ଅଷ୍ଟମୋଽଧ୍ୟାୟଃ
🟣॥ ଅଷ୍ଟମୋଽଧ୍ୟାୟଃ ॥🟣
ଓଂ ଋଷିରୁଵାଚ ॥ ୧॥
ଚଣ୍ଡେ ଚ ନିହତେ ଦୈତ୍ୟେ ମୁଣ୍ଡେ ଚ ଵିନିପାତିତେ ।
ବହୁଲେଷୁ ଚ ସୈନ୍ୟେଷୁ କ୍ଷୟିତେଷ୍ଵସୁରେଶ୍ଵରଃ ॥ ୨॥
ତତଃ କୋପପରାଧୀନଚେତାଃ ଶୁମ୍ଭଃ ପ୍ରତାପଵାନ୍ ।
ଉଦ୍ୟୋଗଂ ସର୍ଵସୈନ୍ୟାନାଂ ଦୈତ୍ୟାନାମାଦିଦେଶ ହ ॥ ୩॥
ଅଦ୍ୟ ସର୍ଵବଲୈର୍ଦୈତ୍ୟାଃ ଷଡଶୀତିରୁଦାୟୁଧାଃ ।
କମ୍ବୂନାଂ ଚତୁରଶୀତିର୍ନିର୍ୟାନ୍ତୁ ସ୍ଵବଲୈର୍ଵୃତାଃ ॥ ୪॥
କୋଟିଵୀର୍ୟାଣି ପଞ୍ଚାଶଦସୁରାଣାଂ କୁଲାନି ଵୈ ।
ଶତଂ କୁଲାନି ଧୌମ୍ରାଣାଂ ନିର୍ଗଚ୍ଛନ୍ତୁ ମମାଜ୍ଞୟା ॥ ୫॥
କାଲକା ଦୌର୍ହୃଦା ମୌର୍ଵାଃ କାଲିକେୟାସ୍ତଥାସୁରାଃ ।
ୟୁଦ୍ଧାୟ ସଜ୍ଜା ନିର୍ୟାନ୍ତୁ ଆଜ୍ଞୟା ତ୍ଵରିତା ମମ ॥ ୬॥
ଇତ୍ୟାଜ୍ଞାପ୍ୟାସୁରପତିଃ ଶୁମ୍ଭୋ ଭୈରଵଶାସନଃ ।
ନିର୍ଜଗାମ ମହାସୈନ୍ୟସହସ୍ରୈର୍ବହୁଭିର୍ଵୃତଃ ॥ ୭॥
ଆୟାନ୍ତଂ ଚଣ୍ଡିକା ଦୃଷ୍ଟ୍ଵା ତତ୍ସୈନ୍ୟମତିଭୀଷଣମ୍ ।
ଜ୍ୟାସ୍ଵନୈଃ ପୂରୟାମାସ ଧରଣୀଗଗନାନ୍ତରମ୍ ॥ ୮॥
ତତଃ ସିଂହୋ ମହାନାଦମତୀଵ କୃତଵାନ୍ନୃପ ।
ଘଣ୍ଟାସ୍ଵନେନ ତାନ୍ନାଦାନମ୍ବିକା ଚୋପବୃଂହୟତ୍ ॥ ୯॥
ଧନୁର୍ଜ୍ୟାସିଂହଘଣ୍ଟାନାଂ ନାଦାପୂରିତଦିଙ୍ମୁଖା ।
ନିନାଦୈର୍ଭୀଷଣୈଃ କାଲୀ ଜିଗ୍ୟେ ଵିସ୍ତାରିତାନନା ॥ ୧୦॥
ତଂ ନିନାଦମୁପଶ୍ରୁତ୍ୟ ଦୈତ୍ୟସୈନ୍ୟୈଶ୍ଚତୁର୍ଦିଶମ୍ ।
ଦେଵୀ ସିଂହସ୍ତଥା କାଲୀ ସରୋଷୈଃ ପରିଵାରିତାଃ ॥ ୧୧॥
ଏତସ୍ମିନ୍ନନ୍ତରେ ଭୂପ ଵିନାଶାୟ ସୁରଦ୍ଵିଷାମ୍ ।
ଭଵାୟାମରସିଂହାନାମତିଵୀର୍ୟବଲାନ୍ଵିତାଃ ॥ ୧୨॥
ବ୍ରହ୍ମେଶଗୁହଵିଷ୍ଣୂନାଂ ତଥେନ୍ଦ୍ରସ୍ୟ ଚ ଶକ୍ତୟଃ ।
ଶରୀରେଭ୍ୟୋ ଵିନିଷ୍କ୍ରମ୍ୟ ତଦ୍ରୂପୈଶ୍ଚଣ୍ଡିକାଂ ୟୟୁଃ ॥ ୧୩॥
ୟସ୍ୟ ଦେଵସ୍ୟ ୟଦ୍ରୂପଂ ୟଥା ଭୂଷଣଵାହନମ୍ ।
ତଦ୍ଵଦେଵ ହି ତଚ୍ଛକ୍ତିରସୁରାନ୍ୟୋଦ୍ଧୁମାୟୟୌ ॥ ୧୪॥
ହଂସୟୁକ୍ତଵିମାନାଗ୍ରେ ସାକ୍ଷସୂତ୍ରକମଣ୍ଡଲୁଃ ।
ଆୟାତା ବ୍ରହ୍ମଣଃ ଶକ୍ତିର୍ବ୍ରହ୍ମାଣୀତ୍ୟଭିଧୀୟତେ ॥ ୧୫॥
ମାହେଶ୍ଵରୀ ଵୃଷାରୂଢା ତ୍ରିଶୂଲଵରଧାରିଣୀ ।
ମହାହିଵଲୟା ପ୍ରାପ୍ତା ଚନ୍ଦ୍ରରେଖାଵିଭୂଷଣା ॥ ୧୬॥
କୌମାରୀ ଶକ୍ତିହସ୍ତା ଚ ମୟୂରଵରଵାହନା ।
ୟୋଦ୍ଧୁମଭ୍ୟାୟୟୌ ଦୈତ୍ୟାନମ୍ବିକା ଗୁହରୂପିଣୀ ॥ ୧୭॥
ତଥୈଵ ଵୈଷ୍ଣଵୀ ଶକ୍ତିର୍ଗରୁଡୋପରି ସଂସ୍ଥିତା ।
ଶଙ୍ଖଚକ୍ରଗଦାଶାର୍ଙ୍ଗଖଡ୍ଗହସ୍ତାଭ୍ୟୁପାୟୟୌ ॥ ୧୮॥
ୟଜ୍ଞଵାରାହମତୁଲଂ ରୂପଂ ୟା ବିଭ୍ରତୋ ହରେଃ ।
ଶକ୍ତିଃ ସାପ୍ୟାୟୟୌ ତତ୍ର ଵାରାହୀଂ ବିଭ୍ରତୀ ତନୁମ୍ ॥ ୧୯॥
ନାରସିଂହୀ ନୃସିଂହସ୍ୟ ବିଭ୍ରତୀ ସଦୃଶଂ ଵପୁଃ ।
ପ୍ରାପ୍ତା ତତ୍ର ସଟାକ୍ଷେପକ୍ଷିପ୍ତନକ୍ଷତ୍ରସଂହତିଃ ॥ ୨୦॥
ଵଜ୍ରହସ୍ତା ତଥୈଵୈନ୍ଦ୍ରୀ ଗଜରାଜୋପରି ସ୍ଥିତା ।
ପ୍ରାପ୍ତା ସହସ୍ରନୟନା ୟଥା ଶକ୍ରସ୍ତଥୈଵ ସା ॥ ୨୧॥
ତତଃ ପରିଵୃତସ୍ତାଭିରୀଶାନୋ ଦେଵଶକ୍ତିଭିଃ ।
ହନ୍ୟନ୍ତାମସୁରାଃ ଶୀଘ୍ରଂ ମମ ପ୍ରୀତ୍ୟାହ ଚଣ୍ଡିକାମ୍ ॥ ୨୨॥
ତତୋ ଦେଵୀଶରୀରାତ୍ତୁ ଵିନିଷ୍କ୍ରାନ୍ତାତିଭୀଷଣା ।
ଚଣ୍ଡିକା ଶକ୍ତିରତ୍ୟୁଗ୍ରା ଶିଵାଶତନିନାଦିନୀ ॥ ୨୩॥
ସା ଚାହ ଧୂମ୍ରଜଟିଲମୀଶାନମପରାଜିତା ।
ଦୂତ ତ୍ଵଂ ଗଚ୍ଛ ଭଗଵନ୍ ପାର୍ଶ୍ଵଂ ଶୁମ୍ଭନିଶୁମ୍ଭୟୋଃ ॥ ୨୪॥
ବ୍ରୂହି ଶୁମ୍ଭଂ ନିଶୁମ୍ଭଂ ଚ ଦାନଵାଵତିଗର୍ଵିତୌ ।
ୟେ ଚାନ୍ୟେ ଦାନଵାସ୍ତତ୍ର ୟୁଦ୍ଧାୟ ସମୁପସ୍ଥିତାଃ ॥ ୨୫॥
ତ୍ରୈଲୋକ୍ୟମିନ୍ଦ୍ରୋ ଲଭତାଂ ଦେଵାଃ ସନ୍ତୁ ହଵିର୍ଭୁଜଃ ।
ୟୂୟଂ ପ୍ରୟାତ ପାତାଲଂ ୟଦି ଜୀଵିତୁମିଚ୍ଛଥ ॥ ୨୬॥
ବଲାଵଲେପାଦଥ ଚେଦ୍ଭଵନ୍ତୋ ୟୁଦ୍ଧକାଙ୍କ୍ଷିଣଃ ।
ତଦାଗଚ୍ଛତ ତୃପ୍ୟନ୍ତୁ ମଚ୍ଛିଵାଃ ପିଶିତେନ ଵଃ ॥ ୨୭॥
ୟତୋ ନିୟୁକ୍ତୋ ଦୌତ୍ୟେନ ତୟା ଦେଵ୍ୟା ଶିଵଃ ସ୍ଵୟମ୍ ।
ଶିଵଦୂତୀତି ଲୋକେଽସ୍ମିଂସ୍ତତଃ ସା ଖ୍ୟାତିମାଗତା ॥ ୨୮॥
ତେଽପି ଶ୍ରୁତ୍ଵା ଵଚୋ ଦେଵ୍ୟାଃ ଶର୍ଵାଖ୍ୟାତଂ ମହାସୁରାଃ ।
ଅମର୍ଷାପୂରିତା ଜଗ୍ମୁର୍ୟତ୍ର କାତ୍ୟାୟନୀ ସ୍ଥିତା ॥ ୨୯॥
ତତଃ ପ୍ରଥମମେଵାଗ୍ରେ ଶରଶକ୍ତ୍ୟୃଷ୍ଟିଵୃଷ୍ଟିଭିଃ ।
ଵଵର୍ଷୁରୁଦ୍ଧତାମର୍ଷାସ୍ତାଂ ଦେଵୀମମରାରୟଃ ॥ ୩୦॥
ସା ଚ ତାନ୍ ପ୍ରହିତାନ୍ ବାଣାଞ୍ଛୂଲଶକ୍ତିପରଶ୍ଵଧାନ୍ ।
ଚିଚ୍ଛେଦ ଲୀଲୟାଧ୍ମାତଧନୁର୍ମୁକ୍ତୈର୍ମହେଷୁଭିଃ ॥ ୩୧॥
ତସ୍ୟାଗ୍ରତସ୍ତଥା କାଲୀ ଶୂଲପାତଵିଦାରିତାନ୍ ।
ଖଟ୍ଵାଙ୍ଗପୋଥିତାଂଶ୍ଚାରୀନ୍କୁର୍ଵତୀ ଵ୍ୟଚରତ୍ତଦା ॥ ୩୨॥
କମଣ୍ଡଲୁଜଲାକ୍ଷେପହତଵୀର୍ୟାନ୍ ହତୌଜସଃ ।
ବ୍ରହ୍ମାଣୀ ଚାକରୋଚ୍ଛତ୍ରୂନ୍ୟେନ ୟେନ ସ୍ମ ଧାଵତି ॥ ୩୩॥
ମାହେଶ୍ଵରୀ ତ୍ରିଶୂଲେନ ତଥା ଚକ୍ରେଣ ଵୈଷ୍ଣଵୀ ।
ଦୈତ୍ୟାଞ୍ଜଘାନ କୌମାରୀ ତଥା ଶକ୍ତ୍ୟାତିକୋପନା ॥ ୩୪॥
ଐନ୍ଦ୍ରୀ କୁଲିଶପାତେନ ଶତଶୋ ଦୈତ୍ୟଦାନଵାଃ ।
ପେତୁର୍ଵିଦାରିତାଃ ପୃଥ୍ଵ୍ୟାଂ ରୁଧିରୌଘପ୍ରଵର୍ଷିଣଃ ॥ ୩୫॥
ତୁଣ୍ଡପ୍ରହାରଵିଧ୍ଵସ୍ତା ଦଂଷ୍ଟ୍ରାଗ୍ରକ୍ଷତଵକ୍ଷସଃ ।
ଵାରାହମୂର୍ତ୍ୟା ନ୍ୟପତଂଶ୍ଚକ୍ରେଣ ଚ ଵିଦାରିତାଃ ॥ ୩୬॥
ନଖୈର୍ଵିଦାରିତାଂଶ୍ଚାନ୍ୟାନ୍ ଭକ୍ଷୟନ୍ତୀ ମହାସୁରାନ୍ ।
ନାରସିଂହୀ ଚଚାରାଜୌ ନାଦାପୂର୍ଣଦିଗମ୍ବରା ॥ ୩୭॥
ଚଣ୍ଡାଟ୍ଟହାସୈରସୁରାଃ ଶିଵଦୂତ୍ୟଭିଦୂଷିତାଃ ।
ପେତୁଃ ପୃଥିଵ୍ୟାଂ ପତିତାଂସ୍ତାଂଶ୍ଚଖାଦାଥ ସା ତଦା ॥ ୩୮॥
ଇତି ମାତୃଗଣଂ କ୍ରୁଦ୍ଧଂ ମର୍ଦୟନ୍ତଂ ମହାସୁରାନ୍ ।
ଦୃଷ୍ଟ୍ଵାଭ୍ୟୁପାୟୈର୍ଵିଵିଧୈର୍ନେଶୁର୍ଦେଵାରିସୈନିକାଃ ॥ ୩୯॥
ପଲାୟନପରାନ୍ଦୃଷ୍ଟ୍ଵା ଦୈତ୍ୟାନ୍ମାତୃଗଣାର୍ଦିତାନ୍ ।
ୟୋଦ୍ଧୁମଭ୍ୟାୟୟୌ କ୍ରୁଦ୍ଧୋ ରକ୍ତବୀଜୋ ମହାସୁରଃ ॥ ୪୦॥
ରକ୍ତବିନ୍ଦୁର୍ୟଦା ଭୂମୌ ପତତ୍ୟସ୍ୟ ଶରୀରତଃ ।
ସମୁତ୍ପତତି ମେଦିନ୍ୟାଂ ତତ୍ପ୍ରମାଣୋ ମହାସୁରଃ ॥ ୪୧॥
ୟୁୟୁଧେ ସ ଗଦାପାଣିରିନ୍ଦ୍ରଶକ୍ତ୍ୟା ମହାସୁରଃ ।
ତତଶ୍ଚୈନ୍ଦ୍ରୀ ସ୍ଵଵଜ୍ରେଣ ରକ୍ତବୀଜମତାଡୟତ୍ ॥ ୪୨॥
କୁଲିଶେନାହତସ୍ୟାଶୁ ବହୁ ସୁସ୍ରାଵ ଶୋଣିତମ୍ ।
ସମୁତ୍ତସ୍ଥୁସ୍ତତୋ ୟୋଧାସ୍ତଦ୍ରୂପାସ୍ତତ୍ପରାକ୍ରମାଃ ॥ ୪୩॥
ୟାଵନ୍ତଃ ପତିତାସ୍ତସ୍ୟ ଶରୀରାଦ୍ରକ୍ତବିନ୍ଦଵଃ ।
ତାଵନ୍ତଃ ପୁରୁଷା ଜାତାସ୍ତଦ୍ଵୀର୍ୟବଲଵିକ୍ରମାଃ ॥ ୪୪॥
ତେ ଚାପି ୟୁୟୁଧୁସ୍ତତ୍ର ପୁରୁଷା ରକ୍ତସମ୍ଭଵାଃ ।
ସମଂ ମାତୃଭିରତ୍ୟୁଗ୍ରଶସ୍ତ୍ରପାତାତିଭୀଷଣମ୍ ॥ ୪୫॥
ପୁନଶ୍ଚ ଵଜ୍ରପାତେନ କ୍ଷତମସ୍ୟ ଶିରୋ ୟଦା ।
ଵଵାହ ରକ୍ତଂ ପୁରୁଷାସ୍ତତୋ ଜାତାଃ ସହସ୍ରଶଃ ॥ ୪୬॥
ଵୈଷ୍ଣଵୀ ସମରେ ଚୈନଂ ଚକ୍ରେଣାଭିଜଘାନ ହ ।
ଗଦୟା ତାଡୟାମାସ ଐନ୍ଦ୍ରୀ ତମସୁରେଶ୍ଵରମ୍ ॥ ୪୭॥
ଵୈଷ୍ଣଵୀଚକ୍ରଭିନ୍ନସ୍ୟ ରୁଧିରସ୍ରାଵସମ୍ଭଵୈଃ ।
ସହସ୍ରଶୋ ଜଗଦ୍ଵ୍ୟାପ୍ତଂ ତତ୍ପ୍ରମାଣୈର୍ମହାସୁରୈଃ ॥ ୪୮॥
ଶକ୍ତ୍ୟା ଜଘାନ କୌମାରୀ ଵାରାହୀ ଚ ତଥାସିନା ।
ମାହେଶ୍ଵରୀ ତ୍ରିଶୂଲେନ ରକ୍ତବୀଜଂ ମହାସୁରମ୍ ॥ ୪୯॥
ସ ଚାପି ଗଦୟା ଦୈତ୍ୟଃ ସର୍ଵା ଏଵାହନତ୍ ପୃଥକ୍ ।
ମାତୄଃ କୋପସମାଵିଷ୍ଟୋ ରକ୍ତବୀଜୋ ମହାସୁରଃ ॥ ୫୦॥
ତସ୍ୟାହତସ୍ୟ ବହୁଧା ଶକ୍ତିଶୂଲାଦିଭିର୍ଭୁଵି ।
ପପାତ ୟୋ ଵୈ ରକ୍ତୌଘସ୍ତେନାସଞ୍ଛତଶୋଽସୁରାଃ ॥ ୫୧॥
ତୈଶ୍ଚାସୁରାସୃକ୍ସମ୍ଭୂତୈରସୁରୈଃ ସକଲଂ ଜଗତ୍ ।
ଵ୍ୟାପ୍ତମାସୀତ୍ତତୋ ଦେଵା ଭୟମାଜଗ୍ମୁରୁତ୍ତମମ୍ ॥ ୫୨॥
ତାନ୍ ଵିଷଣ୍ଣାନ୍ ସୁରାନ୍ ଦୃଷ୍ଟ୍ଵା ଚଣ୍ଡିକା ପ୍ରାହସତ୍ଵରମ୍ ।
ଉଵାଚ କାଲୀଂ ଚାମୁଣ୍ଡେ ଵିସ୍ତୀର୍ଣଂ ଵଦନଂ କୁରୁ ॥ ୫୩॥
ମଚ୍ଛସ୍ତ୍ରପାତସମ୍ଭୂତାନ୍ ରକ୍ତବିନ୍ଦୂନ୍ ମହାସୁରାନ୍ ।
ରକ୍ତବିନ୍ଦୋଃ ପ୍ରତୀଚ୍ଛ ତ୍ଵଂ ଵକ୍ତ୍ରେଣାନେନ ଵେଗିନା ॥ ୫୪॥
ଭକ୍ଷୟନ୍ତୀ ଚର ରଣେ ତଦୁତ୍ପନ୍ନାନ୍ମହାସୁରାନ୍ ।
ଏଵମେଷ କ୍ଷୟଂ ଦୈତ୍ୟଃ କ୍ଷେଣରକ୍ତୋ ଗମିଷ୍ୟତି ॥ ୫୫॥
ଭକ୍ଷ୍ୟମାଣାସ୍ତ୍ଵୟା ଚୋଗ୍ରା ନ ଚୋତ୍ପତ୍ସ୍ୟନ୍ତି ଚାପରେ ।
ଇତ୍ୟୁକ୍ତ୍ଵା ତାଂ ତତୋ ଦେଵୀ ଶୂଲେନାଭିଜଘାନ ତମ୍ ॥ ୫୬॥
ମୁଖେନ କାଲୀ ଜଗୃହେ ରକ୍ତବୀଜସ୍ୟ ଶୋଣିତମ୍ ।
ତତୋଽସାଵାଜଘାନାଥ ଗଦୟା ତତ୍ର ଚଣ୍ଡିକାମ୍ ॥ ୫୭॥
ନ ଚାସ୍ୟା ଵେଦନାଂ ଚକ୍ରେ ଗଦାପାତୋଽଲ୍ପିକାମପି ।
ତସ୍ୟାହତସ୍ୟ ଦେହାତ୍ତୁ ବହୁ ସୁସ୍ରାଵ ଶୋଣିତମ୍ ॥ ୫୮॥
ୟତସ୍ତତସ୍ତଦ୍ଵକ୍ତ୍ରେଣ ଚାମୁଣ୍ଡା ସମ୍ପ୍ରତୀଚ୍ଛତି ।
ମୁଖେ ସମୁଦ୍ଗତା ୟେଽସ୍ୟା ରକ୍ତପାତାନ୍ମହାସୁରାଃ ॥ ୫୯॥
ତାଂଶ୍ଚଖାଦାଥ ଚାମୁଣ୍ଡା ପପୌ ତସ୍ୟ ଚ ଶୋଣିତମ୍ ।
ଦେଵୀ ଶୂଲେନ ଵଜ୍ରେଣ ବାଣୈରସିଭିରୃଷ୍ଟିଭିଃ ॥ ୬୦॥
ଜଘାନ ରକ୍ତବୀଜଂ ତଂ ଚାମୁଣ୍ଡାପୀତଶୋଣିତମ୍ ।
ସ ପପାତ ମହୀପୃଷ୍ଠେ ଶସ୍ତ୍ରସଙ୍ଘସମାହତଃ ॥ ୬୧॥
ନୀରକ୍ତଶ୍ଚ ମହୀପାଲ ରକ୍ତବୀଜୋ ମହାସୁରଃ ।
ତତସ୍ତେ ହର୍ଷମତୁଲମଵାପୁସ୍ତ୍ରିଦଶା ନୃପ ॥ ୬୨॥
ତେଷାଂ ମାତୃଗଣୋ ଜାତୋ ନନର୍ତାସୃଙ୍ମଦୋଦ୍ଧତଃ ॥ ୬୩॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ରକ୍ତବୀଜଵଧୋ ନାମାଷ୍ଟମୋଽଧ୍ୟାୟଃ ॥ ୮॥
Comments
Post a Comment