ଚତୁର୍ଥୋଽଧ୍ୟାୟଃ

 🟣॥ ଚତୁର୍ଥୋଽଧ୍ୟାୟଃ ॥🟣

ଓଂ ଋଷିରୁଵାଚ ॥ ୧॥

ଶକ୍ରାଦୟଃ ସୁରଗଣା ନିହତେଽତିଵୀର୍ୟେ

ତସ୍ମିନ୍ଦୁରାତ୍ମନି ସୁରାରିବଲେ ଚ ଦେଵ୍ୟା ।

ତାଂ ତୁଷ୍ଟୁଵୁଃ ପ୍ରଣତିନମ୍ରଶିରୋଧରାଂସା

ଵାଗ୍ଭିଃ ପ୍ରହର୍ଷପୁଲକୋଦ୍ଗମଚାରୁଦେହାଃ ॥ ୨॥

ଦେଵ୍ୟା ୟୟା ତତମିଦଂ ଜଗଦାତ୍ମଶକ୍ତ୍ୟା

ନିଃଶେଷଦେଵଗଣଶକ୍ତିସମୂହମୂର୍ତ୍ୟା ।

ତାମମ୍ବିକାମଖିଲଦେଵମହର୍ଷିପୂଜ୍ୟାଂ

ଭକ୍ତ୍ୟା ନତାଃ ସ୍ମ ଵିଦଧାତୁ ଶୁଭାନି ସା ନଃ ॥ ୩॥

ୟସ୍ୟାଃ ପ୍ରଭାଵମତୁଲଂ ଭଗଵାନନନ୍ତୋ

ବ୍ରହ୍ମା ହରଶ୍ଚ ନ ହି ଵକ୍ତୁମଲଂ ବଲଂ ଚ ।

ସା ଚଣ୍ଡିକାଖିଲଜଗତ୍ପରିପାଲନାୟ

ନାଶାୟ ଚାଶୁଭଭୟସ୍ୟ ମତିଂ କରୋତୁ ॥ ୪॥

ୟା ଶ୍ରୀଃ ସ୍ଵୟଂ ସୁକୃତିନାଂ ଭଵନେଷ୍ଵଲକ୍ଷ୍ମୀଃ

ପାପାତ୍ମନାଂ କୃତଧିୟାଂ ହୃଦୟେଷୁ ବୁଦ୍ଧିଃ ।

ଶ୍ରଦ୍ଧା ସତାଂ କୁଲଜନପ୍ରଭଵସ୍ୟ ଲଜ୍ଜା

ତାଂ ତ୍ଵାଂ ନତାଃ ସ୍ମ ପରିପାଲୟ ଦେଵି ଵିଶ୍ଵମ୍ ॥ ୫॥

କିଂ ଵର୍ଣୟାମ ତଵ ରୂପମଚିନ୍ତ୍ୟମେତତ୍

କିଞ୍ଚାତିଵୀର୍ୟମସୁରକ୍ଷୟକାରି ଭୂରି ।

କିଂ ଚାହଵେଷୁ ଚରିତାନି ତଵାତି ୟାନି

ସର୍ଵେଷୁ ଦେଵ୍ୟସୁରଦେଵଗଣାଦିକେଷୁ ॥ ୬॥

ହେତୁଃ ସମସ୍ତଜଗତାଂ ତ୍ରିଗୁଣାପି ଦୋଷୈ-

ର୍ନ ଜ୍ଞାୟସେ ହରିହରାଦିଭିରପ୍ୟପାରା ।

ସର୍ଵାଶ୍ରୟାଖିଲମିଦଂ ଜଗଦଂଶଭୂତ-

ମଵ୍ୟାକୃତା ହି ପରମା ପ୍ରକୃତିସ୍ତ୍ଵମାଦ୍ୟା ॥ ୭॥

ୟସ୍ୟାଃ ସମସ୍ତସୁରତା ସମୁଦୀରଣେନ

ତୃପ୍ତିଂ ପ୍ରୟାତି ସକଲେଷୁ ମଖେଷୁ ଦେଵି ।

ସ୍ଵାହାସି ଵୈ ପିତୃଗଣସ୍ୟ ଚ ତୃପ୍ତିହେତୁ-

ରୁଚ୍ଚାର୍ୟସେ ତ୍ଵମତ ଏଵ ଜନୈଃ ସ୍ଵଧା ଚ ॥ ୮॥

ୟା ମୁକ୍ତିହେତୁରଵିଚିନ୍ତ୍ୟମହାଵ୍ରତା ତ୍ଵଂ

ଅଭ୍ୟସ୍ୟସେ ସୁନିୟତେନ୍ଦ୍ରିୟତତ୍ତ୍ଵସାରୈଃ ।

ମୋକ୍ଷାର୍ଥିଭିର୍ମୁନିଭିରସ୍ତସମସ୍ତଦୋଷୈ-

ର୍ଵିଦ୍ୟାସି ସା ଭଗଵତୀ ପରମା ହି ଦେଵି ॥ ୯॥

ଶବ୍ଦାତ୍ମିକା ସୁଵିମଲର୍ଗ୍ୟଜୁଷାଂ ନିଧାନ-

ମୁଦ୍ଗୀଥରମ୍ୟପଦପାଠଵତାଂ ଚ ସାମ୍ନାମ୍ ।

ଦେଵି ତ୍ରୟୀ ଭଗଵତୀ ଭଵଭାଵନାୟ

ଵାର୍ତାସି ସର୍ଵଜଗତାଂ ପରମାର୍ତିହନ୍ତ୍ରୀ ॥ ୧୦॥

ମେଧାସି ଦେଵି ଵିଦିତାଖିଲଶାସ୍ତ୍ରସାରା

ଦୁର୍ଗାସି ଦୁର୍ଗଭଵସାଗରନୌରସଙ୍ଗା ।

ଶ୍ରୀଃ କୈଟଭାରିହୃଦୟୈକକୃତାଧିଵାସା

ଗୌରୀ ତ୍ଵମେଵ ଶଶିମୌଲିକୃତପ୍ରତିଷ୍ଠା ॥ ୧୧॥

ଈଷତ୍ସହାସମମଲଂ ପରିପୂର୍ଣଚନ୍ଦ୍ର-

ବିମ୍ବାନୁକାରି କନକୋତ୍ତମକାନ୍ତିକାନ୍ତମ୍ ।

ଅତ୍ୟଦ୍ଭୁତଂ ପ୍ରହୃତମାତ୍ତରୁଷା ତଥାପି

ଵକ୍ତ୍ରଂ ଵିଲୋକ୍ୟ ସହସା ମହିଷାସୁରେଣ ॥ ୧୨॥

ଦୃଷ୍ଟ୍ଵା ତୁ ଦେଵି କୁପିତଂ ଭ୍ରୁକୁଟୀକରାଲ-

ମୁଦ୍ୟଚ୍ଛଶାଙ୍କସଦୃଶଚ୍ଛଵି ୟନ୍ନ ସଦ୍ୟଃ ।

ପ୍ରାଣାନ୍ ମୁମୋଚ ମହିଷସ୍ତଦତୀଵ ଚିତ୍ରଂ

କୈର୍ଜୀଵ୍ୟତେ ହି କୁପିତାନ୍ତକଦର୍ଶନେନ ॥ ୧୩॥

ଦେଵି ପ୍ରସୀଦ ପରମା ଭଵତୀ ଭଵାୟ

ସଦ୍ୟୋ ଵିନାଶୟସି କୋପଵତୀ କୁଲାନି ।

ଵିଜ୍ଞାତମେତଦଧୁନୈଵ ୟଦସ୍ତମେତ-

ନ୍ନୀତଂ ବଲଂ ସୁଵିପୁଲଂ ମହିଷାସୁରସ୍ୟ ॥ ୧୪॥

ତେ ସମ୍ମତା ଜନପଦେଷୁ ଧନାନି ତେଷାଂ

ତେଷାଂ ୟଶାଂସି ନ ଚ ସୀଦତି ବନ୍ଧୁଵର୍ଗଃ ।

ଧନ୍ୟାସ୍ତ ଏଵ ନିଭୃତାତ୍ମଜଭୃତ୍ୟଦାରା

ୟେଷାଂ ସଦାଭ୍ୟୁଦୟଦା ଭଵତୀ ପ୍ରସନ୍ନା ॥ ୧୫॥

ଧର୍ମ୍ୟାଣି ଦେଵି ସକଲାନି ସଦୈଵ କର୍ମା-

ଣ୍ୟତ୍ୟାଦୃତଃ ପ୍ରତିଦିନଂ ସୁକୃତୀ କରୋତି ।

ସ୍ଵର୍ଗଂ ପ୍ରୟାତି ଚ ତତୋ ଭଵତୀ ପ୍ରସାଦା-

ଲ୍ଲୋକତ୍ରୟେଽପି ଫଲଦା ନନୁ ଦେଵି ତେନ ॥ ୧୬॥

ଦୁର୍ଗେ ସ୍ମୃତା ହରସି ଭୀତିମଶେଷଜନ୍ତୋଃ

ସ୍ଵସ୍ଥୈଃ ସ୍ମୃତା ମତିମତୀଵ ଶୁଭାଂ ଦଦାସି ।

ଦାରିଦ୍ର୍ୟଦୁଃଖଭୟହାରିଣି କା ତ୍ଵଦନ୍ୟା

ସର୍ଵୋପକାରକରଣାୟ ସଦାର୍ଦ୍ରଚିତ୍ତା ॥ ୧୭॥

ଏଭିର୍ହତୈର୍ଜଗଦୁପୈତି ସୁଖଂ ତଥୈତେ

କୁର୍ଵନ୍ତୁ ନାମ ନରକାୟ ଚିରାୟ ପାପମ୍ ।

ସଙ୍ଗ୍ରାମମୃତ୍ୟୁମଧିଗମ୍ୟ ଦିଵଂ ପ୍ରୟାନ୍ତୁ

ମତ୍ଵେତି ନୂନମହିତାନ୍ଵିନିହଂସି ଦେଵି ॥ ୧୮॥

ଦୃଷ୍ଟ୍ଵୈଵ କିଂ ନ ଭଵତୀ ପ୍ରକରୋତି ଭସ୍ମ

ସର୍ଵାସୁରାନରିଷୁ ୟତ୍ପ୍ରହିଣୋଷି ଶସ୍ତ୍ରମ୍ ।

ଲୋକାନ୍ପ୍ରୟାନ୍ତୁ ରିପଵୋଽପି ହି ଶସ୍ତ୍ରପୂତା

ଇତ୍ଥଂ ମତିର୍ଭଵତି ତେଷ୍ଵହିତେଷୁସାଧ୍ଵୀ ॥ ୧୯॥

ଖଡ୍ଗପ୍ରଭାନିକରଵିସ୍ଫୁରଣୈସ୍ତଥୋଗ୍ରୈଃ

ଶୂଲାଗ୍ରକାନ୍ତିନିଵହେନ ଦୃଶୋଽସୁରାଣାମ୍ ।

ୟନ୍ନାଗତା ଵିଲୟମଂଶୁମଦିନ୍ଦୁଖଣ୍ଡ-

ୟୋଗ୍ୟାନନଂ ତଵ ଵିଲୋକୟତାଂ ତଦେତତ୍ ॥ ୨୦॥

ଦୁର୍ଵୃତ୍ତଵୃତ୍ତଶମନଂ ତଵ ଦେଵି ଶୀଲଂ

ରୂପଂ ତଥୈତଦଵିଚିନ୍ତ୍ୟମତୁଲ୍ୟମନ୍ୟୈଃ ।

ଵୀର୍ୟଂ ଚ ହନ୍ତୃ ହୃତଦେଵପରାକ୍ରମାଣାଂ

ଵୈରିଷ୍ଵପି ପ୍ରକଟିତୈଵ ଦୟା ତ୍ଵୟେତ୍ଥମ୍ ॥ ୨୧॥

କେନୋପମା ଭଵତୁ ତେଽସ୍ୟ ପରାକ୍ରମସ୍ୟ

ରୂପଂ ଚ ଶତ୍ରୁଭୟକାର୍ୟତିହାରି କୁତ୍ର ।

ଚିତ୍ତେ କୃପା ସମରନିଷ୍ଠୁରତା ଚ ଦୃଷ୍ଟା

ତ୍ଵୟ୍ୟେଵ ଦେଵି ଵରଦେ ଭୁଵନତ୍ରୟେଽପି ॥ ୨୨॥

ତ୍ରୈଲୋକ୍ୟମେତଦଖିଲଂ ରିପୁନାଶନେନ

ତ୍ରାତଂ ତ୍ଵୟା ସମରମୂର୍ଧନି ତେଽପି ହତ୍ଵା ।

ନୀତା ଦିଵଂ ରିପୁଗଣା ଭୟମପ୍ୟପାସ୍ତମ୍

ଅସ୍ମାକମୁନ୍ମଦସୁରାରିଭଵଂ ନମସ୍ତେ ॥ ୨୩॥

ଶୂଲେନ ପାହି ନୋ ଦେଵି ପାହି ଖଡ୍ଗେନ ଚାମ୍ବିକେ ।

ଘଣ୍ଟାସ୍ଵନେନ ନଃ ପାହି ଚାପଜ୍ୟାନିଃସ୍ଵନେନ ଚ ॥ ୨୪॥

ପ୍ରାଚ୍ୟାଂ ରକ୍ଷ ପ୍ରତୀଚ୍ୟାଂ ଚ ଚଣ୍ଡିକେ ରକ୍ଷ ଦକ୍ଷିଣେ ।

ଭ୍ରାମଣେନାତ୍ମଶୂଲସ୍ୟ ଉତ୍ତରସ୍ୟାଂ ତଥେଶ୍ଵରି ॥ ୨୫॥

ସୌମ୍ୟାନି ୟାନି ରୂପାଣି ତ୍ରୈଲୋକ୍ୟେ ଵିଚରନ୍ତି ତେ ।

ୟାନି ଚାତ୍ୟନ୍ତଘୋରାଣି ତୈ ରକ୍ଷାସ୍ମାଂସ୍ତଥା ଭୁଵମ୍ ॥ ୨୬॥

ଖଡ୍ଗଶୂଲଗଦାଦୀନି ୟାନି ଚାସ୍ତ୍ରାନି ତେଽମ୍ବିକେ ।

କରପଲ୍ଲଵସଙ୍ଗୀନି ତୈରସ୍ମାନ୍ରକ୍ଷ ସର୍ଵତଃ ॥ ୨୭॥

          ଋଷିରୁଵାଚ ॥ ୨୮॥

ଏଵଂ ସ୍ତୁତା ସୁରୈର୍ଦିଵ୍ୟୈଃ କୁସୁମୈର୍ନନ୍ଦନୋଦ୍ଭଵୈଃ ।

ଅର୍ଚିତା ଜଗତାଂ ଧାତ୍ରୀ ତଥା ଗନ୍ଧାନୁଲେପନୈଃ ॥ ୨୯॥

ଭକ୍ତ୍ୟା ସମସ୍ତୈସ୍ତ୍ରିଦଶୈର୍ଦିଵ୍ୟୈର୍ଧୂପୈଃ ସୁଧୂପିତା ।

ପ୍ରାହ ପ୍ରସାଦସୁମୁଖୀ ସମସ୍ତାନ୍ ପ୍ରଣତାନ୍ ସୁରାନ୍ ॥ ୩୦॥

          ଦେଵ୍ୟୁଵାଚ ॥ ୩୧॥

ଵ୍ରିୟତାଂ ତ୍ରିଦଶାଃ ସର୍ଵେ ୟଦସ୍ମତ୍ତୋଽଭିଵାଞ୍ଛିତମ୍ ॥ ୩୨॥

          ଦେଵା ଊଚୁଃ ॥ ୩୩॥

ଭଗଵତ୍ୟା କୃତଂ ସର୍ଵଂ ନ କିଞ୍ଚିଦଵଶିଷ୍ୟତେ ॥ ୩୪॥

ୟଦୟଂ ନିହତଃ ଶତ୍ରୁରସ୍ମାକଂ ମହିଷାସୁରଃ ।

ୟଦି ଚାପି ଵରୋ ଦେୟସ୍ତ୍ଵୟାସ୍ମାକଂ ମହେଶ୍ଵରି ॥ ୩୫॥

ସଂସ୍ମୃତା ସଂସ୍ମୃତା ତ୍ଵଂ ନୋ ହିଂସେଥାଃ ପରମାପଦଃ ।

ୟଶ୍ଚ ମର୍ତ୍ୟଃ ସ୍ତଵୈରେଭିସ୍ତ୍ଵାଂ ସ୍ତୋଷ୍ୟତ୍ୟମଲାନନେ ॥ ୩୬॥

ତସ୍ୟ ଵିତ୍ତର୍ଦ୍ଧିଵିଭଵୈର୍ଧନଦାରାଦିସମ୍ପଦାମ୍ ।

ଵୃଦ୍ଧୟେଽସ୍ମତ୍ପ୍ରସନ୍ନା ତ୍ଵଂ ଭଵେଥାଃ ସର୍ଵଦାମ୍ବିକେ ॥ ୩୭॥

          ଋଷିରୁଵାଚ ॥ ୩୮॥

ଇତି ପ୍ରସାଦିତା ଦେଵୈର୍ଜଗତୋଽର୍ଥେ ତଥାତ୍ମନଃ ।

ତଥେତ୍ୟୁକ୍ତ୍ଵା ଭଦ୍ରକାଲୀ ବଭୂଵାନ୍ତର୍ହିତା ନୃପ ॥ ୩୯॥

ଇତ୍ୟେତତ୍କଥିତଂ ଭୂପ ସମ୍ଭୂତା ସା ୟଥା ପୁରା ।

ଦେଵୀ ଦେଵଶରୀରେଭ୍ୟୋ ଜଗତ୍ତ୍ରୟହିତୈଷିଣୀ ॥ ୪୦॥

ପୁନଶ୍ଚ ଗୌରୀଦେହାତ୍ସା ସମୁଦ୍ଭୂତା ୟଥାଭଵତ୍ ।

ଵଧାୟ ଦୁଷ୍ଟଦୈତ୍ୟାନାଂ ତଥା ଶୁମ୍ଭନିଶୁମ୍ଭୟୋଃ ॥ ୪୧॥

ରକ୍ଷଣାୟ ଚ ଲୋକାନାଂ ଦେଵାନାମୁପକାରିଣୀ ।

ତଚ୍ଛୃଣୁଷ୍ଵ ମୟାଖ୍ୟାତଂ ୟଥାଵତ୍କଥୟାମି ତେ ॥ ୪୨॥

। ହ୍ରୀଂ ଓଂ ।

॥ ସ୍ଵସ୍ତି ଶ୍ରୀମାର୍କଣ୍ଡେୟପୁରାଣେ ସାଵର୍ଣିକେ ମନ୍ଵନ୍ତରେ

ଦେଵୀମାହାତ୍ମ୍ୟେ

ଶକ୍ରାଦିସ୍ତୁତିର୍ନାମ ଚତୁର୍ଥୋଽଧ୍ୟାୟଃ ॥ ୪॥