ଶ୍ରୀନାରାୟଣକବଚମ୍
🟢ଶ୍ରୀନାରାୟଣକବଚମ୍ 🟢
ଓଁ ଶ୍ରୀଗଣେଶାୟ ନମଃ ।
ଓଁ ନମୋ ନାରାୟଣାୟ ।
🌹ଅଙ୍ଗନ୍ୟାସଃ🌹
ଓଁ ଓଁ ନମଃ ପାଦୟୋଃ ।
ଓଁ ନଂ ନମଃ ଜାନୁନୋଃ ।
ଓଁ ମୋଂ ନମଃ ଊର୍ୱୋଃ ।
ଓଁ ନାଂ ନମଃ ଉଦରେ ।
ଓଁ ରାଂ ନମଃ ହୃଦି ।
ଓଁ ଯଂ ନମଃ ଉରସି ।
ଓଁ ଣାଂ ନମଃ ମୁଖେ ।
ଓଁ ଯଂ ନମଃ ଶିରସି ॥
🔴କରନ୍ୟାସଃ🔴
ଓଁ ଓଁ ନମଃ ଦକ୍ଷିଣତର୍ଜନ୍ୟାମ୍ ।
ଓଁ ନଂ ନମଃ ଦକ୍ଷିଣମଧ୍ୟମାୟାମ୍ ।
ଓଁ ମୋଂ ନମଃ ଦକ୍ଷିଣାନାମିକାୟାମ୍ ।
ଓଁ ଭଂ ନମଃ ଦକ୍ଷିଣକନିଷ୍ଠିକାୟାମ୍ ।
ଓଁ ଗଂ ନମଃ ବାମକନିଷ୍ଠିକାୟାମ୍ ।
ଓଁ ବଂ ନମଃ ବାମାନାମିକାୟାମ୍ ।
ଓଁ ତେଂ ନମଃ ବାମମଧ୍ୟମାୟାମ୍ ।
ଓଁ ବାଂ ନମଃ ବାମତର୍ଜନ୍ୟାମ୍ ।
ଓଁ ସୁଂ ନମଃ ଦକ୍ଷିଣାଂଗୁଷ୍ଠୋର୍ଧ୍ୱପର୍ୱଣି ।
ଓଁ ଦେଂ ନମଃ ଦକ୍ଷିଣାଂଗୁଷ୍ଠାୟ ପର୍ୱଣି ।
ଓଁ ବାଂ ନମଃ ବାମାଂଗୁଷ୍ଠୋର୍ଧ୍ୱପର୍ୱଣି ।
ଓଁ ଯଂ ନମଃ ବାମାଂଗୁଷ୍ଠାୟ ପର୍ୱଣି ॥
🔴ବିଷ୍ଣୁଷଡକ୍ଷରନ୍ୟାସଃ 🔴
ଓଁ ଓଁ ନମଃ ହୃଦୟେ ।
ଓଁ ବିଂ ନମଃ ମୂର୍ଧନି ।
ଓଁ ଷଂ ନମଃ ଭ୍ରୁବୋର୍ମଧ୍ୟେ ।
ଓଁ ଣଂ ନମଃ ଶିଖାୟାମ୍ ।
ଓଁ ବେଂ ନମଃ ନେତ୍ରୟୋଃ ।
ଓଁ ନଂ ନମଃ ସର୍ୱସନ୍ଧିଷୁ ।
ଓଁ ମଃ ଅସ୍ତ୍ରାୟ ଫଟ୍ ପ୍ରାଚ୍ୟାମ୍ ।
ଓଁ ମଃ ଅସ୍ତ୍ରାୟ ଫଟ୍ ଆଗ୍ନେୟାମ୍ ।
ଓଁ ମଃ ଅସ୍ତ୍ରାୟ ଫଟ୍ ଦକ୍ଷିଣସ୍ୟାମ୍ ।
ଓଁ ମଃ ଅସ୍ତ୍ରାୟ ଫଟ୍ ନୈରୃତ୍ୟେ ।
ଓଁ ମଃ ଅସ୍ତ୍ରାୟ ଫଟ୍ ପ୍ରତୀଚ୍ୟାମ୍ ।
ଓଁ ମଃ ଅସ୍ତ୍ରାୟ ଫଟ୍ ବାୟବ୍ୟେ ।
ଓଁ ମଃ ଅସ୍ତ୍ରାୟ ଫଟ୍ ଉଦୀଚ୍ୟାମ୍ ।
ଓଁ ମଃ ଅସ୍ତ୍ରାୟ ଫଟ୍ ଐଶାନ୍ୟାମ୍ ।
ଓଁ ମଃ ଅସ୍ତ୍ରାୟ ଫଟ୍ ଊର୍ଧ୍ୱାୟାମ୍ ।
ଓଁ ମଃ ଅସ୍ତ୍ରାୟ ଫଟ୍ ଅଧରାୟାମ୍ ॥
💥ଅଥ ଶ୍ରୀନାରାୟଣକବଚମ୍ 💥
ରାଜୋବାଚ ।
ଯୟା ଗୁପ୍ତଃ ସହସ୍ରାକ୍ଷଃ ସବାହାନ୍ରିପୁସୈନିକାନ୍ ।
କ୍ରୀଡନ୍ନିବ ବିନିର୍ଜିତ୍ୟ ତ୍ରିଲୋକ୍ୟା ବୁଭୁଜେ ଶ୍ରିୟମ୍ ॥ ୧॥
ଭଗବଂସ୍ତନ୍ମମାଖ୍ୟାହି ବର୍ମ ନାରାୟଣାତ୍ମକମ୍ ।
ଯଥାଽଽତତାୟିନଃ ଶତ୍ରୂନ୍ ଯେନ ଗୁପ୍ତୋଽଜୟନ୍ମୃଧେ ॥ ୨॥
ଶ୍ରୀଶୁକ ଉବାଚ ।
ବୃତଃ ପୁରୋହିତସ୍ତ୍ୱାଷ୍ଟ୍ରୋ ମହେନ୍ଦ୍ରାୟାନୁପୃଚ୍ଛତେ ।
ନାରାୟଣାଖ୍ୟଂ ବର୍ମାହ ତଦିହୈକମନାଃ ଶୃଣୁ ॥ ୩॥
ବିଶ୍ୱରୂପ ଉବାଚ ।
ଧୌତାଙ୍ଘ୍ରିପାଣିରାଚମ୍ୟ ସପବିତ୍ର ଉଦଙ୍ମୁଖଃ ।
କୃତସ୍ୱାଙ୍ଗକରନ୍ୟାସୋ ମନ୍ତ୍ରାଭ୍ୟାଂ ବାଗ୍ୟତଃ ଶୁଚିଃ ॥ ୪॥
ନାରାୟଣମୟଂ ବର୍ମ ସନ୍ନହ୍ୟେଦ୍ଭୟ ଆଗତେ ।
ପାଦୟୋର୍ଜାନୁନୋରୂର୍ୱୋରୁଦରେ ହୃଦ୍ୟଥୋରସି ॥ ୫॥
ମୁଖେ ଶିରସ୍ୟାନୁପୂର୍ୱ୍ୟାଦୋଂକାରାଦୀନି ବିନ୍ୟସେତ୍ ।
ଓଁ ନମୋ ନାରାୟଣାୟେତି ବିପର୍ୟଯମଥାପି ବା ॥ ୬॥
କରନ୍ୟାସଂ ତତଃ କୁର୍ୟାଦ୍ଦ୍ୱାଦଶାକ୍ଷରବିଦ୍ୟଯା ।
ପ୍ରଣବାଦିୟକାରାନ୍ତମଙ୍ଗୁଲ୍ୟଙ୍ଗୁଷ୍ଠପର୍ୱସୁ ॥ ୭॥
ନ୍ୟସେଦ୍ଧୃଦୟ ଓଙ୍କାରଂ ବିକାରମନୁ ମୂର୍ଧନି ।
ଷକାରଂ ତୁ ଭ୍ରୁବୋର୍ମଧ୍ୟେ ଣକାରଂ ଶିଖୟା ଦିଶେତ୍ ॥ ୮॥
ବେକାରଂ ନେତ୍ରୟୋର୍ୟୁଞ୍ଜ୍ୟାନ୍ନକାରଂ ସର୍ୱସନ୍ଧିଷୁ ।
ମକାରମସ୍ତ୍ରମୁଦ୍ଦିଶ୍ୟ ମନ୍ତ୍ରମୂର୍ତିର୍ଭବେଦ୍ବୁଧଃ ॥ ୯॥
ସବିସର୍ଗଂ ଫଡନ୍ତଂ ତତ୍ ସର୍ୱଦିକ୍ଷୁ ବିନିର୍ଦିଶେତ୍ ।
ଓଁ ବିଷ୍ଣବେ ନମ ଇତି ॥ ୧୦॥
ଆତ୍ମାନଂ ପରମଂ ଧ୍ୟାୟେଦ୍ଧ୍ୟେୟଂ ଷଟ୍ଶକ୍ତିଭିର୍ୟୁତମ୍ ।
ବିଦ୍ୟାତେଜସ୍ତପୋମୂର୍ତିମିମଂ ମନ୍ତ୍ରମୁଦାହରେତ୍ ॥ ୧୧॥
ଓଁ ହରିର୍ୱିଦଧ୍ୟାନ୍ମମ ସର୍ୱରକ୍ଷାଂ
ନ୍ୟସ୍ତାଙ୍ଘ୍ରିପଦ୍ମଃ ପତଗେନ୍ଦ୍ରପୃଷ୍ଠେ ।
ଦରାରିଚର୍ମାସିଗଦେଷୁଚାପ-
ପାଶାନ୍ଦଧାନୋଽଷ୍ଟଗୁଣୋଽଷ୍ଟବାହୁଃ ॥ ୧୨॥
ଜଲେଷୁ ମାଂ ରକ୍ଷତୁ ମତ୍ସ୍ୟମୂର୍ତି-
ର୍ୟାଦୋଗଣେଭ୍ୟୋ ବରୁଣସ୍ୟ ପାଶାତ୍ ।
ସ୍ଥଲେଷୁ ମାୟାବଟୁବାମନୋଽବ୍ୟାତ୍
ତ୍ରିବିକ୍ରମଃ ଖେଽବତୁ ବିଶ୍ୱରୂପଃ ॥ ୧୩॥
ଦୁର୍ଗେଷ୍ୱଟବ୍ୟାଜିମୁଖାଦିଷୁ ପ୍ରଭୁଃ
ପାୟାନ୍ନୃସିଂହୋଽସୁରୟୂଥପାରିଃ ।
ବିମୁଞ୍ଚତୋ ଯସ୍ୟ ମହାଟ୍ଟହାସଂ
ଦିଶୋ ବିନେଦୁର୍ନ୍ୟପତଂଶ୍ଚ ଗର୍ଭାଃ ॥ ୧୪॥
ରକ୍ଷତ୍ୱସୌ ମାଧ୍ୱନି ଯଜ୍ଞକଲ୍ପଃ
ସ୍ୱଦଂଷ୍ଟ୍ରୟୋନ୍ନୀତଧରୋ ବରାହଃ ।
ରାମୋଽଦ୍ରିକୂଟେଷ୍ୱଥ ବିପ୍ରବାସେ
ସଲକ୍ଷ୍ମଣୋଽବ୍ୟାଦ୍ଭରତାଗ୍ରଜୋଽସ୍ମାନ୍ ॥ ୧୫॥
ମାମୁଗ୍ରଧର୍ମାଦଖିଲାତ୍ପ୍ରମାଦା-
ନ୍ନାରାୟଣଃ ପାତୁ ନରଶ୍ଚ ହାସାତ୍ ।
ଦତ୍ତସ୍ତ୍ୱୟୋଗାଦଥ ଯୋଗନାଥଃ
ପାୟାଦ୍ଗୁଣେଶଃ କପିଲଃ କର୍ମବନ୍ଧାତ୍ ॥ ୧୬॥
ସନତ୍କୁମାରୋଽବତୁ କାମଦେବା-
ଦ୍ଧୟଶୀର୍ଷା ମାଂ ପଥି ଦେବହେଲନାତ୍ ।
ଦେବର୍ଷିବର୍ୟଃ ପୁରୁଷାର୍ଚନାନ୍ତରାତ୍
କୂର୍ମୋ ହରିର୍ମାଂ ନିରୟାଦଶେଷାତ୍ ॥ ୧୭॥
ଧନ୍ୱନ୍ତରିର୍ଭଗବାନ୍ପାତ୍ୱପଥ୍ୟା-
ଦ୍ଦ୍ୱନ୍ଦ୍ୱାଦ୍ଭୟାଦୃଷଭୋ ନିର୍ଜିତାତ୍ମା ।
ଯଜ୍ଞଶ୍ଚ ଲୋକାଦବତାଞ୍ଜନାନ୍ତା-
ଦ୍ବଲୋ ଗଣାତ୍କ୍ରୋଧବଶାଦହୀନ୍ଦ୍ରଃ ॥ ୧୮॥
ଦ୍ୱୈପାୟନୋ ଭଗବାନପ୍ରବୋଧା-
ଦ୍ବୁଦ୍ଧସ୍ତୁ ପାଖଣ୍ଡଗଣପ୍ରମାଦାତ୍ ।
କଲ୍କିଃ କଲେଃ କାଲମଲାତ୍ପ୍ରପାତୁ
ଧର୍ମାବନାୟୋରୁକୃତାବତାରଃ ॥ ୧୯॥
ମାଂ କେଶବୋ ଗଦୟା ପ୍ରାତରବ୍ୟା-
ଦ୍ଗୋବିନ୍ଦ ଆସଙ୍ଗବମାତ୍ତବେଣୁଃ ।
ନାରାୟଣଃ ପ୍ରାହ୍ଣ ଉଦାତ୍ତଶକ୍ତି-
ର୍ମଧ୍ୟନ୍ଦିନେ ବିଷ୍ଣୁରରୀନ୍ଦ୍ରପାଣିଃ ॥ ୨୦॥
ଦେବୋଽପରାହ୍ଣେ ମଧୁହୋଗ୍ରଧନ୍ୱା
ସାୟଂ ତ୍ରିଧାମାବତୁ ମାଧବୋ ମାମ୍ ।
ଦୋଷେ ହୃଷୀକେଶ ଉତାର୍ଧରାତ୍ରେ
ନିଶୀଥ ଏକୋଽବତୁ ପଦ୍ମନାଭଃ ॥ ୨୧॥
ଶ୍ରୀବତ୍ସଧାମାପରରାତ୍ର ଈଶଃ
ପ୍ରତ୍ୟୁଷ ଈଶୋଽସିଧରୋ ଜନାର୍ଦନଃ ।
ଦାମୋଦରୋଽବ୍ୟାଦନୁସନ୍ଧ୍ୟଂ ପ୍ରଭାତେ
ବିଶ୍ୱେଶ୍ୱରୋ ଭଗବାନ୍ କାଲମୂର୍ତିଃ ॥ ୨୨॥
ଚକ୍ରଂ ଯୁଗାନ୍ତାନଲତିଗ୍ମନେମି
ଭ୍ରମତ୍ସମନ୍ତାଦ୍ଭଗବତ୍ପ୍ରୟୁକ୍ତମ୍ ।
ଦନ୍ଦଗ୍ଧି ଦନ୍ଦଗ୍ଧ୍ୟରିସୈନ୍ୟମାଶୁ
କକ୍ଷଂ ଯଥା ବାତସଖୋ ହୁତାଶଃ ॥ ୨୩॥
ଗଦେଽଶନିସ୍ପର୍ଶନବିସ୍ଫୁଲିଙ୍ଗେ
ନିଷ୍ପିଣ୍ଢି ନିଷ୍ପିଣ୍ଢ୍ୟଜିତପ୍ରିୟାସି ।
କୂଷ୍ମାଣ୍ଡବୈନାୟକୟକ୍ଷରକ୍ଷୋ-
ଭୂତଗ୍ରହାଂଶ୍ଚୂର୍ଣୟ ଚୂର୍ଣୟାରୀନ୍ ॥ ୨୪॥
ତ୍ୱଂ ଯାତୁଧାନପ୍ରମଥପ୍ରେତମାତୃ-
ପିଶାଚବିପ୍ରଗ୍ରହଘୋରଦୃଷ୍ଟୀନ୍ ।
ଦରେନ୍ଦ୍ର ବିଦ୍ରାବୟ କୃଷ୍ଣପୂରିତୋ
ଭୀମସ୍ୱନୋଽରେହୃଦୟାନି କମ୍ପୟନ୍ ॥ ୨୫॥
ତ୍ୱଂ ତିଗ୍ମଧାରାସିବରାରିସୈନ୍ୟ-
ମୀଶପ୍ରୟୁକ୍ତୋ ମମ ଛିନ୍ଧି ଛିନ୍ଧି ।
ଚକ୍ଷୂଂଷି ଚର୍ମଞ୍ଛତଚନ୍ଦ୍ର ଛାଦୟ
ଦ୍ୱିଷାମଘୋନାଂ ହର ପାପଚକ୍ଷୁଷାମ୍ ॥ ୨୬॥
ଯନ୍ନୋ ଭୟଂ ଗ୍ରହେଭ୍ୟୋଽଭୂତ୍କେତୁଭ୍ୟୋ ନୃଭ୍ୟ ଏବ ଚ ।
ସରୀସୃପେଭ୍ୟୋ ଦଂଷ୍ଟ୍ରିଭ୍ୟୋ ଭୂତେଭ୍ୟୋଂଽହୋଭ୍ୟ ଏବ ଚ ॥ ୨୭॥
ସର୍ୱାଣ୍ୟେତାନି ଭଗବନ୍ନାମରୂପାସ୍ତ୍ରକୀର୍ତନାତ୍ ।
ପ୍ରୟାନ୍ତୁ ସଂକ୍ଷୟଂ ସଦ୍ୟୋ ଯେ ନଃ ଶ୍ରେୟଃପ୍ରତୀପକାଃ ॥ ୨୮॥
ଗରୁଡୋ ଭଗବାନ୍ ସ୍ତୋତ୍ରସ୍ତୋଭଶ୍ଛନ୍ଦୋମୟଃ ପ୍ରଭୁଃ ।
ରକ୍ଷତ୍ୱଶେଷକୃଚ୍ଛ୍ରେଭ୍ୟୋ ବିଷ୍ୱକ୍ସେନଃ ସ୍ୱନାମଭିଃ ॥ ୨୯ ॥
ସର୍ୱାପଦ୍ଭ୍ୟୋ ହରେର୍ନାମରୂପୟାନାୟୁଧାନି ନଃ ।
ବୁଦ୍ଧୀନ୍ଦ୍ରିୟମନଃପ୍ରାଣାନ୍ପାନ୍ତୁ ପାର୍ଷଦଭୂଷଣାଃ ॥ ୩୦॥
ଯଥା ହି ଭଗବାନେବ ବସ୍ତୁତଃ ସଦସଚ୍ଚ ଯତ୍ ।
ସତ୍ୟେନାନେନ ନଃ ସର୍ୱେ ଯାନ୍ତୁ ନାଶମୁପଦ୍ରବାଃ ॥ ୩୧॥
ଯଥୈକାତ୍ମ୍ୟାନୁଭାବାନାଂ ବିକଲ୍ପରହିତଃ ସ୍ୱୟମ୍ ।
ଭୂଷଣାୟୁଧଲିଙ୍ଗାଖ୍ୟା ଧତ୍ତେ ଶକ୍ତୀଃ ସ୍ୱମାୟଯା ॥ ୩୨॥
ତେନୈବ ସତ୍ୟମାନେନ ସର୍ୱଜ୍ଞୋ ଭଗବାନ୍ ହରିଃ ।
ପାତୁ ସର୍ୱୈଃ ସ୍ୱରୂପୈର୍ନଃ ସଦା ସର୍ୱତ୍ର ସର୍ୱଗଃ ॥ ୩୩॥
ବିଦିକ୍ଷୁ ଦିକ୍ଷୂର୍ଧ୍ୱମଧଃ ସମନ୍ତା-
ଦନ୍ତର୍ବହିର୍ଭଗବାନ୍ନାରସିଂହଃ ।
ପ୍ରହାପୟଂେଲୋକଭୟଂ ସ୍ୱନେନ
ସ୍ୱତେଜସା ଗ୍ରସ୍ତସମସ୍ତତେଜାଃ ॥ ୩୪॥
ମଘବନ୍ନିଦମାଖ୍ୟାତଂ ବର୍ମ ନାରାୟଣାତ୍ମକମ୍ ।
ବିଜେଷ୍ୟସ୍ୟଞ୍ଜସା ଯେନ ଦଂଶିତୋଽସୁରୟୂଥପାନ୍ ॥ ୩୫॥
ଏତଦ୍ଧାରୟମାଣସ୍ତୁ ଯଂ ଯଂ ପଶ୍ୟତି ଚକ୍ଷୁଷା ।
ପଦା ବା ସଂସ୍ପୃଶେତ୍ସଦ୍ୟଃ ସାଧ୍ୱସାତ୍ସ ବିମୁଚ୍ୟତେ ॥ ୩୬॥
ନ କୁତଶ୍ଚିଦ୍ଭୟଂ ତସ୍ୟ ବିଦ୍ୟାଂ ଧାରୟତୋ ଭବେତ୍ ।
ରାଜଦସ୍ୟୁଗ୍ରହାଦିଭ୍ୟୋ ବ୍ୟାଘ୍ରାଦିଭ୍ୟଶ୍ଚ କର୍ହିଚିତ୍ ॥ ୩୭॥
ଇମାଂ ବିଦ୍ୟାଂ ପୁରା କଶ୍ଚିତ୍କୌଶିକୋ ଧାରୟନ୍ ଦ୍ୱିଜଃ ।
ଯୋଗଧାରଣୟା ସ୍ୱାଙ୍ଗଂ ଜହୌ ସ ମରୁଧନ୍ୱନି ॥ ୩୮॥
ତସ୍ୟୋପରି ବିମାନେନ ଗନ୍ଧର୍ୱପତିରେକଦା ।
ଯୟୌ ଚିତ୍ରରଥଃ ସ୍ତ୍ରୀଭିର୍ୱୃତୋ ଯତ୍ର ଦ୍ୱିଜକ୍ଷୟଃ ॥ ୩୯ ॥
ଗଗନାନ୍ନ୍ୟପତତ୍ସଦ୍ୟଃ ସବିମାନୋ ହ୍ୟବାକ୍ଷିରାଃ ।
ସ ବାଲଖିଲ୍ୟବଚନାଦସ୍ଥୀନ୍ୟାଦାୟ ବିସ୍ମିତଃ ।
ପ୍ରାସ୍ୟ ପ୍ରାଚୀସରସ୍ୱତ୍ୟାଂ ସ୍ନାତ୍ୱା ଧାମ ସ୍ୱମନ୍ୱଗାତ୍ ॥ ୪୦॥
ଶ୍ରୀଶୁକ ଉବାଚ ।
ଯ ଇଦଂ ଶୃଣୁୟାତ୍କାଲେ ଯୋ ଧାରୟତି ଚାଦୃତଃ ।
ତଂ ନମସ୍ୟନ୍ତି ଭୂତାନି ମୁଚ୍ୟତେ ସର୍ୱତୋ ଭୟାତ୍ ॥ ୪୧॥
ଏତାଂ ବିଦ୍ୟାମଧିଗତୋ ବିଶ୍ୱରୂପାଚ୍ଛତକ୍ରତୁଃ ।
ତ୍ରୈଲୋକ୍ୟଲକ୍ଷ୍ମୀଂ ବୁଭୁଜେ ବିନିର୍ଜିତ୍ୟ ମୃଧେଽସୁରାନ୍ ॥ ୪୨॥
॥ ଇତି ଶ୍ରୀମଦ୍ଭାଗବତମହାପୁରାଣେ ପାରମହଂସ୍ୟାଂ ସଂହିତାୟାଂ ଷଷ୍ଠସ୍କନ୍ଧେ ନାରାୟଣବର୍ମକଥନଂ ନାମାଷ୍ଟମୋଽଧ୍ୟାୟଃ ॥
Comments
Post a Comment