ଶ୍ରୀସଦାଶିଵକଵଚସ୍ତୋତ୍ରମ୍

 🟣ଶ୍ରୀସଦାଶିଵକଵଚସ୍ତୋତ୍ରମ୍ 🟣

ଶ୍ରୀଦେଵ୍ୟୁଵାଚ-

ଭଗଵନ୍ଦେଵଦେଵେଶ ସର୍ଵାମ୍ନାୟ ପ୍ରପୂଜିତ ।

ସର୍ଵଂ ମେ କଥିତଂ ଦେଵ କଵଚଂ ନ ପ୍ରକାଶିତମ୍ ॥ ୧॥

ପ୍ରାସାଦାଖ୍ୟସ୍ୟ ମନ୍ତ୍ରସ୍ୟ କଵଚଂ ମେ ପ୍ରକାଶୟ ।

ସର୍ଵରକ୍ଷାକରଂ ଦେଵ ୟଦି ସ୍ନେହୋଽସ୍ତି ମାଂ ପ୍ରତି ॥ ୨॥

ଶ୍ରୀଭଗଵାନୁଵାଚ-

ପ୍ରାସାଦମନ୍ତ୍ରକଵଚସ୍ୟ ଵାମଦେଵଋଷିଃ ।

ପନ୍କ୍ତିଶ୍ଛନ୍ଦଃ । ସଦାଶିଵୋ ଦେଵତା ।

ସକଲାଭୀଷ୍ଟସିଦ୍ଧୟେ ଜପେ ଵିନିୟୋଗଃ ।

ଶିରୋ ମେ ସର୍ଵଦା ପାତୁ ପ୍ରାସାଦାଖ୍ୟଃ ସଦାଶିଵଃ ।

ଷଡକ୍ଷରସ୍ଵରୂପୋ ମେ ଵଦନଂ ତୁ ମହେଶ୍ଵରଃ ॥ ୩॥

ପଞ୍ଚାକ୍ଷରାତ୍ମା ଭଗଵାନ୍ଭୁଜୌ ମେ ପରିରକ୍ଷତୁ ।

ମୃତ୍ୟୁଞ୍ଜୟସ୍ତ୍ରିବୀଜାତ୍ମା ଆସ୍ୟଂ ରକ୍ଷତୁ ମେ ସଦା ॥ ୪॥

ଵଟମୂଲଂ ସମାସୀନୋ ଦକ୍ଷିଣାମୂର୍ତିରଵ୍ୟୟଃ ।

ସଦା ମାଂ ସର୍ଵଦଃ ପାତୁ ଷଟ୍ତ୍ରିଂଶାର୍ଣସ୍ଵରୂପଧୃକ୍ ॥ ୫॥

ଦ୍ଵାଵିଂଶାର୍ଣାତ୍ମକୋ ରୁଦ୍ରୋ ଦକ୍ଷିଣଃ ପରିରକ୍ଷତୁ ।

ତ୍ରିଵର୍ଣାତ୍ମା ନୀଲକଣ୍ଠଃ କଣ୍ଠଂ ରକ୍ଷତୁ ସର୍ଵଦା ॥ ୬॥

ଚିନ୍ତାମଣିର୍ବୀଜରୂପୋ ହ୍ୟର୍ଧନାରୀଶ୍ଵରୋ ହରଃ ।

ସଦା ରକ୍ଷତୁ ମେ ଗୁହ୍ୟଂ ସର୍ଵସମ୍ପତ୍ପ୍ରଦାୟକଃ ॥ ୭॥

ଏକାକ୍ଷରସ୍ଵରୂପାତ୍ମା କୂଟଵ୍ୟାପୀ ମହେଶ୍ଵରଃ ।

ମାର୍ତଣ୍ଡଭୈରଵୋ ନିତ୍ୟଂ ପାଦୌ ମେ ପରିରକ୍ଷତୁ ॥ ୮॥

ତୁମ୍ବୁରାଖ୍ୟୋ ମହାବୀଜସ୍ଵରୂପଃ ତ୍ରିପୁରାନ୍ତକଃ ।

ସଦା ମାଂ ରଣଭୂମୌ ଚ ରକ୍ଷତୁ ତ୍ରିଦଶାଧିପଃ ॥ ୯॥

ଊର୍ଧ୍ଵମୂର୍ଦ୍ଧାନମୀଶାନୋ ମମ ରକ୍ଷତୁ ସର୍ଵଦା ।

ଦକ୍ଷିଣାସ୍ୟଂ ତତ୍ପୁରୁଷଃ ପାୟାନ୍ମେ ଗିରିନାୟକଃ ॥ ୧୦॥

ଅଘୋରାଖ୍ୟୋ ମହାଦେଵଃ ପୂର୍ଵାସ୍ୟଂ ପରିରକ୍ଷତୁ ।

ଵାମଦେଵଃ ପଶ୍ଚିମାସ୍ୟଂ ସଦା ମେ ପରିରକ୍ଷତୁ ॥ ୧୧॥

ଉତ୍ତରାସ୍ୟଂ ସଦା ପାତୁ ସଦ୍ୟୋଜାତସ୍ଵରୂପଧୃକ୍ ।

ଇତ୍ଥଂ ରକ୍ଷାକରଂ ଦେଵି କଵଚଂ ଦେଵଦୁର୍ଲଭମ୍ ॥ ୧୨॥

ପ୍ରାତଃକାଲେ ପଠେଦ୍ୟସ୍ତୁ ସୋଽଭୀଷ୍ଟଂ ଫଲମାପ୍ନୁୟାତ୍ ।

ପୂଜାକାଲେ ପଠେଦ୍ୟସ୍ତୁ କଵଚଂ ସାଧକୋତ୍ତମଃ ॥ ୧୩॥

କୀର୍ତିଶ୍ରୀକାନ୍ତିମେଧାୟୁଃ ସହିତୋ ଭଵତି ଧ୍ରୁଵମ୍ ।

କଣ୍ଠେ ୟୋ ଧାରୟେଦେତତ୍କଵଚଂ ମତ୍ସ୍ଵରୂପକମ୍ ॥ ୧୪॥

ୟୁଦ୍ଧେ ଚ ଜୟମାପ୍ନୋତି ଦ୍ୟୂତେ ଵାଦେ ସ ସାଧକଃ ।

କଵଚଂ ଧାରୟେଦ୍ୟସ୍ତୁ ସାଧକୋ ଦକ୍ଷିଣେ ଭୁଜେ ॥ ୧୫॥

ଦେଵା ମନୁଷ୍ୟା ଗନ୍ଧର୍ଵା ଵଶ୍ୟାସ୍ତସ୍ୟ ନ ସଂଶୟଃ ।

କଵଚଂ ଶିରସା ୟସ୍ତୁ ଧାରୟେଦ୍ୟତମାନସଃ ॥ ୧୬॥

କରସ୍ଥାସ୍ତସ୍ୟ ଦେଵେଶି ଅଣିମାଦ୍ୟଷ୍ଟସିଦ୍ଧୟଃ ।

ଭୂର୍ଜପତ୍ରେ ତ୍ଵିମାଂ ଵିଦ୍ୟାଂ ଶୁକ୍ଲପକ୍ଷେଣ ଵେଷ୍ଟିତାମ୍ ॥ ୧୭॥

ରଜତୋଦରସଂଵିଷ୍ଟାଂ କୃତ୍ଵା ଵା ଧାରୟେତ୍ସୁଧୀଃ ।

ସଂପ୍ରାପ୍ୟ ମହତୀଂ ଲକ୍ଷ୍ମୀମନ୍ତେ ମଦ୍ଦେହରୂପଭାକ୍ ॥ ୧୮॥

ୟସ୍ମୈ କସ୍ମୈ ନ ଦାତଵ୍ୟଂ ନ ପ୍ରକାଶ୍ୟଂ କଦାଚନ ।

ଶିଷ୍ୟାୟ ଭକ୍ତିୟୁକ୍ତାୟ ସାଧକାୟ ପ୍ରକାଶୟେତ୍ ॥ ୧୯॥

ଅନ୍ୟଥା ସିଦ୍ଧିହାନିଃ ସ୍ୟାତ୍ସତ୍ୟମେତନ୍ମନୋରମେ ।

ତଵ ସ୍ନେହାନ୍ମହାଦେଵି କଥିତଂ କଵଚଂ ଶୁଭମ୍ ॥ ୨୦॥

ନ ଦେୟଂ କସ୍ୟଚିଦ୍ଭଦ୍ରେ ୟଦୀଚ୍ଛେଦାତ୍ମନୋ ହିତମ୍ ।

ୟୋ ଅର୍ଚୟେଦ୍ଗନ୍ଧପୁଷ୍ପାଦ୍ୟୈଃ କଵଚଂ ମନ୍ମୁଖୋଦିତଂ

ତେନାର୍ଚିତା ମହାଦେଵି ସର୍ଵେ ଦେଵା ନ ସଂଶୟଃ ॥ ୨୧॥

ଇତି ଶ୍ରୀଭୈରଵତନ୍ତ୍ରେ ଶ୍ରୀସଦାଶିଵକଵଚଂ ସମ୍ପୂର୍ଣମ୍