ପଞ୍ଚମୋଽଧ୍ୟାୟଃ
🔴॥ ପଞ୍ଚମୋଽଧ୍ୟାୟଃ ॥🔴
ଵିନିୟୋଗଃ
ଅସ୍ୟ ଶ୍ରୀ ଉତ୍ତରଚରିତ୍ରସ୍ୟ ରୁଦ୍ର ଋଷିଃ । ଶ୍ରୀମହାସରସ୍ଵତୀ ଦେଵତା ।
ଅନୁଷ୍ଟୁପ୍ ଛନ୍ଦଃ । ଭୀମା ଶକ୍ତିଃ । ଭ୍ରାମରୀ ବୀଜମ୍ । ସୂର୍ୟସ୍ତତ୍ତ୍ଵମ୍ ।
ସାମଵେଦଃ ସ୍ଵରୂପମ୍ । ଶ୍ରୀମହାସରସ୍ଵତୀପ୍ରୀତ୍ୟର୍ଥେ ଉତ୍ତରଚରିତ୍ରପାଠେ ଵିନିୟୋଗଃ ।
ଧ୍ୟାନମ୍
ଘଣ୍ଟାଶୂଲହଲାନି ଶଙ୍ଖମୁସଲେ ଚକ୍ରଂ ଧନୁଃ ସାୟକଂ
ହସ୍ତାବ୍ଜୈର୍ଦଧତୀଂ ଘନାନ୍ତଵିଲସଚ୍ଛୀତାଂଶୁତୁଲ୍ୟପ୍ରଭାମ୍ ।
ଗୌରୀଦେହସମୁଦ୍ଭଵାଂ ତ୍ରିଜଗତାମାଧାରଭୂତାଂ ମହା-
ପୂର୍ଵାମତ୍ର ସରସ୍ଵତୀମନୁଭଜେ ଶୁମ୍ଭାଦିଦୈତ୍ୟାର୍ଦିନୀମ୍ ॥
ଓଂ କ୍ଲୀଂ ଋଷିରୁଵାଚ ॥ ୧॥
ପୁରା ଶୁମ୍ଭନିଶୁମ୍ଭାଭ୍ୟାମସୁରାଭ୍ୟାଂ ଶଚୀପତେଃ ।
ତ୍ରୈଲୋକ୍ୟଂ ୟଜ୍ଞଭାଗାଶ୍ଚ ହୃତା ମଦବଲାଶ୍ରୟାତ୍ ॥ ୨॥
ତାଵେଵ ସୂର୍ୟତାଂ ତଦ୍ଵଦଧିକାରଂ ତଥୈନ୍ଦଵମ୍ ।
କୌବେରମଥ ୟାମ୍ୟଂ ଚ ଚକ୍ରାତେ ଵରୁଣସ୍ୟ ଚ ॥ ୩॥
ତାଵେଵ ପଵନର୍ଦ୍ଧିଂ ଚ ଚକ୍ରତୁର୍ଵହ୍ନିକର୍ମ ଚ ।
ତତୋ ଦେଵା ଵିନିର୍ଧୂତା ଭ୍ରଷ୍ଟରାଜ୍ୟାଃ ପରାଜିତାଃ ॥ ୪॥
ହୃତାଧିକାରାସ୍ତ୍ରିଦଶାସ୍ତାଭ୍ୟାଂ ସର୍ଵେ ନିରାକୃତାଃ ।
ମହାସୁରାଭ୍ୟାଂ ତାଂ ଦେଵୀଂ ସଂସ୍ମରନ୍ତ୍ୟପରାଜିତାମ୍ ॥ ୫॥
ତୟାସ୍ମାକଂ ଵରୋ ଦତ୍ତୋ ୟଥାପତ୍ସୁ ସ୍ମୃତାଖିଲାଃ ।
ଭଵତାଂ ନାଶୟିଷ୍ୟାମି ତତ୍କ୍ଷଣାତ୍ପରମାପଦଃ ॥ ୬॥
ଇତି କୃତ୍ଵା ମତିଂ ଦେଵା ହିମଵନ୍ତଂ ନଗେଶ୍ଵରମ୍ ।
ଜଗ୍ମୁସ୍ତତ୍ର ତତୋ ଦେଵୀଂ ଵିଷ୍ଣୁମାୟାଂ ପ୍ରତୁଷ୍ଟୁଵୁଃ ॥ ୭॥
ଦେଵା ଊଚୁଃ ॥ ୮॥
ନମୋ ଦେଵ୍ୟୈ ମହାଦେଵ୍ୟୈ ଶିଵାୟୈ ସତତଂ ନମଃ ।
ନମଃ ପ୍ରକୃତ୍ୟୈ ଭଦ୍ରାୟୈ ନିୟତାଃ ପ୍ରଣତାଃ ସ୍ମ ତାମ୍ ॥ ୯॥
ରୌଦ୍ରାୟୈ ନମୋ ନିତ୍ୟାୟୈ ଗୌର୍ୟୈ ଧାତ୍ର୍ୟୈ ନମୋ ନମଃ ।
ଜ୍ୟୋତ୍ସ୍ନାୟୈ ଚେନ୍ଦୁରୂପିଣ୍ୟୈ ସୁଖାୟୈ ସତତଂ ନମଃ ॥ ୧୦॥
କଲ୍ୟାଣ୍ୟୈ ପ୍ରଣତା ଵୃଦ୍ଧ୍ୟୈ ସିଦ୍ଧ୍ୟୈ କୁର୍ମୋ ନମୋ ନମଃ ।
ନୈରୃତ୍ୟୈ ଭୂଭୃତାଂ ଲକ୍ଷ୍ମ୍ୟୈ ଶର୍ଵାଣ୍ୟୈ ତେ ନମୋ ନମଃ ॥ ୧୧॥
ଦୁର୍ଗାୟୈ ଦୁର୍ଗପାରାୟୈ ସାରାୟୈ ସର୍ଵକାରିଣ୍ୟୈ ।
ଖ୍ୟାତ୍ୟୈ ତଥୈଵ କୃଷ୍ଣାୟୈ ଧୂମ୍ରାୟୈ ସତତଂ ନମଃ ॥ ୧୨॥
ଅତିସୌମ୍ୟାତିରୌଦ୍ରାୟୈ ନତାସ୍ତସ୍ୟୈ ନମୋ ନମଃ ।
ନମୋ ଜଗତ୍ପ୍ରତିଷ୍ଠାୟୈ ଦେଵ୍ୟୈ କୃତ୍ୟୈ ନମୋ ନମଃ ॥ ୧୩॥
ୟା ଦେଵୀ ସର୍ଵଭୂତେଷୁ ଵିଷ୍ଣୁମାୟେତି ଶବ୍ଦିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୧୪-୧୬॥
ୟା ଦେଵୀ ସର୍ଵଭୂତେଷୁ ଚେତନେତ୍ୟଭିଧୀୟତେ ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୧୭-୧୯॥
ୟା ଦେଵୀ ସର୍ଵଭୂତେଷୁ ବୁଦ୍ଧିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୨୦-୨୨॥
ୟା ଦେଵୀ ସର୍ଵଭୂତେଷୁ ନିଦ୍ରାରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୨୩-୨୫॥
ୟା ଦେଵୀ ସର୍ଵଭୂତେଷୁ କ୍ଷୁଧାରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୨୬-୨୮॥
ୟା ଦେଵୀ ସର୍ଵଭୂତେଷୁ ଛାୟାରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୨୯-୩୧॥
ୟା ଦେଵୀ ସର୍ଵଭୂତେଷୁ ଶକ୍ତିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୩୨-୩୪॥
ୟା ଦେଵୀ ସର୍ଵଭୂତେଷୁ ତୃଷ୍ଣାରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୩୫-୩୭॥
ୟା ଦେଵୀ ସର୍ଵଭୂତେଷୁ କ୍ଷାନ୍ତିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୩୮-୪୦॥
ୟା ଦେଵୀ ସର୍ଵଭୂତେଷୁ ଜାତିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୪୧-୪୩॥
ୟା ଦେଵୀ ସର୍ଵଭୂତେଷୁ ଲଜ୍ଜାରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୪୪-୪୬॥
ୟା ଦେଵୀ ସର୍ଵଭୂତେଷୁ ଶାନ୍ତିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୪୭-୪୯॥
ୟା ଦେଵୀ ସର୍ଵଭୂତେଷୁ ଶ୍ରଦ୍ଧାରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୫୦-୫୨॥
ୟା ଦେଵୀ ସର୍ଵଭୂତେଷୁ କାନ୍ତିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୫୩-୫୫॥
ୟା ଦେଵୀ ସର୍ଵଭୂତେଷୁ ଲକ୍ଷ୍ମୀରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୫୬-୫୮॥
ୟା ଦେଵୀ ସର୍ଵଭୂତେଷୁ ଵୃତ୍ତିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୫୯-୬୧॥
ୟା ଦେଵୀ ସର୍ଵଭୂତେଷୁ ସ୍ମୃତିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୬୨-୬୪॥
ୟା ଦେଵୀ ସର୍ଵଭୂତେଷୁ ଦୟାରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୬୫-୬୭॥
ୟା ଦେଵୀ ସର୍ଵଭୂତେଷୁ ତୁଷ୍ଟିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୬୮-୭୦॥
ୟା ଦେଵୀ ସର୍ଵଭୂତେଷୁ ମାତୃରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୭୧-୭୩॥
ୟା ଦେଵୀ ସର୍ଵଭୂତେଷୁ ଭ୍ରାନ୍ତିରୂପେଣ ସଂସ୍ଥିତା ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୭୪-୭୬॥
ଇନ୍ଦ୍ରିୟାଣାମଧିଷ୍ଠାତ୍ରୀ ଭୂତାନାଂ ଚାଖିଲେଷୁ ୟା ।
ଭୂତେଷୁ ସତତଂ ତସ୍ୟୈ ଵ୍ୟାପ୍ତ୍ୟୈ ଦେଵ୍ୟୈ ନମୋ ନମଃ ॥ ୭୭॥
ଚିତିରୂପେଣ ୟା କୃତ୍ସ୍ନମେତଦ୍ ଵ୍ୟାପ୍ୟ ସ୍ଥିତା ଜଗତ୍ ।
ନମସ୍ତସ୍ୟୈ ନମସ୍ତସ୍ୟୈ ନମସ୍ତସ୍ୟୈ ନମୋ ନମଃ ॥ ୭୮-୮୦॥
ସ୍ତୁତା ସୁରୈଃ ପୂର୍ଵମଭୀଷ୍ଟସଂଶ୍ରୟା-
ତ୍ତଥା ସୁରେନ୍ଦ୍ରେଣ ଦିନେଷୁ ସେଵିତା ।
କରୋତୁ ସା ନଃ ଶୁଭହେତୁରୀଶ୍ଵରୀ
ଶୁଭାନି ଭଦ୍ରାଣ୍ୟଭିହନ୍ତୁ ଚାପଦଃ ॥ ୮୧॥
ୟା ସାମ୍ପ୍ରତଂ ଚୋଦ୍ଧତଦୈତ୍ୟତାପିତୈ-
ରସ୍ମାଭିରୀଶା ଚ ସୁରୈର୍ନମସ୍ୟତେ ।
ୟା ଚ ସ୍ମୃତା ତତ୍କ୍ଷଣମେଵ ହନ୍ତି ନଃ
ସର୍ଵାପଦୋ ଭକ୍ତିଵିନମ୍ରମୂର୍ତିଭିଃ ॥ ୮୨॥
ଋଷିରୁଵାଚ ॥ ୮୩॥
ଏଵଂ ସ୍ତଵାଭିୟୁକ୍ତାନାଂ ଦେଵାନାଂ ତତ୍ର ପାର୍ଵତୀ ।
ସ୍ନାତୁମଭ୍ୟାୟୟୌ ତୋୟେ ଜାହ୍ନଵ୍ୟା ନୃପନନ୍ଦନ ॥ ୮୪॥
ସାବ୍ରଵୀତ୍ତାନ୍ ସୁରାନ୍ ସୁଭ୍ରୂର୍ଭଵଦ୍ଭିଃ ସ୍ତୂୟତେଽତ୍ର କା ।
ଶରୀରକୋଶତଶ୍ଚାସ୍ୟାଃ ସମୁଦ୍ଭୂତାବ୍ରଵୀଚ୍ଛିଵା ॥ ୮୫॥
ସ୍ତୋତ୍ରଂ ମମୈତତ୍କ୍ରିୟତେ ଶୁମ୍ଭଦୈତ୍ୟନିରାକୃତୈଃ ।
ଦେଵୈଃ ସମେତୈଃ ସମରେ ନିଶୁମ୍ଭେନ ପରାଜିତୈଃ ॥ ୮୬॥
ଶରୀରକୋଶାଦ୍ୟତ୍ତସ୍ୟାଃ ପାର୍ଵତ୍ୟା ନିଃସୃତାମ୍ବିକା ।
କୌଶିକୀତି ସମସ୍ତେଷୁ ତତୋ ଲୋକେଷୁ ଗୀୟତେ ॥ ୮୭॥
ତସ୍ୟାଂ ଵିନିର୍ଗତାୟାଂ ତୁ କୃଷ୍ଣାଭୂତ୍ସାପି ପାର୍ଵତୀ ।
କାଲିକେତି ସମାଖ୍ୟାତା ହିମାଚଲକୃତାଶ୍ରୟା ॥ ୮୮॥
ତତୋଽମ୍ବିକାଂ ପରଂ ରୂପଂ ବିଭ୍ରାଣାଂ ସୁମନୋହରମ୍ ।
ଦଦର୍ଶ ଚଣ୍ଡୋ ମୁଣ୍ଡଶ୍ଚ ଭୃତ୍ୟୌ ଶୁମ୍ଭନିଶୁମ୍ଭୟୋଃ ॥ ୮୯॥
ତାଭ୍ୟାଂ ଶୁମ୍ଭାୟ ଚାଖ୍ୟାତା ସାତୀଵ ସୁମନୋହରା ।
କାପ୍ୟାସ୍ତେ ସ୍ତ୍ରୀ ମହାରାଜ ଭାସୟନ୍ତୀ ହିମାଚଲମ୍ ॥ ୯୦॥
ନୈଵ ତାଦୃକ୍ କ୍ଵଚିଦ୍ରୂପଂ ଦୃଷ୍ଟଂ କେନଚିଦୁତ୍ତମମ୍ ।
ଜ୍ଞାୟତାଂ କାପ୍ୟସୌ ଦେଵୀ ଗୃହ୍ୟତାଂ ଚାସୁରେଶ୍ଵର ॥ ୯୧॥
ସ୍ତ୍ରୀରତ୍ନମତିଚାର୍ଵଙ୍ଗୀ ଦ୍ୟୋତୟନ୍ତୀ ଦିଶସ୍ତ୍ଵିଷା ।
ସା ତୁ ତିଷ୍ଠତି ଦୈତ୍ୟେନ୍ଦ୍ର ତାଂ ଭଵାନ୍ ଦ୍ରଷ୍ଟୁମର୍ହତି ॥ ୯୨॥
ୟାନି ରତ୍ନାନି ମଣୟୋ ଗଜାଶ୍ଵାଦୀନି ଵୈ ପ୍ରଭୋ ।
ତ୍ରୈଲୋକ୍ୟେ ତୁ ସମସ୍ତାନି ସାମ୍ପ୍ରତଂ ଭାନ୍ତି ତେ ଗୃହେ ॥ ୯୩॥
ଐରାଵତଃ ସମାନୀତୋ ଗଜରତ୍ନଂ ପୁରନ୍ଦରାତ୍ ।
ପାରିଜାତତରୁଶ୍ଚାୟଂ ତଥୈଵୋଚ୍ଚୈଃଶ୍ରଵା ହୟଃ ॥ ୯୪॥
ଵିମାନଂ ହଂସସଂୟୁକ୍ତମେତତ୍ତିଷ୍ଠତି ତେଽଙ୍ଗଣେ ।
ରତ୍ନଭୂତମିହାନୀତଂ ୟଦାସୀଦ୍ଵେଧସୋଽଦ୍ଭୁତମ୍ ॥ ୯୫॥
ନିଧିରେଷ ମହାପଦ୍ମଃ ସମାନୀତୋ ଧନେଶ୍ଵରାତ୍ ।
କିଞ୍ଜଲ୍କିନୀଂ ଦଦୌ ଚାବ୍ଧିର୍ମାଲାମମ୍ଲାନପଙ୍କଜାମ୍ ॥ ୯୬॥
ଛତ୍ରଂ ତେ ଵାରୁଣଂ ଗେହେ କାଞ୍ଚନସ୍ରାଵି ତିଷ୍ଠତି ।
ତଥାୟଂ ସ୍ୟନ୍ଦନଵରୋ ୟଃ ପୁରାସୀତ୍ପ୍ରଜାପତେଃ ॥ ୯୭॥
ମୃତ୍ୟୋରୁତ୍କ୍ରାନ୍ତିଦା ନାମ ଶକ୍ତିରୀଶ ତ୍ଵୟା ହୃତା ।
ପାଶଃ ସଲିଲରାଜସ୍ୟ ଭ୍ରାତୁସ୍ତଵ ପରିଗ୍ରହେ ॥ ୯୮॥
ନିଶୁମ୍ଭସ୍ୟାବ୍ଧିଜାତାଶ୍ଚ ସମସ୍ତା ରତ୍ନଜାତୟଃ ।
ଵହ୍ନିରପି ଦଦୌ ତୁଭ୍ୟମଗ୍ନିଶୌଚେ ଚ ଵାସସୀ ॥ ୯୯॥
ଏଵଂ ଦୈତ୍ୟେନ୍ଦ୍ର ରତ୍ନାନି ସମସ୍ତାନ୍ୟାହୃତାନି ତେ ।
ସ୍ତ୍ରୀରତ୍ନମେଷା କଲ୍ୟାଣୀ ତ୍ଵୟା କସ୍ମାନ୍ନ ଗୃହ୍ୟତେ ॥ ୧୦୦॥
ଋଷିରୁଵାଚ ॥ ୧୦୧॥
ନିଶମ୍ୟେତି ଵଚଃ ଶୁମ୍ଭଃ ସ ତଦା ଚଣ୍ଡମୁଣ୍ଡୟୋଃ ।
ପ୍ରେଷୟାମାସ ସୁଗ୍ରୀଵଂ ଦୂତଂ ଦେଵ୍ୟା ମହାସୁରମ୍ ॥ ୧୦୨॥
ଇତି ଚେତି ଚ ଵକ୍ତଵ୍ୟା ସା ଗତ୍ଵା ଵଚନାନ୍ମମ ।
ୟଥା ଚାଭ୍ୟେତି ସମ୍ପ୍ରୀତ୍ୟା ତଥା କାର୍ୟଂ ତ୍ଵୟା ଲଘୁ ॥ ୧୦୩॥
ସ ତତ୍ର ଗତ୍ଵା ୟତ୍ରାସ୍ତେ ଶୈଲୋଦ୍ଦେଶେଽତିଶୋଭନେ ।
ତାଂ ଚ ଦେଵୀଂ ତତଃ ପ୍ରାହ ଶ୍ଲକ୍ଷ୍ଣଂ ମଧୁରୟା ଗିରା ॥ ୧୦୪॥
ଦୂତ ଉଵାଚ ॥ ୧୦୫॥
ଦେଵି ଦୈତ୍ୟେଶ୍ଵରଃ ଶୁମ୍ଭସ୍ତ୍ରୈଲୋକ୍ୟେ ପରମେଶ୍ଵରଃ ।
ଦୂତୋଽହଂ ପ୍ରେଷିତସ୍ତେନ ତ୍ଵତ୍ସକାଶମିହାଗତଃ ॥ ୧୦୬॥
ଅଵ୍ୟାହତାଜ୍ଞଃ ସର୍ଵାସୁ ୟଃ ସଦା ଦେଵୟୋନିଷୁ ।
ନିର୍ଜିତାଖିଲଦୈତ୍ୟାରିଃ ସ ୟଦାହ ଶୃଣୁଷ୍ଵ ତତ୍ ॥ ୧୦୭॥
ମମ ତ୍ରୈଲୋକ୍ୟମଖିଲଂ ମମ ଦେଵା ଵଶାନୁଗାଃ ।
ୟଜ୍ଞଭାଗାନହଂ ସର୍ଵାନୁପାଶ୍ନାମି ପୃଥକ୍ ପୃଥକ୍ ॥ ୧୦୮॥
ତ୍ରୈଲୋକ୍ୟେ ଵରରତ୍ନାନି ମମ ଵଶ୍ୟାନ୍ୟଶେଷତଃ ।
ତଥୈଵ ଗଜରତ୍ନଂ ଚ ହୃତଂ ଦେଵେନ୍ଦ୍ରଵାହନମ୍ ॥ ୧୦୯॥
କ୍ଷୀରୋଦମଥନୋଦ୍ଭୂତମଶ୍ଵରତ୍ନଂ ମମାମରୈଃ ।
ଉଚ୍ଚୈଃଶ୍ରଵସସଂଜ୍ଞଂ ତତ୍ପ୍ରଣିପତ୍ୟ ସମର୍ପିତମ୍ ॥ ୧୧୦॥
ୟାନି ଚାନ୍ୟାନି ଦେଵେଷୁ ଗନ୍ଧର୍ଵେଷୂରଗେଷୁ ଚ ।
ରତ୍ନଭୂତାନି ଭୂତାନି ତାନି ମୟ୍ୟେଵ ଶୋଭନେ ॥ ୧୧୧॥
ସ୍ତ୍ରୀରତ୍ନଭୂତାଂ ତ୍ଵାଂ ଦେଵି ଲୋକେ ମନ୍ୟାମହେ ଵୟମ୍ ।
ସା ତ୍ଵମସ୍ମାନୁପାଗଚ୍ଛ ୟତୋ ରତ୍ନଭୁଜୋ ଵୟମ୍ ॥ ୧୧୨॥
ମାଂ ଵା ମମାନୁଜଂ ଵାପି ନିଶୁମ୍ଭମୁରୁଵିକ୍ରମମ୍ ।
ଭଜ ତ୍ଵଂ ଚଞ୍ଚଲାପାଙ୍ଗି ରତ୍ନଭୂତାସି ଵୈ ୟତଃ ॥ ୧୧୩॥
ପରମୈଶ୍ଵର୍ୟମତୁଲଂ ପ୍ରାପ୍ସ୍ୟସେ ମତ୍ପରିଗ୍ରହାତ୍ ।
ଏତଦ୍ବୁଦ୍ଧ୍ୟା ସମାଲୋଚ୍ୟ ମତ୍ପରିଗ୍ରହତାଂ ଵ୍ରଜ ॥ ୧୧୪॥
ଋଷିରୁଵାଚ ॥ ୧୧୫॥
ଇତ୍ୟୁକ୍ତା ସା ତଦା ଦେଵୀ ଗମ୍ଭୀରାନ୍ତଃସ୍ମିତା ଜଗୌ ।
ଦୁର୍ଗା ଭଗଵତୀ ଭଦ୍ରା ୟୟେଦଂ ଧାର୍ୟତେ ଜଗତ୍ ॥ ୧୧୬॥
ଦେଵ୍ୟୁଵାଚ ॥ ୧୧୭॥
ସତ୍ୟମୁକ୍ତଂ ତ୍ଵୟା ନାତ୍ର ମିଥ୍ୟା କିଞ୍ଚିତ୍ତ୍ଵୟୋଦିତମ୍ ।
ତ୍ରୈଲୋକ୍ୟାଧିପତିଃ ଶୁମ୍ଭୋ ନିଶୁମ୍ଭଶ୍ଚାପି ତାଦୃଶଃ ॥ ୧୧୮॥
କିଂ ତ୍ଵତ୍ର ୟତ୍ପ୍ରତିଜ୍ଞାତଂ ମିଥ୍ୟା ତତ୍କ୍ରିୟତେ କଥମ୍ ।
ଶ୍ରୂୟତାମଲ୍ପବୁଦ୍ଧିତ୍ଵାତ୍ପ୍ରତିଜ୍ଞା ୟା କୃତା ପୁରା ॥ ୧୧୯॥
ୟୋ ମାଂ ଜୟତି ସଙ୍ଗ୍ରାମେ ୟୋ ମେ ଦର୍ପଂ ଵ୍ୟପୋହତି ।
ୟୋ ମେ ପ୍ରତିବଲୋ ଲୋକେ ସ ମେ ଭର୍ତା ଭଵିଷ୍ୟତି ॥ ୧୨୦॥
ତଦାଗଚ୍ଛତୁ ଶୁମ୍ଭୋଽତ୍ର ନିଶୁମ୍ଭୋ ଵା ମହାବଲଃ ।
ମାଂ ଜିତ୍ଵା କିଂ ଚିରେଣାତ୍ର ପାଣିଂ ଗୃହ୍ଣାତୁ ମେ ଲଘୁ ॥ ୧୨୧॥
ଦୂତ ଉଵାଚ ॥ ୧୨୨॥
ଅଵଲିପ୍ତାସି ମୈଵଂ ତ୍ଵଂ ଦେଵି ବ୍ରୂହି ମମାଗ୍ରତଃ ।
ତ୍ରୈଲୋକ୍ୟେ କଃ ପୁମାଂସ୍ତିଷ୍ଠେଦଗ୍ରେ ଶୁମ୍ଭନିଶୁମ୍ଭୟୋଃ ॥ ୧୨୩॥
ଅନ୍ୟେଷାମପି ଦୈତ୍ୟାନାଂ ସର୍ଵେ ଦେଵା ନ ଵୈ ୟୁଧି ।
ତିଷ୍ଠନ୍ତି ସମ୍ମୁଖେ ଦେଵି କିଂ ପୁନଃ ସ୍ତ୍ରୀ ତ୍ଵମେକିକା ॥ ୧୨୪॥
ଇନ୍ଦ୍ରାଦ୍ୟାଃ ସକଲା ଦେଵାସ୍ତସ୍ଥୁର୍ୟେଷାଂ ନ ସଂୟୁଗେ ।
ଶୁମ୍ଭାଦୀନାଂ କଥଂ ତେଷାଂ ସ୍ତ୍ରୀ ପ୍ରୟାସ୍ୟସି ସମ୍ମୁଖମ୍ ॥ ୧୨୫॥
ସା ତ୍ଵଂ ଗଚ୍ଛ ମୟୈଵୋକ୍ତା ପାର୍ଶ୍ଵଂ ଶୁମ୍ଭନିଶୁମ୍ଭୟୋଃ ।
କେଶାକର୍ଷଣନିର୍ଧୂତଗୌରଵା ମା ଗମିଷ୍ୟସି ॥ ୧୨୬॥
ଦେଵ୍ୟୁଵାଚ ॥ ୧୨୭॥
ଏଵମେତଦ୍ ବଲୀ ଶୁମ୍ଭୋ ନିଶୁମ୍ଭଶ୍ଚାପିତାଦୃଶଃ ।
କିଂ କରୋମି ପ୍ରତିଜ୍ଞା ମେ ୟଦନାଲୋଚିତା ପୁରା ॥ ୧୨୮॥
ସ ତ୍ଵଂ ଗଚ୍ଛ ମୟୋକ୍ତଂ ତେ ୟଦେତତ୍ସର୍ଵମାଦୃତଃ ।
ତଦାଚକ୍ଷ୍ଵାସୁରେନ୍ଦ୍ରାୟ ସ ଚ ୟୁକ୍ତଂ କରୋତୁ ୟତ୍ ॥ ୧୨୯॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ଦେଵ୍ୟା ଦୂତସଂଵାଦୋ ନାମ ପଞ୍ଚମୋଽଧ୍ୟାୟଃ ॥ ୫॥
Comments
Post a Comment