ଶ୍ରୀଧନଲକ୍ଷ୍ମୀସ୍ତୋତ୍ରମ୍
🔴 ଶ୍ରୀଧନଲକ୍ଷ୍ମୀସ୍ତୋତ୍ରମ୍ 🔴
ଶ୍ରୀଧନଦା ଉଵାଚ-
ଦେଵୀ ଦେଵମୁପାଗମ୍ୟ ନୀଲକଣ୍ଠଂ ମମ ପ୍ରିୟମ୍ ।
କୃପୟା ପାର୍ଵତୀ ପ୍ରାହ ଶଙ୍କରଂ କରୁଣାକରମ୍ ॥ ୧॥
ଶ୍ରୀଦେଵ୍ୟୁଵାଚ-
ବ୍ରୂହି ଵଲ୍ଲଭ ସାଧୂନାଂ ଦରିଦ୍ରାଣାଂ କୁଟୁମ୍ବିନାମ୍ ।
ଦରିଦ୍ର-ଦଲନୋପାୟମଞ୍ଜସୈଵ ଧନପ୍ରଦମ୍ ॥ ୨॥
ଶ୍ରୀଶିଵ ଉଵାଚ-
ପୂଜୟନ୍ ପାର୍ଵତୀଵାକ୍ୟମିଦମାହ ମହେଶ୍ଵରଃ ।
ଉଚିତଂ ଜଗଦମ୍ବାସି ତଵ ଭୂତାନୁକମ୍ପୟା ॥ ୩॥
ସସୀତଂ ସାନୁଜଂ ରାମଂ ସାଞ୍ଜନେୟଂ ସହାନୁଗମ୍ ।
ପ୍ରଣମ୍ୟ ପରମାନନ୍ଦଂ ଵକ୍ଷ୍ୟେଽହଂ ସ୍ତୋତ୍ରମୁତ୍ତମମ୍ ॥ ୪॥
ଧନଦଂ ଶ୍ରଦ୍ଦଧାନାନାଂ ସଦ୍ୟଃ ସୁଲଭକାରକମ୍ ।
ୟୋଗକ୍ଷେମକରଂ ସତ୍ୟଂ ସତ୍ୟମେଵ ଵଚୋ ମମ ॥ ୫॥
ପଠନ୍ତଃ ପାଠୟନ୍ତୋଽପି ବ୍ରାହ୍ମଣୈରାସ୍ତିକୋତ୍ତମୈଃ ।
ଧନଲାଭୋ ଭଵେଦାଶୁ ନାଶମେତି ଦରିଦ୍ରତା ॥ ୬॥
ଭୂଭଵାଂଶଭଵାଂ ଭୂତ୍ୟୈ ଭକ୍ତିକଲ୍ପଲତାଂ ଶୁଭାମ୍ ।
ପ୍ରାର୍ଥୟେତ୍ତାଂ ୟଥାକାମଂ କାମଧେନୁସ୍ଵରୂପିଣୀମ୍ ॥ ୭॥
ଧର୍ମଦେ ଧନଦେ ଦେଵି ଦାନଶୀଲେ ଦୟାକରେ ।
ତ୍ଵଂ ପ୍ରସୀଦ ମହେଶାନି! ୟଦର୍ଥଂ ପ୍ରାର୍ଥୟାମ୍ୟହମ୍ ॥ ୮॥
ଧରାମରପ୍ରିୟେ ପୁଣ୍ୟେ ଧନ୍ୟେ ଧନଦପୂଜିତେ ।
ସୁଧନଂ ଧାର୍ମିକଂ ଦେହି ୟଜମାନାୟ ସତ୍ଵରମ୍ ॥ ୯॥ var ୟଜନାୟ ସୁସତ୍ଵରମ୍
ରମ୍ୟେ ରୁଦ୍ରପ୍ରିୟେ ରୂପେ ରାମରୂପେ ରତିପ୍ରିୟେ ।
ଶିଖୀସଖମନୋମୂର୍ତ୍ତେ ପ୍ରସୀଦ ପ୍ରଣତେ ମୟି ॥ ୧୦॥ var ଶଶିପ୍ରଭମନୋମୂର୍ତେ
ଆରକ୍ତ-ଚରଣାମ୍ଭୋଜେ ସିଦ୍ଧି-ସର୍ଵାର୍ଥଦାୟିକେ । var ସିଦ୍ଧସର୍ଵାଙ୍ଗଭୂଷିତେ
ଦିଵ୍ୟାମ୍ବରଧରେ ଦିଵ୍ୟେ ଦିଵ୍ୟମାଲ୍ୟୋପଶୋଭିତେ ॥ ୧୧॥
ସମସ୍ତଗୁଣସମ୍ପନ୍ନେ ସର୍ଵଲକ୍ଷଣଲକ୍ଷିତେ ।
(ଅଧିକପାଠ. ଜାତରୂପମଣୀନ୍ଦ୍ଵାଦି-ଭୂଷିତେ ଭୂମିଭୂଷିତେ ।)
ଶରଚ୍ଚନ୍ଦ୍ରମୁଖେ ନୀଲେ ନୀଲ-ନୀରଜ-ଲୋଚନେ ॥ ୧୨॥
ଚଞ୍ଚରୀକଚମୂ-ଚାରୁ-ଶ୍ରୀହାର-କୁଟିଲାଲକେ ।
ମତ୍ତେ ଭଗଵତି ମାତଃ କଲକଣ୍ଠରଵାମୃତେ ॥ ୧୩॥ var ମୁଖାମୃତେ
ହାସାଵଲୋକନୈର୍ଦିଵ୍ୟୈର୍ଭକ୍ତଚିନ୍ତାପହାରିକେ ।
ରୂପ-ଲାଵଣ୍ୟ-ତାରୂଣ୍ୟ-କାରୂଣ୍ୟ-ଗୁଣଭାଜନେ ॥ ୧୪॥
କ୍ଵଣତ୍କଙ୍କଣମଞ୍ଜୀରେ ଲସଲ୍ଲୀଲାକରାମ୍ବୁଜେ ।
ରୁଦ୍ରପ୍ରକାଶିତେ ତତ୍ତ୍ଵେ ଧର୍ମାଧାରେ ଧରାଲୟେ ॥ ୧୫॥
ପ୍ରୟଚ୍ଛ ୟଜମାନାୟ ଧନଂ ଧର୍ମୈକସାଧନମ୍ ।
ମାତସ୍ତ୍ଵଂ ମେଽଵିଲମ୍ବେନ ଦିଶସ୍ଵ ଜଗଦମ୍ବିକେ ॥ ୧୬॥ var ମାତର୍ମେ ମାଵି
କୃପୟା କରୁଣାଗାରେ ପ୍ରାର୍ଥିତଂ କୁରୁ ମେ ଶୁଭେ ।
ଵସୁଧେ ଵସୁଧାରୂପେ ଵସୁ-ଵାସଵ-ଵନ୍ଦିତେ ॥ ୧୭॥
ଧନଦେ ୟଜମାନାୟ ଵରଦେ ଵରଦା ଭଵ । var ୟଜନାୟୈଵ
ବ୍ରହ୍ମଣ୍ୟୈର୍ବ୍ରାହ୍ମଣୈଃ ପୂଜ୍ୟେ ପାର୍ଵତୀଶିଵଶଙ୍କରେ ॥ ୧୮॥ var ବ୍ରହ୍ମଣ୍ୟେ ବ୍ରାହ୍ମଣେ
ସ୍ତୋତ୍ରଂ ଦରିଦ୍ରତାଵ୍ୟାଧିଶମନଂ ସୁଧନପ୍ରଦମ୍ ।
ଶ୍ରୀକରେ ଶଙ୍କରେ ଶ୍ରୀଦେ ପ୍ରସୀଦ ମୟି କିଙ୍କରେ ॥ ୧୯॥
ପାର୍ଵତୀଶପ୍ରସାଦେନ ସୁରେଶ-କିଙ୍କରେରିତମ୍ ।
ଶ୍ରଦ୍ଧୟା ୟେ ପଠିଷ୍ୟନ୍ତି ପାଠୟିଷ୍ୟନ୍ତି ଭକ୍ତିତଃ ॥ ୨୦॥
ସହସ୍ରମୟୁତଂ ଲକ୍ଷଂ ଧନଲାଭୋ ଭଵେଦ୍ ଧ୍ରୁଵମ୍ ।
ଧନଦାୟ ନମସ୍ତୁଭ୍ୟଂ ନିଧିପଦ୍ମାଧିପାୟ ଚ ।
ଭଵନ୍ତୁ ତ୍ଵତ୍ପ୍ରସାଦାନ୍ମେ ଧନ-ଧାନ୍ୟାଦିସମ୍ପଦଃ ॥ ୨୧॥
॥ ଇତି ଶ୍ରୀଧନଲକ୍ଷ୍ମୀସ୍ତୋତ୍ରଂ ସମ୍ପୂର୍ଣମ୍ ॥
Comments
Post a Comment