ନଵମୋଽଧ୍ୟାୟଃ
🟣॥ ନଵମୋଽଧ୍ୟାୟଃ ॥🟣
ଓଂ ରାଜୋଵାଚ ॥ ୧॥
ଵିଚିତ୍ରମିଦମାଖ୍ୟାତଂ ଭଗଵନ୍ ଭଵତା ମମ ।
ଦେଵ୍ୟାଶ୍ଚରିତମାହାତ୍ମ୍ୟଂ ରକ୍ତବୀଜଵଧାଶ୍ରିତମ୍ ॥ ୨॥
ଭୂୟଶ୍ଚେଚ୍ଛାମ୍ୟହଂ ଶ୍ରୋତୁଂ ରକ୍ତବୀଜେ ନିପାତିତେ ।
ଚକାର ଶୁମ୍ଭୋ ୟତ୍କର୍ମ ନିଶୁମ୍ଭଶ୍ଚାତିକୋପନଃ ॥ ୩॥
ଋଷିରୁଵାଚ ॥ ୪॥
ଚକାର କୋପମତୁଲଂ ରକ୍ତବୀଜେ ନିପାତିତେ ।
ଶୁମ୍ଭାସୁରୋ ନିଶୁମ୍ଭଶ୍ଚ ହତେଷ୍ଵନ୍ୟେଷୁ ଚାହଵେ ॥ ୫॥
ହନ୍ୟମାନଂ ମହାସୈନ୍ୟଂ ଵିଲୋକ୍ୟାମର୍ଷମୁଦ୍ଵହନ୍ ।
ଅଭ୍ୟଧାଵନ୍ନିଶୁମ୍ଭୋଽଥ ମୁଖ୍ୟୟାସୁରସେନୟା ॥ ୬॥
ତସ୍ୟାଗ୍ରତସ୍ତଥା ପୃଷ୍ଠେ ପାର୍ଶ୍ଵୟୋଶ୍ଚ ମହାସୁରାଃ ।
ସନ୍ଦଷ୍ଟୌଷ୍ଠପୁଟାଃ କ୍ରୁଦ୍ଧା ହନ୍ତୁଂ ଦେଵୀମୁପାୟୟୁଃ ॥ ୭॥
ଆଜଗାମ ମହାଵୀର୍ୟଃ ଶୁମ୍ଭୋଽପି ସ୍ଵବଲୈର୍ଵୃତଃ ।
ନିହନ୍ତୁଂ ଚଣ୍ଡିକାଂ କୋପାତ୍କୃତ୍ଵା ୟୁଦ୍ଧଂ ତୁ ମାତୃଭିଃ ॥ ୮॥
ତତୋ ୟୁଦ୍ଧମତୀଵାସୀଦ୍ଦେଵ୍ୟା ଶୁମ୍ଭନିଶୁମ୍ଭୟୋଃ ।
ଶରଵର୍ଷମତୀଵୋଗ୍ରଂ ମେଘୟୋରିଵ ଵର୍ଷତୋଃ ॥ ୯॥
ଚିଚ୍ଛେଦାସ୍ତାଞ୍ଛରାଂସ୍ତାଭ୍ୟାଂ ଚଣ୍ଡିକା ସ୍ଵଶରୋତ୍କରୈଃ ।
ତାଡୟାମାସ ଚାଙ୍ଗେଷୁ ଶସ୍ତ୍ରୌଘୈରସୁରେଶ୍ଵରୌ ॥ ୧୦॥
ନିଶୁମ୍ଭୋ ନିଶିତଂ ଖଡ୍ଗଂ ଚର୍ମ ଚାଦାୟ ସୁପ୍ରଭମ୍ ।
ଅତାଡୟନ୍ମୂର୍ଧ୍ନି ସିଂହଂ ଦେଵ୍ୟା ଵାହନମୁତ୍ତମମ୍ ॥ ୧୧॥
ତାଡିତେ ଵାହନେ ଦେଵୀ କ୍ଷୁରପ୍ରେଣାସିମୁତ୍ତମମ୍ ।
ନିଶୁମ୍ଭସ୍ୟାଶୁ ଚିଚ୍ଛେଦ ଚର୍ମ ଚାପ୍ୟଷ୍ଟଚନ୍ଦ୍ରକମ୍ ॥ ୧୨॥
ଛିନ୍ନେ ଚର୍ମଣି ଖଡ୍ଗେ ଚ ଶକ୍ତିଂ ଚିକ୍ଷେପ ସୋଽସୁରଃ ।
ତାମପ୍ୟସ୍ୟ ଦ୍ଵିଧା ଚକ୍ରେ ଚକ୍ରେଣାଭିମୁଖାଗତାମ୍ ॥ ୧୩॥
କୋପାଧ୍ମାତୋ ନିଶୁମ୍ଭୋଽଥ ଶୂଲଂ ଜଗ୍ରାହ ଦାନଵଃ ।
ଆୟାତଂ ମୁଷ୍ଟିପାତେନ ଦେଵୀ ତଚ୍ଚାପ୍ୟଚୂର୍ଣୟତ୍ ॥ ୧୪॥
ଆଵିଦ୍ୟାଥ ଗଦାଂ ସୋଽପି ଚିକ୍ଷେପ ଚଣ୍ଡିକାଂ ପ୍ରତି ।
ସାପି ଦେଵ୍ୟାସ୍ ତ୍ରିଶୂଲେନ ଭିନ୍ନା ଭସ୍ମତ୍ଵମାଗତା ॥ ୧୫॥
ତତଃ ପରଶୁହସ୍ତଂ ତମାୟାନ୍ତଂ ଦୈତ୍ୟପୁଙ୍ଗଵମ୍ ।
ଆହତ୍ୟ ଦେଵୀ ବାଣୌଘୈରପାତୟତ ଭୂତଲେ ॥ ୧୬॥
ତସ୍ମିନ୍ନିପତିତେ ଭୂମୌ ନିଶୁମ୍ଭେ ଭୀମଵିକ୍ରମେ ।
ଭ୍ରାତର୍ୟତୀଵ ସଙ୍କ୍ରୁଦ୍ଧଃ ପ୍ରୟୟୌ ହନ୍ତୁମମ୍ବିକାମ୍ ॥ ୧୭॥
ସ ରଥସ୍ଥସ୍ତଥାତ୍ୟୁଚ୍ଚୈର୍ଗୃହୀତପରମାୟୁଧୈଃ ।
ଭୁଜୈରଷ୍ଟାଭିରତୁଲୈର୍ଵ୍ୟାପ୍ୟାଶେଷଂ ବଭୌ ନଭଃ ॥ ୧୮॥
ତମାୟାନ୍ତଂ ସମାଲୋକ୍ୟ ଦେଵୀ ଶଙ୍ଖମଵାଦୟତ୍ ।
ଜ୍ୟାଶବ୍ଦଂ ଚାପି ଧନୁଷଶ୍ଚକାରାତୀଵ ଦୁଃସହମ୍ ॥ ୧୯॥
ପୂରୟାମାସ କକୁଭୋ ନିଜଘଣ୍ଟାସ୍ଵନେନ ଚ ।
ସମସ୍ତଦୈତ୍ୟସୈନ୍ୟାନାଂ ତେଜୋଵଧଵିଧାୟିନା ॥ ୨୦॥
ତତଃ ସିଂହୋ ମହାନାଦୈସ୍ତ୍ୟାଜିତେଭମହାମଦୈଃ ।
ପୂରୟାମାସ ଗଗନଂ ଗାଂ ତଥୈଵ ଦିଶୋ ଦଶ ॥ ୨୧॥
ତତଃ କାଲୀ ସମୁତ୍ପତ୍ୟ ଗଗନଂ କ୍ଷ୍ମାମତାଡୟତ୍ ।
କରାଭ୍ୟାଂ ତନ୍ନିନାଦେନ ପ୍ରାକ୍ସ୍ଵନାସ୍ତେ ତିରୋହିତାଃ ॥ ୨୨॥
ଅଟ୍ଟାଟ୍ଟହାସମଶିଵଂ ଶିଵଦୂତୀ ଚକାର ହ ।
ଵୈଃ ଶବ୍ଦୈରସୁରାସ୍ତ୍ରେସୁଃ ଶୁମ୍ଭଃ କୋପଂ ପରଂ ୟୟୌ ॥ ୨୩॥
ଦୁରାତ୍ମଂସ୍ତିଷ୍ଠ ତିଷ୍ଠେତି ଵ୍ୟାଜହାରାମ୍ବିକା ୟଦା ।
ତଦା ଜୟେତ୍ୟଭିହିତଂ ଦେଵୈରାକାଶସଂସ୍ଥିତୈଃ ॥ ୨୪॥
ଶୁମ୍ଭେନାଗତ୍ୟ ୟା ଶକ୍ତିର୍ମୁକ୍ତା ଜ୍ଵାଲାତିଭୀଷଣା ।
ଆୟାନ୍ତୀ ଵହ୍ନିକୂଟାଭା ସା ନିରସ୍ତା ମହୋଲ୍କୟା ॥ ୨୫॥
ସିଂହନାଦେନ ଶୁମ୍ଭସ୍ୟ ଵ୍ୟାପ୍ତଂ ଲୋକତ୍ରୟାନ୍ତରମ୍ ।
ନିର୍ଘାତନିଃସ୍ଵନୋ ଘୋରୋ ଜିତଵାନଵନୀପତେ ॥ ୨୬॥
ଶୁମ୍ଭମୁକ୍ତାଞ୍ଛରାନ୍ଦେଵୀ ଶୁମ୍ଭସ୍ତତ୍ପ୍ରହିତାଞ୍ଛରାନ୍ ।
ଚିଚ୍ଛେଦ ସ୍ଵଶରୈରୁଗ୍ରୈଃ ଶତଶୋଽଥ ସହସ୍ରଶଃ ॥ ୨୭॥
ତତଃ ସା ଚଣ୍ଡିକା କ୍ରୁଦ୍ଧା ଶୂଲେନାଭିଜଘାନ ତମ୍ ।
ସ ତଦାଭିହତୋ ଭୂମୌ ମୂର୍ଚ୍ଛିତୋ ନିପପାତ ହ ॥ ୨୮॥
ତତୋ ନିଶୁମ୍ଭଃ ସମ୍ପ୍ରାପ୍ୟ ଚେତନାମାତ୍ତକାର୍ମୁକଃ ।
ଆଜଘାନ ଶରୈର୍ଦେଵୀଂ କାଲୀଂ କେସରିଣଂ ତଥା ॥ ୨୯॥
ପୁନଶ୍ଚ କୃତ୍ଵା ବାହୂନାମୟୁତଂ ଦନୁଜେଶ୍ଵରଃ ।
ଚକ୍ରାୟୁଧେନ ଦିତିଜଶ୍ଛାଦୟାମାସ ଚଣ୍ଡିକାମ୍ ॥ ୩୦॥
ତତୋ ଭଗଵତୀ କ୍ରୁଦ୍ଧା ଦୁର୍ଗା ଦୁର୍ଗାର୍ତିନାଶିନୀ ।
ଚିଚ୍ଛେଦ ଦେଵୀ ଚକ୍ରାଣି ସ୍ଵଶରୈଃ ସାୟକାଂଶ୍ଚ ତାନ୍ ॥ ୩୧॥
ତତୋ ନିଶୁମ୍ଭୋ ଵେଗେନ ଗଦାମାଦାୟ ଚଣ୍ଡିକାମ୍ ।
ଅଭ୍ୟଧାଵତ ଵୈ ହନ୍ତୁଂ ଦୈତ୍ୟସୈନ୍ୟସମାଵୃତଃ ॥ ୩୨॥
ତସ୍ୟାପତତ ଏଵାଶୁ ଗଦାଂ ଚିଚ୍ଛେଦ ଚଣ୍ଡିକା ।
ଖଡ୍ଗେନ ଶିତଧାରେଣ ସ ଚ ଶୂଲଂ ସମାଦଦେ ॥ ୩୩॥
ଶୂଲହସ୍ତଂ ସମାୟାନ୍ତଂ ନିଶୁମ୍ଭମମରାର୍ଦନମ୍ ।
ହୃଦି ଵିଵ୍ୟାଧ ଶୂଲେନ ଵେଗାଵିଦ୍ଧେନ ଚଣ୍ଡିକା ॥ ୩୪॥
ଭିନ୍ନସ୍ୟ ତସ୍ୟ ଶୂଲେନ ହୃଦୟାନ୍ନିଃସୃତୋଽପରଃ ।
ମହାବଲୋ ମହାଵୀର୍ୟସ୍ତିଷ୍ଠେତି ପୁରୁଷୋ ଵଦନ୍ ॥ ୩୫॥
ତସ୍ୟ ନିଷ୍କ୍ରାମତୋ ଦେଵୀ ପ୍ରହସ୍ୟ ସ୍ଵନଵତ୍ତତଃ ।
ଶିରଶ୍ଚିଚ୍ଛେଦ ଖଡ୍ଗେନ ତତୋଽସାଵପତଦ୍ଭୁଵି ॥ ୩୬॥
ତତଃ ସିଂହଶ୍ଚଖାଦୋଗ୍ରଦଂଷ୍ଟ୍ରାକ୍ଷୁଣ୍ଣଶିରୋଧରାନ୍ ।
ଅସୁରାଂସ୍ତାଂସ୍ତଥା କାଲୀ ଶିଵଦୂତୀ ତଥାପରାନ୍ ॥ ୩୭॥
କୌମାରୀଶକ୍ତିନିର୍ଭିନ୍ନାଃ କେଚିନ୍ନେଶୁର୍ମହାସୁରାଃ ।
ବ୍ରହ୍ମାଣୀମନ୍ତ୍ରପୂତେନ ତୋୟେନାନ୍ୟେ ନିରାକୃତାଃ ॥ ୩୮॥
ମାହେଶ୍ଵରୀତ୍ରିଶୂଲେନ ଭିନ୍ନାଃ ପେତୁସ୍ତଥାପରେ ।
ଵାରାହୀତୁଣ୍ଡଘାତେନ କେଚିଚ୍ଚୂର୍ଣୀକୃତା ଭୁଵି ॥ ୩୯॥
ଖଣ୍ଡଂ ଖଣ୍ଡଂ ଚ ଚକ୍ରେଣ ଵୈଷ୍ଣଵ୍ୟା ଦାନଵାଃ କୃତାଃ ।
ଵଜ୍ରେଣ ଚୈନ୍ଦ୍ରୀହସ୍ତାଗ୍ରଵିମୁକ୍ତେନ ତଥାପରେ ॥ ୪୦॥
କେଚିଦ୍ଵିନେଶୁରସୁରାଃ କେଚିନ୍ନଷ୍ଟା ମହାହଵାତ୍ ।
ଭକ୍ଷିତାଶ୍ଚାପରେ କାଲୀଶିଵଦୂତୀମୃଗାଧିପୈଃ ॥ ୪୧॥
॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ୟେ
ନିଶୁମ୍ଭଵଧୋ ନାମ ନଵମୋଽଧ୍ୟାୟଃ ॥ ୯॥
Comments
Post a Comment