ଶ୍ରୀଗଣେଶବାହ୍ୟପୂଜା
🥀🔸ଶ୍ରୀଗଣେଶବାହ୍ୟପୂଜା 🔸🥀
➖➖➖➖➖➖➖➖
ଶ୍ରୀ ଗଣେଶାୟ ନମଃ ॥
ଐଲ ଉଵାଚ ॥
ବାହ୍ୟପୂଜାଂ ଵଦ ଵିଭୋ! ଗୃତ୍ସମଦପ୍ରକୀର୍ତିତାମ୍ ।
ୟେନ ମାର୍ଗେଣ ଵିଘ୍ନେଶଂ ଭଜିଷ୍ୟସି ନିରନ୍ତରମ୍ ॥ ୧॥
ଗାର୍ଗ୍ୟ ଉଵାଚ ॥
ଆଦୌ ଚ ମାନସୀଂ ପୂଜାଂ କୃତ୍ଵା ଗୃତ୍ସମଦୋ ମୁନିଃ ।
ବାହ୍ୟାଂ ଚକାର ଵିଧିଵତ୍ତାଂ ଶୃଣୁଷ୍ଵ ସୁଖପ୍ରଦାମ୍ ॥ ୨॥
ହୃଦି ଧ୍ୟାତ୍ତ୍ଵା ଗଣେଶାନଂ ପରିଵାରାଦିସଂୟୁତମ୍ ।
ନାସିକାରନ୍ଧ୍ରମାର୍ଗେଣ ତଂ ବାହ୍ୟାଂଗ ଚକାର ହ ॥ ୩॥
ଆଦୌ ଵୈଦିକମନ୍ତ୍ରଂ ସ ଗଣାନାଂ ତ୍ଵେତି ସମ୍ପଠନ୍ ।
ପଶ୍ଚାଚ୍ଛ୍ଲୋକ ସମୁଚ୍ଚାର୍ୟ ପୂଜୟାମାସ ଵିଘ୍ନପମ୍ ॥ ୪॥
ଗୃତ୍ସମଦ ଉଵାଚ ॥
ଚତୁର୍ବାହୁଂ ତ୍ରିନେତ୍ରଂ ଚ ଗଜାସ୍ୟଂ ରକ୍ତ ଵର୍ଣକମ୍ ।
ପାଶାଂକୁଶାଦି-ସଂୟୁକ୍ତଂ ମାୟାୟୁକ୍ତ ପ୍ରଚିନ୍ତୟେତ୍ ॥ ୫॥
ଆଗଚ୍ଛ ବ୍ରହ୍ମଣାଂ ନାଥ ସୁରା-ଽସୁର-ଵରାର୍ଚିତ ।
ସିଦ୍ଧି-ବୁଦ୍ଧ୍ୟାଦି-ସଂୟୁକ୍ତ! ଭକ୍ତିଗ୍ରହଣଲାଲସ!॥ ୬॥
କୃତାର୍ଥୋଽହଂ କୃତାର୍ଥୋଽହଂ ତଵାଗମନତଃ ପ୍ରଭୋ ।
ଵିଘ୍ନେଶାଽନୁଗୃହୀତୋଽହଂ ସଫଲୋ ମେ ଭଵୋଽଭଵତ୍ ॥ ୭॥
ରତ୍ନସିଂହାସନଂ ସ୍ଵାମିନ୍ ଗୃହାଣ ଗଣନାୟକ ।
ତତ୍ରୋପଵିଶ୍ୟ ଵିଘ୍ନେଶ ରକ୍ଷ ଭକ୍ତାନ୍ ଵିଶେଷତଃ ॥ ୮॥
ସୁଵାସିତାଭିରଦ୍ଭିଶ୍ଚ ପାଦପ୍ରକ୍ଷାଲନଂ ପ୍ରଭୋ!।
ଶୀତୋଷ୍ଣାମ୍ଭଃ କରୋମି ତେ ଗୃହାଣ ପାଦ୍ୟମୁତ୍ତମମ୍ ॥ ୯॥
ସର୍ଵତୀର୍ଥାହୃତଂ ତୋୟଂ ସୁଵାସିତଂ ସୁଵସ୍ତୁଭିଃ ।
ଆଚମନଂ ଚ ତେନୈଵ କୁରୂଷ୍ଵ ଗଣନାୟକ ॥ ୧୦॥
ରତ୍ନ-ପ୍ରଵାଲ-ମୁକ୍ତାଦ୍ୟୈରନର୍ଧ୍ୟୈଃ ସଂସ୍କୃତଂ ପ୍ରଭୋ ।
ଅର୍ଧ୍ୟଂ ଗୃହାଣ ହେରମ୍ବ ଦ୍ଵିରଦାନନ ତୋଷକମ୍ ॥ ୧୧॥
ଦଧି-ମଧୁ-ଘୃତୈର୍ୟୁକ୍ତଂ ମଧୁପର୍କଂ ଗଜାନନ ।
ଗୃହାଣ ଭାଵସଂୟୁକ୍ତଂ ମୟା ଦତ୍ତଂ ନମୋଽସ୍ତୁ ତେ ॥ ୧୨॥
ପାଦ୍ୟେ ଚ ମଧୁପର୍କେ ଚ ସ୍ନାନେ ଵସ୍ତ୍ରୋପଧାରଣେ ।
ଉପଵୀତେ ଭୋଜନାନ୍ତେ ପୁନରାଚମନଂ କୁରୂ ॥ ୧୩॥
ଚମ୍ପକାଦ୍ୟୈର୍ଗଣାଧ୍ୟକ୍ଷ ଵାସିତଂ ତୈଲମୁତ୍ତମମ୍ ।
ଅଭ୍ୟଂଗଂ କୁରୂ ସର୍ଵେଶ! ଲମ୍ବୋଦର! ନମୋଽସ୍ତୁ ତେ ॥ ୧୪॥
ୟକ୍ଷ-କର୍ଦମକାଦ୍ୟୈଶ୍ଚ ଵିଘ୍ନେଶ ଭକ୍ତଵତ୍ସଲ!।
ଉଦ୍ଵର୍ତନଂ କୁରୁଷ୍ଵ ତ୍ଵଂ ମୟା ଦତ୍ତୈର୍ମହାପ୍ରଭୋ ॥ ୧୫॥
ନାନାତୀର୍ଥଜଲୈର୍ଢୁଣ୍ଢେ! ସୁଖୋଷ୍ଣଭାଵରୂପକୈଃ ।
କମଣ୍ଡଲୂଦ୍ଭଵୈଃ ସ୍ନାନଂ କୁରୂ ଢୁଣ୍ଢେ ସମର୍ପିତୈଃ ॥ ୧୬॥
କାମଧେନୁ ସମଦ୍ଭୂତଂ ପୟଃ ପରମପାଵନମ୍ ।
ତେନ ସ୍ନାନଂ କୁରୁଷ୍ଵ ତ୍ଵଂ ହେରଂବ ପରମାର୍ଥଵିତ୍ ॥ ୧୭॥
ପଂଚାମୃତାନାଂ ମଧ୍ୟେ ତୁ ଜଲୈଃ ସ୍ନାନଂ ପୁନଃ ପୁନଃ ।
କୁରୁ ତ୍ଵଂ ସର୍ଵତୀର୍ଥେଭ୍ୟୋ ଗଂଗାଦିଭ୍ୟଃ ସମାହୃତୈଃ ॥ ୧୮॥
ଦଧି ଧେନୁପୟୋଦ୍ଭୂତଂ ମଲାପହରଣଂ ପରମ୍ ।
ଗୃହାଣ ସ୍ନାନକାର୍ୟାର୍ଥଂ ଵିନାୟକ ଦୟାନିଧେ ॥ ୧୯॥
ଧେନୁଦୁଗ୍ଧୋଦ୍ଭଵଂ ଢୁଣ୍ଢେ ଘୃତଂ ସନ୍ତୋଷକାରକମ୍ ।
ମହାମଲାପଘାତାର୍ଥଂ ତେନ ସ୍ନାନଂ କୁରୂ ପ୍ରଭୋ ॥ ୨୦॥
ସାରଘଂ ସସ୍କୃତଂ ପୂର୍ଣଂ ମଧୁ ମଧୁରସୋଦ୍ଭଵମ୍ ।
ଗୃହାଣ ସ୍ନାନକାର୍ୟାର୍ଥଂ ଵିନାୟକ ନମୋଽସ୍ତୁ ତେ ॥ ୨୧॥
ଇକ୍ଷୁଦଣ୍ଡସମୁଦ୍ଭୂତାଂ ଶର୍କରାଂ ମଲନାଶିନୀମ୍ ।
ଗୃହାଣ ଗଣନାଥ ତ୍ଵଂ ତୟା ସ୍ନାନଂ ସମାଚର ॥ ୨୨॥
ୟକ୍ଷକର୍ଦମକାଦ୍ୟୈଶ୍ଚ ସ୍ନାନଂ କୁରୂ ଗଣେଶ୍ଵର ।
ଅନ୍ତ୍ୟଂ ମଲହରଂ ଶୁଦ୍ଧଂ ସର୍ଵସୌଗନ୍ଧ୍ୟକାରକମ୍ ॥ ୨୩॥
ତତୋ ଗନ୍ଧାକ୍ଷତାଦୀଂଶ୍ଚ ଦୂର୍ଵାଂକୁରାନ୍ ଗଜାନନ ।
ସମର୍ପୟାମି ସ୍ଵଲ୍ପାଂସ୍ତ୍ଵଂ ଗୃହାଣ ପରମେଶ୍ଵର ॥ ୨୪॥
ବ୍ରହ୍ମଣସ୍ପତ୍ୟସୂକ୍ତୈଶ୍ଚ ହ୍ୟେକଵିଂଶତିଵାରକୈଃ ।
ଅଭିଷେକଂ କରୋମି ତେ ଗୃହାଣ ଦ୍ଵିରଦାନନ ॥ ୨୫॥
ତତ ଆଚମନଂ ଦେଵ ସୁଵାସିତଜଲେନ ଚ ।
କୁରୁଷ୍ଵ ଗଣନାଥ ତ୍ଵଂ ସର୍ଵତୀର୍ଥଭଵେନ ଵୈ ॥ ୨୬॥
ଵସ୍ତ୍ରୟୁଗ୍ମଂ ଗୃହାଣ ତ୍ଵମନର୍ଘ୍ୟଂ ରକ୍ତଵର୍ଣକମ୍ ।
ଲୋକଲଜ୍ଜାହରଂ ଚୈଵ ଵିଘ୍ନନାଥ ନମୋଽସ୍ତୁ ତେ ॥ ୨୭॥
ଉତ୍ତରୀୟଂ ସୁଚିତ୍ରଂ ଵୈ ନଭସ୍ତାରାଂକିତଂ ୟଥା ।
ଗୃହାଣ ସର୍ଵସିଦ୍ଧୀଶ ମୟା ଦତ୍ତଂ ସୁଭକ୍ତିତଃ ॥ ୨୮॥
ଉପଵୀତଂ ଗଣାଧ୍ୟକ୍ଷ ଗୃହାଣ ଚ ତତଃ ପରମ୍ ।
ତ୍ରୈଗୁଣ୍ୟମୟରୂପଂ ତୁ ପ୍ରଣଵଗ୍ରନ୍ଥିବନ୍ଧନମ୍ ॥ ୨୯॥
ତତଃ ସିନ୍ଦୂରକଂ ଦେଵ ଗୃହାଣ ଗଣନାୟକ ।
ଅଂଗଲେପନଭାଵାର୍ଥଂ ସଦାନନ୍ଦଵିଵର୍ଧନମ୍ ॥ ୩୦॥
ନାନାଭୂଷଣକାନି ତ୍ଵମଂଗେଷୁ ଵିଵିଧେଷୁ ଚ ।
ଭାସୁରସ୍ଵର୍ଣରତ୍ନୈଶ୍ଚ ନିର୍ମିତାନି ଗୃହାଣ ଭୋ ॥ ୩୧॥
ଅଷ୍ଟଗନ୍ଧ-ସମାୟୁକ୍ତଂ ଗନ୍ଧଂ ରକ୍ତଂ ଗଜାନନ ।
ଦ୍ଵାଦଶାଂଗେଷୁ ତେ ଢୁଣ୍ଢେ ଲେପୟାମି ସୁଚିତ୍ରଵତ୍ ॥ ୩୨॥
ରକ୍ତଚନ୍ଦନସଂୟୁକ୍ତାନଥ ଵା କୁଂକୁମୈର୍ୟୁତାନ୍ ।
ଅକ୍ଷତାନ୍ ଵିଘ୍ନରାଜ ତ୍ଵଂ ଗୃହାଣ ଭାଲମଣ୍ଡଲେ ॥ ୩୩॥
ଚମ୍ପକାଦି-ସୁଵୃକ୍ଷେଭ୍ୟଃ ସମ୍ଭୂତାନି ଗଜାନନ ।
ପୁଷ୍ପାଣି ଶମୀ-ମନ୍ଦାର-ଦୂର୍ଵାଦୀନି ଗୃହାଣ ଚ ॥ ୩୪॥
ଦଶାଂଗ ଗୁଗ୍ଗୁଲଂ ଧୂପଂ ସର୍ଵସୌରଭକାରକମ୍ ।
ଗୃହାଣ ତ୍ଵଂ ମୟା ଦତ୍ତଂ ଵିନାୟକ ମହୋଦର ॥ ୩୫॥
ନାନାଜାତିଭଵଂ ଦୀପ ଗୃହାଣ ଗଣନାୟକ ।
ଅଜ୍ଞାନମଲଜଂ ଦୋଷଂ ହରନ୍ତଂ ଜ୍ୟୋତିରୂପକମ୍ ॥ ୩୬॥
ଚତୁର୍ଵିଧାନ୍ନସମ୍ପନ୍ନଂ ମଧୁରଂ ଲଡ୍ଡୁକାଦିକମ୍ ।
ନୈଵେଦ୍ୟଂ ତେ ମୟା ଦତ୍ତ ଭୋଜନଂ କୁରୂ ଵିଘ୍ନପ ॥ ୩୭॥
ସୁଵାସିତଂ ଗୃହାଣେଦଂ ଜଲଂ ତୀର୍ଥ ସମାହୃତମ୍ ।
ଭୁକ୍ତିମଧ୍ୟେ ଚ ପାନାର୍ଥଂ ଦେଵଦେଵେଶ ତେ ନମଃ ॥ ୩୮॥
ଭୋଜନାନ୍ତେ କରୋଦ୍ଵର୍ତଂ ୟକ୍ଷକର୍ଦମକେନ ଚ ।
କୁରୁଷ୍ଵ ତ୍ଵଂ ଗଣାଧ୍ୟକ୍ଷ ପିବ ତୋୟଂ ସୁଵାସିତମ୍ ॥ ୩୯॥
ଦାଡିମଂ ଖର୍ଜୁରଂ ଦ୍ରାକ୍ଷାଂ ରମ୍ଭାଦୀନି ଫଲାନି ଵୈ ।
ଗୃହାଣ ଦେଵଦେଵେଶ ନାନାମଧୁରକାଣି ତୁ ॥ ୪୦॥
ଅଷ୍ଟାଂଗ ଦେଵ ତାମ୍ବୂଲଂ ଗୃହାଣ ମୁଖଵାସନମ୍ ।
ଅସକୃଦ୍ଵିଘ୍ନରାଜ ତ୍ଵଂ ମୟା ଦତ୍ତଂ ଵିଶେଷତଃ ॥ ୪୧॥
ଦକ୍ଷିଣାଂ କାଂଚନାଦ୍ୟାଂ ତୁ ନାନାଧାତୁସମୁଦ୍ଭଵାମ୍ ।
ରତ୍ନାଦ୍ୟୈଃ ସଂୟୁତାଂ ଢୁଂଢେ ଗୃହାଣ ସକଲପ୍ରିୟ ॥ ୪୨॥
ରାଜୋପଚାରକାଦ୍ୟାନି ଗୃହାଣ ଗଣନାୟକ ।
ଦାନାନି ତୁ ଵିଚିତ୍ରାଣି ମୟା ଦତ୍ତାନି ଵିଘ୍ନପ ॥ ୪୩॥
ତତ ଆଭରଣଂ ତେଽହମର୍ପୟାମି ଵିଧାନତଃ ।
ଵିଵିଧୈରୂପଚାରୈଶ୍ଚ ତେନ ତୁଷ୍ଟୋ ଭଵ ପ୍ରଭୋ ॥ ୪୪॥
ତତୋ ଦୂର୍ଵାଂକୁରାନ୍ ଢୁଂଢେ ଏକଵିଂଶତିସଂଖ୍ୟକାନ୍ ।
ଗୃହାଣ କାର୍ୟସିଦ୍ଧ୍ୟର୍ଥଂ ଭକ୍ତଵାତ୍ସଲ୍ୟକାରଣାତ୍ ॥ ୪୫॥
ନାନାଦୀପସମାୟୁକ୍ତଂ ନୀରାଜନଂ ଗଜାନନ ।
ଗୃହାଣ ଭାଵସଂୟୁକ୍ତଂ ସର୍ଵାଜ୍ଞାନାଦିନାଶନ ॥ ୪୬॥
ଗଣାନାଂ ତ୍ଵେତି ମନ୍ତ୍ରସ୍ୟ ଜପଂ ସାହସ୍ରକଂ ପରମ୍ ।
ଗୃହାଣ ଗଣନାଥ ତ୍ଵଂ ସର୍ଵସିଦ୍ଧିପ୍ରଦୋ ଭଵ ॥ ୪୭॥
ଆର୍ତିକ୍ୟଂ ଚ ସୁକର୍ପୂରଂ ନାନାଦୀପମୟଂ ପ୍ରଭୋ ।
ଗୃହାଣ ଜ୍ୟୋତିଷାଂ ନାଥ ତଥା ନୀରାଜୟାମ୍ୟହମ୍ ॥ ୪୮॥
ପାଦୟୋସ୍ତେ ତୁ ଚତ୍ଵାରି ନାଭୌ ଦ୍ଵେ ଵଦନେ ପ୍ରଭୋ ।
ଏକଂ ତୁ ସପ୍ତଵାରଂ ଵୈ ସର୍ଵାଂଗେଷୁ ନିରଂଜନମ୍ ॥ ୪୯॥
ଚତୁର୍ଵେଦଭଵୈର୍ମନ୍ତ୍ରୈର୍ଗାଣପତ୍ୟୈର୍ଗଜାନନ ।
ମନ୍ତ୍ରିତାନି ଗୃହାଣ ତ୍ଵଂ ପୁଷ୍ପପତ୍ରାଣି ଵିଘ୍ନପ ॥ ୫୦॥
ପଂଚପ୍ରକାରକୈଃ ସ୍ତୋତ୍ରୈର୍ଗାଣପତ୍ୟୈର୍ଗଣାଧିପ ।
ସ୍ତୌମି ତ୍ଵାଂ ତେନ ସନ୍ତୁଷ୍ଟୋ ଭଵ ଭକ୍ତିପ୍ରଦାୟକ ॥ ୫୧॥
ଏକଵିଂଶତିସଂଖ୍ୟଂ ଵା ତ୍ରିସଂଖ୍ୟଂ ଵା ଗଜାନନ ।
ପ୍ରାଦକ୍ଷିଣ୍ୟଂ ଗୃହାଣ ତ୍ଵଂ ବ୍ରହ୍ମନ୍ ବ୍ରହ୍ମେଶଭାଵନ ॥ ୫୨॥
ସାଷ୍ଟାଂଗା ପ୍ରଣତିଂ ନାଥ ଏକଵିଂଶତିସମ୍ମିତାମ୍ ।
ହେରମ୍ବ ସର୍ଵପୂଜ୍ୟ ତ୍ଵଂ ଗୃହାଣ ତୁ ମୟା କୃତାମ୍ ॥ ୫୩॥
ନ୍ୟୂନାତିରିକ୍ତଭାଵାର୍ଥଂ କିଂଚିଦ୍ ଦୁର୍ଵାଂକୁରାନ୍ ପ୍ରଭୋ ।
ସମର୍ପୟାମି ତେନ ତ୍ଵଂ ସାଂଗାଂ ପୂଜାଂ କୁରୂଷ୍ଵ ତାମ୍ ॥ ୫୪॥
ତ୍ଵୟା ଦତ୍ତଂ ସ୍ଵହସ୍ତେନ ନିର୍ମାଲ୍ୟଂ ଚିନ୍ତୟାମ୍ୟହମ୍ ।
ଶିଖାୟାଂ ଧାରୟାମ୍ୟେଵ ସଦା ସର୍ଵପ୍ରଦଂ ଚ ତତ୍ ॥ ୫୫॥
ଅପରାଧାନସଂଖ୍ୟାତାନ୍ କ୍ଷମସ୍ଵ ଗଣନାୟକ ।
ଭକ୍ତଂ କୁରୁ ଚ ମାଂ ଢୁଂଢେ ତଵ ପାଦପ୍ରିୟଂ ସଦା ॥ ୫୬॥
ତ୍ଵଂ ମାତା ତ୍ଵଂ ପିତା ମେ ଵୈ ସୁହୃତ୍ସମ୍ବନ୍ଧିକାଦୟଃ ।
ତ୍ଵମେଵ କୁଲଦେଵଶ୍ଚ ସର୍ଵଂ ତ୍ଵଂ ମେ ନ ସଂଶୟଃ ॥ ୫୭॥
ଜାଗ୍ରତ୍-ସ୍ଵପ୍ନ-ସୁଷୁପ୍ତିଭିର୍ଦେହ-ଵାଂଗ୍ମନସୈଃ କୃତମ୍ ।
ସାଂସର୍ଗିକେଣ ୟତ୍କର୍ମ ଗଣେଶାୟ ସମର୍ପୟେ ॥ ୫୮॥
ବ୍ରାହ୍ୟଂ ନାନାଵିଧଂ ପାପଂ ମହୋଗ୍ରଂ ତଲ୍ଲୟଂ ଵ୍ରଜେତ୍ ।
ଗଣେଶପାଦତୀର୍ଥସ୍ୟ ମସ୍ତକେ ଧାରଣାତ୍ କିଲ ॥ ୫୯॥
ପାଦୋଦକଂ ଗଣେଶସ୍ୟ ପୀତଂ ମର୍ତ୍ୟେଣ ତତ୍କ୍ଷଣାତ୍ ।
ସର୍ଵାଂତର୍ଗତଜଂ ପାପଂ ନଶ୍ୟତି ଗଣନାତିଗମ୍ ॥ ୬୦॥
ଗଣେଶୂଚ୍ଛିଷ୍ଟଗନ୍ଧଂ ଵୈ ଦ୍ଵାଦଶାଂଗେଷୁ ଚର୍ଚୟେତ୍ ।
ଗଣେଶତୁଲ୍ୟରୂପଃ ସ ଦର୍ଶନାତ୍ ସର୍ଵପାପହା ॥ ୬୧॥
ୟଦି ଗଣେଶପୂଜାଦୌ ଗନ୍ଧଭସ୍ମାଦିକଂ ଚରେତ୍ ।
ଅଥଵୋଚ୍ଛିଷ୍ଟଗନ୍ଧଂ ତୁ ନୋ ଚେତ୍ତତ୍ର ଵିଧିଂ ଚରେତ୍ ॥ ୬୨॥
ଦ୍ଵାଦଶାଂଗେଷୁ ଵିଘ୍ନେଶଂ ନାମମନ୍ତ୍ରେଣ ଚାଽର୍ଚୟେତ୍ ।
ତେନ ସୋଽପି ଗଣେଶେନ ସମୋ ଭଵତି ଭୂତଲେ ॥ ୬୩॥
ଆଦୌ ଗଣେଶ୍ଵରଂ ମୂର୍ଧ୍ନି ଲଲାଟେ ଵିଘ୍ନନାୟକମ୍ ।
ଦକ୍ଷିଣେ କର୍ଣମୂଲେ ତୁ ଵକ୍ରତୁଣ୍ଡଂ ସମର୍ଚୟେତ୍ ॥ ୬୪॥
ଵାମେ କର୍ଣସ୍ୟ ମୂଲେ ଵୈ ଚୈକଦନ୍ତଂ ସମର୍ଚୟେତ୍ ।
କଣ୍ଠେ ଲମ୍ବୋଦରଂ ଦେଵଂ ହୃଦି ଚିନ୍ତାମଣିଂ ତଥା ॥ ୬୫॥
ବାହୌ ଦକ୍ଷିଣକେ ଚୈଵ ହେରଂବଂ ଵାମବାହୁକେ ।
ଵିକଟଂ ନାଭିଦେଶେ ତୁ ଵିଘ୍ନନାଥଂ ସମର୍ଚୟେତ୍ ॥ ୬୬॥
କୁକ୍ଷୌ ଦକ୍ଷିଣଗାୟାଂ ତୁ ମୟୂରେଶଂ ସମର୍ଚୟେତ୍ ।
ଵାମକୁକ୍ଷୌ ଗଜାସ୍ୟଂ ଵୈ ପୃଷ୍ଠେ ସ୍ଵାନନ୍ଦଵାସିନମ୍ ॥ ୬୭॥
ସର୍ଵାଂଗଲେପନଂ ଶସ୍ତଂ ଚିତ୍ରିତଂ ଚାଽଷ୍ଟଗନ୍ଧକୈଃ ।
ଗାଣେଶାନାଂ ଵିଶେଷେଣ ସର୍ଵଭଦ୍ରସ୍ୟ କାରଣାତ୍ ॥ ୬୮॥
ତତୋଚ୍ଛିଷ୍ଟଂ ତୁ ନୈଵେଦ୍ୟଂ ଗଣେଶସ୍ୟ ଭୁନଜ୍ମ୍ୟହମ୍ ।
ଭୁକ୍ତି-ମୁକ୍ତିପ୍ରଦଂ ପୂର୍ଣଂ ନାନାପାପନିକୃନ୍ତନମ୍ ॥ ୬୯॥
ଗଣେଶସ୍ମରଣେନୈଵ କରୋମି କାଲଖଣ୍ଡନମ୍ ।
ଗାଣପତ୍ୟୈଶ୍ଚ ସଂଵାସଃ ସଦାଽସ୍ତୁ ମେ ଗଜାନନ ॥ ୭୦॥
ଗାର୍ଗ୍ୟ ଉଵାଚ ॥
ଏଵଂ ଗୃତ୍ସମଦଶ୍ଚୈଵ ଚକାର ବାହ୍ୟପୂଜନମ୍ ।
ତ୍ରିକାଲେଷୁ ମହାୟୋଗୀ ସଦା ଭକ୍ତିସମନ୍ଵିତଃ ॥ ୭୧॥
ତଥା କୁରୁ ମହୀପାଲ ଗାଣପତ୍ୟୋ ଭଵିଷ୍ୟସି ।
ତଥା ଗୃତ୍ସମଦଃ ସାକ୍ଷାତ୍ତଥା ତ୍ଵମପି ନିଶ୍ଚିତମ୍ ॥ ୭୨॥
ଇତି ଶ୍ରୀମଦାନ୍ତ୍ୟେ ମୁଦ୍ଗଲପୁରାଣେ ଗଣେଶବାହ୍ୟପୂଜା ସମାପ୍ତା ॥
Comments
Post a Comment