ଈଶ୍ଵରସ୍ତୋତ୍ରମ୍ - ୨
🔸ଈଶ୍ଵରସ୍ତୋତ୍ରମ୍ - ୨🔸
ଅଥ ଦ୍ଵିଷଷ୍ଟିତମଃ ପଟଲଃ
ଶ୍ରୀଆନନ୍ଦଭୈରଵୀ ଉଵାଚ
ଅଥ ନାଥ ପ୍ରଵକ୍ଷ୍ୟେଽହଂ କାକିନୀଗୁରୁଦେଵୟୋଃ ।
ମନ୍ତ୍ରୋଦ୍ଧାରସ୍ତଵ ଜ୍ଞାନଂ ୟେନ ସିଦ୍ଧୋ ଭଵେଦ୍ ୟତିଃ ॥ ୬୨-୧॥
ଏତତ୍ସ୍ତଵନପାଠେନ ସହସ୍ରାଖ୍ୟାନ୍ତସିଦ୍ଧିଷୁ ।
ରାଜତ୍ଵଂ ଲଭତେ ସଦ୍ୟୋଽଥଵା ୟୋଗୀ ଚ ସମ୍ପଦି ॥ ୬୨-୨॥
ୟଥା ଜନକରାଜା ଚ ଵିଷୟେ ଗୁରୁଭକ୍ତିମାନ୍ ।
ମହାସିଦ୍ଧୋ ମହାଜ୍ଞାନୀ ତଥା ଭଵତି ସାଧକଃ ॥ ୬୨-୩॥
ସୁରା ନାଗା ରୁଦ୍ରଗଣାଃ ସର୍ଵେ ଵିଦ୍ୟାର୍ଥସେଵକାଃ ।
ୟୋଗୀ ଜ୍ଞାନୀ ତଥା ସିଦ୍ଧାଃ ଖେଚରା ୟକ୍ଷରାକ୍ଷସାଃ ॥ ୬୨-୪॥
ମୁନୟଃ କ୍ରୋଧଵେତାଲାସ୍ତଥା ଚଣ୍ଡେଶ୍ଵରାଦୟଃ ।
ଏତଚ୍ଛୁଭସ୍ତଵେନ୍ଦ୍ରେଣ ସ୍ତୁତ୍ଵା ସର୍ଵତ୍ର ସିଦ୍ଧିଗାଃ ॥ ୬୨-୫॥
ପୂର୍ଣଃ ପୂର୍ଣେନ୍ଦୁବିମ୍ବାନନକମଲକଟାକ୍ଷାଦଘୌଘାପହାରୀ
ନାରୀନ୍ଧାତା ଵିଧାତା ସମଵତି ନ ଚ ତାନ୍ ୟୋଗୟୋଗ୍ୟାନ୍ ମହେନ୍ଦ୍ରାନ୍ ।
ସମ୍ପତ୍ତିପ୍ରାଣୟୋଗୀ ନିରଵଧିଵରଦାନନ୍ଦଗୋପ୍ତା ଶରୀରୋ
ବାଲୋ ମୃତ୍ୟୁଞ୍ଜୟସ୍ୟ ପ୍ରଭୁରିତି ଭୟହା ପାତୁ ମେ ଗୁପ୍ତଦେହମ୍ ॥ ୬୨-୬॥
କାମକ୍ରୋଧାପହନ୍ତା ଜନୟତି ଭରତାନ୍ ଭାରତାନ୍ ପାତୁ ପୃଥ୍ଵୀଂ
ୟୋ ୟୋଗୀ ଭାଵୟୋଗୀ ମମ କୁଲଫଲଦଃ ସର୍ଵଦା ଶଂ କରୋତୁ ।
ତତ୍କ୍ରୋଡେ ଲୋକଚକ୍ରଂ ତିଲତୁଲତୁଲସେସନ୍ନିଭଂ ଭାତି ସୂକ୍ଷ୍ମଂ
ତଚ୍ଛ୍ରୀନାଥାଙ୍ଘ୍ରିପାଦଦ୍ଵୟମଜରମହଂ ଭାଵୟେ ହୃତ୍ପ୍ରପଞ୍ଚେ ॥ ୬୨-୭॥
ମାୟାଂ ମୋହେ ଵିଵେକୀ ଶତ-କିତଵ-ରିପୂଚ୍ଛେଦକଃ ପ୍ରେରକସ୍ଥ-
କୋର୍ଷାଣୀ ଗୁପ୍ତତନ୍ଦ୍ରାଵନିଭଵମନୁଜୋ ୟୋ ମହାମଙ୍ଗଲସ୍ଥଃ ।
ଲୋକାତୀତୋ ତିତୀରୋ ଜୟ ଜୟ କରୁଣାନାଥ ଦାତା ତପସ୍ଵୀ
ମନ୍ତ୍ରୋଦ୍ଧାରାର୍ଥଗୁପ୍ତଂ ସମଵତି ୟ ଇହ ପ୍ରାଣନାଥଂ ତମୀଡେ ॥ ୬୨-୮॥
ଭାଵାନ୍ତୋ ୟୋଽତିଗୁର୍ଵୀ ହୃଦି ଜୟକମଲେଽତେଽମରପ୍ରତ୍ୟଥର୍ଵୋ
ଵାଗ୍ଦେଵୀ ଦେଵତାୟୈ ନମ ଇତି ମନୁନା ମୋହିତୋ ଵାକ୍ପତୀଶଃ ।
ମନ୍ତ୍ରାର୍ଥୋଦ୍ଦୀପନାଖ୍ୟୋ ଵିଜୟସଖାକୋଟିଭିର୍ଵେଷ୍ଟିତୋ ୟୋ
ବାଲାର୍କାନନ୍ଦରଶ୍ମିପ୍ରଚୟଶତମଖଃ ପାତୁ ମାଂ ଦୁଃଖଜାଲାତ୍ ॥ ୬୨-୯॥
ହୃଷ୍ଟାଙ୍ଗା ସଙ୍ଗତାଙ୍ଗାନନଵିମଲଶିଖାକୋଟିଭିର୍ଵର୍ଜିତୋ ୟୋ
ମନ୍ତ୍ରାଚ୍ଚୈତନ୍ୟହର୍ତା ପ୍ରଣଵମୟଶିଵଂ ତତ୍ସଦାନ୍ତେ ଶିଵଂ ଚ ।
ଧ୍ୟାତ୍ଵା ମାହେଶ୍ଵରାୟାଂ ନମ ଇତି ଜପନାତ୍ ତେ ମହେନ୍ଦ୍ରାଧିପଃ ସ୍ୟାତ୍
କାଲୀପୁତ୍ରଃ ସ ଏଵ ତ୍ଵମଭୟଵରଦଃ ସେଵ୍ୟତେ ୟୈଃ ସ ମୁକ୍ତଃ ॥ ୬୨-୧୦॥
ହଂସଃ ପ୍ରାଣାଵିହନ୍ତା ତ୍ଵମଖିଲଵରଦସ୍ତ୍ଵଂ ନିଦାନଃ ପ୍ରଧାନଃ
ଶାନ୍ତୀଶସ୍ତ୍ଵଂ ପ୍ରତିଷ୍ଠଃ ପ୍ରଣଵଶିଵସଦାଭଦ୍ରମାହେଶ୍ଵରାୟ ।
ଅନ୍ତେଽତ୍ୟୁଚ୍ଚୈର୍ନମୋଽନ୍ତେ ମନୁମିହ ଜପତେ ସମ୍ପଦେ ଦୋଷଭଙ୍ଗା-
ଦାନନ୍ଦାବ୍ଧୌ ତ୍ଵମୀଶୋ ଗୁରୁରିହ ଚପଲଂ ଚାପଲଂ ମାଂ ପ୍ରପାହି ॥ ୬୨-୧୧॥
ଆନନ୍ଦୋଦ୍ରେକକାରୀ ତ୍ଵମପି ସକରୁଣାସାଗରୋ ଭକ୍ତିଦାତା
ଦାତା ଵିଦ୍ୟାଧରୀଣାଂ ତ୍ଵମପି ସୁରରିପୁଃ ପାର୍ଵତୀପ୍ରାଣନାଥଃ ।
ତାରେ ବିନ୍ଦ୍ଵାଧରାଢ୍ୟଂ କ୍ଷରମଥଵିଧୁମତ୍ତଂ ମନ୍ତ୍ରମେକାକ୍ଷରଂ ତେ
ତାରାନ୍ତଂ ତ୍ର୍ୟକ୍ଷରନ୍ତଂ ପ୍ରଜପତି ୟଦି ୟୋ ୟୋଗିରାଡ୍ ଭୂତଲେ ସ୍ୟାତ୍ ॥ ୬୨-୧୨॥
ସର୍ପାଣ୍ଡସ୍ଥଂ ସୁସିଦ୍ଧୋ ହରଵିଧୁମଧରଂ ଚନ୍ଦ୍ରବିନ୍ଦୁସ୍ଵରୂପଂ
ଜପ୍ତ୍ଵା ନିତ୍ୟଂ ଵିଲୋମଂ ପ୍ରଣଵମୃତିହରଂ ଵହ୍ନିକାନ୍ତା ତଦନ୍ତେ ।
ଏତଦ୍ରୂପଂ ପଦଂ ୟୋ ଭଜତି ଵରଗତଂ ହେମମଞ୍ଜୀରନାଦଂ
ମମ୍ରେକ୍ଷାନନ୍ଦଚିତ୍ତଂ ଵିଜୟଵରକୁଲାନନ୍ଦଦଃ ପ୍ରାଣଗଂ ତେ ॥ ୬୨-୧୩॥
ଉଚ୍ଚାଟେ ମୋହନେ ଵାପ୍ୟରିଵଶସମୟେ ଶାନ୍ତିପୁଷ୍ଟ୍ୟାନ୍ତଵଶ୍ୟେ
ତେ ମନ୍ତ୍ରାନ୍ ୟୋଜୟିତ୍ଵା ଜପତି ୟଦି ସୁଧୀଃ ଶ୍ରୀପଦାବ୍ଜାଵଲମ୍ବୀ ।
ସିଧ୍ୟେତ୍ ଷଟ୍କର୍ମସାରଂ ପରମଗୁରୁଗତଃ ସ ଭଵେତ୍ କଲ୍ପଶାଖୀ
ରାଜେନ୍ଦ୍ରଃ ସର୍ଵଲୋକେ ଧନପତିସଦୃଶଃ ଶମ୍ଭୁନାଥପ୍ରସାଦାତ୍ ॥ ୬୨-୧୪॥
ଖାନ୍ତଂ ଶକ୍ରାଦିରୂଢଂ ଵିଧୁନୟନୟୁତଂ କାମବୀଜଂ ତ୍ରିଶକ୍ତିଂ
ଚାଦ୍ୟେଽନ୍ତେ ଓଁ ଶିଵାୟାନଲଵଧୁମିଲିତଂ ୟୋ ଜପେନ୍ନାଥମନ୍ତ୍ରମ୍ ।
ତେନାମ୍ନାୟୋ ଜପିତ୍ଵା କୁଲପଥନିରତଃ ସାଧକଃ ଶ୍ରୀଵରେଣ୍ୟଃ
କିଂ ତସ୍ୟାସାଧ୍ୟସିଦ୍ଧିଂ ତ୍ରିଜଗତି ସ ସୁଖୀ ସନ୍ମୁଖୀ ୟୋଗମାର୍ଗୀ ॥ ୬୨-୧୫॥
ସର୍ଵାତୀତୋ ଵିହାରୀ ପଦଗତିରହିତଃ ସର୍ଵଗାମୀ ଵିରାମୀ
ହସ୍ତାଭାଵୋ ଵିନେତା ନିରଵଧିଵରଦଃ ସର୍ଵରୂପୀ ଵିରୂପୀ ।
ମନ୍ତ୍ରଜ୍ଞସ୍ତ୍ଵଂ ସୁମନ୍ତ୍ରୀ ମହମୟସମୟଃ ସଂଶୟାସାରହନ୍ତା
ମନ୍ତା ଵିଶ୍ଵେଶ୍ଵରୀଣାଂ ପରପଶୁପତୟେଽନ୍ତେ ନମଃ ପାତୁ ନମ୍ରମ୍ ॥ ୬୨-୧୬॥
ୟୋଗୀ ଭୋଗୀ ଵିରାଗୀ ତ୍ଵମତୁଲଵିଭଵଃ ସମ୍ଭଵଃ ପଞ୍ଚଚୂଡୋ
ଵାଣୀ ଶେଷଃ ପ୍ରିୟେଶଃ ଶଶିଗ୍ରଥିତମୃଡାଶୋଭିତାଙ୍ଗୋ ହ୍ୟନଙ୍ଗଃ ।
କାମୋ ମାୟା ରମେଶଃ ପ୍ରଥମଦିନକରଶ୍ରେଣି ଶୋଭାଵଲିପ୍ତଃ
ସର୍ଵାଙ୍ଗଂ ୟଃ ପ୍ରପାୟାଦମଲକମଲଗଃ କ୍ରୋଧଗୋ ୟୋଽଵଲୋକମ୍ ॥ ୬୨-୧୭॥
ଏତଚ୍ଛ୍ରୀଶଙ୍କରସ୍ତୋତ୍ରଂ ୟଃ ପଠେନ୍ନିୟତଃ ଶୁଚିଃ ।
ସଂଵତ୍ସରାଦ୍ ଭଵେତ୍ ସିଦ୍ଧିଃ ସର୍ଵଜ୍ଞାନପ୍ରଦାୟିନୀ ॥ ୬୨-୧୮॥
ଶୁଚୌ ଵାପ୍ୟଶୁଚୌ ସ୍ତୌତି ଭକ୍ତ୍ୟା ୟଃ ସାଧକୋତ୍ତମଃ ।
ସ ସର୍ଵୟାତନାମୁକ୍ତୋ ୟୋଗୀ ଗ୍ରନ୍ଥିଵିଭେଦକଃ ॥ ୬୨-୧୯॥
ଅକସ୍ମାତ୍ ସିଦ୍ଧିମାପ୍ନୋତି ପ୍ରେମାନନ୍ଦସୁଭକ୍ତିଦାମ୍ ।
ଶତମଷ୍ଟୋତ୍ତରଂ ଚାସ୍ୟ ପୁରଶ୍ଚର୍ୟାଵିଧିଃ ସ୍ମୃତଃ ॥ ୬୨-୨୦॥
ନ ସ୍ନାନଂ ନ ଜପଃ କାର୍ୟଂ ନ ପୂଜାଦିଵିଧାନକମ୍ ।
କେଵଲଂ ସ୍ତଵପାଠେନାନାହତେ ସୁସ୍ଥିରୋ ଭଵେତ୍ ॥ ୬୨-୨୧॥
ଚିରଞ୍ଜୀଵୀ ଵୀତରାଗୋ ଵୀତସଂସାରଭାଵନଃ ।
ପଠିତ୍ଵା ଧାରୟିତ୍ଵା ଚ ୟୋଗଭ୍ରଷ୍ଟୋ ନ ସମ୍ଭଵେତ୍ ।
ଅନାୟାସେ ୟୋଗସିଦ୍ଧିଂ ପ୍ରାପ୍ନୋତି ଵିପୁଲାଂ ଶ୍ରିୟମ୍ ॥ ୬୨-୨୨॥
ଇତି ଶ୍ରୀରୁଦ୍ରୟାମଲେ ଉତ୍ତରତନ୍ତ୍ରେ ମହାତନ୍ତ୍ରୋଦ୍ଦୀପନେ ସିଦ୍ଧମନ୍ତ୍ରପ୍ରକରଣେ
ଷଟ୍ଚକ୍ରପ୍ରକାଶେ ଭୈରଵୀଭୈରଵସଂଵାଦେ ଈଶ୍ଵରସ୍ତୋତ୍ରଵିନ୍ୟାସୋ ନାମ
ଦ୍ଵିଷଷ୍ଟିତମଃ ପଟଲଃ ॥ ୬୨॥
Comments
Post a Comment