍ୟଂ ଶୃଣୁୟାନ୍ମମ ॥ ୧୬॥
ଉପସର୍ଗାଃ ଶମଂ ୟାନ୍ତି ଗ୍ରହପୀଡାଶ୍ଚ ଦାରୁଣାଃ ।
ଦୁଃସ୍ଵପ୍ନଂ ଚ ନୃଭିର୍ଦୃଷ୍ଟଂ ସୁସ୍ଵପ୍ନମୁପଜାୟତେ ॥ ୧୭॥
ବାଲଗ୍ରହାଭିଭୂତାନାଂ ବାଲାନାଂ ଶାନ୍ତିକାରକମ୍ ।
ସଙ୍ଘାତଭେଦେ ଚ ନୃଣାଂ ମୈତ୍ରୀକରଣମୁତ୍ତମମ୍ ॥ ୧୮॥
ଦୁର୍ଵୃତ୍ତାନାମଶେଷାଣାଂ ବଲହାନିକରଂ ପରମ୍ ।
ରକ୍ଷୋଭୂତପିଶାଚାନାଂ ପଠନାଦେଵ ନାଶନମ୍ ॥ ୧୯॥
ସର୍ଵଂ ମମୈତନ୍ମାହାତ୍ମ୍ୟଂ ମମ ସନ୍ନିଧିକାରକମ୍ ।
ପଶୁପୁଷ୍ପାର୍ଘ୍ୟଧୂପୈଶ୍ଚ ଗନ୍ଧଦୀପୈସ୍ତଥୋତ୍ତମୈଃ ॥ ୨୦॥
ଵିପ୍ରାଣାଂ ଭୋଜନୈର୍ହୋମୈଃ ପ୍ରୋକ୍ଷଣୀୟୈରହର୍ନିଶମ୍ ।
ଅନ୍ୟୈଶ୍ଚ ଵିଵିଧୈର୍ଭୋଗୈଃ ପ୍ରଦାନୈର୍ଵତ୍ସରେଣ ୟା ॥ ୨୧॥
ପ୍ରୀତିର୍ମେ କ୍ରିୟତେ ସାସ୍ମିନ୍ ସକୃଦୁଚ୍ଚରିତେ ଶ୍ରୁତେ ।
ଶ୍ରୁତଂ ହରତି ପାପାନି ତଥାରୋଗ୍ୟଂ ପ୍ରୟଚ୍ଛତି ॥ ୨୨॥
ରକ୍ଷାଂ କରୋତି ଭୂତେଭ୍ୟୋ ଜନ୍ମନାଂ କୀର୍ତନଂ ମମ ।
ୟୁଦ୍ଧେଷୁ ଚରିତଂ ୟନ୍ମେ ଦୁଷ୍ଟଦୈତ୍ୟନିବର୍ହଣମ୍ ॥ ୨୩॥
ତସ୍ମିଞ୍ଛ୍ରୁତେ ଵୈରିକୃତଂ ଭୟଂ ପୁଂସାଂ ନ ଜାୟତେ ।
ୟୁଷ୍ମାଭିଃ ସ୍ତୁତୟୋ ୟାଶ୍ଚ ୟାଶ୍ଚ ବ୍ରହ୍ମର୍ଷିଭିଃ କୃତାଃ ॥ ୨୪॥
ବ୍ରହ୍ମଣା ଚ କୃତାସ୍ତାସ୍ତୁ ପ୍ରୟଚ୍ଛନ୍ତୁ ଶୁଭାଂ ମତିମ୍ ।
ଅରଣ୍ୟେ ପ୍ରାନ୍ତରେ ଵାପି ଦାଵାଗ୍ନିପରିଵାରିତଃ ॥ ୨୫॥
ଦସ୍ୟୁଭିର୍ଵା ଵୃତଃ ଶୂନ୍ୟେ ଗୃହୀତୋ ଵାପି ଶତ୍ରୁଭିଃ ।
ସିଂହଵ୍ୟାଘ୍ରାନୁୟାତୋ ଵା ଵନେ ଵା ଵନହସ୍ତିଭିଃ ॥ ୨୬॥
ରାଜ୍ଞା କ୍ରୁଦ୍ଧେନ ଚାଜ୍ଞପ୍ତୋ ଵଧ୍ୟୋ ବନ୍ଧଗତୋଽପି ଵା ।
ଆଘୂର୍ଣିତୋ ଵା ଵାତେନ ସ୍ଥିତଃ ପୋତେ ମହାର୍ଣଵେ ॥ ୨୭॥
ପତତ୍ସୁ ଚାପି ଶସ୍ତ୍ରେଷୁ ସଙ୍ଗ୍ରାମେ ଭୃଶଦାରୁଣେ ।
ସର୍ଵାବାଧାସୁ ଘୋରାସୁ ଵେଦନାଭ୍ୟର୍ଦିତୋଽପି ଵା ॥ ୨୮॥
ସ୍ମରନ୍ ମମୈତଚ୍ଚରିତଂ ନରୋ ମୁଚ୍ୟେତ ସଙ୍କଟାତ୍ ।
ମମ ପ୍ରଭାଵାତ୍ସିଂହାଦ୍ୟା ଦସ୍ୟଵୋ ଵୈରିଣସ୍ତଥା ॥ ୨୯॥
ଦୂରାଦେଵ ପଲାୟନ୍ତେ ସ୍ମରତଶ୍ଚରିତଂ ମମ ॥ ୩୦॥
ଋଷିରୁଵାଚ ॥ ୩୧॥
ଇତ୍ୟୁକ୍ତ୍ଵା ସା ଭଗଵତୀ ଚଣ୍ଡିକା ଚଣ୍ଡଵିକ୍ରମା ॥ ୩୨॥
ପଶ୍ୟତାଂ ସର୍ଵଦେଵାନାଂ ତତ୍ରୈଵାନ୍ତରଧୀୟତ ।
ତେଽପି ଦେଵା ନିରାତଙ୍କାଃ ସ୍ଵାଧିକାରାନ୍ୟଥା ପୁରା ॥ ୩୩॥
ୟଜ୍ଞଭାଗଭୁଜଃ ସର୍ଵେ ଚକ୍ରୁର୍ଵିନିହତାରୟଃ ।
ଦୈତ୍ୟାଶ୍ଚ ଦେଵ୍ୟା ନିହତେ ଶୁମ୍ଭେ ଦେଵରିପୌ ୟୁଧି ॥ ୩୪॥
ଜଗଦ୍ଵିଧ୍ଵଂସକେ ତସ୍ମିନ୍ ମହୋଗ୍ରେଽତୁଲଵିକ୍ରମେ ।
ନିଶୁମ୍ଭେ ଚ ମହାଵୀର୍ୟେ ଶେଷାଃ ପାତାଲମାୟୟୁଃ ॥ ୩୫॥
ଏଵଂ ଭଗଵତୀ ଦେଵୀ ସା ନିତ୍ୟାପି ପୁନଃ ପୁନଃ ।
ସମ୍ଭୂୟ କୁରୁତେ ଭୂପ ଜଗତଃ ପରିପାଲନମ୍ ॥ ୩୬॥
ତୟୈତନ୍ମୋହ୍ୟତେ ଵିଶ୍ଵଂ ସୈଵ ଵିଶ୍ଵଂ ପ୍ରସୂୟତେ ।
ସା ୟାଚିତା ଚ ଵିଜ୍ଞାନଂ ତୁଷ୍ଟା ଋଦ୍ଧିଂ ପ୍ରୟଚ୍ଛତି ॥ ୩୭॥
ଵ୍ୟାପ୍ତଂ ତୟୈତତ୍ସକଲଂ ବ୍ରହ୍ମାଣ୍ଡଂ ମନୁଜେଶ୍ଵର ।
ମହାଦେଵ୍ୟା ମହାକାଲୀ ମହାମାରୀସ୍ଵରୂପୟା ॥ ୩୮॥
ସୈଵ କାଲେ ମହାମାରୀ ସୈଵ ସୃଷ୍ଟିର୍ଭଵତ୍ୟଜା ।
ସ୍ଥିତିଂ କରୋତି ଭୂତାନାଂ ସୈଵ କାଲେ ସନାତନୀ ॥ ୩୯॥
ଭଵକାଲେ ନୃଣାଂ ସୈଵ ଲକ୍ଷ୍ମୀର୍ଵୃଦ୍ଧିପ୍ରଦା ଗୃହେ ।
ସୈଵାଭାଵେ ତଥାଲକ୍ଷ୍ମୀର୍ଵିନାଶାୟୋପଜାୟତେ ॥ ୪୦॥
ସ୍ତୁତା ସମ୍ପୂଜିତା ପୁଷ୍ପୈର୍ଗନ୍ଧଧୂପାଦିଭିସ୍ତଥା ।
ଦଦାତି ଵିତ୍ତଂ ପୁତ୍ରାଂଶ୍ଚ ମତିଂ ଧର୍ମେ ଗତିଂ ଶୁଭାମ୍ ॥ ୪୧॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ଭଗଵତୀ ଵାକ୍ୟଂ ଦ୍ଵାଦଶୋଽଧ୍ୟାୟଃ ॥ ୧୨॥
Comments
Post a Comment