ଜୟଦୁର୍ଗାସ୍ତୋତ୍ରମ୍

 🌹 ଜୟଦୁର୍ଗାସ୍ତୋତ୍ରମ୍ 🌹

👉ଵିନିୟୋଗଃ -

ଓଂ ଅସ୍ୟ ଶ୍ରୀଜୟଦୁର୍ଗା ସ୍ତୋତ୍ରମହାମନ୍ତ୍ରସ୍ୟ, ମାର୍କଣ୍ଡୟୋ ମୁନିଃ, ବୃହତୀ ଛନ୍ଦଃ, ଶ୍ରୀଜୟଦୁର୍ଗା ଦେଵତା, ପ୍ରଣଵୋ ବୀଜଂ, ସ୍ଵାହା ଶକ୍ତିଃ । ଶ୍ରୀଦୁର୍ଗା ପ୍ରସାଦସିଦ୍ଧ୍ୟର୍ଥେ ଜପେ ଵିନିୟୋଗଃ ।

👉ହୃଦୟାଦିନ୍ୟାସଃ -

ଓଂ ଦୁର୍ଗେ ହୃଦୟାୟ ନମଃ । ଓଂ ଦୁର୍ଗେ ଶିରସି ସ୍ଵାହା । ଓଂ ଦୁର୍ଗାୟୈ ଶିଖାୟୈ ଵଷଟ୍ । ଓଂ ଭୂତରକ୍ଷିଣୀ କଵଚାୟ ହୁଂ । ଓଂ ଦୁର୍ଗେ ଦୁର୍ଗେ ରକ୍ଷିଣି ନେତ୍ରତ୍ରୟାୟ ଵୌଷଟ । ଓଂ ଦୁର୍ଗେ ଦୁର୍ଗେ ରକ୍ଷିଣି ।  ଅସ୍ତ୍ରାୟ ଫଟ୍ ।

            🔸ଧ୍ୟାନମ୍ 🔸

କାଳାଭ୍ରାଭାଂ କଟାକ୍ଷୈରରିକୁଲଭୟଦାଂ 

ମୌଲିବଦ୍ଧେନ୍ଦୁରେଖାମ୍

ଶଙ୍ଖଂ ଚକ୍ରଂ କୃପାଣଂ ତ୍ରିଶିଖମପି କରୈ-

ରୁଦ୍ଵହନ୍ତୀଂ ତ୍ରିନେତ୍ରାମ୍ ।

ସିଂହସ୍କନ୍ଧାଧିରୂଢାଂ ତ୍ରିଭୁଵନମଖିଲଂ 

ତେଜସା ପୂରୟନ୍ତୀଂ 

ଧ୍ୟାୟେଦ୍ ଦୁର୍ଗା ଜୟାଖ୍ୟାଂ ତ୍ରିଦଶପରିଵୃତାଂ ସେଵିତାଂ ସିଦ୍ଧିକାମୈଃ ॥

👉ପ୍ରଥମମନ୍ତ୍ରଃ -

ଓଂ ନମୋ ଦୁର୍ଗେ-ଦୁର୍ଗେ ରକ୍ଷିଣୀ ସ୍ଵାହା ।

👉ଦ୍ଵିତୀୟମନ୍ତ୍ରଃ -

ଓଂ କ୍ରୋଂ କ୍ଲୀଂ ଶ୍ରୀଂ ହୀଂ ଆଂ ସ୍ତ୍ରୀ ହୂଂ ଜୟଦୁର୍ଗେ ରକ୍ଷ-ରକ୍ଷ ସ୍ଵାହା ।

ବ୍ରହ୍ମୋ ଉଵାଚ -

ଦୁର୍ଗେ ଶିଵେଽଭୟେ ମାୟେ ନାରାୟଣି ସନାତନି ।

ଜୟେ ମେ ମଙ୍ଗଲଂ ଦେହି ନମସ୍ତେ ସର୍ଵମଙ୍ଗଲେ ॥ ୧॥

ଦୈତ୍ୟନାଶାର୍ଥଵଚନୋ ଦକାରଃ ପରିକୀର୍ତିତଃ ।

ଉକାରୋ ଵିଘ୍ନନାଶାର୍ଥଵାଚକୋ ଵେଦସମ୍ମତଃ ॥ ୨॥

ରେଫୋ ରୋଗଘ୍ନଵଚନୋ ଗଶ୍ଚ ପାପଘ୍ନଵାଚକଃ ।

ଭୟଶତ୍ରୁଘ୍ନଵଚନଶ୍ଚାକାରଃ ପରିକୀର୍ତିତଃ ॥ ୩॥

ସ୍ମୃତ୍ୟୁକ୍ତିସ୍ମରଣାଦ୍ୟସ୍ୟା ଏତେ ନଶ୍ୟନ୍ତି ନିଶ୍ଚିତମ୍ ।

ଅତୋ ଦୁର୍ଗା ହରେଃ ଶକ୍ତିର୍ହରିଣା ପରିକୀର୍ତିତା ॥ ୪॥

ଵିପତ୍ତିଵାଚକୋ ଦୁର୍ଗଶ୍ଚାକାରୋ ନାଶଵାଚକଃ ।

ଦୁର୍ଗଂ ନଶ୍ୟତି ୟା ନିତ୍ୟଂ ସା ଦୁର୍ଗା ପରିକୀର୍ତିତା ॥ ୫॥

ଦୁର୍ଗୋ ଦୈତ୍ୟେନ୍ଦ୍ରଵଚନୋଽପ୍ୟାକାରୋ ନାଶଵାଚକଃ ।

ତଂ ନନାଶ ପୁରା ତେନ ବୁଧୈର୍ଦୁର୍ଗା ପ୍ରକୀର୍ତିତା ॥ ୬॥

ଶଶ୍ଚ କଲ୍ୟାଣଵଚନ ଇକାରୋତ୍କୃଷ୍ଟଵାଚକଃ ।

ସମୂହଵାଚକଶ୍ଚୈଵ ଵାକାରୋ ଦାତୃଵାଚକଃ ॥ ୭॥

ଶ୍ରେୟଃସଙ୍ଘୋତ୍କୃଷ୍ଟଦାତ୍ରୀ ଶିଵା ତେନ ପ୍ରକୀର୍ତିତା ।

ଶିଵରାଶିର୍ମୂର୍ତିମତୀ ଶିଵା ତେନ ପ୍ରକୀର୍ତିତା ॥ ୮॥

ଶିଵୋ ହି ମୋକ୍ଷଵଚନଶ୍ଚାକାରୋ ଦାତୃଵାଚକଃ ।

ସ୍ଵୟଂ ନିର୍ଵାଣଦାତ୍ରୀ ୟା ସା ଶିଵା ପରିକୀର୍ତିତା ॥ ୯॥

ଅଭୟୋ ଭୟନାଶୋକ୍ତଶ୍ଚାକାରୋ ଦାତୃଵାଚକଃ ।

ପ୍ରଦଦାତ୍ୟଭୟଂ ସଦ୍ୟଃ ସାଽଭୟା ପରିକୀର୍ତିତା ॥ ୧୦॥

ରାଜଶ୍ରୀଵଚନୋ ମାଶ୍ଚ ୟାଶ୍ଚ ପ୍ରାପଣଵାଚକଃ ।

ତାଂ ପ୍ରାପୟତି ୟା ସଦ୍ୟଃ ସା ମାୟା ପରିକୀର୍ତିତା ॥ ୧୧॥

ମାଶ୍ଚ ମୋକ୍ଷାର୍ଥଵଚନୋ ୟାଶ୍ଚ ପ୍ରାପଣଵାଚକଃ ।

ତଂ ପ୍ରାପୟତି ୟା ନିତ୍ୟଂ ସା ମାୟା ପରିକୀର୍ତିତା ॥ ୧୨॥

ନାରାୟାଣାର୍ଧାଙ୍ଗଭୂତା ତେନ ତୁଲ୍ୟା ଚ ତେଜସା ।

ତଦା ତସ୍ୟ ଶରୀରସ୍ଥା ତେନ ନାରାୟଣୀ ସ୍ମୃତା ॥ ୧୩॥

ନିର୍ଗୁଣସ୍ୟ ଚ ନିତ୍ୟସ୍ୟ ଵାଚକଶ୍ଚ ସନାତନଃ ।

ସଦା ନିତ୍ୟା ନିର୍ଗୁଣା ୟ କୀର୍ତିତା ସା ସନାତନୀ ॥ ୧୪॥

ଜୟଃ କଲ୍ୟାଣଵଚନୋ ହ୍ୟାକାରୋ ଦାତୃଵାଚକଃ ।

ଜୟଂ ଦଦାତି ୟା ନିତ୍ୟଂ ସା ଜୟା ପରିକୀର୍ତିତା ॥ ୧୫॥

ସର୍ଵମଙ୍ଗଲଶବ୍ଦଶ୍ଚ ସମ୍ପୂର୍ଣୈଶ୍ଵର୍ୟଵାଚକଃ ।

ଆକାରୋ ଦାତୃଵଚନସ୍ତଦ୍ଦାତ୍ରୀ ସର୍ଵମଙ୍ଗଲା ॥ ୧୬॥

ନାମାଷ୍ଟକମିଦଂ ସାରଂ ନାମାର୍ଥସହସଂୟୁତମ୍ ।

ନାରାୟଣେନ ୟଦ୍ଦତ୍ତଂ ବ୍ରହ୍ମଣେ ନାଭିପଙ୍କଜେ ॥ ୧୭॥

ତସ୍ମୈ ଦତ୍ଵା ନିଦ୍ରିତଶ୍ଚ ବଭୂଵ ଜଗତାଂ ପତିଃ ।

ମଧୁକୈଟଭୌ ଦୁର୍ଗାନ୍ତୌ ବ୍ରହ୍ମାଣଂ ହନ୍ତୁମୁଦ୍ୟତୌ ॥ ୧୮॥

ସ୍ତୋତ୍ରେଣାନେନ ସ ବ୍ରହ୍ମା ସ୍ତୁତିଂ ନତ୍ଵା ଚକାର ହ ।

ସାକ୍ଷାତ୍ସ୍ତୁତା ତଦା ଦୁର୍ଗା ବ୍ରହ୍ମଣେ କଵଚଂ ଦଦୌ ॥ ୧୯॥

ଶ୍ରୀକୃଷ୍ଣକଵଚଂ ଦିଵ୍ୟଂ ସର୍ଵରକ୍ଷଣନାମକମ୍ ।

ଦତ୍ତ୍ଵା ତସ୍ମୈ ମହାମାୟା ସାଽନ୍ତର୍ଧାନଂ ଚକାର ହ ॥ ୨୦॥

ସ୍ତୋତ୍ରଂ କୁର୍ଵନ୍ତି ନିଦ୍ରାଂ ଚ ସଂରକ୍ଷ୍ୟ କଵଚେନ ଵୈ ।

ନିଦ୍ରାନୁଗ୍ରହତଃ ସଦ୍ୟଃ ସ୍ତୋତ୍ରସ୍ୟୈଵ ପ୍ରଭାଵତଃ ॥ ୨୧॥

ତତ୍ରାଜଗାମ ଭଗଵାନ୍ଵୃଷରୂପୀ ଜନାର୍ଦନଃ ।

ଶକ୍ତ୍ୟା ଚ ଦୁର୍ଗୟା ସାର୍ଧଂ ଶଙ୍କରସ୍ୟ ଜୟାୟ ଚ ॥ ୨୨॥

ସରଥଂ ଶଙ୍କରଂ ମୂର୍ଧ୍ନି କୃତ୍ଵା ଚ ନିର୍ଭୟଂ ଦଦୌ ।

ଅତ୍ୟୂର୍ଧ୍ଵଂ ପ୍ରାପୟାମାସ ଜୟା ତସ୍ମୈ ଜୟଂ ଦଦୌ ॥ ୨୩॥

ସ୍ତୋତ୍ରସ୍ୟୈଵ ପ୍ରଭାଵେଣ ସଂପ୍ରାପ୍ୟ କଵଚଂ ଵିଧିଃ ।

ଵରଂ ଚ କଵଚଂ ପ୍ରାପ୍ୟ ନିର୍ଭୟଂ ପ୍ରାପ ନିଶ୍ଚିତମ୍ ॥ ୨୪॥

ବ୍ରହ୍ମା ଦଦୌ ମହେଶାୟ ସ୍ତୋତ୍ରଂ ଚ କଵଚଂ ଵରମ୍ ।

ତ୍ରିପୁରସ୍ୟ ଚ ସଙ୍ଗ୍ରାମେ ସରଥେ ପତିତେ ହରୌ ॥ ୨୫॥

ବ୍ରହ୍ମାସ୍ତ୍ରଂ ଚ ଗୃହୀତ୍ଵା ସ ସନିଦ୍ରଂ ଶ୍ରୀହରିଂ ସ୍ମରନ୍ ।

ସ୍ତୋତ୍ରଂ ଚ କଵଚଂ ପ୍ରାପ୍ୟ ଜଘାନ ତ୍ରିପୁରଂ ହରଃ ॥ ୨୬॥

ସ୍ତୋତ୍ରେଣାନେନ ତାଂ ଦୁର୍ଗାଂ କୃତ୍ଵା ଗୋପାଲିକା ସ୍ତୁତିମ୍ ।

ଲେଭିରେ ଶ୍ରୀହରିଂ କାନ୍ତଂ ସ୍ତୋତ୍ରସ୍ୟାସ୍ୟ ପ୍ରଭାଵତଃ ॥ ୨୭॥

ଗୋପକନ୍ୟା କୃତଂ ସ୍ତୋତ୍ରଂ ସର୍ଵମଙ୍ଗଲନାମକମ୍ ।

ଵାଞ୍ଛିତାର୍ଥପ୍ରଦଂ ସଦ୍ୟଃ ସର୍ଵଵିଘ୍ନଵିନାଶନମ୍ ॥ ୨୮॥

ତ୍ରିସନ୍ଧ୍ୟଂ ୟଃ ପଠେନ୍ନିତ୍ୟଂ ଭକ୍ତିୟୁକ୍ତଶ୍ଚ ମାନଵଃ ।

ଶୈଵୋ ଵା ଵୈଷ୍ଣଵୋ ଵାଽପି ଶାକ୍ତୋ ଦୁର୍ଗାତ୍ପ୍ରମୁଚ୍ୟତେ ॥ ୨୯॥

ରାଜଦ୍ଵାରେ ଶ୍ମଶାନେ ଚ ଦାଵାଗ୍ନୌ ପ୍ରାଣସଙ୍କଟେ ।

ହିଂସ୍ରଜନ୍ତୁଭୟଗ୍ରସ୍ତୋ ମଗ୍ନଃ ପୋତେ ମହାର୍ଣଵେ ॥ ୩୦॥

ଶତ୍ରୁଗ୍ରସ୍ତେ ଚ ସଙ୍ଗ୍ରାମେ କାରାଗାରେ ଵିପଦ୍ଗତେ ।

ଗୁରୁଶାପେ ବ୍ରହ୍ମଶାପେ ବନ୍ଧୁଭେଦେ ଚ ଦୁସ୍ତରେ ॥ ୩୧॥

ସ୍ଥାନଭ୍ରଷ୍ଟେ ଧନଭ୍ରଷ୍ଟେ ଜାତିଭ୍ରଷ୍ଟେ ଶୁଚାଽନ୍ଵିତେ ।

ପତିଭେଦେ ପୁତ୍ରଭେଦେ ଖଲସର୍ପଵିଷାନ୍ଵିତେ ॥ ୩୨॥

ସ୍ତୋତ୍ରସ୍ମରଣମାତ୍ରେଣ ସଦ୍ୟୋ ମୁଚ୍ୟେତ ନିର୍ଭୟଃ ।

ଵାଞ୍ଛିତଂ ଲଭତେ ସଦ୍ୟଃ ସର୍ଵୈଶ୍ଵର୍ୟମନୁତ୍ତମମ୍ ॥ ୩୩॥

ଇହ ଲୋକେ ହରେର୍ଭକ୍ତିଂ ଦୃଢାଂ ଚ ସତତଂ ସ୍ମୃତିମ୍ ।

ଅନ୍ତେ ଦାସ୍ୟଂ ଚ ଲଭତେ ପାର୍ଵତ୍ୟାଶ୍ଚ ପ୍ରସାଦତଃ ॥ ୩୪॥

ଅନେନ ସ୍ତଵରାଜେନ ତୁଷ୍ତୁଵୁର୍ନିତ୍ୟମୀଶ୍ଵରମ୍ ।

ପ୍ରଣେମୁଃ ପରୟା ଭକ୍ତ୍ୟା ୟାଵନ୍ମାସଂ ଵ୍ରଜାଙ୍ଗନାଃ ॥ ୩୫॥

ଇତି ଶ୍ରୀବ୍ରହ୍ମଵୈଵର୍ତେ ବ୍ରହ୍ମକୃତଂ ଜୟଦୁର୍ଗାସ୍ତୋତ୍ରଂ ସମ୍ପୂର୍ଣମ୍ ।