ଶ୍ରୀମହାଲକ୍ଷ୍ମୀସ୍ତୋତ୍ରମ୍ ( ଵିଷ୍ଣୁପୁରାଣାନ୍ତର୍ଗତମ୍ )
ଶ୍ରୀମହାଲକ୍ଷ୍ମୀସ୍ତୋତ୍ରମ୍
( ଵିଷ୍ଣୁପୁରାଣାନ୍ତର୍ଗତମ୍ )
ଶ୍ରୀଗଣେଶାୟ ନମଃ ।
ଶ୍ରୀପରାଶର ଉଵାଚ
ସିଂହାସନଗତଃ ଶକ୍ରସ୍ସମ୍ପ୍ରାପ୍ୟ ତ୍ରିଦିଵଂ ପୁନଃ ।
ଦେଵରାଜ୍ୟେ ସ୍ଥିତୋ ଦେଵୀଂ ତୁଷ୍ଟାଵାବ୍ଜକରାଂ ତତଃ ॥ ୧॥
ଇନ୍ଦ୍ର ଉଵାଚ
ନମସ୍ୟେ ସର୍ଵଲୋକାନାଂ ଜନନୀମବ୍ଜସମ୍ଭଵାମ୍ । var ସର୍ଵଭୂତାନାଂ
ଶ୍ରିୟମୁନ୍ନିଦ୍ରପଦ୍ମାକ୍ଷୀଂ ଵିଷ୍ଣୁଵକ୍ଷଃସ୍ଥଲସ୍ଥିତାମ୍ ॥ ୨॥
ପଦ୍ମାଲୟାଂ ପଦ୍ମକରାଂ ପଦ୍ମପତ୍ରନିଭେକ୍ଷଣାମ୍
ଵନ୍ଦେ ପଦ୍ମମୁଖୀଂ ଦେଵୀଂ ପଦ୍ମନାଭପ୍ରିୟାମହମ୍ ॥ ୩॥
ତ୍ଵଂ ସିଦ୍ଧିସ୍ତ୍ଵଂ ସ୍ଵଧା ସ୍ଵାହା ସୁଧା ତ୍ଵଂ ଲୋକପାଵନୀ ।
ସନ୍ଧ୍ୟା ରାତ୍ରିଃ ପ୍ରଭା ଭୂତିର୍ମେଧା ଶ୍ରଦ୍ଧା ସରସ୍ଵତୀ ॥ ୪॥
ୟଜ୍ଞଵିଦ୍ୟା ମହାଵିଦ୍ୟା ଗୁହ୍ୟଵିଦ୍ୟା ଚ ଶୋଭନେ ।
ଆତ୍ମଵିଦ୍ୟା ଚ ଦେଵି ତ୍ଵଂ ଵିମୁକ୍ତିଫଲଦାୟିନୀ ॥ ୫॥
ଆନ୍ଵୀକ୍ଷିକୀ ତ୍ରୟୀ ଵାର୍ତା ଦଣ୍ଡନୀତିସ୍ତ୍ଵମେଵ ଚ ।
ସୌମ୍ୟାସୌମ୍ୟୈର୍ଜଗଦ୍ରୂପୈସ୍ତ୍ଵୟୈତଦ୍ଦେଵି ପୂରିତମ୍ ॥ ୬॥
କା ତ୍ଵନ୍ୟା ତ୍ଵାମୃତେ ଦେଵି ସର୍ଵୟଜ୍ଞମୟଂ ଵପୁଃ ।
ଅଧ୍ୟାସ୍ତେ ଦେଵଦେଵସ୍ୟ ୟୋଗଚିନ୍ତ୍ୟଂ ଗଦାଭୃତଃ ॥ ୭॥
ତ୍ଵୟା ଦେଵି ପରିତ୍ୟକ୍ତଂ ସକଲଂ ଭୁଵନତ୍ରୟମ୍ ।
ଵିନଷ୍ଟପ୍ରାୟମଭଵତ୍ତ୍ଵୟେଦାନୀଂ ସମେଧିତମ୍ ॥ ୮॥
ଦାରାଃ ପୁତ୍ରାସ୍ତଥାଽଽଗାରସୁହୃଦ୍ଧାନ୍ୟଧନାଦିକମ୍ ।
ଭଵତ୍ୟେତନ୍ମହାଭାଗେ ନିତ୍ୟଂ ତ୍ଵଦ୍ଵୀକ୍ଷଣାନ୍ନୃଣାମ୍ ॥ ୯॥
ଶରୀରାରୋଗ୍ୟମୈଶ୍ଵର୍ୟମରିପକ୍ଷକ୍ଷୟଃ ସୁଖମ୍ ।
ଦେଵି ତ୍ଵଦ୍ଦୃଷ୍ଟିଦୃଷ୍ଟାନାଂ ପୁରୁଷାଣାଂ ନ ଦୁର୍ଲଭମ୍ ॥ ୧୦॥
ତ୍ଵମମ୍ବା ସର୍ଵଭୂତାନାଂ ଦେଵଦେଵୋ ହରିଃ ପିତା । var ତ୍ଵଂ ମାତା ସର୍ଵଲୋକାନାଂ
ତ୍ଵୟୈତଦ୍ଵିଷ୍ଣୁନା ଚାମ୍ବ ଜଗଦ୍ଵ୍ୟାପ୍ତଂ ଚରାଚରମ୍ ॥ ୧୧॥
ମା ନଃ କୋଶସ୍ତଥା ଗୋଷ୍ଠଂ ମା ଗୃହଂ ମା ପରିଚ୍ଛଦମ୍ ।
ମା ଶରୀରଂ କଲତ୍ରଂ ଚ ତ୍ୟଜେଥାଃ ସର୍ଵପାଵନି ॥ ୧୨॥
ମା ପୁତ୍ରାନ୍ମା ସୁହୃଦ୍ଵର୍ଗାନ୍ମା ପଶୂନ୍ମା ଵିଭୂଷଣମ୍ ।
ତ୍ୟଜେଥା ମମ ଦେଵସ୍ୟ ଵିଷ୍ଣୋର୍ଵକ୍ଷଃସ୍ଥଲାଶ୍ରୟେ ॥ ୧୩॥
ସତ୍ତ୍ଵେନ ସତ୍ୟଶୌଚାଭ୍ୟାଂ ତଥା ଶୀଲାଦିଭିର୍ଗୁଣୈଃ ।
ତ୍ୟଜ୍ୟନ୍ତେ ତେ ନରାଃ ସଦ୍ୟଃ ସନ୍ତ୍ୟକ୍ତା ୟେ ତ୍ଵୟାଽମଲେ ॥ ୧୪॥
ତ୍ଵୟାଽଵଲୋକିତାଃ ସଦ୍ୟଃ ଶୀଲାଦ୍ୟୈରଖିଲୈର୍ଗୁଣୈଃ ।
କୁଲୈଶ୍ଵର୍ୟୈଶ୍ଚ ପୂଜ୍ୟନ୍ତେ ପୁରୁଷା ନିର୍ଗୁଣା ଅପି ॥ ୧୫॥
ସ ଶ୍ଲାଘ୍ୟଃ ସ ଗୁଣୀ ଧନ୍ୟଃ ସ କୁଲୀନଃ ସ ବୁଦ୍ଧିମାନ୍ ।
ସ ଶୂରଃ ସ ଚ ଵିକ୍ରାନ୍ତୋ ୟସ୍ତ୍ଵୟା ଦେଵି ଵୀକ୍ଷିତଃ ॥ ୧୬॥
ସଦ୍ୟୋ ଵୈଗୁଣ୍ୟମାୟାନ୍ତି ଶୀଲାଦ୍ୟାଃ ସକଲା ଗୁଣାଃ ।
ପରାଙ୍ଗମୁଖୀ ଜଗଦ୍ଧାତ୍ରୀ ୟସ୍ୟ ତ୍ଵଂ ଵିଷ୍ଣୁଵଲ୍ଲଭେ ॥ ୧୭॥
ନ ତେ ଵର୍ଣୟିତୁଂ ଶକ୍ତା ଗୁଣାଞ୍ଜିହ୍ଵାଽପି ଵେଧସଃ ।
ପ୍ରସୀଦ ଦେଵି ପଦ୍ମାକ୍ଷି ମାଽସ୍ମାଂସ୍ତ୍ୟାକ୍ଷୀଃ କଦାଚନ ॥ ୧୮॥
ଶ୍ରୀପରାଶର ଉଵାଚ
ଏଵଂ ଶ୍ରୀଃ ସଂସ୍ତୁତା ସମ୍ୟକ୍ ପ୍ରାହ ହୃଷ୍ଟା ଶତକ୍ରତୁମ୍ ।
ଶୃଣ୍ଵତାଂ ସର୍ଵଦେଵାନାଂ ସର୍ଵଭୂତସ୍ଥିତା ଦ୍ଵିଜ ॥ ୧୯॥
ଶ୍ରୀରୁଵାଚ
ପରିତୁଷ୍ଟାସ୍ମି ଦେଵେଶ ସ୍ତୋତ୍ରେଣାନେନ ତେ ହରେ ।
ଵରଂ ଵୃଣୀଷ୍ଵ ୟସ୍ତ୍ଵିଷ୍ଟୋ ଵରଦାଽହଂ ତଵାଗତା ॥ ୨୦॥
ଇନ୍ଦ୍ର ଉଵାଚ
ଵରଦା ୟଦିମେଦେଵି ଵରାର୍ହୋ ୟଦି ଵାଽପ୍ୟହମ୍ ।
ତ୍ରୈଲୋକ୍ୟଂ ନ ତ୍ଵୟା ତ୍ୟାଜ୍ୟମେଷ ମେଽସ୍ତୁ ଵରଃ ପରଃ ॥ ୨୧॥
ସ୍ତୋତ୍ରେଣ ୟସ୍ତଥୈତେନ ତ୍ଵାଂ ସ୍ତୋଷ୍ୟତ୍ୟବ୍ଧିସମ୍ଭଵେ ।
ସ ତ୍ଵୟା ନ ପରିତ୍ୟାଜ୍ୟୋ ଦ୍ଵିତୀୟୋଽସ୍ତୁ ଵରୋ ମମ ॥ ୨୨॥
ଶ୍ରୀରୁଵାଚ
ତ୍ରୈଲୋକ୍ୟଂ ତ୍ରିଦଶଶ୍ରେଷ୍ଠ ନ ସନ୍ତ୍ୟକ୍ଷ୍ୟାମି ଵାସଵ ।
ଦତ୍ତୋ ଵରୋ ମୟାଽୟଂ ତେ ସ୍ତୋତ୍ରାରାଧନତୁଷ୍ଟୟା ॥ ୨୩॥
ୟଶ୍ଚ ସାୟଂ ତଥା ପ୍ରାତଃ ସ୍ତୋତ୍ରେଣାନେନ ମାନଵଃ ।
ସ୍ତୋଷ୍ୟତେ ଚେନ୍ନ ତସ୍ୟାହଂ ଭଵିଷ୍ୟାମି ପରାଙ୍ଗ୍ମୁଖୀ ॥ ୨୪॥
ଶ୍ରୀପାରାଶର ଉଵାଚ
ଏଵଂ ଵରଂ ଦଦୌ ଦେଵୀ ଦେଵରାଜାୟ ଵୈ ପୁରା ।
ମୈତ୍ରେୟ ଶ୍ରୀର୍ମହାଭାଗା ସ୍ତୋତ୍ରାରାଧନତୋଷିତା ॥ ୨୫॥
ଭୃଗୋଃ ଖ୍ୟାତ୍ୟାଂ ସମୁତ୍ପନ୍ନା ଶ୍ରୀଃ ପୂର୍ଵମୁଦଧେଃ ପୁନଃ ।
ଦେଵଦାନଵୟତ୍ନେନ ପ୍ରସୂତାଽମୃତମନ୍ଥନେ ॥ ୨୬॥
ଏଵଂ ୟଦା ଜଗତ୍ସ୍ଵାମୀ ଦେଵରାଜୋ ଜନାର୍ଦନଃ ।
ଅଵତାରଃ କରୋତ୍ୟେଷା ତଦା ଶ୍ରୀସ୍ତତ୍ସହାୟିନୀ ॥ ୨୭॥
ପୁନଶ୍ଚପଦ୍ମା ସମ୍ଭୂତା ୟଦାଽଦିତ୍ୟୋଽଭଵଦ୍ଧରିଃ ।
ୟଦା ଚ ଭାର୍ଗଵୋ ରାମସ୍ତଦାଭୂଦ୍ଧରଣୀତ୍ଵିୟମ୍ ॥ ୨୮॥
ରାଘଵତ୍ଵେଽଭଵତ୍ସୀତା ରୁକ୍ମିଣୀ କୃଷ୍ଣଜନ୍ମନି ।
ଅନ୍ୟେଷୁ ଚାଵତାରେଷୁ ଵିଷ୍ଣୋରେଖାଽନପାୟିନୀ ॥ ୨୯॥
ଦେଵତ୍ଵେ ଦେଵଦେହେୟଂ ମାନୁଷତ୍ଵେ ଚ ମାନୁଷୀ ।
ଵିଷ୍ଣୋର୍ଦେହାନୁରୁପାଂ ଵୈ କରୋତ୍ୟେଷାଽଽତ୍ମନସ୍ତନୁମ୍ ॥ ୩୦॥
ୟଶ୍ଚୈତଶୃଣୁୟାଜ୍ଜନ୍ମ ଲକ୍ଷ୍ମ୍ୟା ୟଶ୍ଚ ପଠେନ୍ନରଃ ।
ଶ୍ରିୟୋ ନ ଵିଚ୍ୟୁତିସ୍ତସ୍ୟ ଗୃହେ ୟାଵତ୍କୁଲତ୍ରୟମ୍ ॥ ୩୧॥
ପଠ୍ୟତେ ୟେଷୁ ଚୈଵର୍ଷେ ଗୃହେଷୁ ଶ୍ରୀସ୍ତଵଂ ମୁନେ ।
ଅଲକ୍ଷ୍ମୀଃ କଲହାଧାରା ନ ତେଷ୍ଵାସ୍ତେ କଦାଚନ ॥ ୩୨॥
ଏତତ୍ତେ କଥିତଂ ବ୍ରହ୍ମନ୍ୟନ୍ମାଂ ତ୍ଵଂ ପରିପୃଚ୍ଛସି ।
କ୍ଷୀରାବ୍ଧୌ ଶ୍ରୀର୍ୟଥା ଜାତା ପୂର୍ଵଂ ଭୃଗୁସୁତା ସତୀ ॥ ୩୩॥
ଇତି ସକଲଵିଭୂତ୍ୟଵାପ୍ତିହେତୁଃ ସ୍ତୁତିରିୟମିନ୍ଦ୍ରମୁଖୋଦ୍ଗତା ହି ଲକ୍ଷ୍ମ୍ୟାଃ ।
ଅନୁଦିନମିହ ପଠ୍ୟତେ ନୃଭିର୍ୟୈର୍ଵସତି ନ ତେଷୁ କଦାଚିଦପ୍ୟଲକ୍ଷ୍ମୀଃ ॥ ୩୪॥
॥ ଇତି ଶ୍ରୀଵିଷ୍ଣୁପୁରାଣେ ମହାଲକ୍ଷ୍ମୀ ସ୍ତୋତ୍ରଂ ସମ୍ପୂର୍ଣମ୍ ॥
Comments
Post a Comment