ଅଥ ଦେଵ୍ୟପରାଧକ୍ଷମାପନସ୍ତୋତ୍ରମ୍
🟣॥ ଅଥ ଦେଵ୍ୟପରାଧକ୍ଷମାପନସ୍ତୋତ୍ରମ୍ ॥🟣
ନ ମନ୍ତ୍ରଂ ନୋ ୟନ୍ତ୍ରଂ ତଦପି ଚ ନ ଜାନେ ସ୍ତୁତିମହୋ
ନ ଚାହ୍ଵାନଂ ଧ୍ୟାନଂ ତଦପି ଚ ନ ଜାନେ ସ୍ତୁତିକଥାଃ ।
ନ ଜାନେ ମୁଦ୍ରାସ୍ତେ ତଦପି ଚ ନ ଜାନେ ଵିଲପନଂ
ପରଂ ଜାନେ ମାତସ୍ତ୍ଵଦନୁସରଣଂ କ୍ଲେଶହରଣମ୍ ॥ ୧॥
ଵିଧେରଜ୍ଞାନେନ ଦ୍ରଵିଣଵିରହେଣାଲସତୟା
ଵିଧେୟାଶକ୍ୟତ୍ଵାତ୍ତଵ ଚରଣୟୋର୍ୟା ଚ୍ୟୁତିରଭୂତ୍ ।
ତଦେତତ୍ କ୍ଷନ୍ତଵ୍ୟଂ ଜନନି ସକଲୋଦ୍ଧାରିଣି ଶିଵେ
କୁପୁତ୍ରୋ ଜାୟେତ କ୍ଵଚିଦପି କୁମାତା ନ ଭଵତି ॥ ୨॥
ପୃଥିଵ୍ୟାଂ ପୁତ୍ରାସ୍ତେ ଜନନି ବହଵଃ ସନ୍ତି ସରଲାଃ
ପରଂ ତେଷାଂ ମଧ୍ୟେ ଵିରଲତରଲୋଽହଂ ତଵ ସୁତଃ ।
ମଦୀୟୋଽୟଂ ତ୍ୟାଗଃ ସମୁଚିତମିଦଂ ନୋ ତଵ ଶିଵେ
କୁପୁତ୍ରୋ ଜାୟେତ କ୍ଵଚିଦପି କୁମାତା ନ ଭଵତି ॥ ୩॥
ଜଗନ୍ମାତର୍ମାତସ୍ତଵ ଚରଣସେଵା ନ ରଚିତା
ନ ଵା ଦତ୍ତଂ ଦେଵି ଦ୍ରଵିଣମପି ଭୂୟସ୍ତଵ ମୟା ।
ତଥାପି ତ୍ଵଂ ସ୍ନେହଂ ମୟି ନିରୁପମଂ ୟତ୍ପ୍ରକୁରୁଷେ
କୁପୁତ୍ରୋ ଜାୟେତ କ୍ଵଚିଦପି କୁମାତା ନ ଭଵତି ॥ ୪॥
ପରିତ୍ୟକ୍ତା ଦେଵା ଵିଵିଧଵିଧସେଵାକୁଲତୟା
ମୟା ପଞ୍ଚା ଶୀତେରଧିକମପନୀତେ ତୁ ଵୟସି ।
ଇଦାନୀଂ ଚେନ୍ମାତସ୍ତଵ ୟଦି କୃପା ନାପି ଭଵିତା
ନିରାଲମ୍ବୋ ଲମ୍ବୋଦରଜନନି କଂ ୟାମି ଶରଣମ୍ ॥ ୫॥
ଶ୍ଵପାକୋ ଜଲ୍ପାକୋ ଭଵତି ମଧୁପାକୋପମଗିରା
ନିରାତଙ୍କୋ ରଙ୍କୋ ଵିହରତି ଚିରଂ କୋଟିକନକୈଃ ।
ତଵାପର୍ଣେ କର୍ଣେ ଵିଶତି ମନୁ ଵର୍ଣେ ଫଲମିଦଂ
ଜନଃ କୋ ଜାନୀତେ ଜନନି ଜନନୀୟଂ ଜପଵିଧୌ ॥ ୬॥
ଚିତାଭସ୍ମାଲେପୋ ଗରଲମଶନଂ ଦିକ୍ପଟଧରୋ
ଜଟାଧାରୀ କଣ୍ଠେ ଭୁଜଗପତିହାରୀ ପଶୁପତିଃ ।
କପାଲୀ ଭୂତେଶୋ ଭଜତି ଜଗଦୀଶୈକପଦଵୀଂ
ଭଵାନି ତ୍ଵତ୍ପାଣିଗ୍ରହଣପରିପାଟୀଫଲମିଦମ୍ ॥ ୭॥
ନ ମୋକ୍ଷସ୍ୟାକାଙ୍କ୍ଷା ଭଵଵିଭଵଵାଞ୍ଛାପି ଚ ନ ମେ
ନ ଵିଜ୍ଞାନାପେକ୍ଷା ଶଶିମୁଖି ସୁଖେଚ୍ଛାପି ନ ପୁନଃ ।
ଅତସ୍ତ୍ଵାଂ ସଂୟାଚେ ଜନନି ଜନନଂ ୟାତୁ ମମ ଵୈ
ମୃଡାନୀ ରୁଦ୍ରାଣୀ ଶିଵ ଶିଵ ଭଵାନୀତି ଜପତଃ ॥ ୮॥
ନାରାଧିତାସି ଵିଧିନା ଵିଵିଧୋପଚାରୈଃ
କିଂ ରୁକ୍ଷଚିନ୍ତନପରୈର୍ନ କୃତଂ ଵଚୋଭିଃ ।
ଶ୍ୟାମେ ତ୍ଵମେଵ ୟଦି କିଞ୍ଚନ ମୟ୍ୟନାଥେ
ଧତ୍ସେ କୃପାମୁଚିତମମ୍ବ ପରଂ ତଵୈଵ ॥ ୯॥
ଆପତ୍ସୁ ମଗ୍ନଃ ସ୍ମରଣଂ ତ୍ଵଦୀୟଂ
କରୋମି ଦୁର୍ଗେ କରୁଣାର୍ଣଵେଶି ।
ନୈତଚ୍ଛଠତ୍ଵଂ ମମ ଭାଵୟେଥାଃ
କ୍ଷୁଧାତୃଷାର୍ତା ଜନନୀଂ ସ୍ମରନ୍ତି ॥ ୧୦॥
ଜଗଦମ୍ବ ଵିଚିତ୍ର ମତ୍ର କିଂ
ପରିପୂର୍ଣା କରୁଣାସ୍ତି ଚେନ୍ମୟି ।
ଅପରାଧପରମ୍ପରାପରଂ
ନ ହି ମାତା ସମୁପେକ୍ଷତେ ସୁତମ୍ ॥ ୧୧॥
ମତ୍ସମଃ ପାତକୀ ନାସ୍ତି ପାପଘ୍ନୀ ତ୍ଵତ୍ସମା ନ ହି ।
ଏଵଂ ଜ୍ଞାତ୍ଵା ମହାଦେଵି ୟଥାୟୋଗ୍ୟଂ ତଥା କୁରୁ ॥ ୧୨॥ ଓଂ ॥
Comments
Post a Comment