ଶ୍ରୀସୂକ୍ତ (ଋଗ୍ଵେଦ)
॥ ଶ୍ରୀସୂକ୍ତ (ଋଗ୍ଵେଦ) ॥
ଓଂ ॥ ହିରଣ୍ୟଵର୍ଣାଂ ହରିଣୀଂ ସୁଵର୍ଣରଜତସ୍ରଜାମ୍ ।
ଚନ୍ଦ୍ରାଂ ହିରଣ୍ମୟୀଂ ଲକ୍ଷ୍ମୀଂ ଜାତଵେଦୋ ମ ଆଵହ ॥ ୧॥
ତାଂ ମ ଆଵହ ଜାତଵେଦୋ ଲକ୍ଷ୍ମୀମନପଗାମିନୀମ୍ ।
ୟସ୍ୟାଂ ହିରଣ୍ୟଂ ଵିନ୍ଦେୟଂ ଗାମଶ୍ଵଂ ପୁରୁଷାନହମ୍ ॥ ୨॥
ଅଶ୍ଵପୂର୍ଵାଂ ରଥମଧ୍ୟାଂ ହସ୍ତିନାଦପ୍ରବୋଧିନୀମ୍ ।
ଶ୍ରିୟଂ ଦେଵୀମୁପହ୍ଵୟେ ଶ୍ରୀର୍ମାଦେଵୀର୍ଜୁଷତାମ୍ ॥ ୩॥
କାଂ ସୋସ୍ମିତାଂ ହିରଣ୍ୟପ୍ରାକାରାମାର୍ଦ୍ରାଂ ଜ୍ଵଲନ୍ତୀଂ ତୃପ୍ତାଂ ତର୍ପୟନ୍ତୀମ୍ ।
ପଦ୍ମେ ସ୍ଥିତାଂ ପଦ୍ମଵର୍ଣାଂ ତାମିହୋପହ୍ଵୟେ ଶ୍ରିୟମ୍ ॥ ୪॥
ଚନ୍ଦ୍ରାଂ ପ୍ରଭାସାଂ ୟଶସା ଜ୍ଵଲନ୍ତୀଂ ଶ୍ରିୟଂ ଲୋକେ ଦେଵଜୁଷ୍ଟାମୁଦାରାମ୍ ।
ତାଂ ପଦ୍ମିନୀମୀଂ ଶରଣମହଂ ପ୍ରପଦ୍ୟେଽଲକ୍ଷ୍ମୀର୍ମେ ନଶ୍ୟତାଂ ତ୍ଵାଂ ଵୃଣେ ॥ ୫॥
ଆଦିତ୍ୟଵର୍ଣେ ତପସୋଽଧିଜାତୋ ଵନସ୍ପତିସ୍ତଵ ଵୃକ୍ଷୋଽଥ ବିଲ୍ଵଃ ।
ତସ୍ୟ ଫଲାନି ତପସା ନୁଦନ୍ତୁ ମାୟାନ୍ତରାୟାଶ୍ଚ ବାହ୍ୟା ଅଲକ୍ଷ୍ମୀଃ ॥ ୬॥
ଉପୈତୁ ମାଂ ଦେଵସଖଃ କୀର୍ତିଶ୍ଚ ମଣିନା ସହ ।
ପ୍ରାଦୁର୍ଭୂତୋଽସ୍ମି ରାଷ୍ଟ୍ରେଽସ୍ମିନ୍ କୀର୍ତିମୃଦ୍ଧିଂ ଦଦାତୁ ମେ ॥ ୭॥
କ୍ଷୁତ୍ପିପାସାମଲାଂ ଜ୍ୟେଷ୍ଠାମଲକ୍ଷ୍ମୀଂ ନାଶୟାମ୍ୟହମ୍ ।
ଅଭୂତିମସମୃଦ୍ଧିଂ ଚ ସର୍ଵାଂ ନିର୍ଣୁଦ ମେ ଗୃହାତ୍ ॥ ୮॥
ଗଂଧଦ୍ଵାରାଂ ଦୁରାଧର୍ଷାଂ ନିତ୍ୟପୁଷ୍ଟାଂ କରୀଷିଣୀମ୍ ।
ଈଶ୍ଵରୀ ସର୍ଵଭୂତାନାଂ ତାମିହୋପହ୍ଵୟେ ଶ୍ରିୟମ୍ ॥ ୯॥
ମନସଃ କାମମାକୂତିଂ ଵାଚଃ ସତ୍ୟମଶୀମହି ।
ପଶୂନାଂ ରୂପମନ୍ନସ୍ୟ ମୟି ଶ୍ରୀଃ ଶ୍ରୟତାଂ ୟଶଃ ॥ ୧୦॥
କର୍ଦମେନ ପ୍ରଜାଭୂତା ମୟି ସମ୍ଭଵ କର୍ଦମ ।
ଶ୍ରିୟଂ ଵାସୟ ମେ କୁଲେ ମାତରଂ ପଦ୍ମମାଲିନୀମ୍ ॥ ୧୧॥
ଆପଃ ସୃଜନ୍ତୁ ସ୍ନିଗ୍ଧାନି ଚିକ୍ଲୀତ ଵସ ମେ ଗୃହେ ।
ନି ଚ ଦେଵୀଂ ମାତରଂ ଶ୍ରିୟଂ ଵାସୟ ମେ କୁଲେ ॥ ୧୨॥
ଆର୍ଦ୍ରାଂ ପୁଷ୍କରିଣୀଂ ପୁଷ୍ଟିଂ ପିଙ୍ଗଲାଂ ପଦ୍ମମାଲିନୀମ୍ ।
ଚନ୍ଦ୍ରାଂ ହିରଣ୍ମୟୀଂ ଲକ୍ଷ୍ମୀଂ ଜାତଵେଦୋ ମ ଆଵହ ॥ ୧୩॥
ଆର୍ଦ୍ରାଂ ୟଃ କରିଣୀଂ ୟଷ୍ଟିଂ ସୁଵର୍ଣାଂ ହେମମାଲିନୀମ୍ ।
ସୂର୍ୟାଂ ହିରଣ୍ମୟୀଂ ଲକ୍ଷ୍ମୀଂ ଜାତଵେଦୋ ମ ଆଵହ ॥ ୧୪॥
ତାଂ ମ ଆଵହ ଜାତଵେଦୋ ଲକ୍ଷ୍ମୀମନପଗାମିନୀମ୍ ।
ୟସ୍ୟାଂ ହିରଣ୍ୟଂ ପ୍ରଭୂତଂ ଗାଵୋ ଦାସ୍ୟୋଽଶ୍ଵାନ୍ଵିନ୍ଦେୟଂ ପୁରୁଷାନହମ୍ ॥ ୧୫॥
ୟଃ ଶୁଚିଃ ପ୍ରୟତୋ ଭୂତ୍ଵା ଜୁହୁୟାଦାଜ୍ୟ ମନ୍ଵହମ୍ ।
ଶ୍ରିୟଃ ପଞ୍ଚଦଶର୍ଚଂ ଚ ଶ୍ରୀକାମଃ ସତତଂ ଜପେତ୍ ॥ ୧୬॥
ଫଲଶ୍ରୁତି
ପଦ୍ମାନନେ ପଦ୍ମ ଊରୂ ପଦ୍ମାକ୍ଷୀ ପଦ୍ମସମ୍ଭଵେ ।
ତ୍ଵଂ ମାଂ ଭଜସ୍ଵ ପଦ୍ମାକ୍ଷୀ ୟେନ ସୌଖ୍ୟଂ ଲଭାମ୍ୟହମ୍ ॥
ଅଶ୍ଵଦାୟୀ ଗୋଦାୟୀ ଧନଦାୟୀ ମହାଧନେ ।
ଧନଂ ମେ ଜୁଷତାଂ ଦେଵି ସର୍ଵକାମାଂଶ୍ଚ ଦେହି ମେ ॥
ପୁତ୍ରପୌତ୍ର ଧନଂ ଧାନ୍ୟଂ ହସ୍ତ୍ୟଶ୍ଵାଦିଗଵେ ରଥମ୍ ।
ପ୍ରଜାନାଂ ଭଵସି ମାତା ଆୟୁଷ୍ମନ୍ତଂ କରୋତୁ ମାମ୍ ॥
ଧନମଗ୍ନିର୍ଧନଂ ଵାୟୁର୍ଧନଂ ସୂର୍ୟୋ ଧନଂ ଵସୁଃ ।
ଧନମିନ୍ଦ୍ରୋ ବୃହସ୍ପତିର୍ଵରୁଣଂ ଧନମଶ୍ନୁ ତେ ॥
ଵୈନତେୟ ସୋମଂ ପିବ ସୋମଂ ପିବତୁ ଵୃତ୍ରହା ।
ସୋମଂ ଧନସ୍ୟ ସୋମିନୋ ମହ୍ୟଂ ଦଦାତୁ ସୋମିନଃ ॥
ନ କ୍ରୋଧୋ ନ ଚ ମାତ୍ସର୍ୟଂ ନ ଲୋଭୋ ନାଶୁଭା ମତିଃ ।
ଭଵନ୍ତି କୃତପୁଣ୍ୟାନାଂ ଭକ୍ତାନାଂ ଶ୍ରୀସୂକ୍ତଂ ଜପେତ୍ସଦା ॥
ଵର୍ଷନ୍ତୁ ତେ ଵିଭାଵରି ଦିଵୋ ଅଭ୍ରସ୍ୟ ଵିଦ୍ୟୁତଃ ।
ରୋହନ୍ତୁ ସର୍ଵବୀଜାନ୍ୟଵ ବ୍ରହ୍ମ ଦ୍ଵିଷୋ ଜହି ॥
ପଦ୍ମପ୍ରିୟେ ପଦ୍ମିନି ପଦ୍ମହସ୍ତେ ପଦ୍ମାଲୟେ ପଦ୍ମଦଲାୟତାକ୍ଷି ।
ଵିଶ୍ଵପ୍ରିୟେ ଵିଷ୍ଣୁ ମନୋଽନୁକୂଲେ ତ୍ଵତ୍ପାଦପଦ୍ମଂ ମୟି ସନ୍ନିଧତ୍ସ୍ଵ ॥
ୟା ସା ପଦ୍ମାସନସ୍ଥା ଵିପୁଲକଟିତଟୀ ପଦ୍ମପତ୍ରାୟତାକ୍ଷୀ ।
ଗମ୍ଭୀରା ଵର୍ତନାଭିଃ ସ୍ତନଭର ନମିତା ଶୁଭ୍ର ଵସ୍ତ୍ରୋତ୍ତରୀୟା ।
ଲକ୍ଷ୍ମୀର୍ଦିଵ୍ୟୈର୍ଗଜେନ୍ଦ୍ରୈର୍ମଣିଗଣ ଖଚିତୈସ୍ସ୍ନାପିତା ହେମକୁମ୍ଭୈଃ ।
ନିତ୍ୟଂ ସା ପଦ୍ମହସ୍ତା ମମ ଵସତୁ ଗୃହେ ସର୍ଵମାଙ୍ଗଲ୍ୟୟୁକ୍ତା ॥
ଲକ୍ଷ୍ମୀଂ କ୍ଷୀରସମୁଦ୍ର ରାଜତନୟାଂ ଶ୍ରୀରଂଗଧାମେଶ୍ଵରୀମ୍ ।
ଦାସୀଭୂତସମସ୍ତ ଦେଵ ଵନିତାଂ ଲୋକୈକ ଦୀପାଂକୁରାମ୍ ।
ଶ୍ରୀମନ୍ମନ୍ଦକଟାକ୍ଷଲବ୍ଧ ଵିଭଵ ବ୍ରହ୍ମେନ୍ଦ୍ରଗଙ୍ଗାଧରାଂ ।
ତ୍ଵାଂ ତ୍ରୈଲୋକ୍ୟ କୁଟୁମ୍ବିନୀଂ ସରସିଜାଂ ଵନ୍ଦେ ମୁକୁନ୍ଦପ୍ରିୟାମ୍ ॥
ସିଦ୍ଧଲକ୍ଷ୍ମୀର୍ମୋକ୍ଷଲକ୍ଷ୍ମୀର୍ଜୟଲକ୍ଷ୍ମୀସ୍ସରସ୍ଵତୀ ।
ଶ୍ରୀଲକ୍ଷ୍ମୀର୍ଵରଲକ୍ଷ୍ମୀଶ୍ଚ ପ୍ରସନ୍ନା ମମ ସର୍ଵଦା ॥
ଵରାଂକୁଶୌ ପାଶମଭୀତିମୁଦ୍ରାଂ କରୈର୍ଵହନ୍ତୀଂ କମଲାସନସ୍ଥାମ୍ ।
ବାଲାର୍କ କୋଟି ପ୍ରତିଭାଂ ତ୍ରିଣେତ୍ରାଂ ଭଜେହମାଦ୍ୟାଂ ଜଗଦୀଶ୍ଵରୀଂ ତାମ୍ ॥
ସର୍ଵମଙ୍ଗଲମାଙ୍ଗଲ୍ୟେ ଶିଵେ ସର୍ଵାର୍ଥ ସାଧିକେ ।
ଶରଣ୍ୟେ ତ୍ର୍ୟମ୍ବକେ ଦେଵି ନାରାୟଣି ନମୋଽସ୍ତୁ ତେ ॥
ସରସିଜନିଲୟେ ସରୋଜହସ୍ତେ ଧଵଲତରାଂଶୁକ ଗନ୍ଧମାଲ୍ୟଶୋଭେ ।
ଭଗଵତି ହରିଵଲ୍ଲଭେ ମନୋଜ୍ଞେ ତ୍ରିଭୁଵନଭୂତିକରିପ୍ରସୀଦ ମହ୍ୟମ୍ ॥
ଵିଷ୍ଣୁପତ୍ନୀଂ କ୍ଷମାଂ ଦେଵୀଂ ମାଧଵୀଂ ମାଧଵପ୍ରିୟାମ୍ ।
ଵିଷ୍ଣୋଃ ପ୍ରିୟସଖୀଂମ୍ ଦେଵୀଂ ନମାମ୍ୟଚ୍ୟୁତଵଲ୍ଲଭାମ୍ ॥
ମହାଲକ୍ଷ୍ମୀ ଚ ଵିଦ୍ମହେ ଵିଷ୍ଣୁପତ୍ନୀ ଚ ଧୀମହୀ ।
ତନ୍ନୋ ଲକ୍ଷ୍ମୀଃ ପ୍ରଚୋଦୟାତ୍ ॥
(ଆନନ୍ଦଃ କର୍ଦମଃ ଶ୍ରୀଦଶ୍ଚିକ୍ଲୀତ ଇତି ଵିଶ୍ରୁତାଃ ।
ଋଷୟଃ ଶ୍ରିୟଃ ପୁତ୍ରାଶ୍ଚ ଶ୍ରୀର୍ଦେଵୀର୍ଦେଵତା ମତାଃ
(ସ୍ଵୟମ୍ ଶ୍ରୀରେଵ ଦେଵତା ॥ ) variation)
(ଚନ୍ଦ୍ରଭାଂ ଲକ୍ଷ୍ମୀମୀଶାନାମ୍ ସୁର୍ୟଭାଂ ଶ୍ରିୟମୀଶ୍ଵରୀମ୍ ।
ଚନ୍ଦ୍ର ସୂର୍ୟଗ୍ନି ସର୍ଵାଭାମ୍ ଶ୍ରୀମହାଲକ୍ଷ୍ମୀମୁପାସ୍ମହେ ॥ variation)
ଶ୍ରୀଵର୍ଚସ୍ୟମାୟୁଷ୍ୟମାରୋଗ୍ୟମାଵିଧାତ୍ ପଵମାନଂ ମହୀୟତେ ।
ଧନଂ ଧାନ୍ୟଂ ପଶୁଂ ବହୁପୁତ୍ରଲାଭଂ ଶତସଂଵତ୍ସରଂ ଦୀର୍ଘମାୟୁଃ ॥
ଋଣରୋଗାଦିଦାରିଦ୍ର୍ୟପାପକ୍ଷୁଦପମୃତ୍ୟଵଃ ।
ଭୟଶୋକମନସ୍ତାପା ନଶ୍ୟନ୍ତୁ ମମ ସର୍ଵଦା ॥
ଶ୍ରିୟେ ଜାତ ଶ୍ରିୟ ଆନିର୍ୟାୟ ଶ୍ରିୟଂ ଵୟୋ ଜନିତୃଭ୍ୟୋ ଦଧାତୁ ।
ଶ୍ରିୟଂ ଵସାନା ଅମୃତତ୍ଵମାୟନ୍ ଭଜଂତି ସଦ୍ୟଃ ସଵିତା ଵିଦଧ୍ୟୂନ୍ ॥
ଶ୍ରିୟ ଏଵୈନଂ ତଚ୍ଛ୍ରିୟାମାଦଧାତି । ସନ୍ତତମୃଚା ଵଷଟ୍କୃତ୍ୟଂ
ସନ୍ଧତ୍ତଂ ସନ୍ଧୀୟତେ ପ୍ରଜୟା ପଶୁଭିଃ । ୟ ଏଵଂ ଵେଦ ।
ଓଂ ମହାଦେଵ୍ୟୈ ଚ ଵିଦ୍ମହେ ଵିଷ୍ଣୁପତ୍ନ୍ଯୈ ଚ ଧୀମହି ।
ତନ୍ନୋ ଲକ୍ଷ୍ମୀଃ ପ୍ରଚୋଦୟାତ୍ ॥
॥ ଓଂ ଶାନ୍ତିଃ ଶାନ୍ତିଃ ଶାନ୍ତିଃ ॥
Comments
Post a Comment