ଶ୍ରୀନୀଳ ସରସ୍ୱତୀସ୍ତୋତ୍ରମ୍

 🟢 ଶ୍ରୀନୀଳ ସରସ୍ୱତୀସ୍ତୋତ୍ରମ୍ 🟢

     ଶ୍ରୀ ଗଣେଶାୟ ନମଃ ॥

ଘୋରରୂପେ ମହାରାବେ ସର୍ବଶତ୍ରୁବଶଙ୍କରୀ । 

ଭକ୍ତେଭ୍ୟୋ ବରଦେ ଦେବି ତ୍ରାହି ମାଂ ଶରଣାଗତମ୍ ॥ ୧॥

ସୁରାଽସୁରାର୍ଚିତେ ଦେବି ସିଦ୍ଧଗନ୍ଧର୍ୱସେବିତେ ।

ଜାଡ୍ୟପାପହରେ ଦେବି ତ୍ରାହି ମାଂ ଶରଣାଗତମ୍ ॥ ୨॥

ଜଟାଜୂଟସମାୟୁକ୍ତେ ଲୋଲଜିହ୍ୱାନୁକାରିଣୀ ।

ଦ୍ରୁତବୁଦ୍ଧିକରେ ଦେବି ତ୍ରାହି ମାଂ ଶରଣାଗତମ୍ ॥ ୩॥

ସୌମ୍ୟରୂପେ ଘୋରରୂପେ ଚଣ୍ଡରୂପେ ନମୋଽସ୍ତୁ ତେ । 

ଦୃଷ୍ଟିରୂପେ ନମସ୍ତୁଭ୍ୟଂ ତ୍ରାହି ମାଂ ଶରଣାଗତମ୍ ॥ ୪॥ 

ଜଡାନାଂ ଜଡତାଂ ହମ୍ସି ଭକ୍ତାନାଂ ଭକ୍ତବତ୍ସଲେ । 

ମୂଢତାଂ ହର ମେ ଦେବି ତ୍ରାହି ମାଂ ଶରଣାଗତମ୍ ॥ ୫॥

ହ୍ରୂଂ ହ୍ରୂଂକାରମୟେ ଦେବି ବଲିହୋମପ୍ରିୟେ ନମଃ ।

ଉଗ୍ରତାରେ ନମସ୍ତୁଭ୍ୟଂ ତ୍ରାହି ମାଂ ଶରଣାଗତମ୍ ॥ ୬॥

ବୁଦ୍ଧିଂ ଦେହି ଯଶୋ ଦେହି କବିତ୍ୱଂ ଦେହି ଦେହି ମେ ।

କୁବୁଦ୍ଧିଂ ହର ମେ ଦେବି ତ୍ରାହି ମାଂ ଶରଣାଗତମ୍ ॥ ୭॥ 

ଇନ୍ଦ୍ରାଦିଦେବ ସଦ୍ୱୃନ୍ଦବନ୍ଦିତେ କରୁଣାମୟୀ । 

ତାରେ ତାରାଧିନାଥାସ୍ୟେ ତ୍ରାହି ମାଂ ଶରଣାଗତମ୍ ॥ ୮॥

     ॥ ଅଥ ଫଲଶ୍ରୁତିଃ ॥

ଅଷ୍ଟମ୍ୟାଂ ଚ ଚତୁର୍ଦଶ୍ୟାଂ ନବମ୍ୟାଂ ଯଃ ପଠେନ୍ନରଃ ।

ଷଣ୍ମାସୈଃ ସିଦ୍ଧିମାପ୍ନୋତି ନାଽତ୍ର କାର୍ୟା ବିଚାରଣା ॥ ୧॥

ମୋକ୍ଷାର୍ଥୀ ଲଭତେ ମୋକ୍ଷଂ ଧନାର୍ଥୀ ଧନମାପ୍ନୁୟାତ୍ ।

ବିଦ୍ୟାର୍ଥୀ ଲଭତେ ବିଦ୍ୟାଂ ତର୍କବ୍ୟାକରଣାଦିକାମ୍ ॥ ୨॥

ଇଦଂ ସ୍ତୋତ୍ରଂ ପଠେଦ୍ୟସ୍ତୁ ସତତଂ ଶ୍ରଦ୍ଧୟାନ୍ୱିତଃ । 

ତସ୍ୟ ଶତ୍ରୁଃ କ୍ଷୟଂ ଯାତି ମହାପ୍ରଜ୍ଞା ଚ ଜାୟତେ ॥ ୩॥

ପୀଡାୟାଂ ବାପି ସଙ୍ଗ୍ରାମେ ଜପ୍ୟେ ଦାନେ ତଥା ଭୟେ ।

ଯ ଇଦଂ ପଠତି ସ୍ତୋତ୍ରଂ ଶୁଭଂ ତସ୍ୟ ନ ସଂଶୟଃ ॥ ୪॥

ସ୍ତୋତ୍ରେଣାନେନ ଦେବେଶି ସ୍ତୁତ୍ୱା ଦେବୀଂ ସୁରେଶ୍ୱରୀମ୍ ।

ସର୍ୱକାମମବାପ୍ନୋତି ସର୍ୱବିଦ୍ୟାନିଧିର୍ଭବେତ୍ ॥ ୫॥ 

ଇତି ତେ କଥିତଂ ଦିବ୍ୟଂ ସ୍ତୋତ୍ରଂ ସାରସ୍ୱତପ୍ରଦମ୍ ।

ଅସ୍ମାତ୍ପରତରଂ ନାସ୍ତି ସ୍ତୋତ୍ରଂ ତନ୍ତ୍ରେ ମହେଶ୍ୱରୀ ॥ ୬॥

  ॥ ଇତି ବୃହନ୍ନିଲତନ୍ତ୍ରେ ଦ୍ୱିତୀୟପଟଳେ ତାରିଣୀନୀଲସରସ୍ୱତୀସ୍ତୋତ୍ରଂ ସମାପ୍ତମ୍ ॥